www.kitabxana.net
– Milli Virtual Kitabxana
51
Razılaşdı:
- Hə, düz deyirsən, bu, başağrıdan məsələdir... Əvvəlcə oddan danışım. Qonşu
tayfalar odu almaq üçün bu tayfaya qalın, geniş meşələr, çaylar bəxş edirdilər,
kənizlər, qullar bağışlayırdılar. Odları sönəndə yenə də onların yanına gəlirdilər.
Çünki od yandırmağın və onu qorumağın sirrini bircə bu tayfa bilirdi.
Bir gün bədbəxtlik baş verdi. Tayfanın müqəddəs sümükləri oğurlandı. Onu qonşu
tayfalardan kimsə oğurlamışdı. Və onu tapmaq lazımıydı. Çünki sümüklərin
oğurlanması, bar-bərəkətin, dözümlülüyün, gücün-qüvvətin itirilməsi demək idi.
Müqəddəs itkiləri tapmasaydılar, tayfaya elə bir bədbəxtlik üz verərdi ki, onun
altından çıxmaq olmazdı. Kişilər gücsüz, qadınlar sonsuz olar, düzənlər, meşələr
yanıb külə dönər, çaylar quruyar, bulaqlar susuz qalardı. Tədbir tökmək lazımıydı.
Od tayfasının başçısı Ərbilən üç gün, üç gecə fikirləşdi, mərədən bayıra çıxmadı,
oğul-uşaq, qız-gəlin, arvad üzü görmədi. Üç günün tamamında dan üzü mərədən
çıxdı, Böyük palıd ağacının dibinə gəldi. Böyük tonqal qalandı, daş təbillər işə
düşdü, Səsyayan adamları harayladı. Şirbilək, Qurdürək gəldi, onların dalınca
Yelötən, Qurdgüdən özünü yetirdi. Bu xəbəri eşidənlər sağdan-soldan, dağdan-
meşədən tökülüşüb gəldilər. Hamı böyük ocağın başında cəm oldu.
Gün çırtlayıb, göy üzünün bağrını qana döndərəndə Ərbilən oturduğu yerdən ağır-
ağır ayağa qalxdı, üzünü tayfanın seçilmişlərinə tutub hüznlü xəbəri çatdırdı:
- Çox işlədik, çox yedik, çox gəzdik, çox bildik, amma ruhlarımızı qoruya
bilmədik. Arxayınlaşdıq, o qədər rahat olduq ki, biganələşdik, yadırğadıq, ehtiyat
əldən getdi. Yağılar ruhlarımızı oğurladılar. Ruhlarsız biz heç nəyik. Onları
hökmən tapmalıyıq, tapmasaq gərək buralardan çıxıb gedək, özümüzə təzə məkan
seçək,- dedi.
Şirbilək:
- Mən gedərəm, sümükləri onların əlindən dartıb alaram,-deyə nərildədi.
Yelötən:
- Düşmənlərə mən hamıdan tez çataram, -deyə qürurla uğuldadı.
Qurdürək:
- Mən onların izinə tez düşərəm, -deyə uzun-uzun uladı.
Ər oğlu Qorçatan dinmədi. İri-qara gözlərini yer tanrısının üzünə dirədi, sifəti alov
kimi alışıb-yandı. Bu, o demək idi ki, mənə etibar eləsən, daha tez taparam.
www.kitabxana.net
– Milli Virtual Kitabxana
52
Ərənlər arasında dava-dalaş düşdü, hərə öz cəsurluğunu sübut eləmək üçün
dəridən-qabıqdan çıxdı. Ağız deyəni qulaq eşitmədi.
Ərbilən ayağa durdu, əlini yuxarı qaldırdı. Bu, sakit olmaq işarəsiydi. Hamı onun
qərarını gözlədi. Tayfa başçısının ürəyindən öz oğlunu sınağa çəkmək keçirdi,
çünki varis Qorçatan olmalıydı, amma bunun üçün nəyə qadir olduğunu
göstərməliydi. Bu qərar həmtayfalarına xoş getməzdi, araya nifaq düşərdi.
Ərbilən mübahisəyə son qoymaq üçün:
- Hərə bir tərəfə getsin, - dedi, - Gün çıxanda yüyürün, Ay çıxanda yeriyin, çayı
tutub gedin, düşmən çaydan kənar düşməz, sudan doymaz. Kim tez qayıtsa, ərliyi
ona verəcəm. Qoy, tayfa başçısı o olsun! Çünki mən pis başçı oldum, ruhlarımızı
qoruya bilmədim.
Ruhları qorumaq asan məsələ deyildi. Onu qoruyan dovşandan ayıq olmalı,
yarasadan iti görməli, qulağı itdən tez eşitməliydi. Bu dəfə qoca Yatmaz ocağa
xəyanət eləmişdi, uzun sürən xəstəlik onu əldən salmış, kimisə çağırmağa taqəti
qalmamış, yerindəcə keçinmiş və Göylər Qoruyucusunun, Səma Tanrısının yanına
getmişdi. Düşmənlər bunu gözləyirmişlər, sən demə, kahaya girmiş ruhlar uyuyan
sümükləri aparmışdılar...
Müqəddəs ruhların dalınca gedənlərin şərəfinə şadyanalıq düzənləndi. Ocaq çatıldı,
Ay maralı, Gün ayısı kəsildi. Od tayfasının igidləri onların qanından içdilər, qara
tikələrindən odda bişirib yedilər, çoxillik şəhər şehindən içdilər ki, qollarına
qüvvət, beyinlərinə ağıl hakim olsun...
