www.kitabxana.net
– Milli Virtual Kitabxana
60
qurdunu alandan sonra yola düzəldi. Ləngimək olmazdı, onu qabaqlaya,
müqəddəslərin ruhunu tapa və ərliyi Qorçatanın əlindən ala bilərdilər. Bir az
getmişdi ki, nərilti səsinə dayandı. Bu, mağara şiriydi. O, Qorçatanın dağ kəlini
vurub öldürməsini görmüş, yad iyi uzaqdan almış və çölə çıxmışdı. İndi isə
mağaranın qarşısında dayanıb iri, qırmızı gözləriylə Qorçatanı izləyirdi. Ər oğlu
bilirdi ki, mağara şiri ondan əl çəkən deyil. Çünki onun ovlağına girib, ovunu
əlindən alıb. Mağara şiri olan yerdə, onun izni olmadan kim bu işi görə bilərdi ki, -
yalnız buralara bələd olmayan adam. Deməli, yad məxluq gəlmişdi və ona
meydan
oxuyurdu.
Qorçatan ehtiyatlana-ehtiyatlana, qayalara sığına-sığına gedirdi. Qarşıda iri bir
kaha vardı. Əroğlu həmin kahaya girdi, kahanın ağzını iri qaya parçasıyla örtdü.
Bura təhlükəsiziydi. Çoxdandı heç kim yaşamırdı. Əroğlu bu kimsəsizliyi içəridəki
havadan duydu. Görünür, bir vaxtlar burada yaşamış qonur ayı mağara şirinin
qorxusundan harasa çıxıb getmiş, ya da döyüşdə məğlub olmuşdu.
Mağara şiri dağ kəllərindən birinin dalına düşsəydi, Qorçatanı yadından çıxarardı,
amma, deyəsən, onun belə bir fikri yoxuydu. Görünür, Qorçatanın iri, qoca kəli
vurub öldürməsi mağara şirinə təsir eləmişdi. Bu, onun ərazisindəki ova göz
dikməyiylə də bağlı deyildi, mağara şirinə ən çox təsir edən özünün qıymadığı bir
kəlin öldürülməsiydi. Mağara şiriylə qoca dağ kəlini ortaq xatirələr birləşdirirdi.
Onlar bu ərazilərə birlikdə nəzarət edirdilər. Mağara şirinə ov lazım olanda qoca
dağ kəli bunu asanlıqla
eləyirdi, dəstəni onun qapısının ağzından keçirirdi, özü
getmək istəməyəndə isə ovu köhnə dostuna tərəf ötürürdü.
Mağara şiri haqqında Qorçatan çox eşitmişdi: indiyə kimi heç kim onu
yenməmişdi. Tayfanın çoxgörmüş qocaları bu azman heyvanın boz ayıdan iki dəfə
yekə olduğunu, onlara düşmən kəsildiyini, odu ilk əldə etdiklərinə görə gözü
götürmədiyini söyləyirdilər. Çünki od çıxandan mağara şiri ikiayaqlılara yaxın
düşə bilmirdi.
