20
- Yox, yox, hiss edirəm ki… - o, susdu, sonra köksünü ötürüb əlavə elədi: -
Sizi qınamıram. İndi insanlarda etibar qalmayıb. Qardaş qardaşa, ata oğluna
inanmır, ürək qızdırmır. Bunun hamısına günahkar zəmanədir.
Vahan çeşməyini gözündən götürüb cib dəsmalı ilə silə-silə dedi:
- Adamların hamısını etibarsız zənn etmək düz olmaz. Necə deyərlər, dünya
xali deyil. Əlbəttə, qoyun dərisi geyib sürünün içinə soxulan qurdlar da var. Sən ha
eləyib onun qurd olduğunu bilincə, o böyük ziyanlar vurur. Həkim Arakeli isə biz
etibarsız adam hesab eləmirik.
Suren yerindən söz atdı:
- Mən həkimin yaxşılığını heç vaxt unutmayacağam. Ancaq onun diqqəti,
qayğısı sayəsində sağalmışam. Onu da bilirəm ki, hamı Koçaryana yaxşı bir həkim,
mehriban və insanpərvər bir adam kimi çox hörmət edir. Deyirlər ki, doktor
xəstələrinin çoxundan pul almır.
Vahan Surenin sözünə qüvvət verdi:
- Elədir. Doktor Arakel insanlara şəfa verdiyi üçün fəxr edə bilər.
Arakel gülə-gülə:
- Mehriban və insanpərvər olduğumu bilmirəm, - dedi. – Ancaq çalışıram ki,
həkimlik vəzifəmi layiqiylə yerinə yetirim. Amma, burası da var ki, elin yaralarını
sağaltmaq üçün beş, on həkim kifayət deyil. Xalqın ürəyində çox ağır, dərin kök
salmış dərdləri var. Onları sağaltmaq üçün böyük və məharətli əməliyyat lazımdır.
Arakelin sözlərinin başqa bir rəng aldığını dərhal anlayan Vahan soruşdu:
- Elin dərdi deyəndə nəyi nəzərdə tutursan, doktor?
- Onu sizin hər ikiniz məndən yaxşı bilirsiniz. Çünki bu sahədə siz məndən
təcrübəli həkimsiniz…
Üçü də bir-birinin üzünə baxdı. Aralığa çökən ani sükutdan sonra həkim
dilləndi:
- Atalar deyər ki, göz görmək, qulaq eşitmək üçündür. Erməni kəndlilərinin
dilənçi, acınacaqlı həyatı göz qabağındadır. Öz yurd-yuvalarından dağıdılmış
müsəlman kəndlilərinin ahı-naləsi hələ də qulaqlardan getməyib… Mən dərd
bunları hesab edirəm, Vahan!..
Həkimdən belə sözləri ilk dəfə eşidən Vahanla Suren təəccübləndilər.
«Bəlkə, bu da daşnakların adamıdır… bizdən söz alır», deyə ürəklərində
fikirləşdilər. Lakin şübhələrini büruzə vermədilər.
Arakel ayağa qalxıb:
- Mən gedirəm, - dedi, - səhər Əngələviddə olmalıyam. Baqrat ağanın qızı
xəstədir, onun yanına çağırıblar. Nə zaman lazımınız olsam, evimi tanıyırsınız.
Qulluğunuzda durmağa hazıram.
Vahan həkimə təşəkkür etdi. Suren istədi desin ki: «Doktor, atam Armenakı
orada gör, de ki, ondan, anamdan, bacımdan çox nigaranam. Saak mənim
tapşırığımı onlara yetirməyibmi? Atam daha Gorusa gəlməsin. Mən özüm evimizə
gələcəyəm…». Lakin demədi.
- Gecəniz xeyrə qalsın! – deyə Arakel qara drap paltosunun yaxasını
qaldırdı…
Suren onu həyətdən ötürüb qayıtdı.
- Hava necədir?
