37
etməkdir. Bu məqsədlə çox cəhətli sorğu tətbiq edilir ki, onlar aşağıdakılardan
ibarətdir.
1. Formal səviyyəli suallar şagirdlərin faktik biliklərinin yada salınmasına
xidmət edən, hafizəyə əsaslanan suallardır. Belə sualların cavabına adətən mətində
rast gəlinir. Əzbərçiliyə meyilli, zəif xarakterli və yalnız yüksək qiymət almaq
həvəsində olan şagirdlər formal sualları xoşlayır. Nəzərə almaq lazımdır ki, adətən
yaradıcı təfəkkürə malik olan istedadlı şagirdlər belə suallara qarşı etinasız olur.
Məsələn « Avstraliyanın təbii zonaları» mövzusunda « Savannalar materikin
hansı hissəsində yerləşir» sualının cavabına (şimal hissədə) dərslik mətinində rast
gəlmək mümkündür.
2. Çevirmə suallarının köməyi ilə şagird mövzunun təsvirini verir, məlumat
çatdırmağın fərqli olmasına çalışır, mütaliə zamanı rast gəldiyi informasiyaları
canlandırır. Məsələn eyni mövzu daxilində («Avstraliyanın təbii zonaları»)
«Materikin hansı hissəsində kölgəsi olmayan hündür ağaclar, bu ağacların
yarpaqları ilə özünün suya olan təlabatını ödəyən koala ayısı, başqa materiklərdə
rast gəlinməyən kisəli heyvanlar yaşayır?»Göründüyü kimi bu sualın cavabını
tapmaq üçün şagirdin idraki fəaliyyəti aktivləşməli, bir neçə variantda cavabları
araşdırmalıdır.
İnterpretasiya sualları əslində çevirmə suallarının daha mürəkkəb forması
olub, yeni ideyalar arasında qarşılıqlı əlaqə yaratmağa istiqamətlənmişdir.
Məntiqi düşüncənin ən yüksək səviyyəsinə əsaslanan interpretasiya suallarında
şagirdlər ideyaların mənalarını dərk edərək, onların uzlaşdırılmasına nail
olmalıdırlar .
Məsələn nümunə üçün seçilmiş mövzuda «sizcə nə üçün savannada hündür
ağacların (evkalipt nəzərdə tutulur) kölgəsi olmur?» və ya «Nə üçün Avstraliya
materikində mövcud olan kisəlilərə başqa materiklərdə rast gəlinmir» və s.
3. Tətbiq sualları şagirdlərə problemlərin həllində müstəqil tədqiq etmək
imkanı yaradır. İnformasiyaları ümumiləşdirmək, onun həyatı əhəmiyyətini dərk
edərək nəticələr çıxarmağı tələb edir. Məsələn «Avstraliyanın şimalında yağıntının
illik rejimində olan fərqlilik, ərazinin bitki və canlı aləminə necə təsir göstərir?» və
ya «Avstraliyanın Qondvana qurusandan çox uzaq keçmişdə (570 milyon il əvvəl)
ayrılması materikin təbiətində hansı xüsusiyyətləri yaratmışdır?»- sualına cavab
vermək üçün şagird müxtəlif mənbələrdən istifadə etməli, alternativ fikirlərə öz
münasibətini bildirməlidir.
4. Təhlil sualları məlumatın nə dərəcədə doğru olduğunu müəyyən etmək,
səbəb- nəticə əlaqələrinə əsasən tədqiqə yönəlir. Mövzunun ümumi başa
düşünülməsinə əsasən onun daha kiçik hissələrə ayrılmasını təmin edir.
5. Sintez sualları özünəməxsus formaların yaradılması, bilik və
bacarıqlardan istifadə etməklə problemə yaradıcı yanaşma üçün imkan yaradır.
Sintez sualları vasitəsi ilə şagirdlərdə alternativ fikirlər yaratmaq, məsələnin
həllinə tamamilə əks tərəfdən yanaşmaq mümkündür. Məsələn, təqdim etdiyimiz
dərs nümunəsində «Evkalipt ağacları Avstraliyanın cənubunda günəş şüalarının
daha aşağı bucaqda göründüyü ərazilərdə yayılmış olsaydı yenə də kölgəsi
olmazdımı?» Göründüyü kimi, sual şagirdə tamamilə gözlənilməz əks variantda
verilir.