O, uzun-uzadı nərildəyəndən, dağı-daşı silkələyəndən, ətrafındakı ağacları
pəncəsilə vurub parçalayandan sonra bir müddət susdu və az keçmiş kahanın
qarşısında peyda oldu. Ondan nəmişlik və torpaq iyi gəlirdi. Görünür, çoxdandır ki,
heç nə ovlamamışdı və qocaydı. Qoca dağ kəlinin ona «xidməti» piylənmək və
tənbəlliklə nəticələnmişdi. Mağara
şiri iri, qırmızı gözlərilə kahanın qapısını
örtmüş qaya parçasının böyründən içəri baxdı, Qorçatan onun odlu nəfəsini hiss
elədi. Sonra pəncəsilə qayanı aşırmağa çalışdı. Qorçatan daş nizəni əlində hazır
tutmuşdu. Mağara şiri bir də həmlə eləsəydi, qaya parçasını aşıra
və içəri girə
biləcəkdi. Qorçatan bunu duydu və nizəsini mağara şirinin gözünə soxdu. Qəfil
www.kitabxana.net
– Milli Virtual Kitabxana
61
zərbədən və ağrıdan heyvan nərildəməyə başladı, kahanın qapısını bağlamış qaya
parçasını pəncəsilə parça-parça eləyib içəri soxuldu. O, qəzəbindən yeri-göyü
dağıdırdı, dırnaqları ilə lağım atırdı. Qorçatan küncə sıxıldı. İlk dəfəydi ki, qorxu
Əroğluna üstün gəlməyə başlayırdı. O, belə qəzəbli və bədheybət heyvan
görməmişdi. Amma qorxuyla düşmənə qalib gəlmək olmaz. Qorçatan üçün bu,
cəngəllik həqiqətinin əlifbasıydı. Od tayfasının güvənci özünü ələ aldı, mağara
şirini irəli buraxdı, meşələr sahibi Qorçatanın tuşuna çatanda əlindəki toppuzla
onun boynunun arxasından bir neçə dəfə vurdu. Toppuz
elə zərblə dəydi ki, köklü-
köhmərli palıda oxşar heyvanın boynunun sümükləri xıncım-xıncım oldu və o öz
ətalətilə bir az getdikdən sonra diz üstə çökdü, xırıldayaraq böyrü üstə aşdı.
Mağara şirinin qoca olması Qorçatanın dadına yetdi, çünki müqavimət göstərməyə
gücü yoxuydu.
Qorçatan iri gövdəli düşməninin başının üstündə durub bir müddət ona baxdı,
axırda mağara şirinin köpək dişlərini daşla vurub çıxardı, belindəki kətan
kəndirdən bir qıl çıxarıb ona düzdü və boynundan asdı. Bir
kənarda oturub dincini
aldı və özünə gələr-gəlməz kahadan çıxdı.
Əroğlu üç ulduz gecəsini arxada qoyduqdan sonra düzənliyə çıxdı. Burdan o tərəfə
susuz səhralar və kolluqlar uzanıb gedirdi. O, Günəşi tutub getdi. Ruhlar
qoruyucusu demişdi ki, hədəfə çatmaq üçün Böyük oda sarı getmək lazımdır.
Əroğlu dayanmadan qaçırdı, Günəşin istisi üz-gözünü qarsır, onun qaçışını
ləngidirdi. Susuzlamışdı. Ağzı qurumuşdu, dodaqları dodağına yapışırdı. Nəhayət,
qalın kolluğa çatdı. Bir azdan meşəyə girəcəkdi. Amma susuzluq onun gücünü
yeyirdi. Su içməsəydi, yad ruhlar bədəninə girər, içindəki işığı oğurlayıb özlərilə
aparar, yerinə qaranlığı hakim edərdilər.
Bir dəstə ceyran sürüsü yel kimi ötüb keçdi. Görünür, onları kimsə qovurdu. Bir
azdan iki pələng gördü. Ceyranları qovan onlarıydı, amma
ova çata bilmirdilər və
bir azdan qaça-qaça gözdən itdilər. Qorçatan lap yaxınlıqda nəm iyi duydu, burnu
ilə suyun havasını tutdu və həmin istiqamətə tərəf yüyürdü. Ona elə gəldi ki,
hardasa, lap yaxınlıqda su çeşməsi var. Burun havasına su çeşməsini tutub getdi.
Lakin onun çeşmə zənn elədiyi yerə hələ çox var idi. Nəhayət, Əroğlu istədiyini
tapa bildi, ancaq onun tapdığı su çeşməsi yox, iri dəmir ağacının altıydı. Ağacın
altı rütubətli və nəm idi. Qorçatan ağacın dibini çapacaqla qazdı, sonra daş nizəyə
keçdi, çala getdikcə nəmişlənirdi, suyla dolurdu. O, suyun durulmasını gözləmədi,
ağzını dirəyib fasiləylə çalaya dolan suyu içməyə başladı. Susuzluğunu yatırandan
sonra uzanıb yatdı və gecənin bir aləmi ilbizlərin və gecə dovşanlarının səsinə
oyandı. Kimsə böyük bir kolun dibini eşirdi və ona yaxınlaşırdı. Bu, kol
kərgədanıydı, qaranlıqda güclə seçilirdi. Qorçatan nizəsini əlində hazır tutdu,