17
- Yaxşı, onda mən yubanmayım… - Saak yerindən qalxdı.
Klavdiya Saakın bu gecə vaxtı getməsinə razı olmadı, lakin o, qalmaq
istəmədi.
- Yeriniz dardır. Burda qonaqçım var, gecəni onun evində qalaram. Daha,
salamat olun! – Saak onlarla görüşdü. – Kənddə qalmaq mənim üçün qorxulu olsa,
sizin yanınıza gələcəyəm. Xudahafiz.
Saak qapıya tərəf getmək istərkən, Suren onu dayandırdı.
- Saak əmi, atama da de ki, tez yığışıb gəlsin. Məndən də nigaran qalmasın.
- Deyərəm, arxayın ol.
Saak getdi. Vahan onun arxasınca baxıb nə isə fikrə daldı. Klavdiya durub
öz otağına çəkildi.
Əllərini şalvarının ciblərinə qoyub otaqda vargəl edən Karo Samvelin
qarşısında dayandı. Onu başdan ayağa süzüb soruşdu:
- Bir şey öyrənə bildinmi?
- Xeyr.
- Xeyri daha nə oldu, malbaş!
- Kəndlilər heç bir şey demirlər, özüm də açıqdan-açığa kimdən soruşaydım.
- Baqratla Qrikorun Şələkdən Əngələvidə bir gəldiklərini söyləmirdilərmi?
Samvel cavab verməyib, çiynini atdı. Karo amiranə tərzdə sualını
təkrarlayıb, əlavə etdi:
- Sən xəfiyyəsən, malbaş. Gərək hər şeyi biləsən. Özün də düz danışasan.
Heç bir şeyi hökumətdən gizlətməyəsən. Yaxşı, de görüm Baqratla Qrikor günün
hansı vaxtında Şələkdən yola düşüblər.
Samvel udquna-udquna cavab verdi:
- Düzü, bilmirəm. – O, nə isə fikirləşdi, sonra gülümsünərək dedi: - Yoxsa,
öz qaynatandan da şübhələnirsən, yeznə?
- Yeznə-meznə bilmirəm, - deyə Karo üz-gözünü turşutdu. – Mən general-
qubernatoram, sən xəfiyyə. Cinayətin üstü açılmalıdır. Özü də sən açmalısan. Atan
da cinayət eləmiş olsa, gizlətməməlisən. Başa düşdünmü?
- Bəli.
Karo söhbəti dəyişdirib, Araksidən söz saldı. Onu tapıb gizlincə öldürməyi
əmr etdi.
Samvel yerindən qalxdı:
- Gedə bilərəmmi?
- Get. Tapşırıqlarımı yerinə yetir.
Samvel getdi. Karo stolun arxasına keçib nə isə yazmağa başladı. Bu vaxt
Saak Baqratın həyətinə girdi. İkinci mərtəbəyə qalxmamış, pilləkənin aşağısında
nəfəsini dərmək üçün dayandı. Fikir onu götürdü: «Hər şeyi deyimmi? Onları ələ
verimmi? Axı, bu namərdlik olar. Vahanla Suren mənə nə pislik ediblər? Heç nə.
Ancaq onların əlində heç bir ixtiyar yoxdur. İstədiklərini də eliyə bilmədilər. İndi
özləri orda-burda gizli yaşamağa məcbur olublar. Mən belə adamlardan nə xeyir
görə bilərəm? Heç nə. Güc, ixtiyarat Karo kimilərin əlindədir…».
…Saak fikir-xəyal içində qapını açdı. Lakin otağa girməyib astanada
dayandı.
18
Karo başını qaldırarkən, Saakı görüb içəri çağırdı, oturmaq üçün yer
göstərdi.
- Hə, danış görək nə xəbərlə gəlmisən.
- Tapşırıqlarını yerinə yetirmişəm.
- Ay sağ ol! Belə ha! – Karo stulunu çəkib onunla yanaşı oturdu.
Saak, Vahanla Sureni gördüyünü müfəssəl danışıb, axırda dedi:
- Onların başının üstünü tez almaq lazımdır. Yoxsa, əldən çıxarlar.
Karo əlini Saakın çiyninə vurub gülə-gülə:
- Qorxma, çıxmazlar, - dedi. – Bizim sənin kimi sədaqətli adamımız var. Elə
deyilmi, Saak kişi?
- Bəli, bəli! Mən öz erməni hökumətimizin yolunda canımı əsirgəmərəm.
Mən…
Karo onun sözünü kəsdi:
- Yaxşı, yaxşı, özünü mənə tanıtma, sənin barəndə mənə müfəssəl yazıblar,
öz sədaqətini həbsxanada göstərmisən. Erməni hökuməti sənin kimi adamların
qədrini bilir, yoxsulluq çəkməsinə razı olmur.
- Hə, qadan alım, nahankapet, məni yay kimi əyən ancaq yoxsulluqdur.
- Mən, bolşeviklər kimi yalan vədlər deyil, sənə torpaq verəcəyəm.
- Bəs haçan?
- Elə bu saat.
Saak Karonun üzünə dik baxdı. Elə güman etdi ki, onu ələ salır.
- Yoxsa inanmırsan? Surenin atası Armenakın evini, həyətini, torpağını
verdim sənə, bu gündən sahib ol.
- Başına dönüm, axı camaat məni qınayar. Deyərlər namərd…
Karo ona sözünün dalını deməyə imkan vermədi.
