281
demişlər: «Zanq zur», yəni «zəng susdu». Deyilənlərə görə, ölkə bu zamandan
Zəngəzur adlanmışdır.
Bəli, Tatevin zəngi çoxdan susmuşdur, lakin daşnakların indi həbsxanaya
çevirdikləri monastırın qaranlıq bucaqlarından inilti səsi kəsilməmişdir.
…Atlılar enişli, yoxuşlu dar cığırlarla gəlib meşəyə girdilər.
- Cənab sparapet, atı tez sürüb meşədən çıxmaq lazımdır…
Njde Nersesyanın üzünə tərs-tərs baxdı.
- Sən nə zamandan bəri belə qorxaq olmusan?
- Mən ehtiyat üçün deyirəm. Meşə bu saat qorxuludur…
Atlılar meşədən çıxdılar. Kəndə çatmağa az qalırdı.
- Mən camaata xəbər verim ki, sparapet ağanın qabağına çıxsınlar! – deyə
Samvel atını şallaqladı…
Dərin bir dərənin baş tərəfindən keçəndə Njde Nersesyandan soruşdu:
- Bu dərənin adını bilirsənmi?
- Xeyr.
- Buraya «Qız dərəsi» deyərlər. Belə rəvayət var ki, qədim zamanlarda bir
dəfə İran şahı Arazı keçib erməni torpağına basqın eləyir. Düşmən qoşunu bir çox
kəndi alır. Ermənilərdən bəziləri əsir düşür, bəziləri dağlara, meşələrə qaçır.
İranlılara əsir düşmüş gözəl bir erməni qızı özünü öldürmək istəyir, ancaq
qoymayırlar. Deyirlər ki, səni şahın hərəmxanasına aparacayıq. Onu İrana aparmaq
üçün iki əsgərin qabağına qatırlar. Bu dərənin kənarından keçəndə qız əsgərlərdən
birini uçuruma itələyir. Özü isə qaçmağa üz qoyur, lakin ikinci əsgərin oxu onu
kürəyindən yaralayır. Qız sürünə-sürünə dərənin kənarına gəlib çıxır, özünü
uçuruma tullayır. O vaxtdan dərənin Adı qalır «Qız dərəsi». – Njde geri çevrilib
Nersesyandan soruşdu: - Bunu nə üçün danışdığımı başa düşdünmü?
- Bəli, başa düşdüm ki, qədimdən qalma belə bir əfsanə var.
- Yox, rəis. Mən onu demək istəyirdim ki, bizim əsgərlərimiz də gərək o qız
kimi qeyrətli olsunlar. Düşmənə diri-diri təslim olmasınlar.
Onlar şəlalənin yanından ötüb keçəndə, Njde atı saxladı. Nersesyan da öz
atının başını çəkdi. Hər ikisi bir neçə dəqiqə sakit durduqdan sonra Nersesyan
dilləndi:
- Görünür ki, bu yerlər cənab sparapetin çox xoşuna gəlir… Meşə, şəlalə,
dağ-daş…
- O monastırı görürsənmi?
- Bəli, görürəm, necə ki?
- Mən ondan başqa heç nəyə baxmaq istəmirəm. O, qədim Syunik
hökumətindən mənim indiki Syunik hökumətimə yadigar qalmışdır. Onu tikən
ustanın adını bilmirəm. Ancaq mahir usta imiş. Sıldırım qayanın üstündə elə bir
əzəmətli monastır tikib. Fikirləşirəm ki, mənim düşmənlərimdən nə qədərini o
monastırdan aşağı, dərənin dibinə atdırsam ürəyim soyuyar…
- Keçən payızda Tatev monastırından nə qədər adam atdırdın?
- İravan həbsxanasından gətirilmiş altmışa qədər kommunist…
- Bu axşam da ikisini atdırarsan, ürəyin soyuyar.
- İki kommunist nədir? Məndə ilahi bir qüvvə olsaydı, bütün yer üzündəki
kommunistləri birdəfəlik məhv edərdim…
282
Hər ikisi atını tərpətdi.
Kəndin girəcəyində onları Samvel və kəndxuda qarşıladı.
Kəndxuda salam verib Njdenin qabağında ikiqat oldu.
- Sparapet ağa, bizə gedəcəyik! – deyə Njdenin atının cilovundan tutub
çəkməyə başladı.
Bütün kənd camaatının pişvaza çıxmamasından rəncidə olan Njde
kəndxudadan soruşdu:
- Kənddə səndən başqa başı papaqlı var? Yoxsa hamısı qırılıb, heç xəbərimiz
yoxdur?
Njdenin bu kinayəli sözlərlə nə demək istədiyini dərhal başa düşən kəndxuda
dilləndi:
- Adamlar çöldə-bayırda, işdədirlər. Sənin gələcəyindən xəbərləri yoxdur.
Səni qarşılamaq üçün hamının əvəzindən özüm gəlmişəm…
Monastırın pəncərəsiz, bacasız və qaranlıq bir məbədi… Hava kəsif, yerdən
nəm iyi gəlir. Vaxtı ilə burada mömin bəndələr niyyət edib çoxlu şam
yandırmışlar, keşişin qübbələrdə əks-səda verən duasına, mövzəsinə qulaq
asmışlar. Həyat mübarizəsindən, dünya zövqündən əl çəkib tərki-dünya olmuş
neçə-neçə rahib ömrünü burda ibadətlə başa vermişdir…
Vahanla Şahmərdan məbədin bir bucağında, soyuq sal daşların üstündə
uzanmışdılar. Neçə gün idi ki, işıqlı dünya ilə əlaqələri tamam kəsilmişdi. Sağır
daş-divarlardan, başları üzərində ucalan tağbənddən başqa heç nə görmürdülər,
qollarındakı zəncirlərin səsindən başqa heç bir səs eşitmirdilər.
