16
A Z Ə R B A Y C A N V Ə K İ L İ ‐ VIII nömrə
Lakin nəzərə alınması vacibdir ki, sərbəst hərəkət azadlığının məhdudlaşdırılmasının
qanunsuzluğundan şikayət edən şəxsə eyni zamanda inzibati və cinayət mühakimə icraatı
qaydasında rədd cavabının verilməsi vətəndaşların hüquq və azadlıqlarının məhkəmədə
müdafiəsinə təminat verən milli və beynəlxalq hüququn tələbləri ilə uzlaşmır.
Artıq qeyd etdiyimiz kimi, Əsas Qanunda bəyan edilmiş insan hüquq və azadlıqlarının
gerçəkləşdirilməsinin zəruri elementlərindən biri də həmin hüquq və azadlıqların hüquqi müdafiə
mexanizminin qanunvericiliklə dəqiq müəyyən edilməsidir. Bu baxımdan insanın sərbəst hərəkət
azadlığı hüququnun konstitusion səviyyədə təsbiti ilə yanaşı, qeyd edilən insan azadlığının zəruri
hallarda məhdudlaşdırılmasının və müdafiə edilməsinin dəqiq qanunvericilik tənziminə ehtiyac
vardır. Bu məqsədə nail olmaq üçün hər şeydən əvvəl mühafizə altına alınmış hüququn
qanunvericilik sistemində normativ yeri və pozulma ehtimallarına uyğun hüquqi müdafiə
mexanizmi müəyyən edilməlidir.
Fikrimizcə, cinayət prosesində şəxsin ölkədən getmək hüququnun məhdudlaşdırılmasının əsasları
və qaydalarının Azərbaycan Respublikasının Cinayət Prosessual Məcəlləsində nəzərdə tutulması
əhatəli
tənzimetmə
və
qanunvericiliyin
sistemləşdirilməsi
nöqteyi‐nəzərdən
daha
məqsədəmüvafiqdir. Bu məqsədəmüvafiqliyi şərtləndirilən hallardan biri cinayət prosesində şəxsin
ölkədən getmək hüququnu məhdudlaşdıran tədbirin (şəxsin haqqında məlumatların
Sərhədkeçməyə məhdudiyyət siyahısı”na daxil edilməklə onun ölkədən getməsinə məhdudiyyətin
qoyulması) öz hüquqi mahiyyətinə, təyinatına və məqsədlərinə görə əslində cinayət prosesində
tətbiq edilən prosessual məcburiyyət tədbiri olmasıdır.
Digər tərəfdən Azərbaycan Respublikası CPM‐nin 12.4‐cü maddəsində təsbit edilmiş prinsip
mahiyyətli imperativ müddəanın tələblərinə görə prosessual məcburiyyət tədbirlərinin tətbiqi ilə
əlaqədar şəxsin Konstitusiya ilə təsbit olunmuş hüquq və azadlıqlarının müvəqqəti
məhdudlaşdırılması barədə qərar yalnız zərurət olduqda bu Məcəllə ilə müəyyən edilmiş hallarda
və qaydada qəbul edilə bilər.
Deməli, cinayət prosesində tətbiq edilən hər hansı prosessual məcburiyyət tədbiri, o cümlədən də
Konstitusiyada təsbit edilmiş şəxsin sərbəst surətdə ölkədən getmək hüququnun
məhdudlaşdırılması yalnız CPM‐də nəzərdə tutulmuş hallarda və qaydada tətbiq edilə və həyata
keçirilə bilər. CPM‐dən kənar bu kimi halların və qaydaların müəyyən edilməsinə yol verilmir.
Eyni zamanda nəzərə alınmalıdır ki, şəxsin ölkədən getmək hüququnu məhdudlaşdıran tədbir şəxsin
bilavasitə ümumi mənada azadlıq hüququ ilə bağlı olduğundan ciddi prosessual məcburiyyət tədbiri
hesab olunmaqla həmin tədbirin tətbiq edilməsinin yalnız məhkəmə qərarı əsasında mümkünlüyü
prosessual qanunvericilikdə öz əksini tapmalıdır.
Təsadüfi deyildir ki, sərbəst hərəkət azadlığının önəmliyini nəzərə alan qanunverici Miqrasiya
Məcəlləsinin yuxarıda istinad etdiyimiz 9‐cu maddəsinin digər yarımbəndində (9.3.6) məhkəmə
qərarlarının icrası üzrə icraatda məhkəmə qərarı əsasında verilmiş icra sənədinin könüllü icra üçün
müəyyən olunmuş vaxtda üzürsüz səbəbdən icra edilməməsinə görə vətəndaşın ölkədən getmək
hüququnun müvəqqəti məhdudlaşdırılması üçün qanuni qüvvəyə minmiş məhkəmə qərarının
vacibliyi barədə göstəriş ifadə etmişdir.
Nəhayət, mövcud təcrübəyə əsaslanaraq apardığımız normativ‐hüquqi təhlil onu deməyə əsas verir
ki, Konstitusiyada əsas insan hüquq və azadlıqlarından biri kimi nəzərdə tutulmuş sərbəst hərəkət
azadlığının məzmununa daxil olan şəxsin ölkədən getmək hüququnun cinayət prosesində qanunsuz
məhdudlaşdırılması hallarından müdafiəsinə hüquqi təminat verən əhatəli və sistemli normativ
tənzimələməyə ehtiyac vardır. Bu ehtiyacın təmin olunması üçün ilk növbədə cinayət prosesində
sərbəst hərəkət azadlığının (ölkədən getmək hüququnun) məhdudlaşdırılması ilə bağlı həyata
keçirilən tədbir Azərbaycan Respublikasının Cinayət Prosessual Məcəlləsində ayrıca prosessual
məcburiyyət tədbiri kimi nəzərdə tutulmalı, onun tətbiqinin prosessual hüquqi əsasları və qaydaları,
eləcə də bu cür məhdudiyyətlərə məruz qalan şəxslərin məhkəmə nəzarəti qaydasında hüquqi
müdafiə imkanları konkretləşdirilməlidir.