- Düşmənin evinə, həyətinə, malına sahib olmaq özü böyük mərdlikdir,
namərdlik deyil. Başa düşdün? Sənin və bütün ermənilərin iki düşməni var:
bolşeviklər, bir də müsəlmanlar. Gələcəkdə bizim üçün yaxşı işləsən, müsəlman
kəndlərindən sənə o qədər torpaq verəcəyəm ki, əkib qurtara bilməyəsən.
- Müsəlman kəndlərində torpaq qalmayıb, hamısını ermənilər öz aralarında
bölüşdürüblər…
- Yaxşı, daha söz güləşdirmə, dur get. İki saatdan sonra mənimlə Gorusa
yola düşəcəksən.
- Gorusa? Mən ordan indicə gəlmişəm. Hələ də qıçlarım qırılır.
- Doğrudan da sən avam adamsan! – deyə Karo gülümsəyib, başını buladı. –
Həbsxanadan qurtarmısan, ancaq başa düş ki, ixtiyarın mənim əlimdədir. Özün də
qorxma, piyada getməyəcəksən. Bolşeviklərin Gorusda gizləndiyi yuvanı sən
göstərməlisən, onları sən tutub mənə verməlisən. Başa düşdün?
Bolşeviklərin yerini öyrənib deməklə öz vəzifəsini bitmiş hesab edən,
qorxusundan xəfiyyəçilik tələsinə düşən Saak yerindən qalxdı. Ağzını açıb nə isə
demək istədi, lakin Karo onu qabaqladı:
- Danışdıqlarımız burada qalmalıdır. Ağzından bir söz qaçırsan, boğazına
qurğuşun tökdürərəm. Get!
Saak bir söz demədən, məyus halda başını aşağı salıb otaqdan çıxdı.
19
«Vahanla Sureni ələ keçirdikdən sonra, onları hansı ağır cəzalarla
öldürəcəyəm? – deyə Karo sonsuz bir sevinc içində düşünməyə başladı. –
Güllələyimmi? Dar ağacından asdırımmı? Yox, yox, əvvəlcə dillərini kəsəcəyəm,
sonra diri-diri çarmıxa çəkəcəyəm. Eh, bunlar yüngül cəzadır. Təzə, heç kəsə
məlum olmayan təzə cəzalar tapmalıyam…».
Aşot içəri girdi:
- General-nahankapet ağa, səni xanım çağırır!
- Hansı xanım?
- Nvard xanım. Deyəsən, Siranuşun kefi məxşuşdur. Həkim dalınca getmək
lazımdır…
- Yaxşı. Gedək.
Hər ikisi otaqdan çıxdı.
Üçüncü fəsil
Dünyada hər cəhətcə bir-birinin eyni olan iki adam yoxdur. Adamlar yalnız
zahiri görünüşcə deyil, arzu, xasiyyət və idrakca da bir-birindən fərqlənirlər.
Adam var gülər üzlü, şən və zarafatcıldır, adam var qaşqabağından zəhər
yağır. Adam var xeyirxahdır, rəhmdildir, adam var xudpəsənd, paxıl, kinli, rəhmsiz
və zülmkardır. Adam var bir sözdən min məna çıxarır, adam var ki, yüz sözdən bir
məna duymağa qabil deyildir. Adam var, nəfəsi də gopla gedib gəlir, adam da var
ki, istəsə də yalan bir söz danışa bilməz. Adam var bir qəpiyə gümanı gəlsə
dostdan, qohumdan əsirgəməz, adam da var ki, mal-dövləti aşıb-daşsa da, dilənçi
kökündə yaşayar. Adam var, ildə bir dəfə danışdırmasan ağzını açıb danışmaz,
adam var ki, sözdən-söhbətdən həzz alar.
Həkim Arakel Koçaryan da ürəyinə yatan hər kəslə – istər çoban olsun, istər
ziyalı, danışmaqdan həzz alır. Onun fikrincə, söz insanın qəlbinin aynasıdır. Bir
adamın nə arzu və nə əqidədə olduğunu bilmək üçün onunla azacıq söhbət etmək
kifayət edər.
Arakelin söhbəti Vahanla, Surenlə tuturdu. Onlar tanış olandan, xüsusən
Koçaryan Sureni müalicə etməyə başlayandan daha yaxın olmuşdular. Həkim
bekar vaxtlarında onların yanına gəlib saatlarla söhbət edərdi.
Onlar bu gün də axşamdan gecə saat on ikiyədək o yandan, bu yandan,
ölkədəki vəziyyətdən danışdılar. Arakel Tiflisdə gimnaziyada təhsil aldığından,
Peterburqda oxuyub həkim olduğundan söhbət elədi. Gorusda xəstəxana açmaq
arzusunda olduğundan söz açdı. Lakin təəssüflə qeyd etdi ki: «Mənim bu
fikirlərimi yerinə yetirmək üçün hələ imkan və şərait yoxdur».
Vahan yekə, çuğun saatını qoltuq cibindən çıxarıb baxdı.
- Vaxt nə tez gəlib keçir, - deyə yenə cibinə qoydu. Sonra kiminsə gələcəyini
gözləyirmiş kimi, qapıya baxdı.
- Bəlkə bir yerə gedəcəksiniz? Mənim gəlişim və uzun söhbətim sizə mane
oldu?
- Heç yerə getməyəcəyik, doktor, - deyə Vahan cavab verdi. – Söhbət
eləyirik, narahat olma.
Dostları ilə paylaş: |