51
məktəblərdən birində I sinif şagirdlərinə “Ev
işlərində anama
necə kömək edirəm” mövzusu təqdim olundu. Şagirdlərə işin
mahiyyətini açmaq üçün “Ananız harada işləyir?” “Siz evdə
ananıza necə kömək edirsiniz?” “Hansı işləri görürsünüz?”
“Ananız sizdən razı qalırmı?” “Ananızı nə üçün sevirsiniz?
Sualları verildi. Bundan başqa heç bir əlavə iş aparılmadı.
Çünki şagirdlərin hər birinin öz həyatı, öz dünyası, öz təcrübəsi
var. Hərənin anası bir idarədə, zavodda, fabrikdə, müəssisədə
çalışır, evdə evdarlıq işləri ilə məşğul olur, ailəyə uşaqlarına
kömək edir. Şagirdlər bu gündəlik prosesi izləyir, onun
haqqında geniş məlumata malik olurlar. Sadəcə olaraq sualların
qoyuluşu şagirdlərin diqqətini analarının əməyinə, uşaqların
gördüyü işlərə, onların köməyinə yönəldir. Nəticədə şagirdlərin
hər biri analarına necə kömək etmələri ilə əlaqədar canlı və
inandırıcı şifahi hekayələr qurdular.
Şagirdlər analarına kömək etməklə əlaqədar həyatı
təəssüratlarını, gördükləri işləri, şəxsi münasibətlərini və s.
aydın şəkildə göstərmişdilər. Buna səbəb şagirdlərin mövzu
haqqındakı təsəvvürlərinin zənginliyi olmuşdur”. (64, 15)
Ana dilinin tədrisi metodikası ilə uzun illər elmi
axtarışlar aparan professor A.Rəhimov sərbəst yazılara xüsusi
əhəmiyyət verir. O, göstərir ki, oxunmuş material, müşahidə,
şəkil və şəxsi təcrübə əsasında, yaxud bir qism sərbəst inşalarda
mühakimə elementləri olsa da, onları mühakimə xarakterli inşa
adlandırmaq olmaz. Ona görə də mühakimə xarakterli inşa
tərtib etdirərkən başlıca diqqət mövzunun seçilməsinə
yönəldiləmlidir. Belə ki, sərlövhə şagirdləri problemlə
qarşılaşdırmalı, mühakimə yürütməyə məcbur etməlidir: “Sadiq
dost kim ola bilər?”, “Mən vətənimizi nə üçün sevirəm?”,
“Kəndimizin sabahı”, “Mən kim olacağam?”, “Müəllim nə
üçün bizim qayğımıza qalır?”, “Biz dirrikdə necə işləyəcəyik”,
“Yay tətilini Göy-göldə keçirəcəyik” və s. (64, 26)
52
Təcrübə göstərir ki, mühakimə xarakterli inşanın
mövzusunu müəyyənləşdirmək hələ işin hamısı deyildir. Bunun
üçün şagirdlərdə aydın təsəvvür yaratmaq, əsas məzmuna
dərindən nüfuz etmək üçün onlara müəyyən ideya, frazalar
verilməlidir. Başqa sözlə, III-IV sinif şagirdləri mövzu ilə bağlı
fikri axtarışlara cəlb olunmalıdırlar.
Yazılı və şifahi tapşırıqlar köhnə dövründəkindən
tamamilə fərqlənir və fərqlənməlidir. Çünki müasir dərs köhnə
qaydalardan imtina etməyi qəti şəkildə qarşıya qoyur. Yeni
dərsin yeni tipli tapşırıqları olması tələbi müəyyən dövlət
strukturlarının irəli sürdüyü qanun və göstərişlərə əsaslanmır.
Bu, dövrün öz tələbidir. Şagirdin dərsdə fəallaşması anlayışını
düzgün mənimsəmək lazımdır. Şagird mənasız oyunlar
vasitəsilə fəallaşa bilər, oynayar, səs-küy salar, amma həmin
dərsə “fəal” adını vermək olmaz. Onun müasir dərs olması
düşündürücü, cəlbedici, inkişafetdirici, tərbiyəedici
xüsusiyyətləri ilə səciyyələnir. Müasir dərs intellektə meydan
verir. Şagirdin qəlbində yaradıcılıq ehtiraslarını coşdurur. Onu
vətəndaş kimi tərbiyə edir. Bəlkə də onun dərsdə aldığı bilgi
əvvəlki illərin şagirdlərinin dərsdə aldığı bilikdən az olur.
Amma o, bilik qazanmağın yollarını aydın təsəvvür etdiyi üçün
ona lazım olan hər hansı elmi məlumatı istədiyi anda əldə
etməyə qadirdir. O vurma cədvəlini əzbər bilməz. Şeir də
əzbərləməyə bilər, qrammatikanı ona lazım olan qədər bilər,
amma özünü cəmiyyətdə yetkin bir şəxsiyyət kimi sübut edər.
Müasir dərsin nə demək olduğu barədə çoxlu gözəl
kitablar yazılıb. Son illərin kitablarında “müasir dərs nədir?”
sualına çox aydın cavablar tapıırıq:
“Müasir dərs” anlamında “müasir” sözünün
özünəməxsus evristik mənası var. “Müasir dərs” bu günkü
dərs” demək deyildir.