A Z Ə R B A Y C A N V Ə K İ L İ ‐ VIII nömrə
17
Müzəffər Ağazadə
Respublikanın əməkdar hüquqşünası
EHTİYATSIZLIQDAN SAĞLAMLIĞA AZ AĞIR
ZƏRƏR VURMA CİNAYƏT MƏSULİYYƏTİNƏ
SƏBƏB OLMALIDIRMI?
Etiraf etmək lazımdır ki, ehtiyatsızlıqdan zərərçəkmişin sağlamlığına az ağır zərər vurma ilə
nəticələnən əməllərlə bağlı normalar cinayət qanunvericiliyində ən çox mübahisə doğuran
normalardandır. Bu fikir həm belə əməllər üçün qanunda cinayət məsuliyyəti müəyyən edilməsi,
həm də nəzərdə tutulan cəzaların növləri və hədləri məsələlərinə aiddir.
Məsələn, elə ondan götürək ki, ehtiyatsızlıqdan sağlamlığa az ağır və ya ağır zərər vurmadan bəhs
edən Azərbaycan Respublikası Cinayət Məcəlləsinin 131‐ci maddəsi öz strukturuna görə iki hissədən
ibarətdir. CM‐nin 131.1‐ci maddəsi ehtiyatsızlıqdan sağlamlığa az ağır, 131.2‐ci maddəsi isə
ehtiyatsızlıqdan sağlamlığa ağır zərər vurmaq üstündə məsuliyyətdən bəhs edir. Buna baxmayaraq
həm 131.1‐ci, həm də 131.2‐ci maddələrin sanksiyalarında eyni cəza ‐ ən çoxu 6 ayadək müddətdə
azadlıqdan məhrumetmə cəzası nəzərdə tutulur. Belə çıxır ki, ehtiyatsızlıqdan baş verən əməl
nəticəsində zərərçəkmişin sağlamlığına az ağır, yaxud ağır zərər dəyməsinin cəza təyini zamanı heç
bir əhəmiyyəti yoxdur.
Aydın deyildir ki, zərərçəkmişin sağlamlığına az ağır, yaxud ağır zərər vurulması eyni sanksiya ilə
əhatələnəcəkdisə, bu cinayətlərin obyektiv cəhəti üçün niyə bir dispozisiya deyil, iki dispozisiya
müəyyən edilmişdir. Halbuki CM‐nin bir cox maddələrinin dispozisiyasında əməlin zərərçəkmişin
sağlamlığına az ağır və ya ağır zərərə səbəb olması bir yerdə verilir və məhkəmələr cəza təyini
zamanı zərərin dərəcəsini nəzərə almalı olurlar.Bu növ əməllərə görə qanundakı başqa bir
uyğunsuzluğa diqqət yetirək. Məntiqə və cinayət‐hüquq nəzəriyyəsinə görə eyni nəticəli ictimai‐
təhlükəli əməlin (cinayətin) subyektiv cəhətdən qəsdən törədilməsi belə əməlin ehtiyatsızlıqdan
törədilməsinə görə daha ağır məsuliyyətə səbəb olmalıdır. Lakin CM‐nin ehtiyatsızlıqdan
zərərçəkmişin sağlamlığına az ağır zərər vurulması ilə bağlı normalarında bu prinsip pozulmuşdur.
Belə ki, CM‐nin 127‐ci maddəsində ağırlaşdırıcı tövsifedici əlamətlər (məsələn, zərərvurmanın xüsusi
amansızlıqla, və ya ümumi təhlükəli üsulla, yaxud zərərçəkmişin orqanlarından istifadə edilməsi
məqsədilə törədilməsi və.s.) olmadan zərərçəkmişin sağlamlığına qəsdən az ağır zərər yetirilməsi
təqsirkarın 2 ilədək müddətdə islah işlərinə və ya 2 ilədək müddətə azadlıqdan məhrum etmə
cəzasına məruz qalması ilə nəticələnə bilər. CM‐nin 262.1, 263.1, 263‐1.1, 266.1, 268.1 və 351.1‐ci
maddələri ilə nəzərdə tutulan əməllər isə ehtiyatsızlıq üzündən zərərçəkmişin sağlamlığına az ağır
zərər vurulması ilə əlaqədar məsuliyyətdən bəhs edir. Ehtiyatsızlıqdan törədilməsinə baxmayaraq
bu maddələrlə də ya qəsdən törədilən cinayətlər üçün nəzərdə tutulan qədər (2 ilədək müddətə
azadlıqdan məhrumetmə), bəzi hallardan isə hətta daha ağır ‐ 3 ilədək müddətə azadlıqdan
məhrumetmə cəzası nəzərdə tutulur. (Məsələn, 263‐1.1, 263‐1.2, 351.1‐ci maddələr). Nəzərə alınsa
ki, eyni əməllərin zərərçəkmişin sağlamlığına ağır zərər yetirməsinə səbəb olması da CM‐nin
263.11ci maddəsi ilə ən çoxu 3 il azadlıqdan məhrumetmə ilə nəticələnir, uyğunsuzluq göz
qabağındadır. Üstəlik yol hərəkəti və nəqliyyatın istismarı qaydalarının pozulması eyni zamanda
təqsirkarın 2 ildən 4 ilədək müddətə nəqliyyat vasitələrini idarə etmək hüququndan məhrum
edilməsinə də səbəb olur. Həm də bu növ əlavə cəza mütləq tətbiq edilməlidir.