M.P.Vaqif
və müasirlik
16
normal bədii zövq vahidi kimi alır. Buna görə də Vaqifin lüğəti kimlərdənsə kəmiyyətcə arxada qalar, ancaq
semantik əhatəsinə görə heç bir şairin dili onunla bəhsə girə bilməz.
Azərbaycan filologiyasında M.P.Vaqif sənətinin böyüklüyünü hamıdan daha yaxşı dərk (və şərh) edən
F.Köçərli şairin dilinin (ümumiyyətlə, təfəkkürünün) xalqın məişətinə aşınalıqdan irəli gələn naturalizmini
göstərmək məqsədilə yazmışdı: “Qəribə hal budur ki, yüz ildən bəri bizim tərəkəmə xalqının dolanacağı
dəyişməyibdir. Necə ki, Vaqifin əsərində onlar narahat və natəmiz və fəna bir halda güzəran edirdilər, indi də
həmin qərar üzrə məişət etməkdədirlər. Tərəkəmə övrətlərinin çoxusu əsla təmizlik bilməzlər. Necə ki, şair
onları vəsf edir, uzun dırnaqlı, baldırı çirməkli, yalın ayaqlı, yorğanı-yasdığı tozlu-torpaqlı… həmin bizim
tərəkəmə xalqının övrətləridir ki, əllərin-üzlərin həftədə bir dəfə yumazlar, başların daramazlar, danışmaq
bilməzlər və örkən-çatı toxumaqdan qeyri bir şeyə qabiliyyətləri yoxdur. Həqiqətdə “hazır çobandılar,
düdükləri yox”.
Molla Pənah Vaqifin adı həm də Azərbaycanın tarixi taleyində özünəməxsus yeri olan ictimai-siyasi
xadimlərdən biri kimi çəkilir. O, Azərbaycanın xanlıqlar dövrünün tanınmış dövlət xadimlərindən biri kimi
ölkə əhəmiyyətli məsələlərin həllində, xüsusən xarici əlaqələrin genişlənməsində və zəhmətkeş xalqla saray
arasında münasibətlərin tənzimlənməsində mühüm rol oynamışdır. Qarabağ xanlığının siyasi tarixində Molla
Pənah Vaqifin böyük xidmətləri olmuşdur. Dövlət işlərində Vaqif elmi-helmi və uzaqgörənliyi və xalqa
yaxınlığı ilə Molla Pənah Vaqif ola bilmişdir.
Molla Pənah Vaqif Azərbaycan ədəbiyyatında heca vəznli şeir məktəbi yaratmışdır. Böyük sənətkarın
adı ilə bağlı olan şeir-sənət ənənələri yaşamış, ədəbiyyatımızın sonrakı inkişaf mərhələlərində yaradıcılıqla
davam etdirilmişdir. Azərbaycan ədəbiyyatında heca vəznli xalq şeiri üslubunun möhkəmlənib aparıcı
mövqe tutmasında Molla Pənah Vaqifin mühüm rolu olmuşdur. Onun adı və sənəti həmişə uca tutulmuş,
yüksək ehtiramla yad olunmuşdur. Xalq şairi Səməd Vurğunun məşhur “Vaqif” tarixi dramı (1938) və Yusif
Vəzir Çəmənzəminlinin “İki od arasında” (1937) romanı qüdrətli sənətkara bəslənilən ümumxalq ehtiramına
Azərbaycan ədəbiyyatında ucaldılmış möhtəşəm abidələrdir. Bəstəkar Ramiz Mustafayevin “Vaqif” operası
(1960) böyük söz ustadının həyat və sənət ideallarını xalqımıza çatdırmağa uğurla xidmət edir.