İmranbəyin şirin söhbətinin bu yerində arakəsmənin arxasından inilti səsi gəldi. O,
barmağını dodaqlarına dirəyib susmaq işarəsi verdi. Azıxantrop, deyəsən,
oyanmışdı, ya da qarabasmalar içindəydi, inildəyirdi. Nəfəsimizi içimizə salıb, bir
müddət dinməz dayandıq, arakəsmənin arxasındakı səs kəsəndən sonra İmranbəy
pıçıltı ilə dedi ki, onun yetirməsi bir azdan oyanacaq, yemək istəyəcək, qarnı
doyandan sonra fantaziyalarını işə salacaq. O, indi qədimdən yox, bu zamandan
danışır, radio söhbətləri hamı kimi onun da başını pozub, Amerika prezidentinin
andiçmə mərasimində dediyi nitqdən tutmuş, Əfqanıstan müharibəsinə qədər hər
şeyi əzbər bilir, hətta dünyanın tezliklə məhv olacağı, Axirət gününün gələcəyi
barədə proqnozlara da inanır.
- Meymunlar indi adamlardan da yaxşı proqnoz verir, -deyə yersiz bir söhbət
eləmək istədim. İmranbəy mənim bu sözlərimə əhəmiyyət vermədi və söhbətinə
davam elədi. O, çox şirin və bəlağətli danışırdı, sözlüyü xoruz səsi eşitməmiş
ifadələrlə zəngin idi, sanki kimsə, İmranbəyin qulağının dibində durub, dediklərini
www.kitabxana.net
– Milli Virtual Kitabxana
53
pıçıldayırdı, o isə bütün bunları mənə ötürürdü. Ekzellənt-mekzellənt, fayn-mayn
yaddan çıxmışdı. İmranbəy bunları deyirdi:
- Xülas, Şirbilək cənuba, Qurdürək şimala, Yelötən qərbə, Ər oğlu Qorçatan şərqə
getdi.
Qorçatan oddan isti, küləkdən yüngül, sudan duruydu. Sevən qəlbi, vuran qolu, iti
qaçışı vardı. Amma onu sevməyənlər, gözü götürməyənlər də az deyildi.
Bunlardan biri və ən fəndgiri Tülkügüdən, o birisi isə Qurdötürən idi. Onlar ayrı-
ayrılıqda Əroğlunun arxasınca getdilər. Ürəklərində gecədən qara niyyətləri vardı.
Görüm, uca tanrı onların niyyətlərini gözlərində qoysun! Necə ki qoydu da! - deyə
İmranbəy söhbətinin bu yerində arvadfason bir qarğış da elədi.
- Əclaflığa bax e. Həmişə özümüz özümüzə qənim olmuşuq, - deyə mən də onun
bu sözlərinə qəhmər çıxdım.
- Qorçatan qorxmaz və cəsur idi, ağacı köklü-köməcli dibindən çıxarırdı, dırnaqları
ilə qaya çapırdı, sinəsilə seli dayandırırdı, gözlərindən qığılcım yağırdı. O, tezliklə
düşmənin mətəsinə çatıb müqəddəs sümükləri ya zorla, ya da xoşla alıb geri
gətirərdi. Tülkügüdən bunu bilirdi, özü tayfa başçısı olmaq istəyirdi, Qurdötürəni
də aldatmışdı ki, ona vəzifə-filan lazım deyil, eləcə müqəddəs sümüklərin
qarovulunu çəksə bəsdi. Çünki müqəddəs sümüklərin qoruyucusu tayfa
başçısından sonra ikinci adam sayılırdı. Sümüklərə yaxın olduğundan onların
dilini-sirrini bilirdi, ruhları rəngindən, pıçıltılarını səsindən tanıyırdı. Ruhlar ona, o
da ruhlara etibar eləyirdi. Tayfa başçısı qərar verməzdən öncə onunla
məsləhətləşirdi. Müqəddəslərin qoruyucusu «hə» desə, qərar verilərdi, «yox» desə,
qırağa qoyulardı. Başçının sözçüsü qərarı oxuyandan sonra hamı gözünü
qoruyucuya dikərdi, o, baş barmağını qaldırsaydı, qərar keçərdi, aşağı endirsəydi,
yan ötərdi.
Ərbilən qərarını elan edəndə qoruyucu yoxuydu, o biri dünyada müqəddəslərin
ruhları qarşısında hesabat verirdi, ona görə də kimsə dinmədi, bu hökmə boyun
əydi. Hərə bir tərəfə üz tütdü.
Tülkügüdən düşərgədən ayrılandan bir ay günü sonra Böyük Kahanın yanında
dayandı, yatacağını orda saldı və Ər oğlu Qorçatanı gözləməyə qərar verdi.
Qurdötürən yerini Kahanın o biri üzündə saldı ki, Qorçatan qayıdanda duyuq
düşsün və hərəsi bir tərəfdən Ər oğluna hücum eləsinlər. Tülkügüdən bir fəndlə
onu kahaya salsın, Qurdötürən isə arxadan hücum eləsin. Qorçatanın işini
bitirəndən sonra gətirdiyi qəniməti alıb, Ərbilənə aparsınlar, igidliklərini sübut
eləsinlər.
Dostları ilə paylaş: |