21
Suren Vahanın sualına fikirli cavab verdi:
- Bərk soyuqdur, qaranlıqdır.
- Niyə fikirlisən?
- Doktor mənim əlimi sıxıb ayrılanda dedi: «Camaatın yaralarını sağaltmaq
istəyən əsli həkim sizsiniz. Sən qoçaq oğlansan, amma, bundan sonra, döyüşə
girəndə, elə et ki, yaralanmayasan…». Düzü, bu sözlər, bir də onun bu axşamkı
danışığı məni şübhələndirir.
- Burada şübhəli və təəccüblü heç bir şey yoxdur. O, bizim məqsədimizi çox
yaxşı başa düşür… Lakin açıq bir söz demir. Mən belə anlayıram ki, nə bizə
yaxınlaşmaq istəyir, nə daşnaklara.
- Məncə belələrinə o qədər də bel bağlamaq olmaz.
- Doktor Arakel haqqında mən belə düşünmürəm. O, nəcib ziyalıdır.
Belələrini həyat həqiqətlərilə öz tərəfimizə çəkə bilərik.
- Bizi ələ verəcəyindən ehtiyat edirəm.
- Buna inanmıram, - deyərək Vahan yenə saatına baxdı. – Nə isə, yığışmaq
lazımdır. Saat on ikidir. Kəndə gedib çıxınca sübh açılar.
Onlar paltarlarını, sənədlərini yığışdırdılar. Şapiroqrafı taxta çamadana
qoydular. Başlıqlarını boyunlarına dolayıb, tiftik əlcəklərini geydilər.
Vahan həyətə çıxıb ətrafa göz gəzdirdi, tez qayıtdı. Əlini çamadana atıb:
- Gedək, – dedi.
Suren bağlamanı götürdü. Evdən çıxdılar. Vahan qapını bağlayıb, açarını
cibinə qoydu.
Onlar o tərəfə, bu tərəfə baxa-baxa şaxtalı gecədə həyətdən aralandılar.
…O başdandı. Xoruzlar səs-səsə verib banlayırdı. Bir azdan sonra, hava
işıqlanacaqdı…
Soyuqdan əllərini qara şal pencəyinin ciblərinə qoymuş, boynunu qısıb
toyuq kimi büzüşmüş Saak həyətə girdi. O yana, bu yana nəzər salıb, yavaş-yavaş
evin qapısına yanaşdı. Qapını yavaşca döydü. İçəridən səs gəlmədi. İkinci, üçüncü
dəfə bərkdən döydü, yenə cavab verən olmadı. Qapını gücü gəldikcə itələdi, lakin
aça bilmədi. Həm acığından, həm soyuqdan əsə-əsə öz-özünə deyinməyə başladı:
«Bu lənətə gəlmişlər, qapını niyə açmırlar…» - o dolanıb, Klavdiya yatan otağın
pəncərəsinin qabağına gəldi. Bir neçə dəfə şüşəni ara verə-verə döydü. Otaqdan səs
çıxmadı. Ərinin qayıdacağından ümidini kəsmiş Klavdiya iki gün bundan əvvəl
köçüb Bakıya, ata-anasının yanına getmişdi.
Saak geri çəkilib fikrə getdi: «Onlar qaçıblar, yoxsa, qəsdən qapını
açmırlar?»
O, dayanıb gözləmək qərarına gəldi. Titrəməli adamlar kimi dişləri bir-
birinə dəyə-dəyə pəncərənin altında çöməltmə oturdu.
Səhər açıldı. Şaxta sanki qanını, iliklərini dondurmuş Saak pəncərədən içəri
baxdı.
«Evin yıxılsın canım! – deyə iki əlli başına vurdu. – Otaqlarda bir adam
yoxdur… Onlar qaçıb gediblər. Allah, mən yenə bəlayə düşəcəyəm!.. Ocağın
sönsün canım, mən nahankapetə nə deyəcəyəm...».