Azərbaycan xalqının Ümummilli Lideri Heydər Əliyevin 1982-ci ildə Azərbaycanın qədim Şuşa
şəhərində Molla Pənah Vaqifə ucaltdığı böyük məqbərə bu ölməz sənətkarın ədəbiyyatımızın inkişafı
sahəsindəki xidmətlərinə və ictimai-siyasi fəaliyyətinə dövlət səviyyəsində verilmiş yüksək qiymətin parlaq
ifadəsidir. Ermənistan silahlı birləşmələrinin Dağlıq Qarabağı işğal edərkən Vaqifin məqbərəsini dağıtması
bu təcavüzkar ölkənin mədəniyyətdən uzaq olan mənəviyyatsız simasını əks etdirir. Görkəmli Azərbaycan
şairi və ictimai xadimi Molla Pənah Vaqifin anadan olmasının 300 illik yubileyinin doğma ölkəsi ilə birlikdə
UNESCO və TÜRKSOY miqyasında beynəlxalq səviyyədə qeyd olunması böyük ümummilli və bəşəri
ideallara xidmət edən böyük sənətin təntənəsidir. Azərbaycan Respublikasının Prezidenti İlham Əliyevin
“Böyük Azərbaycan şairi Molla Pənah Vaqifin 300 illik yubileyinin keçirilməsi haqqında”kı 12 yanvar 2017-
ci il tarixli sərəncamı müstəqil dövlətimizdə sənətə və sənətkara bəslənilən əbədi ehtiramın parlaq və əməli
nümunəsidir. Dövlət sərəncamında öz əksini tapmış aşağıdakı sözlər Molla Pənah Vaqifin ölməz sənətinin
yüksək qiymətini ifadə etməklə bərabər, qarşıda duran mühüm vəzifələri də nəzərə çarpdırır: “Molla Pənah
Vaqif öz ənənələri ilə seçilən ədəbi məktəb yaratmış ölməz sənətkardır... Azərbaycan şeiri Vaqifin sayəsində
tarixinin növbəti mərhələsinə qədəm qoymuşdur. Onun klassik bədii fikir salnaməmizin parlaq
səhifələrindən birini təşkil edən irsi müasir dövrdə də insanların əxlaqi-mənəvi kamilləşməsinə xidmət
göstərir”.
Ədəbiyyat
1. Cəfərov N. Azərbaycanşünaslığın əsasları. Bakı:
Pedaqogika, 2005
2. Cəfərov N. Azərbaycan türkcəsinin milliləşməsi tarixi. Bakı: Az.DKP, 1995
3. Cəfərov N. Molla Pənah Vaqif. Bakı: Ressenans-A, 2017
4. Xudiyev N. Seçilmiş əsərləri. Bakı: Elm və təhsil, 2012
5. Vaqif M.P. Seçilmiş əsərləri. Bakı: Şərq-Qərb, 2004
6. Vaqif M.P – 300. (Tərtib edənlər: S.Quliyeva, L.Əhmədova). Bakı: Milli Kitabxana, 2017
M.P.Vaqif və müasirlik
17
XƏLİLOV NİZAMİ
filologiya üzrə elmlər doktoru, professor
Bakı Dövlət Universiteti
VAQİF YARADICILIĞINDA AŞIQ POEZİYASININ YENİ MƏRHƏLƏSİ VƏ
ŞAİRİN AŞIQ YARADICILIĞINA TƏSİRİ
Açar sözlər: M.P.Vaqif, aşıq yaradıcılığı, qoşma, müxəmməs
The place of the Ashug poetry in Vagif’s activity and it’s stages and impact poet to Ashuq poetry
Ashug poetry had special place in M.P.Vagif’s activity. Using ashug poetry he gave a new colour to
classic poetry. At the same time using ashug poetry helped him to enlarge it’s development, add it some new
colours and enrich it.
Keywords: Vagif, Kind of ashug poetry, goshma, muxammas, garayli, folk poetry
Heca vəznli şeir M.P.Vaqif yaradıcılığında silinməz izlər buraxdı. Onun əsərlərinin poetikası həqiqi
mənada gələcək şeirin cığırlarını müəyyənləşdirdi. O, Azərbaycan poeziyasına yeni üslub, forma gətirdi.
Onun şeirlərindəki dil zənginliyi hadisəyə çevrildi, klassik poeziyaya yeni bir nəfəs verdi. Məhəbbət
lirikasına yeni siqlət gətirdi. Vaqif lirikası aşıq poeziyasından bəhrələndiyi kimi, eyni zamanda aşıq poeziya-
sının inkişafını genişləndirdi, ona yeni çalarlar əlavə etdi. Müxəmməs janrı aşıq poeziyasında Vaqifdən əvvəl
olubsa da, buna rast gəlmirik. Aşıq ədəbiyyatında və klassik poeziyada müxəmməsin ilk mükəmməl
nümunəsini Vaqif yaradıcılığında müşahidə edirik.
