12
A Z Ə R B A Y C A N V Ə K İ L İ ‐ VIII nömrə
Sadiq Əfəndiyev
Vəkillər Kollegiyasının üzvü
CİNAYƏT PROSESİNDƏ ŞƏXSİN ÖLKƏDƏN GETMƏK
HÜQUQUNUN MƏHDUDLAŞDIRILMASI
Məlumdur ki, müasir beynəlxalq və milli hüquq sistemlərinin
qarşısında duran mühüm və aktual məsələlərdən biri insan hüquq
və azadlıqlarının qorunmasıdır. Bu bəşəri missiyanın həlli ilk
növbədə insan hüquq və azadlıqlarının qanunvericilik səviyyəsində aydın surətdə təsbitindən və
məhkəmə müdafiəsi mexanizminin dəqiq müəyyən edilməsindən keçir. Bu “aydınlıq” və “dəqiqliyi”
hər şeydən əvvəl müasir beynəlxalq hüququn mütərəqqi kəşflərindən sayılan və hüquqi sabitliyin
təmin edilməsinə yönəlmiş hüquqi müəyyənlik prinsipi tələb edir. Çünki dəqiq ifadə edilməmiş və
real müdafiə mexanizminə malik olmayan hüquq son anda realizəsiz qalaraq xəyali bir hüquqa
çevrilir. Ona görə də əsas qanun hesab edilən konstitusiyanın müddəaları da daxil olmaqla hər bir
qanunun müddəası birmənalı və aydın şəkildə ifadə olunmaqla hər kəs üçün hüquq və azadlıqlarının
müdafiəsinə zəruri hüquqi şərait yaradılmalıdır.
İnsan hüquq və azadlıqları mütləq və məhdudiyyətsiz deyildir və zəruri hallarda qanunla müəyyən
olunmuş məhdudiyyətlərə məruz qala bilir. Məhz bu məhdudiyyətlər onların hüquqi müdafiəsini
zəruri edir.
İnsan hüquq və azadlıqlarına bu cür yanaşma Ümumdünya İnsan Hüquqları Bəyannaməsinin 29‐cu
maddəsinin ikinci hissəsində belə xülasə edilmişdir: “Hər bir insan öz hüquq və azadlıqlarını həyata
keçirərkən yalnız o məhdudiyyətlərə məruz qala bilər ki, onlar müstəsna olaraq başqalarının hüquq
və azadlıqlarının lazımi qaydada tanınması və onlara hörmət edilməsinin təmin edilməsi və
demokratik cəmiyyətdə əxlaq qaydalarının, ictimai asayişin və ümumi rifahın ədalətli tələblərinin
ödənilməsi naminə qanunla müəyyən edilmiş olsun”.
Bu müddəa İnsan Hüquqlarının və Əsas Azadlıqlarının Müdafiəsi Haqqında Avropa Konvensiyasının
18ci maddəsində bir daha konkretləşdirilmişdir: “Qeyd olunan hüquq və azadlıqlarla bağlı bu
Konvensiyada yol verilən məhdudiyyətlər, nəzərdə tutulduğundan başqa, hər hansı digər məqsəd
üçün tətbiq olunmamalıdır”.
Öz növbəsində Azərbaycan Respublikası Konstitusiyasının 71‐ci maddəsinə görə hər kəsin hüquq
və azadlıqları bu Konstitusiyada və qanunlarda müəyyən edilmiş əsaslarla, habelə digərlərinin
hüquq və azadlıqları ilə məhdudlaşır.
Hazırda hüquqi müstəvidə geniş spektirdə məhdudiyyətlərə məruz qalan əsas insan hüquq və
azadlıqlarından biri də insanın sərbəst hərəkət azadlığıdır. İnsanın sərbəst hərəkət azadlığı ilkin
və başlıca insan hüquqlarından biri hesab olunur. Antik dövrün filosofu Epiktet sərbəst hərəkət
azadlığını qısaca olaraq belə təsvir edirdi: “hara istəyirəm gedirəm, haradan istəyirəm qayıdıram”.
Lakin insanın sərbəst hərəkət azadlığı da digər hüquq və azadlıqlar kimi mütləq deyildir və bu
azadlığın reallaşdırılması digər hüquq və azadlıqların gözlənilməsi şərti ilə mümkündür.
Insanın sərbəst hərəkət azadlığı Azərbaycan Respublikası Konstitusiyasının 28‐ci maddəsində
ümumi azadlıq hüququnun tərkib hissəsi kimi nəzərdə tutulmuşdur. Maddənin 3–cü hissəsində
qeyd edilir: “Qanuni surətdə Azərbaycan Respublikasının ərazisində olan hər kəs sərbəst hərəkət
edə bilər, özünə yaşayış yeri seçə və Azərbaycan Respublikasının ərazisindən kənara gedə bilər”.
Azərbaycan Respublikasının Konstitusiyası sərbəst hərəkət azadlığı çərçivəsində hər kəsə sərbəst
surətdə aşağıdakı davranış imkanlarını vermişdir:
1)
ölkə daxilində sərbəst hərəkət edə bilmək imkanı;
2)
özünə yaşayış yeri seçə bilmək imkanı;
3)
Azərbaycan Respublikasının ərazisindən kənara gedə bilmək imkanı.