22
Saak yaxasını Karonun əlindən necə qurtaracağını fikirləşə-fikirləşə, öz-
özünə tədbir tökə-tökə içəri girdi. Baş əyib, qapının yanında dayandı. Səhər saat
yeddiyə kimi Saakın gəlməsini gözləyən və əməliyyat üçün hazır olan Karo gülə-
gülə dedi:
- Saak kişi, gəldin? Danış görək. Bu saat gedib onları caynağımıza
keçirəcəyikmi? Yaxına gəl, niyə elə büzüşmüsən? Olmaya, gecənin şaxtası səni
qurudub… Ancaq gördüyün iş çox şərəfli işdir, dövlət işidir. Hə, danış!
Saak əllərini döşündə çarpazlayıb irəli addımladı, gəlib Karonun stolunun
qabağında dayandı. Keçən gecəki «fəaliyyətindən» qorxa-qorxa danışdı. Nəhayət,
güclə eşidiləcək bir səslə dedi:
- Onlar qaçıblar.
Sanki Karonun başına bir güllə vurdular. Yaralı pələng kimi nərildədi:
- Sus, dəyyus oğlu, sus! – deyə stuldan qalxıb Saakın yanına gəldi. – De
görüm necə qaçıblar? Hara qaçıblar? Bəs ev sahibəsi Musatova hardadır?
- Bilmirəm, nahankapet.
- Bilirsən! Yaxşı bilirsən, şan vordi
1
. – Karo onun tüklü üzünə bir tərs sillə
vurdu. – Onları qaçıran sən özünsən, xain, tülkü! – Karo var gücüylə ikinci silləni
vurmaq istəyəndə, Saak özünü geri verdi.
- Nahankapetin canına and olsun ki, mən hökumətə xain deyiləm. Bu sifət
məndə olsaydı, qazamatdan buraxmazdılar. Nə eləyim ki, onlar…
Karo qışqırıb Saakın sözünü kəsdi.
- Qazamat, qazamat! – Səni buraxdılar ki, bolşevikləri ələ verəsən, ya yox?
Şan vordi! Amma, görünür ki, sən köhnə əqidəndən dönməmisən.
- Xeyr, başın üçün, məndə heç bir əqidə yoxdur, nə köhnə, nə təzə. Mən
kişiyəm, söz vermişəm, axır nəfəsimə kimi erməni hökumətinin qulu olacağam.
Karo istehzalı bir təbəssümlə:
- Buna bax, kişiyə bax! – dedi, - hər bığı, saqqalı olana kişi deməzlər. –
Hirsindən özünü ələ ala bilməyən general-qubernator Saakın, qəlyan tüstüsündən
saralmış sallaq bığından yapışıb dartdı… - Bu kişi bığı deyil, gədə bığıdır, gədə!
Mən bundan bir tük qoymayacağam qalsın.
Üzünün bir tərəfi əyilib, ağzı açıla qalmış Saak, bığını Karonun əlindən
qurtarmaq üçün yalvara-yalvara yerə çökdü. Karo onu təpiklə vurub döşəməyə
sərdi. Geri çəkilib mauzerini çıxartdı.
Ölümünü yəqin edən Saakın bədəni qorxudan titrədi… Karonun kitelinin
ətəyindən yapışıb yalvarmağa başladı:
- Balalarım sənə qurban, nahankapet, məni öldürmə!.. Rəhmin gəlsin!..
Vahanla Sureni yerin altında da olsalar tapacağam, möhlət ver.
Karo mauzeri qoburuna qoydu.
- Yaxşı, səni yenə yoxlayarıq. Sözlərin yalan çıxsa, özünü də, ailəni də məhv
edəcəyəm! Get o bolşeviklərin yerini öyrən, mənə xəbər ver.
Ağasından aman və mərhəmət görmüş bir qul kimi, Saak sevinə-sevinə
getdi.
1
Ş a n v o r d i - it oğlu (ermənicə).
Dostları ilə paylaş: |