Biz bu mülahizəni söyləyəndə Vaqifə qədər müxəmməs şeir formasının olmasını əsla inkar etmirik.
Güman ki, başqa şeir şəkilləri kimi müxəmməs forması da olmuşdur. Lakin bütün tələblərə, yəni, mükəmməl
vəzn quruluşuna və qafiyələnmə prinsiplərinə əməl olunmasından söhbət gedəndə, ilk növbədə M.P.Vaqif
yada düşür.
Müxəmməsdən bəhs edən bəzi tədqiqatçılar da bu formanın yazılı ədəbiyyatdan aşıq poeziyasına
keçməsi fikrindədirlər.
Biz də o fikirdəyik ki, müxəmməs şeir forması M.P.Vaqifdən çox-çox əvvəl yaranmışdır. Hətta
M.Füzulinin beşlikləri də müxəmməs şeir formasındadır. Lakin M.P.Vaqif yaradıcılığındakı mükəmməl
müxəmməs formasına ondan əvvəlki mənbələrdə rast gəlmək olmur.
Onu da nəzərə çatdıraq ki, Vaqifin müxəmməslərindən bəhs edənlər birinci növbədə “Görmədim”
müxəmməsini diqqətə çatdırırlar. Lakin Vaqifin qoşmaları kimi, müxəmməslərində də aşiq-məşuq
münasibətlərinin təsviri o qədər güclüdür ki, sanki şair canlı bir mənzərə yaradır.
Şairin yaradıcılığında məhəbbət mövzusunda yazılmış şeirləri üstünlük təşkil edir. Vaqifin poe-
ziyasında gözəllərin tərifi o dərəcədə canlıdır ki, sanki həmin gözəl səninlə üzbəüz dayanıb, qarşındadır.
Bütün dünya xalqlarının qədim və orta əsrlərində elə bir şair təsəvvür etmək olmaz ki, o, məhəbbəti
tərənnüm etməsin. Bu cəhətdən Azərbaycan orta əsr poeziyası xüsusilə seçilir. Bir tərəfdən aşıq şeirinin
geniş vüsət alması, digər tərəfdən aşıq şeiri tərzində yazan şairlərin get-gedə artması ilk növbədə onların
canlı dil ilə, geniş kütlə ilə təmasından, ünsiyyətindən irəli gələn bir hal idi. Bu bolluğun içərisində seçilmək,
yeni söz demək, yeni forma, məzmun gətirmək, yeni boyalar əlavə etmək, əlbəttə ki, hər kəsə qismət deyildi.
Bu baxımdan Vaqif yaradıcılığı diqqəti daha çox çəkir. Prof.A.Dadaşzadə yazır: “İlk baxışda başqa şairlər
kimi, Vaqif də gözələ məhəbbətini bildirir, hətta bəzən hicran əzablarından şikayətlənir. Lakin aydındır ki,
Vaqifin gözəlləmələri ilə ondan əvvəlki klassik məhəbbət lirikası bir-birindən çox fərqlənir. Vaqifin lirikası
həm Füzuli, həm Nəsimi, həm Xətai lirikasından seçilir” (2, 68-69).
M.P.Vaqif hər şeydən əvvəl yenilikçi şair idi. XVIII əsrdə islam ideologiyasının qüvvətli olduğu bir
şəraitdə: “Mənim yarım deyil ol Kəbədən kəm”, “Sən yüz mərtəbə ol Kəbəyi ülyadan artıqsan” kimi ifadələr
işlətmək o qədər də asan deyildi. Vaqif isə insan gözəlliyini hər şeydən uca tuturdu. O, hər cür örtüyə,
pərdəyə qarşı çıxaraq “ataq üzdən-gözdən tamam niqabı” deyərək realizmi şeirə, sənətə gətirirdi. Vaqifin
vəsf etdiyi məhəbbətdə üç mühüm cəhət – gözəllik, vəfa, ağıl birləşir və bir-birini tamamlayır.
Vaqif gözəlin qaşını qibləyə, üzünü Kəbəyə bənzədir. Gözəldə naz-qəmzə olmasını arzulayır:
Həqdir, gözəl xoşdur cahan içində,
Gözəldə bir nazü qəmzə gərəkdir.
Didarını görmək iman təzələr,
Qaşı qiblə, üzü Kəbə gərəkdir.