www.kitabxana.net
– Milli Virtual Kitabxana
33
xəbər tuta və məni aradan götürə bilərdi. Tanıyırsan da onları... Dəli hara, iş hara?
Dəlinin yeri xəstəxanadır, lap uzağı, qapısı bağlı evdir. İndinin özündə də səksəkəli
yatıram, mənə elə gəlir ki, kimlərsə məni izləyir.
İzi azdırmaq, həm də Azıxantropa yaxın olmaq üçün Tarix İnstitutuna işə
düzəldim. Gecələr məni kim tanıyacaqdı ki… Bir neçə ay gözətçi işləyəndən sonra
arxeologiya şöbəsində kimyəvi təmizləmə laboratoriyasına işə girdim, daha
doğrusu, adım gözətçilikdə qaldı, özüm isə bu işlə məqşğul oldum, şöbə müdirinin
razılığı ilə. Şöbə müdiri çoxdan məndən şübhələnmişdi, ürəyinə dammışdı ki, mən
elə-belə adam deyiləm, bekar vaxtlarında mənim gözətçi komama baş çəkirdi. Evi
yaxındaydı. Biz ordan-burdan söhbət eliyirdik, aranı dağa, dağı arana daşıyırdıq.
Bir-birimizə isinişmişdik. O, daim kimya laboratoriyasından şikayətlənirdi.
Deyirdi ki, bəzi arxeoloji qazıntılar rütubətə və saxlanma şəraitinə tab
gətirməyərək xarab olur. Onu müntəzəm təmizləmək lazımdır.
Azıxantropun alt çənə sümüyü xüsusi şöbədə, şüşənin altında saxlanılırdı. Onunla
yanaşı daha bir neçə qiymətli arxeoloji tapıntı vardı. Bu, əsasən qədim və orta aşel
dövrünə aid suxurlar, ayı, maral sümükləri və erkən dövrlə bağlı tapıntılar idi.
Mezeolit və neolit dövrünə aid çapacaqlar, daşdan yonulmuş nizə ucluqları, daş
toppuz və sair. Eh, o qədər zir-zibil var orda, çoxunun da adını səhv yazıblar. Alim
deyillər e, aləmdilər...
Məni yalnız Azıxantrop maraqlandırırdı. Gecələr növbə zamanı həmin şöbəyə
gedir, səhərə kimi Azıxantropun alt çənə sümüyünə tamaşa edir, onunla virtual
əlaqəyə girmək istəyirdim, amma alınmırdı. Çalışırdım, amma alınmırdı...
Meditasiya kursları da köməyimə gəlmirdi. Hə, orada işləyərkən - başı ilə yuxarıya
işarə elədi, yəqin ki, Amerikadakı laboratoriyanı nəzərdə tuturdu - iş
yoldaşlarımdan biri qoca hindliydi, istənilən vəziyyətdə və şəraitdə meditasiyanın
mümkünlüyünü mənə başa salmışdı, saatlarla kürslar keçmişdi. Hətta ayaqüstə
yatan vaxtlarım da olub. Bir də görmüşəm ki, həyətimizdə, köhnə əncir ağacının
dibindəyəm. Atam-anam da sağdır. Mən əncir ağacının dibində uzanmışam,
qarşımda buğlanan çay var, əlimdə çoxlu hominid şəkilləri tutmuşam. Onlar dirilir,
ağaca dırmaşır, biri göyə uçur. Nənəm də hardansa peyda olur, kəlmeyi-şəhadətini
oxuyur, «dünyanın axırıdır» - deyir, məni uşaq kimi dalına atır, qaçmaq istəyir,
birdən yerə yıxılır, başım əncir ağacının gövdəsinə dəyir. Ayılıram və görürəm ki,
həmin qoca hindu alnıma şappıldadır ki, ayılım…
İmranbəy söhbətinin şirin yerində gülür, sanki ölənlərinin hamısı dirilib gəlib və
indi toyunda qol götürüb oynayırlar.
www.kitabxana.net
– Milli Virtual Kitabxana
34
- Maraqlıdır, - deyirəm. Çalışıram ki, o, xatirələrindən ayılsın və söhbətinə davam
eləsin.
-Əlbəttə, maraqlıdır. Harda qalmışdım? - deyə soruşur.
- Hindli səni şappıldadan yerdə.
- Yox, ondan əvvəl nəsə danışırdım axı? -Bir anlığa fikirləşdi. - Hə, yadıma düşdü,
sümüyə baxan yerdə. Mən o sümüyü oğurlaya bilərdim, amma bundan tez duyuq
düşə bilərdilər. Həm də əldə edəcəyim məhlulun ölmüş hüceyrələri dirildib-
diriltməyəcəyini dəqiq bilmirdim.
Mənə hormonoid lazımıydı. Dedeqonusu tapmışdım, daha doğrusu, onu özümlə
Amerikadan gətirmişdim, amma cift mayesi yoxumuydu. Nə baxırsan? - deyə
gözlərini üzümə zillədi, - təzədən evlənib, bəşəriyyətin sirrini arvadıma
deməyəcəkdim ki? Belə işlərdə həkimlər kara gəlir. Mən onlarla çox işləmişəm:
Amerikada da, burada da. Dillərini də yaxşı bilirəm. Uzağa getmədim. Yaşadığım
evin yanındakı doğum evindən bir həkim tapdım, yaşlı qadın idi, cəmi 200 dollara
mən istəyəni tapıb gətirdi. Yoxladım, tərkibi mən deyən idi, həkim aldatmamışdı.
Müsəlmana ümid olmaq olar? Amerikalılar demiş, «etibar elə, amma şübhələn»...