38
6.Qiymətləndirici suallar Şagirdlərin qərara gəldiyi fikirlərin düzgün və
ya səhv olmasını müəyyən etmək, nəticə çıxarmasına yönəlmiş suallardır.
Qiymətləndirici suallar şagirdləri öyrəndikləri informasiyanın keyfiyyətinə görə
fərqləndirməyə məcbur edir. Onlar problemə aid irəli sürdükləri fikirləri
əsaslandırır, təcrübə və statistik rəqəmlərə əsasən onun doğru olub- olmadığını üzə
çıxarır. Qiymətləndirici suallara nümunə olaraq «Tropsferdə havanın
temperaturunun artması hansı dəyişikliyə səbəb olur?» probleminə şagird
münasibətini götürmək olar. Şagirdlər havanın temperaturunun artması ilə 1
kub.m havada ola biləcək su buxarının miqdarının artması fikrini əsaslandırmaq
üçün təcrübələr aparır. Və yaxud «Quru subtropik iqlim şəraitində becərilən
pambığın məhsuldarlığının tropiklərə nisbətən aşağı olmasını» subut etmək üçün
təkcə pambığın günəş istiliyinə tələbkar olması fikri ilə əsaslandırmaq kifayət
deyil. Şagirdlər müstəqil olaraq tədqiqat aparır, statistikanı araşdırır. 1 hektar
sahədən yığılan pambıq lifinin subtropik enliklərdə tropiklərə nisbətən çox aşağı
olduğunu ümumiləşdirir və bunun ölkədə bitkiçiliyin ekstensiv inkşafından asılı
olduğunu əsaslandırır.
Şaxələndirmə
Hər hansı mövzuya dair şagirdləri açıq və müstəqil düşüncəyə
istiqamətləndirən metoddur. Beyin həmləsinin qeyri -səlis xətt üzrə işləmə
vəziyyətidir. Şaxələndirmə əsasən fərdi, cütlər və kiçik qruplar formasında
aparılmalıdır. Mövzunun öyrənilməsindən əvvəl şagird təfəkkürünə təkan vermək
onu düşünməyə cəlb etmək, onlarda mövzuya dair maraq yaratmaq, digər fənnlər
və ya şagirdin dünyagörüşünün hüdudlarını üzə çıxarmaq, biliklər arasında əlaqə
yaratmaq və s fəaliyyətlərə xidmət edir. Şaxələndirmə metodunun köməyi ilə
şagird təfəkkürünü də inkişaf etdirmək mümkündür.
Şaxələndirmə tətbiq etmək üçün ilk növbədə aşağıdakılar tələb olunur:
- şaxələndirmə üçün uyğun gələn münasib mövzu seçilməldir.
- şagirdlərə şaxələndirmə prosesi aydın şəkildə təsvir edilməldir.
- mövzunu açmaq üçün onun daxilində ikinci dərəcəli mövzuları qrup
daxilində fərdlərə paylanması təmin edilməlidir
- iştirakçıların qrup daxilində hazırladığı şaxələndirmələri qrupda
birləşdirilməsinə nəzarət edilməlidir.
Şaxələndirmə prosesinin mərhələləri sadə və asan yadda qalır.
1. Mövzunun adı mərkəzdə (yazı müstəvisinin ortasında) yazılır.
2. Mövzu ilə əlaqəli fikirinizə düşən, ağıla gələn bütün sözlər mərkəz sözün
ətrafında yazılır.
3. Bir-biri ilə əlaqəli olan fikirlər arasında xətt çəkilərək birləşdirilir.
4. Bütün fikirlərin yazıya köçürülməsi və ideyalar axını üçün vaxt qoyulur. (5-
10 dəqiqə)
5. Şagirdlər mümkün qədər daha və çox fikirlər və əlaqəli ifadələr yazmağa
həvəsləndirilir (bu onların dünyagörüşünü, mövzuya dair biliklərinin səviyyəsini
göstərən meyardır).
Şaxələndirmə üçün coğrafiya fənninin son dərəcə geniş imkanları vardır.
Çünki coğrafi mövzuların əksəriyyəti şagirdlərin real həyatda gördüyü hadisə və
proseslərlə əlaqədardır.