Bu anlamda, adətən, bir-birilə üzvi surətdə bağlı olan
iki cəhət ayırd edilməlidir. Çox vaxt müasir dərs dedikdə, onu
53
təkcə
dərsin elmi-nəzəri səviyyəsini yüksəltmək,
müasirləşdirmək kimi başa düşülür. Dərs özünün elmi-nəzəri
səviyyəsinə görə müvafiq elm sahəsinin ən yeni uğurlarını əks
etdirməlidir. Bu, şəksizdir. Lakin müasir dərs anlamını təkcə bu
kökdə izah etmək birtərəfli olardı. Söhbət pedaqoji fenomendən
gedir: dərs, ilk növbədə pedaqoji (psixoloji) fenomendir.
Müasir sözü də sifət kimi məhz dərsi səciyyələndirir. Bu istər
psixoloji və pedaqoji, istərsə də dilçilik baxımından belədir.
Müasir dərs pedaqoji (psixoloji) elmlərin ən yeni uğurlarına
söykənməlidir. Dərsin müasirliyini dəyərləndirmək üçün
xüsusilə əhəmiyyətli olan elmi-pedaqoji səviyyəsi də məhz bu
axarda köklənir.
Başqa sözlə, dərs təkcə özünün elmi-nəzəri
səviyyəsinə görə deyil, həm də pedaqoji konsepsiyasına – yeni
pedaqoji təfəkkür ölçüləri ilə qurulmasına görə müasir olur.
Müasir bilikləri müasir üsullarla – müasir dərsi ümumi şəkildə
belə səciyyələndirmək olar.
... Müasir dərs konsepsiyasında iki yeni, lakin köklü
prinsip – inkişafetdirici və tərbiyəedici təlim prinsipləri əmələ
gəlirdi. Yeni pedaqoji təfəkkür artıq ikinci mərhələdə
şəxsiyyətin formalaşmasının sirrlərini bu prinsiplərin təsir
çevrəsində axtarırdı və onlara müasir məktəbin Arximed lingi
kimi böyük əhəmiyyət verirdi. Yeni pedaqoji təfəkkürün artıq
bu mərhələdə əsas konseptual model formalaşırdı: onun ana
xəttini şagirdin bir şəxsiyyət kimi inkişafı və tərbiyəsi təşkil
edirdi. Yeni pedaqoji təfəkkürün inkişafında üçüncü mərhələ
onun əsas paradiqmalarının məktəb təcrübəsinə “yol açması”
ilə başlayır. (32, 170-171)
Dil qaydalarının yalnız tərifdən ibarət olması şagirdi
tez yorur. Onun elm öyrənmək həvəsini söndürür. Məsələn,
əşyanın adını bildirən əsas nitq hissəsinə “isim” deyilir. Say
bildirən nitq hissəsinə “say” deyilir. Hərəkət bildirən nitq
hissəsinə “fel” deyilir və s kimi yalnız bilgi verən təriflər uşağı
54
cəlb etmir. Bu tipli təriflərlə fəal dərs qurmaq da mümkün
deyil. Çünki məsələnin bu cür qoyuluşu hafizəyə əsaslanan
dərslərin prinsipinə uyğundur. Uşaq həmin tərifləri
əzbərlədikdən sonra müəllimin birtərəfli sual strategiyası
başlayır: isim nəyə deyilir? Misal göstər. Say nəyə deyilir?
Misal göstər. Fel nəyə deyilir? Misal göstər. Bunlar şagirdə
müəyyən informasiya verir. Amma dilin dərin qatlarında yatan
məna gözəlliyini öyrətmir. Ola bilər ki, uşaq yalnız
qrammatikanın qanun və kateqoriyalarını əzbər bilsin, zəngin
dil okeanında üzə bilməsin. Çünki qanun və kateqoriyalar dilin
sxemidir, özü deyil. Təklikdə cansızdır. Onu ətə-qana gətirmək
üçün bədii mətnlərin verdiyi imkanlardan, ismin də, felin də,
sayın da ifadə etdiyi və dilçilik elmində açılmayan gözəllikləri
şagirdə çatdırılmalıdır. Müasir təlim bunu tələb edir. Bunsuz
şagirdin öyrəndiyi bilik əzbərçilikdən o yana getməyəcəkdir.
Şagirdə elmi müddəanı əzbərlətməkdənsə anlatmaq və hər
hansı bir nitq hissəsini tapmaq, cümlədə işlətmək bacarıqları
yaratmaq lazımdır. Yadda saxlamaq lazımdır ki, savadlılıq heç
də qrammatik qaydaları bilməkdən asılı deyildir. Elə adamlar
var ki, düzgün yazırlar, amma qrammatikanı bilmirlər. Elə
uşaqlar da vardır ki, onlar qrammatik qaydaları bilirlər, amma
olduqca savadsız yazırlar. “Əvvəlcə canlı, düzgün niitqə qulaq
asmaq, çoxlu oxumaq, öz-özünə danışmaq, yazılı nitqi oxumaq,
müstəqil yazmağı öyrənmək lazımdır. Savadlılıq belə yaranır.
Dil üzərində müşahidə aparmaq vacibdir. Buna yarımtədqiqat
tipli dil çalışmaları deyilir. (25, 284)
Prof. Bəşir Əhmədov yazır: “Məlıumdur ki, uşaq dili
mənimsəyərkən komponentləri ayrılıqda öyrənmir, onun
komponentlər haqqında təsəvvürü də olmur. Hər bir şəxs dilin
səs sistemini, leksikasını, qrammatikasını praktik yolla vəhdət
şəkildə mənimsəyir. Elə bir adam yoxdur ki, əvvəl səsləri,
sonra sözləri, daha sonra şəkilçiləri öyrənsin. Deməli dilin
praktik şəkildə mənimsənilməsi kompleks halında olur.”