İşimi ehtiyatlı tutmuşdum və bir neçə ay əvvəl üçüncü azı dişimi çəkdirmişdim.
Dişim öləndən sonra onu soyuducunun, bax, elə bu soyuducunun, - deyə küncdə
qoyulmuş xırda və qədim «Morozka»nı göstərdi, - buzluğuna qoymuşdum.
Soyuducunu da ordan - «Cındır bazarı»nı nəzərdə tuturdu,- almışam. Bilirdim ki,
buz hüceyrələri uzun müddət ölməyə qoymur. Alt çənə sümüyü də uzun müddət
buzlaqda qalmışdı, su çəkiləndən sonra isə rütubətli mağarada ömür sürmüşdü, lap
sonralar onu tapmışdılar, cəmi 40-50 il bundan qabaq. Onun tarixini bilirsən,
yəqin?
- Onu kim bilmir ki...
- Ay sağ ol. Mən də eyni yolu seçdim. Dişim soyuducuda bir ay qaldıqdan sonra
onu çıxardım və döşəmənin sökülmüş yerindən torpağa basdırdım. Bir neçə həftə
keçəndən sonra onu çıxardım, hermetik şüşəyə yerləşdirdim, axırda isə dişin
hüceyrə toxumalarını oyub çıxardım və xüsusi məhlula qoydum. Elə işləmək
lazımıydı ki, toxumalar zədələnməsin. Bir neçə gün keçdi, toxumada heç bir
dəyişiklik olmadı. Ümidimi tamam itirmişdim. Şöbə müdirilə şərab vurmaqda
davam edirdim, az qala depressiyaya düşəcəkdim. Həmkarım da elə bilirdi ki,
kiməsə vurulmuşam. Mən də zarafata salırdım, məsələnin mahiyyətindən
uzaqlaşdırmaq üçün ağlasığmaz sevgi macəraları quraşdırırdım. Üstündən iki
həftəyə yaxın bir vaxt keçəndən sonra toxumanın qızardığını və canlandığını
www.kitabxana.net
– Milli Virtual Kitabxana
35
gördüm. Ölmüş hüceyrə dirilmişdi. Eşidirsən, dirilmişdi!? Özü də necə! Bir
müddətdən sonra o böyüməyə və şüşəyə yerləşməməyə başladı, mən onu məhv
elədim. Çünki həmin hüceyrə mənim dişimdən götürülmüşdü. Deməli, mənim
klonlaşdırılmış surətim yarana bilərdi. Təsəvvür edirsən, balaca-balaca imranbəylər
neft quyularının yanındakı çala-çuxurda ora-bura qaçışır, toyuq balaları kimi
zibilliklərdə eşələnir, Azıxantrop da çaşır, hansını tutacağını bilmir. Halbuki ona
mən lazımam, mən, - dedi, sinəsinə döydü və güldü, sonra söhbətinə davam elədi. -
Təbii ki, bu, mənə lazım deyildi. Əsas məsələ Azıxantropun çənə sümüyündəydi.
Bəli, bəli, çənə sümüyündə... Nədənsə istəyimə çatacağıma, sağlam hüceyrə
tapacağıma əmin idim.
Bir gecə mən onu dəyişdim. Azıxantropa oxşar çənə sümüyünü Tarix İnstitutunun
başqa bölməsindən oğurladım, əslində oğurlamağa da ehtiyac yox idi, çünki onlara
nəzarət olunmurdu və gətirib əslilə dəyişdim. Bu, əlbəttə müvəqqətiydi. İşimi
qurtarandan sonra onu yerinə qaytaracaqdım. Mən o qədər də qansız adam
deyiləm, ürəyim yumşaqdı, razı olmaram ki, kimsə mənim güdazıma getsin.
Həmin ərəfədə bizim evləri sökməyə başladılar. Mən Bakıda qeydiyyata
düşməmişdim. Evin sənədləri də ölmüş əmimin adınaydı. Ona varisliyimi sübut
edən sənəd yalnız mənə qalan və notariusda təsdiqlənən kağızıydı. Vur-tut saralmış
bir vərəq...
Bizim evləri alan iş adamı ilə uzun çənə-boğazdan, get-gəldən sonra o, mənə evin
dəyərindən qat-qat aşağı pul verdi. Əclaf, çox xəsis adam idi. Amma o yazıq
hardan biləydi ki, bir azərbaycanlı balası bəşəriyyətin doğuş nöqtəsini axtarır,
paralanmış vətəni, şair xalqı, qaraqaş-qaragöz milləti naminə böyük kəşflərə baş
vurub, hətta bu yolda canını da qurban verməyə hazırdır. O isə. O isə bir
qəpiyindən belə keçmək istəmirdi.
Nə isə... Bu pul eksperimentləri keçirmək üçün kifayət edərdi. Mən belə
düşünürdüm. Nəinki düşünürdüm, hətta inanırdım da. Amma belə olmadı. Bəli,
bəli, belə olmadı...
Pulu alandan sonra bura köçdüm. Kimsəsiz bir binadır. Qonşularım siçovullar və
çaqqallardır. Sonuncular gecələr mənə qonaq gəlirlər. Hərdən tülkülər da buralarda
sülənir. O qədər çoxdular ki, sülək itlərin hamısını buradan qovublar...
İmranbəyin söhbəti mənə cansıxıcı və uzun gəldi. Günəş çoxdan batmışdı.
Zirzəminin bacasından düşən işıq yox olmuşdu. İçəri qaranlıq idi. Çölə çıxmaq
olardı.
- Çölə çıxaq, havam çatmır, - dedim.
Dostları ilə paylaş: |