Amid Əlioğlu
Yüklə 1,73 Mb. Pdf görüntüsü
|
www.kitabxana.net Amid Əlioğlu 2016 - Qardaşlar, nə məsələdir? – soruşanda onların üç nəfər olmağı görünür Əhmədi qətiyyən qorxutmurdu. - Başa düşmədim, – deyə dəmir barmaqlıqlardan meymun kimi sallanan, əzələlərini hər kəsə daha qabarıq göstərmək üçün bədəninə yapışan köynək geyinmiş oğlan üzünü bizə tərəf çevirəndə sifətinin çopurları ilk baxışdan adamı diksindirirdi. - Deyirəm nə məsələdir? – sualını təkrarlayan Əhməd artıq hirsli olduğunu büruzə verirdi. - Mən də dedim ki, başa düşmədim. Onlarla burun-buruna idik. Ani davanın qoxusu gəlirdi. Həm sinif qızları, həm də oğlanlar prosesi izləməklə kifayətlənirdilər. Dərsin başlanmasına işarə verən zəngin səslənməsi ilə şagirdlər binaya daxil olduqca həyətdə seyrəklik yaranırdı. Hətta Əhmədin sinif yoldaşları da müəllimlərin iradından qorxaraq sinif otaqlarına üz tuturdular. - Onlar mənim sinif yoldaşlarımdı. Niyə söz atırsız? – deyə Əhməd davam etdi. Saqqız çeynədiyindən sözləri əməlli deyə bilməyən ikinci oğlan dilləndi: - Lap yaxşı. Bizim də xoşumuza gələn qızlardı. www.kitabxana.net Amid Əlioğlu 2016 Aydanın da, o qızların arasında olmasını nəzərə alsaq, Əhmədin hövsələdən çıxması an məsələsi idi. - Bir də ki sənə nə dəxli var? O qədər oğlanın içində bir sənəmi qaldı onların... Oğlanın sözünü kəsən Əhməd: - Onlar görməyiblər yəqin sizi. Mən görmüşəm, mən gəlmişəm, – bildirdi. - Qaqaş, sən o qızlara “atviçatsan”? – Bayaqdan danışmayan, saçına yaxdığı geldən başının dibi görünən sısqa oğlan ciyiltili səslə dilləndi. Əhmədin onun gözlərinə hirs ilə baxmağı oğlanın susmasına kifayət etmişdi. Mən özümü Əhmədlə onların arasına salıb hər iki tərəfi sakitləşməyə və məsələni sülh yolu ilə həll etməyə dəvət etdim. Bir tərəfdən də, sinif otağının laybalay açılmış pəncərələrində nəinki məktəblilərin, hətta bəzi müəllimlərin tamaşaya baxırlarmış kimi düzülməsi məni hövsələdən çıxarırdı. Əhməd hər üçünə xəbərdarlıq edərək: - Nə isə, bir də belə şey olmasın, gedin, – deyəndə sir-sifəti çopur olan və ortada dayanan özündənrazı oğlanın əlilə Əhmədin sinəsindən itələyərək: www.kitabxana.net Amid Əlioğlu 2016 - Əşşi, get işinlə məşğul ol! – deyə ucadan söyləməsi bardağı daşırdan son damla oldu. Heç kimin ağlına belə gəlməyən cəldliklə alnını oğlanın sifətinə var gücü ilə çırpan Əhmədi belə əsəbi görməmişdim. Bir andaca ara qarışdı. Onlardan sısqa olanı özündən asılı olmayaraq geri çəkiləndə digəri Əhmədin qarnına tərəf təpik atdı. Bir əlilə oğlanın ayağından tutan Əhməd sağ ayağıyla onun tək ayağına şiddətli zərbə endirəndə, başa düşdüm ki, o, sanki həmin təpiyi gözləyirmiş. Saniyələr içində baş verən çarpışmaya mənim də qoşulmağıma gərək qalmamışdı. Bayaqdan lovğalığından az qala partlayan oğlan yerdə qıvrılır, o birisi isə ayağını iki əli ilə tutub acı çəkdiyini, istəməsə də, büruzə verirdi. Üçüncü isə elə bil bayaqdan hadisələrin içində olan adam deyildi. İşə onsuz da gecikdiyim üçün birinci dərsi buraxmalı olan Əhmədlə ikinci dərs başlayana qədər məktəbin həyətindəki oturacaqda əyləşərək gözləməli olduq. Tənəffüs vaxtı yuxarı siniflərin dərs aldığı üçüncü mərtəbənin 314 saylı sinif otağına Əhmədlə bir yerdə qalxdıq. Yoldaşları otağın müxtəlif www.kitabxana.net Amid Əlioğlu 2016 yerlərində toplaşaraq qızğın müzakirələr aparan vəkillərə bənzəyirdilər. Heç kimə fikir vermədən pəncərinin yanındakı yerinə doğru istiqamətlənmiş Əhmədə yönələn həsəd dolu baxışları uzaqdan sezə bilirdim. İkinci dərsin başlanmasına üç-dörd dəqiqədən bəlkə də az vaxt qalmışdı. Az əvvəl yaşanan hadisənin təsirindən çıxa bilməyən qızların Əhmədə təşəkkür etməsini səbirsizliklə gözləyirdim. Və həmin qızlardan biri – yerişi, duruşu, geyimilə oğlanların həmişə diqqət mərkəzində olanı gərgin səs tonu ilə dilləndi: - Əhməd... Barmaqları ilə qızarmış alnını ovuşduran Əhməd əlini saxlayıb üzünü qıza tərəf çevirdi. Qız davam etdi: - Sən özünü nə hesab edirsən ki? Onları niyə döydün? İçlərindən biri xalamgilin qonşusudur. Mənə görə gəlib. Sənə nə dəxli var axı? - deyəndə təəccübümdən damarlarımda qanım dondu sanki. Əsəbindən dişlərini qıcamağı dodağının altında açıq- aşkar bilinən Əhməd əllərini yumruq halında sıxaraq ayağa qalxdı. Bunu görən digər qızlardan biri özünü qabağa verərək: www.kitabxana.net Amid Əlioğlu 2016 - Solmaz düz deyir də. Sənin nəyinə gərək? Üzr istəmək əvəzinə, üstəlik, hirslə ayağa da qalxırsan. Gəl bir bizi də döy... Gördüklərimə və eşitdiklərimə inana bilmirdim. Əhməd bu həyasız qızlardan ötrümü özünü təhlükəyə atmışdı? Bu idimi onların təşəkkürü? Qızlar onun qarşısında yarımdairə şəklində düzülərək hərəsi bir söz deyirdi. Artıq qızların söhbətinə onlardan geri qalmayan oğlanlar da qoşulmuşdu. Hadisə baş verməmişdən əvvəl qızlara yaxın oturacaqda əyləşmişlərin arasında sifəti yadımda qalan - təlxək kimi deyib-gülən oğlanlardan biri dilləndi: - “İgid”, özünü kimə göstərirsən ki? Bizdən belə qollu-biləklisən? Biz onların cavabını verə bilməzdik guya? Əhməd onların gözlərinin içinə baxmaqdan başqa heç nə etmirdi. Sinif yoldaşları söz demək üçün sıraya düzülərək onun üstünə addımlayırdı. Əhmədin isə gözləri, zənnimcə, Aydanı axtarırdı. Qızlardan bir başqası: - Qızların qədrini belə bilənsən, get bacına sahib çıx da, – deyəndə Əhmədi də, məni də cərəyan vurdu Yüklə 1,73 Mb. Dostları ilə paylaş:
|