Düşdüyü təhlükədən xilas olmaq üçün heç bir imkanı olmayan insanın
yeganə təsəllisi fikir-xəyaldır… Vahanla Şahmərdan da şirin xəyallar içində idilər.
Onlar bir an da olsun ölüm haqqında düşünmür, bu qaranlıq zindandan azad olub
yenə də öz əməlləri uğrunda çarpışacaqlarına ümid edirdilər.
Gözünü qaranlıq bir nöqtəyə zilləmiş Şahmərdanın xəyalına mübariz
yoldaşları və gündə neçə dəfə xatırladığı arvadı gəldi. Elə bil, Növrəstə ona
deyirdi: «…Bibioğlu, dedim axı, ehtiyatlı ol… İndi özünü də bədbəxt elədin, məni
də». Şahmərdan köksünü ötürdü və Növrəstə ilə qabaq-qarşı durub danışırmış
kimi, ucadan dedi:
- Yox, əzizim, biz bədbəxt olmayacayıq! Səbirli və möhkəm ol!
Vahan da zəncirini səslədə-səslədə durub oturdu.
- Yanlarımı daş əzdi, qollarımı zəncir kəsdi…
- Görəsən bizi burda çox saxlayacaqlar?
- Onu kim bilər…
- Kaş, bizimkilərin xəbəri olaydı, bizi azad eləmək üçün bir tədbir
götürəydilər…
- Bizi öldürməsələr, azad olmağımız qaldı Qızıl Ordunun hücumuna. Mən
onu arzu edirəm ki, ordumuz tezliklə hücuma keçsin…
- Bu xarabanın bir deşiyi, bacası da yoxdur ki, təzə hava alasan. Nəfəsim
təngişir…
- Sənin nəfəsin təngişir, mən də acam. Gözlərim qaralır, başım fırlanır.
283
Bayırdan tappıltı səsi gəldi. Məbədin ensiz və alçaq qapısı açıldı. Əvvəlcə
əlində fonar olan həbsxana rəisi, sonra bir əsgər içəri girdi. Vahan, Şahmərdan
yerlərindən tərpənmədilər. Həbsxana rəisi fonarın işığını gah Vahanın, gah
Şahmərdanın üzünə salıb dedi:
- Qalxın ayağa!
- Bizi hara aparırsınız? – deyə Vahan soruşdu.
- Hara? İkinizə də toy eləyəcəyik. Qalxın ayağa!
- Toy özünə qalsın. Biz acıq, çörək verin.
- Yaxşı! Çərənləmə! – Həbsxana rəisi Vahana bir təpik ilişdirdi. – Yaxşı iş
görmüsünüz, hələ bir sizin qarnınızı da doyuracayıq…
Dustaqları bayıra çıxartdılar…
Əli tapançalı həbsxana rəisi qabaqda, süngüsü az qala dustaqların kürəyinə
toxunan əsgər arxada gedirdi.
Şahmərdan yeriyə-yeriyə, gah başının üstündə çətir kimi açılmış mavi
səmaya, sayrışan parlaq ulduzlara, gah ay işığında qalın kölgə kimi görünən
meşəyə baxdı. O dayandı.
- Nə təmiz, nə sərin havadır! – deyə sinə dolusu nəfəs aldı.
- Dayanma! – deyə əsgər tüfənginin qundağı ilə onu daldan itələdi. – Yeri!
Ayağını tez-tez at!
Dustaqları kəndxudanın evinə gətirdilər. İçəri girən kimi onların burnuna
şərab və ət iyi gəldi. Görünür, buradakılar təzəcə yeyib-içmişdilər. Vahanla
Şahmərdan otaqdakı adamların içində yalnız Samvellə Nersesyanı tanıdılar.
Nersesyan Vahanı göstərib dedi:
- O qoca bolşevik ermənidir, o biri də müsəlman.
Samvel də dilləndi:
- Cənab sparapet, bunları mən yaxşı tanıyıram. Köhnə qurddurlar.
Qalın döşəyin üstündə oturub mütəkkəyə dirsəklənmiş, zər poqonlu,
frençinin üstündən enli, qara qurşaq bağlamış Njde dustaqlara mənalı-mənalı
baxıb:
- Xoş gördük, «qəhrəmanlar»! – dedi. – Vərəqənizi oxudum. Çox «mahir»
təbliğatçısınız. Ancaq məni bir şey maraqlandırır: sizi əsgərliyə alan kimdir?
Vahan dedi:
- Nersesyan.
- Nersesyan? – deyə Njde qışqırdı və sağ tərəfində oturan rəisə qəzəblə
baxdı.
Müqəssir olunacağından qorxan və o saat rəngi dəyişilən Nersesyan dilləndi:
- Cənab sparapet, bu bolşevik yalan deyir. Bunların ikisi də bizim əsgərlərin
içinə gizli soxulublar… Ölüm ayağında hətərən-pətərən danışır.
- Mən ölümdən qorxmuram. Amma, sən öz ağandan qorxduğun üçün yalan
danışırsan.
- Sus! – deyə Nersesyan Vahanın üstünə çığırdı. – Bil ki, cənab sparapet
Njdenin qarşısındasınız. O, sizin gözlərinizi çıxardacaqdır. Mən…
Njde Nersesyana sözünün gerisini deməyə imkan verməyib, Vahana
müraciət elədi:
Dostları ilə paylaş: |