7
FƏSIL I. DAXİLİ BAZARIN QORUNMASINDA QİYMƏT AMİLİNDƏN
İSTİFADƏNİN NƏZƏRİ ƏSASLARI
1.1. Liberallaşma və proteksionizmin əsas xüsusiyyətləri,
qarşılıqlı əlaqəsi və ziddiyyətləri
Müasir dövrdə Azərbaycan Respublikasında xarici ticarət strategiyasının
əsas istiqamətlərindən biri də ölkənin ixrac-idxal imkanlarının artırılması, ixrac və
idxal əməliyyatlarının beynəlxalq standart və normalara uyğun tənzimlənməsidir.
Bu məqsədlə də Azərbaycan Respublikası özünün dövlət müstəqilliyini yenidən
elan etdikdən sonra xarici iqtisadi əlaqələr sahəsində ardıcıl iqtisadi islahatlar
həyata keçirməyə başlamışdır. Belə ki, müstəqilliyin ilk dövrlərindən iqtisadiyyatın
açıqlığını elan etmiş, xarici iqtisadi əlaqələrin və qiymətlərin liberallaşdırılması,
mövcud qanunvericiliyinin təkmilləşdirilməsini və qiymətlərin tənzimlənməsinin
müasir vasitələrlə həyata keçirilməsini təmin etmişdir.
Respublikamızın iqtisadçı alimləri A.Ş.Şəkərəliyev, C.Q.Nuriyev və
A.Ə.Əliyevin fikrincə, gömrük siyasəti ölkənin “... gömrük ərazisində gömrük
nəzarəti və mal dövriyyəsinin daha səmərəli tənzimlənməsi, daxili bazarın
qorunması, milli iqtisadiyyatın inkişafının stimullaşdırılması, dövlətin iqtisadi
siyasətindən irəli gələn vəzifələrin həyata keçirilməsi, habelə gömrük işinin
beynəlxalq normalara uyğun aparılmalıdır” [19, s.25]. Doğrudan da istənilən
dövlətin gömrük siyasətinin əsas məqsədi onun iqtisadi maraqlarının təmin
edilməsi sayılır. Bu mənada Azərbaycan da istisna deyildir. Məhz bu baxımdan
yuxarıda verilən tərif AR Gömrük Məcəlləsinin 2-ci maddəsində verilən gömrük
siyasətinin məqsədləri ilə üst-üstə düşür və onları tamamlayır [4 s.13].
İqtisadi ədəbiyyatda gömrük siyasətinin iki növü fərqləndirilir: proteksionist
gömrük siyasəti və azad ticarət siyasəti. Proteksionizm - daxili bazarda özünün
sənaye və kənd təsərrüfatını xarici rəqabətdən qorumağa yönəldilmiş siyasətdir.
Proteksionist gömrük siyasəti milli iqtisadiyyatı xarici rəqabətdən qorumaq yolu
ilə onun inkişafına kömək edən şəraitin yaradılmasına yönəldilir [18, s.120].
Proteksionizm ölkənin daxili bazarına gətirilən xarici əmtəələrdən gömrük
tutulmasının yüksək səviyyəsinin müəyyən edilməsini, müəyyən əmtəələrin
8
idxalının məhdudlaşdırılmasını və ya tamamilə qadağan edilməsini, ixracın
gücləndirilməsini, ixrac sahələrinin maliyyələşdirilməsini və s. nəzərdə tutur.
Başqa sözlə desək, proteksionist gömrük siyasəti üçün yüksək gömrük və idxalın
məhdudlaşdırılması səciyyəvidir.
Beləliklə, proteksionizmə daxili bazarın xarici rəqabətdən qorunmasına
yönəldilən dövlət siyasəti kimi yanaşmaq lazımdır. Bunun əksinə olaraq
liberalizm(fritrederçilik) dedikdə, daxili bazarın xarici mallar, kapital, işçi qüvvəsi
üçün açıq olması yolu ilə daxili bazarda rəqabətin gücləndirilməsinə yönəldilən
iqtisadi siyasət başa düşülür. Onu da qeyd edək ki, hər iki istiqamət bu və ya digər
ölkənin əmək bölgüsündə baş verən dəyişikliklərə, beynəlxalq iqtisadi
münasibətlərdəki hadisələrə reaksiyasını əks etdirir. Liberal və ya proteksionist
istiqamətin hakim mövqe tutmasından asılı olaraq xarici ticarətin dövlət
tənzimlənməsinin forma və metodlarının istifadə mexanizmlərində əhəmiyyətli
fərqlər mövcuddur.
