13
Tarix Dostiyev
tarix elmləri doktoru, professor
İSLAM DÖVRÜ MÜLKİ MONUMENTAL MEMARLIĞI
AZƏRBAYCANIN ARXEOLOJİ İRSİNDƏ
Birgə yaşayış tərzinin hakim olduğu şəhərlər qədim dövrlərdən
istehsal, mədəniyyət və intellektual potensalın cəmləşdiyi,
cəmiyyətin sosial-iqtisadi, siyasi və mədəni inkişafında böyük
rol oynayan və onun tərəqqisinə təkan verən mərkəzlər idi. Orta
əsrlərdə Azərbaycanda urbanizasiya prosesi yüksək səviyyəyə
çatmış, bu isə şəhərsalma fəaliyyətinin genişlənməsində öz
təcəssümünü tapmışdır.
Orta əsr Azərbaycan şəhərlərinin simasını müsəlman Şərq
memarlığı üçün səciyyəvi olan ictimai və dini binalar – məscidlər,
minarələr, mədrəsələr, köşk-qəsrlər, saray kompleksləri,
karvansaralar, örtülü bazarlar, ictimai hamamlar və s.
müəyyənləşdirirdi. İslamın yayılması ilə Azərbaycan şəhərlərinin
tikintilərinin tipologiyası yeni tip binalarla zənginləşirdi.
Azərbaycan şəhərlərində də, Şərqin digər müsəlman ölkələrində
olduğu kimi, monumental tikililərin yeni tipləri: məhəllə və Came
məscidləri, minarələr, mədrəsələr və digər ictimai-dini binalar
ucaldılırdı. Mülki və dini binaların tikintisində çatma tağlar, tağ-
tavanlar, günbəzlər, çatma tağlı portallar, şəbəkəli pəncərələr,
stalaktit karnizlər kimi konstruktiv elementlərdən geniş istifadə
olunurdu .
Hazırkı məruzədə orta əsr Azərbaycan şəhərlərinin ərazisində
aparılan arxeoloji qazıntılar nəticəsində üzə çıxarılmış, erkən
və klassik islam dönəmlərinə aid olunan mülki monumental
memarlıq abidələrini səciyyələndirməyə cəhd edəcəyik.
Arxeoloji qazıntılar geniş miqyasda aparılmadığından
VIII-X əsrlərin tikililəri, eləcə də sonrakı dövrlərin tikililəri əksər
hallarda komplekslər şəklində deyil, tək-tək üzə çıxarılmışdır.
Bununla belə arxeoloji qazıntıların miqyasının məhdudluğuna
14
baxmayaraq üzə çıxarılmış tikinti qalıqları erkən islam dövrü
memarlığının tədqiqi üçün çox qiymətli faktik materiallar olmaqla,
Azərbaycan şəhərlərində inşaat texnikası və memarlığının yüksək
səviyyəsindən xəbər verir.
Şirvanın mülki memarlığının maraqlı nümunələrindən biri
arxeoloji qazıntılar zamanı Şamaxının VI qazıntı sahəsində
üzə çıxarılıb. Arxeoloji tədqiqatlar nəticəsində ictimai təyinatlı
həmin binanın bir salonu və üç otağı tədqiq olunub. Lakin divar
qalıqlarının qazıntı sahəsində şimal və cənuba doğru uzanması
kompleksin geniş sahəli, çoxotaqlı olduğunu təsdiqləməyə imkan
vermişdir . Bina səliqə yonulmuş daşlardan əhəngli məhlulla inşa
olunmuşdu. Nisbətən yaxşı mühafizə olunmuş qərb divarında
75x50x30 sm ölçüdə taxça düzəldilmişdi.
