6
A Z Ə R B A Y C A N V Ə K İ L İ ‐ XII nömrə
İndinin özündə də CM‐nin bəzi maddələrində söylədiyimiz fikirlərlə üst‐üstə düşən nümunələr
vardır. Məsələn AR CM‐nin 120,126 və 127‐ci maddələrində nəzərdə tutulan əməllərin xuliqanlıq
zəmnində törədilməsi halı ağırlaşdırıcı tövsif edici hal kimi nəzərdə tutulmuşdur. CM‐nin əmlakı
qəsdən məhv etmə və ya zədələmə cinayətindən bəhs edən 186‐cı maddəsində, yol hərəkəti və
nəqliyyat vasitələrinin istismarı qaydalarını pozma cinayətlərindən bəhs edən 263‐cü maddəsində
və digər maddələrdə də belə ağırlaşdırıcı tövsif edici əlamətlər nəzərdə tutula bilər.
Cinayət qanununda (CM‐nin 263‐1‐ci maddəsin) yol hərəkəti və ya nəqliyyat vasitələrinin
istismarı qaydalarının sərxoş halda və ya nəqliyyat vasitələrini idarə etmək hüququ olmayan şəxs
tərəfindən pozulması ağırlaşdırıcı tövsif edici əlamət kimi nəzərdə tutulduğu halda, ağır nəticəli
yol‐nəqliyyat hadisəsinin məhz xuliqanlıq zəmnində törədilməsi (avtoxuliqanlıq) ağırlaşdırıcı tövsif
edici əlamət kimi nəzərdə tutulmur. Halbuki, bir sıra yol‐nəqliyyat hadisələrinin məhz avtoxuliqanlıq
(sürət yarışı) şəklində törədilməsi nəinki ağır nəticələrə gətirib çıxarır, həm də əhalinin dincliyini
nümayişkaranə şəkildə pozan bu hərəkətlərlə cəmiyyətə qarşı açıqca hörmətsizlik nümayiş etdirilir.
Xatırladaq ki, ağır nəticəli olmayan belə əməllər üçün İnzibati Xətalar Məcəlləsində kifayət qədər
ciddi tənbeh tədbiri nəzərdə tutulmuşdur. (İXM‐nin 511‐ci maddəsi)
Bunu da xatırlatmağı lazım bilirik ki, aldığımız məlumata görə dünyanın əksər ölkələrinin
cinayət qanunvericiliklərində xuliqanlıq qismindı ayrıca norma yoxdur. Bu faktın özü də həmin növ
cinayət tərkibinin qanundan çıxarılmasının vətəndaşların qanunla qorunan hüquqlarının həyata
keçirilməsinə mənfi təsir etməyəcəyinə dəlalət edir.
Əlbəttə yazı müəllifi başa düşür ki, cinayət qanunundan xuliqanlıq adlanan cinayət tərkibinin
birdəfəlik çıxarılması yaxın gələcəyin işi deyildir. Xuliqanlıq mövcudluğu mübahisə doğurmayan bir
cinayət tərkibi kimi şüurumuza hopmuşdur və bu sahədə tezliklə radikal dəyişikliklər etməyin bəlkə
də vaxtı çatmamışdır. Biz isə bu təklifin gec‐tez qəbul ediləcəyi ümidi ilə məsələnin gündəmdə
saxlanmasını zəruri hesab edirik.
Nəhayət xuliqanlıq cinayətləri ilə bağlı bir anlaşılmaz məsələyə də diqqət cəlb etmək istəyirik.
Məlumdur ki, həyat və sağlamlıq əleyhinə cinayətlərdən olan qəsdən adam öldürmə, qəsdən
sağlamlığa ağır zərər vurma və qəsdən sağlamlıqa az ağır zərər vurma kimi cinayətlər xuliqanlıq
zəmnində də törədilir. Qanunverici belə əməllərin xuliqanlıq zəmnində törədilməsini ağırlaşdırıcı
tövsifedici əlamət kimi qəbul etməklə qanunda müvafiq norma yaratmışdır. (CM‐nin 120.2.2. 126.2.4
və 127.2.3‐cü maddələri). Amma bu da mübahisesiz faktdır ki, xuliqanlıq zəmnində baş verən hadisə
zamanı zərərçəkmişin sağlamlığına nəinki ağır, yaxud az ağır, həmçinin yüngül zərər də vurula bilər.
Lakin hansı səbəbdənsə xuliqanlıq zəmnində zərərçəkmişin sağlamlığına yüngül zərər vurulması
qanunda (CM‐nin 128‐ci maddəsi) ağırlaşdırıcı tövsif edici əlamət kimi nəzərdə tutulmamışdır. Bunu
məntiqə uyğun heab etmək olmaz və qanundaki bu anlaşılmazlıq tezliklə aradan qaldırılmalıdır.
Biz öz tərəfimizdən qəsdən sağlamlığa yüngül zərər vurmadan bəhs edən CM‐in 128‐ci maddəsi
ilə müəyyən olunan normanın aşağıdakı kimi verilməsini təklif edirik.
Maddə 128. Qəsdən sağlamlığa yüngül zərər vurma.