Azad ticarət siyasəti mahiyyət etibarilə bu və ya digər milli iqtisadi sistem
çərçivəsində monetarizm siyasətinə yaxındır. Bu siyasətə görə dünya bazarı ticarət
əməliyyatlarının qarşılıqlı səmərəliliyinin və tarazlığının təmin edilməsi
problemlərini istənilən digər tənzimləyici tərəfə nisbətən daha səmərəli həll etmək
iqtidarındadır. Azad ticarət siyasəti keçid iqtisadiyyatlı ölkələrdə dünya bazarının
milli təsərrüfatların dünya təsərrüfatına inteqrasiyasına imkan yaratmasını və
müasir elmi-texniki nailiyyətlərdən istifadə olunmasının təmin edilməsini nəzərdə
tutur. Bu zaman dövlət tənzimlənməsi başlıca olaraq gömrük-tarif tənzimləmə
metodları vasitəsilə həyata keçirilir və müvafiq ölkəyə əmtəə və kapital axınını
stimullaşdırır.
Beynəlxalq təcrübə sübut edir ki, azad ticarət həqiqətən daxili bazarlarda
rəqabət prosesini gücləndirir, müəssisələri yeniliklər tətbiq etməyə və
istehlakçıların tələbatını daha dolğun ödəməyə sövq edir, istehsal həcmlərini
artırmaq hesabına vəsaitlərə qənaət etməyə imkan yaradır. Bununla yanaşı, azad
ticarət siyasəti təkmilləşdirmə və yeniliklərin tətbiqini stimullaşdırmaq vasitəsilə
uzunmüddətli yüksək iqtisadi artım templərinə istiqamətlənən dinamik qüvvələri
9
sərbəstləşdirir. Proteksionizm siyasəti isə bunun əksinə olaraq həmin qüvvələrin
fəaliyyətinə maneçilik törədir.
Tədqiqatlar göstərir ki, azad ticarət siyasəti istənilən ölkə üçün səmərə
vermiş olsa da, həmin səmərə bütün ölkələr və ya əhali qrupları üçün eyni
səviyyədə olmur. İdxalçı ölkənin əldə etdiyi müsbət nəticə çox vaxt istehlakçıların
qazandıqları mənfəətin istehsalçıların itkilərini üstələməsi ilə bağlı olur. İxracatçı
ölkə üçün isə müsbət nəticə istehsalçıların mənfəət əldə etməsindən ibarətdir.
Lakin bu halda istər-istəməz istehlakçılar itkilərə məruz qalmış olur.
Qeyd etmək lazımdır ki, ticarət liberallaşdırılarkən qısamüddətli dövrdə
inkişaf stimullarının azalması ilə əlaqədar olaraq həm idxal əvəzləyici, həm də
xarici ticarətə bilavasitə cəlb edilməyən sahələrdə məşğulluğun səviyyəsi aşağı
düşə bilər. Şübhəsiz ki, məşğulluğun ixrac sahələrində kəskin artımı onun digər
sahələrdə azalmasını kompensasiya edə bilməyəcək. Ona görə ki, ixrac yönümlü
sahələrin müəssisələri digər sahələrdən sərbəst buraxılan işçiləri bir çox
səbəblərdən, o cümlədən yeni investisiyaların cəlb edilməsinin gecikməsi, yeni
peşə ixtisaslaşmasının ləng həyata keçirilməsi və ya əmək resurslarının məhdud
səfərbərliyi üzündən işlə təmin etməkdə maneələrlə qarşılaşa bilərlər.
Bazar iqtisadiyyatlı ölkələrin təcrübəsi göstərir ki, onlar üçün azad ticarət
siyasətinin tam olaraq həyata keçirilməsi bir sıra səbəblər üzündən mümkünsüzdür.
Çünki bu ölkələrin əksəriyyətində, o cümlədən Azərbaycanda iqtisadiyyatın bir
çox sahələri inkişaf etmiş ölkələrin müvafiq sahələrindən geri qalır. Qeyd olunan
vəziyyət isə keçid iqtisadiyyatlı ölkələrin dünya bazarlarında inkişaf etmiş
ölkələrlə
münasibətdə qeyri-bərabər
şərtlər daxilində rəqabət aparmaq
məcburiyyəti qarşısında qalır. Bu zaman həm də yalnız kənd təsərrüfatı, xammal
və enerji daşıyıcılarının hasilatı və ilkin emalı sahələri rəqabət aparmaq iqtidarında
olur. Odur ki, ilk növbədə milli istehsal sahələrini gücləndirməyi və onların
istehsal etdiyi məhsulları dünya standartları səviyyəsinə çatdırmağı məqsədəuyğun
hesab edirik. Eyni zamanda bu zaman yerli istehsal məhsullarının daha güclü xarici
rəqabətdən qorunması üçün müəyyən tədbirlərin həyata keçirilməsi lazım
gələcəkdir, bu da son nəticədə azad ticarət prinsiplərinə uyğun gəlməyəcəkdir.
Dostları ilə paylaş: |