Arran memarlıq məktəbinin mülki monumental binalarının
səciyyəvi xüsusiyyətlərinin müəyyənləşdirilməsində Bərdə,
Gəncə, Şəmkir, Beyləqan və Dəbildə aparılmış arxeoloji
qazıntıların materiallarının əhəmiyyəti olduqca böyükdür. Arran
memarlıq məktəbinin səciyyəvi xüsusiyyətlərindən biri qarışıq
hörgü üslubundan - bişmiş kərpic, çaydaşı və yerli ağ daşın xüsusi
qayda üzrə hörgüdə işlədilməsidir. Memarlıq tariximizdə «Gəncə
hörgüsü» adı ilə məlum olan hörgünün xüsusiyyəti çaydaşı ilə
bişmiş kərpicin divar səthində naxış yaradan qayda əsasında
birlikdə işlədilməsidir. Arran memarlıq məktəbinin digər səciyyəvi
xüsusiyyəti tikililərdə hörgünün çoxrəngli olmasındadır. Məsələn,
Şəmkir şəhərinin içqalasında bişmiş kərpiclə yerli ağdaş və göy
rəngli çaydaşı hörgüdə xüsusi zolaqlar şəklində tətbiq edilərək
açıq və tünd, soyuq və isti rənglərin növbələşməsindən alınan
bədii effekt yaradır, hörgüyə xüsusi bir görkəm verir.
Şəmkir şəhər yerində IV qazıntı sahəsində üzə çıxarılmış, qəsr
divarı ilə möhkəmləndirilmiş
IX-X əsrlərdə fəaliyyət göstərmiş
və XI əsrin əvvəllərində yangın nəticəsində sıradan çıxmış
monumental binanın arxeoloji qazıntısı xüsusi maraq doğurur.
Ümumi sahəsi 2000 kv.m.-dən artıq olan binanın dördbucaq
biçimli, sütunlu həyəti ətrafında 10 artıq otaq yerləşirmiş.
Otaqların qapısı həyətə açılırmış. Otaqlardan beşi artıq arxeoloji
15
qazıntılarla öyrənilib. Binanın divarlarında hörgünün alt cərgələri
çaydaşından, üst cərgələr isə çiy kərpicdən hörülüb. Daş hörgüdən
çiy kərpic hörgüyə keçiddə ağac qurşaqlar olubdur. Kompleksin
diqqətlə öyrənilməsi binanın dam örtüyünün tağtavanlı olduğunu
müəyyənləşdirməyə əsas verir.
Şamaxı, Bakı, Dərbənd, Qəbələ, Gəncə, Şəmkir, Beyləqan,
Dəbil, Xaraba-Gilan və başqa şəhərlərdə aparılan qazıntılar
şəhristanda, xüsusilə XI-XII əsrlərdə tikintilərin çoxluğundan,
onların sıx yerləşməsindən xəbər verir. Arxeoloji qazıntılarla
Dərbənddə, Şamaxıda, Bakıda, Şabranda üzə çıxarılmış ictimai-
dini binaların, yaşayış evlərinin, istehkam tikililərinin qalıqları
Şirvan memarlığı üçün səciyyəvi olan xüsusiyyətləri özündə əks
etdirir.
Son illər Şamaxı şəhərində inşaat işləri zamanı üzə çıxarılmış
monumental bina qalıqlarının Şirvanşahların saray tipli
binalarından birinin qalıqları olduğu ehtimal edilir.
Ümumiyyətlə, arxeoloji qazıntılar nəticəsində üzə çıxarılmış
tikili qalıqları və salamat qalmış memarlıq abidələrinin tədqiqi
orta əsr tikililərinin bir çox səciyyəvi ünsürlərini, onların
xüsusiyyətlərini müəyyənləşdirməyə imkan verir. İnşaatçılar
müxtəlif tip tikililəri ucaldarkən ərazinin xüsusiyyətlərini və
inşa olunacaq binanın xarakterini nəzərə almaqla öz işlərini
qururdular. Tikilinin bünövrəsinin möhkəmliyinə xüsusi diqqət
yetirilirdi. Təbii şəraitin imkan verdiyi ərazilərdə qayalıqlardan
səmərəli istifadə olunurdu. Bunu Bakıda, İçərişəhərdə aşkarlanan
tikinti qalıqları əyani nümayiş etdirir. Qayalıq olmayan ərazilərdə
tikililərin bünövrəsi üçün xəndək qazılır, qaya daşlarından və
ya çaydaşılarından adi palçıqla və ya əhəngli məhlulla özül
qoyulurdu. Kürsülük çox vaxt bünövrə ilə vahid konstruksiya
təşkil edirdi. Bir, iki, bəzən hətta üç pilləli stilobata təsadüf
olunur. Kürsülük divarların dayanaqlığını artırır, xüsusilə binanın
antiseysmik imkanlarını gücləndirirdi. Kürsülüyün iri daşlardan
hörülməsinə üstünlük verirdilər.
Dostları ilə paylaş: |