128.1
Sağlamlığın qısa müddətdə pozulmasına və ya ümumi əmək fəaliyyətinin cüzi
itirilməsinə səbəb olmuş qəsdən sağlamlığa yüngül zərər vurma – üç yüz manatdan beş yüz
manatadək miqdarda cərimə və ya altı ayadək müddətdə islah işləri və ya altı ayadək müddətə
azadlıqdan məhrum etmə ilə cəzalandırılır.
128.2
Eyni əməllər xuliqanlıq niyyəti ilə törədildikdə ‐ beş yüz manatdan min manatadək
miqdarda cərimə və ya bir ilədək müddətə islah işləri və ya bir ilədək müddətə azadlıqdan məhrum
etmə ilə cəzalandırılır.
7
A Z Ə R B A Y C A N V Ə K İ L İ ‐ XII nömrə
Anar Bağırov
VKRH‐nin üzvü
AZƏRBAYCAN RESPUBLİKASINDA VƏ XARİCİ
ÖLKƏLƏRDƏ ÖDƏNİŞSİZ HÜQUQİ YARDIM
ALMAQ HÜQUQUNUN KONSTİTUSİON TƏNZİMİ:
BƏZİ KEYFİYYƏT VƏ EFFEKTİVLİK MƏSƏLƏLƏRİ
Ölkədə konstitusionalizmin nəzəriyyə və praktikasının müasir inkişaf mərhələsi sosial‐hüquqi
dövlətçilik ideyasının tanınması və həyata keçirilməsi ilə səciyyələnir ki, bu da funksional olaraq
bütün ictimai‐siyasi institutların demokratik inkişafına yönəlmişdir. Konstitusion quruculuğun
strategiya və taktikasının başlıca məqsədi “əsas qanun”da təsbit olunmuş siyasi, hüquqi, iqtisadi və
sosial məqsəd və dəyərlərin əldə olunması istiqamətində konstitusion‐hüquq münasibətləri
subyektlərinin bütün hərəkətlərinin sistemləşdirilməsi və koordinasiyasından ibarətdir.
Baxılan kontekstdə, ali hüquqi qüvvəli akt olaraq Azərbaycan Respublikası Konstitusiyasının
rolunun, əsas istiqamət məzmununun və tənzimedici təsir formalarının tədqiqi mühüm əhəmiyyət
kəsb edir. Bura ən vacib ictimai münasibətlərin qurulması, inkişafı və təkmilləşdirilməsi, o cümlədən
insan və vətəndaşın keyfiyyətli hüquqi yardım almaq hüququ, bu hüququn müdafiəsi, onun
realizəsinin effketivliyi və məhsuldarlığının təmin edilməsi daxildir. Məlumdur ki, demokratik,
hüquqi və sosial dövlətin bütün institutularının qurulması və fəaliyyəti onun Konstitutsiya
normalarının məzmunundan, onların realizəsinin keyfiyyət və effektivliyindən birbaşa asılıdır.
Azərbaycan Respublikasının Konstitusiyası Azərbaycan dövlətini demokratik, hüquqi, dünyəvi
və unitar respublika kimi müəyyən etməklə, bir tərəfdən, onun demokratizminin sistemqurucu
əlamətlərini təsbit edir, hansılar ki, dövlətin və cəmiyyətin suverenliyində, xalqın hakimiyyətin
mənbəyi olmasında, dövlət hakimiyyətinin qanunverici, icra və məhkəmə qollarına bölünməsində,
ideoloji, iqtisadi və siyasi plüralizmdə (müxtəliflikdə) və sair prinsiplərdə ifadə olunurlar, digər
tərəfdən, ictimai həyatın müxtəlif sferalarında Azərbaycan dövlətinin funksiyalar sistemini müəyyən
edir ki, bu sferalardan biri də, insan və vətəndaşın keyfiyyətli hüquqi yardım almaq hüququ, bu
fundamental hüququn təmin olunması və müdafiəsidir. Azərbaycan Respublikasının Konstitusiyası
digər əsas hüquqlar kimi bu hüququn praktiki realizəsinin fundamental normativ‐hüquqi bazasını
təşkil edir. Konstitusion normaların keyfiyyət və effektivlik kimi əlamətlərinə digər bütün
normalarda olduğu kimi bu normalarda da əməl olunması çox vacib əhəmiyyət kəsb edir. Buna
görə, hazırkı tədqiqat çərçivəsində ilk növbədə, hər kəsin yüksək keyfiyyətli hüquqi yardım almaq
hüququnu tənzim edən Azərbaycan Respublikası Konstitusiya normalarının keyfiyyətlilik və
effektivlik əlamətləri baxımından nəzərdən keçirilməsini zəruri sayrıq.
Qeyd edək ki, hər kəsin yüksək keyfiyyətli hüquqi (yuridik) yardım almaq hüququnun tədqiqi
ilə B.K.Botnev, L.K.Ayvar, Q.B.Mirzoyev, İ.S.Yartıx, Y.Q.Tarlo, O.Y.Kutafin, A.A.Levi və digər görkəmli
alimlər məşğul olmuşlar. Bununla belə, Azərbaycan Respublikasının müasir konstitusionhüquqi
inkişaf mərhələsi, xüsusən, tədqiq olunan hüquq institutunun qanunvericilik səviyyəsində
tənzimlənmə ərəfəsində olması mövzunu yüksək səviyyədə aktuallaşdırır.