Eyni zamanda Azərbaycan Respublikası qanunvericiliyinin tərkib hissəsi olan İnsan Hüquqlarının və
Əsas azadlıqlarının Müdafiəsi Haqqında Avropa Konvensiyasının 2 saylı Protokolunun “Hərəkət
etmək azadlığı” adlanan 2‐ci maddəsinə görə qanuni əsaslarla hər hansı dövlətin ərazisində olan hər
kəsin həmin ərazidə sərbəst hərəkət etmək və özünə yaşayış yeri seçmək hüququ vardır. Hər kəs öz
ölkəsi də daxil olmaqla hər hansı ölkəni tərk etməkdə azaddır. Bu hüquqların həyata keçirilməsinə
milli təhlükəsizlik və ictimai asayiş maraqları naminə, ictimai qaydanın qorunması, cinayətlərin
qarşısının alınması, sağlamlığın və mənəviyyatın qorunması və ya digər şəxslərin hüquq və
azadlıqlarının müdafiəsi üçün qanunla nəzərdə tutulmuş və demokratik cəmiyyətdə zəruri olanlardan
başqa heç bir məhdudiyyətlər qoyula bilməz. Yeri gəlmişkən qeyd edək ki, sərbəst hərəkət etmək
azadlığı adı çəkilən Konvensiyada Azərbaycan Respublikasının Konstitusiyasından fərqli olaraq
ümumi mənada azadlıq hüququndan bəhs edən maddədə deyil, ayrıca bir maddədə nəzərdə
tutulmuşdur.
Fikrimizcə, Konvensiyanın mövqeyi sırf normativ‐texniki xarakter daşıyır və sərbəst hərəkət
azadlığının ayrıca təsbiti onun ümumi azadlıq hüququnun tərkib elementi kimi mahiyyətinə xələl
gətirmir. İstər milli, istərsə də beynəlxalq qanunvericiliyin tələblərinə görə insan və vətəndaşın
sərbəst hərəkət etmək azadlığı yalnız Konstitusiya və qanunlarda nəzərdə tutulmuş əsaslarla
məhdudlaşdırıla bilər, yəni hər hansı bir şəxsin qeyd olunan azadlığı yalnız qanunamüvafiq tətbiq
edilən və demokratik cəmiyyətdə ictimai maraqlarla əsaslandırılmış məhdudiyyətlərə məruz qala
bilər. Başqa hər hansı bir hal bu cür məhdudlaşdırma üçün əsas ola bilməz. Ölkəmizdə həyata keçirilən
cinayət prosesi zamanı cinayət prosessual tədbir qismində sərbəst hərəkət azadlığının
məhdudlaşdırılması ölkə ərazisində olan şəxslərin ölkədən getmək hüquqlarına məhdudiyyətin
qoyulması formasında həyata keçirilir. Bu məhdudiyyətin qanuni əsasları bir sıra qanunvericilik
aktlarında nəzərdə tutulmuşdur. “Ölkədən getmək, ölkəyə gəlmək və pasportlar haqqında” 14 iyun
1994‐cü il tarixli Azərbaycan Respublikası Qanununun 1‐ci maddəsi cinayət prosesində vətəndaş
cinayət işi üzrə şübhəli və ya təqsirləndirilən şəxs qismində tanındıqda, məhkum edildikdə və ya
barəsində tibbi xarakterli məcburi tədbirlər tətbiq edildikdə müvafiq olaraq barəsində cinayət təqibi
üzrə icraat başa çatanadək, cəzasını çəkib qurtaranadək və ya cəzadan azad edilənədək, yaxud tibbi
xarakterli məcburi tədbirlərin tətbiqi ləğv edilənədək onun ölkədən getmək hüququnun
məhdudlaşdırılmasını mümkün hesab etmişdir. Hüquq islahatları çərçivəsində qəbul edilmiş
Azərbaycan Respublikasının yeni Miqrasiya Məcəlləsində bu məsələ əvvəlki qanundan fərli olaraq
daha aydın və müfəssəl şəkildə öz əksini tapmışdır. Bu Məcəllənin qəbulu ilə əlaqədar “Ölkədən
getmək, ölkəyə gəlmək və pasportlar haqqında” 14 iyun 1994‐cü il tarixli Azərbaycan Respublikası
Qanununun sözü gedən məhdudiyyətlə bağlı qaydaları artıq öz əhəmiyyətini itirmişdir. Məcəllənin
2‐ci bölməsinin 3‐cü fəsili bütövlükdə vətəndaşların ölkədən getməsi və ölkəyə gəlməsi məsələlərinə
həsr edilmişdir. Həmin fəsildə yer almış 9‐cu maddədə vətəndaşların ölkədən getmək və ölkəyə
gəlmək hüququndan məhrum edilə bilinməzliyi kimi prinsip xarakterli müddəa bir daha
vurğulanmaqla, cinayət prosesinin həyata keçirilməsi ilə əlaqədar konkret olaraq dörd halda
vətəndaşın ölkədən getmək hüququnun məhdudlaşdırılmasının hüquqi şərtləri və müddətləri
göstərilmişdir. Bunlara aiddir:
1. Azərbaycan Respublikasının Cinayət‐Prosessual Məcəlləsinə uyğun olaraq tutulduqda və ya
barəsində hər hansı qətimkan tədbiri seçildikdə ‐ azad edilənədək, qətimkan tədbirinin müddəti
bitənədək və ya qətimkan tədbiri ləğv edilənədək (9.3.1);
2. məhkum edildikdə – Azərbaycan Respublikasının Cinayət Məcəlləsi ilə müəyyən edilmiş əsas
cəzasını çəkib qurtaranadək və ya bu Məcəllənin 9.3.4‐cü maddəsində nəzərdə tutulmuş hal istisna
olmaqla, cəzadan azad edilənədək (9.3.2);
3. Azərbaycan Respublikasının Cinayət‐Prosessual Məcəlləsinə uyğun olaraq barəsində tibbi
xarakterli məcburi tədbirlər tətbiq edildikdə – tibbi xarakterli məcburi tədbirlərin tətbiqi ləğv
edilənədək (9.3.3);
A Z Ə R B A Y C A N V Ə K İ L İ ‐ VIII nömrə
13