15
İnsan hüquqları və vətəndaşlıq alt-xətti üzrə şagirdlər əsas insan hüquq və
azadlıqlarını, Azərbaycan Respublikasının Konstitusiyasında və Beynəlxalq Uşaq
Hüquqları Konvensiyasında təsbit olunmuş hüquq və vəzifələri öyrənir, özlərinin
və başqalarının hüquqlarını müdafiə etmək və bunu başqalarından da tələb etmək
bacarıqları qazanırlar.
Mənəviyyat
Bu məzmun xəttinin fənnə daxil edilməsində başlıca məqsəd məktəbin
qarşısında duran ən mühüm vəzifələrdən birinin–milli və bəşəri dəyərlərə
əsaslanan tərbiyənin daha dolğun, daha sistemli və nəticəyönümlü şəkildə
mənimsədilməsidir.
Ona görə də burada əsas diqqət şagirdlərin özlərini mənəvi tərəfdən kəşf
etmələrinə, sahib olduqları keyfiyyətləri və dəyərləri tanımalarına, onlarda
xalqımızın və bəşəriyyətin inkişaf prosesində əldə etdiyi yüksək əxlaqi dəyərlərə
əsaslanan yeni davranış və ünsiyyət bacarıqlarının formalaşdırılmasına yönəldilir.
Bunun nəticəsində şagirdlər öz mənəvi haqq və vəzifələrini dərk edir, onları
reallaşdırmağın yollarını mənimsəyir, tolerant, sərbəst düşünən, mənsub olduqları
ailəyə, xalqa və dövlətə faydalı şəxsiyyətlər kimi yetişirlər.
Bütün bunları reallaşdırımaq üçün aşağıdakı istiqamətlərdə bacarıq və
dəyərlərin formalaşdırılması nəzərdə tutulur:
İnsanı digər varlıqlardan fərqləndirən əxlaqi keyfiyyətləri, hiss və
duyğuları tanıtmaq, onları idarə etmək;
İnsanlararası münasibətlərdə zəruri olan ədəb və davranış qaydalarını
mənimsəmək;
Dini dəyərləri düzgün dərk etmək və mənəvi keyfiyyətlərin
formalaşmasında onlardan faydalanmaq, dinlə xurafat arasında fərqi ayırd etmək.
Bu məzmun xətti aşağıdakı alt-xətləri əhatə edir:
Ailə, məişət və cəmiyyətdə ədəb və davranış qaydaları
Din. Əxlaqın formalaşmasında dinin rolu
Ailə, məişət və cəmiyyətdə ədəb və davranış qaydaları alt-xətti vasitəsilə
şagirlər öz varlıqlarının əsil mahiyyətini və qayəsini anlayır, mənəvi məsuliyyət və
16
vəzifələrini tanıyır, onları yerinə yetirmək üçün lazım olan bacarıq və dəyərlərə
yiyələnirlər. Onlar müşahidə və müqayisələr aparmaqla insanın təbiətdə ən üstün
keyfiyyətlərə sahib varlıq olduğunu dərk edir, bütün varlıqların özünəməxsus
vəzifələri yerinə yetirdiklərini qavramaqla ən məsul vəzifələrin insana aid olduğu
qənaətinə gəlirlər.
Şagirdlər həm də mənəvi potensiallarından səmərəli istifadə etmək, hiss və
duyğularını düzgün idarə eləmək, milli və bəşəri mənəvi dəyərləri mənimsəməklə
ailədə, məktəbdə və cəmiyyətdə lazım olan üstün ədəb, davranış və ünsiyyət
bacarıqlarına yiyələnirlər.
Din. Əxlaqın formalaşmasında dinin rolu alt-xətti üzrə şagirdlər İslam və
digər dünya dinlərinə aid dəyərləri, onların ortaq və fərqli cəhətlərini, dinlərin
əxlaqa təsirini öyrənir, insanın mənəvi gücünün mənbələrini aşkar edir, onlardan
düzgün istifadə etmək vərdişlərinə yiyələnirlər. Onlar dinlə xurafat arasındakı
fərqləri ayırd edir, dindən müxtəlif məqsədlər üçün istifadə oluna biləcəyini və
belə təmayüllərdən uzaq durmağı öyrənirlər.
Sağlamlıq və təhlükəsizlik
XX əsrdə başlamış və getdikcə sürətlənməkdə olan elmi-texniki inkişaf
insanlar üçün rifah və rahatlıq gətirməklə yanaşı, həm də təhlükə mənbəyinə
çevrilməkdədir. Artıq texnogen xarakterli qəzalar ekoloji tarazlığı yalnız regional
deyil, həm də qlobal miqyasda pozmaqdadır. Bu isə yoluxucu xəstəliklərin artması
və təbii fəlakətlərin intensivləşməsi ilə müşayiət olunur. Ona görə də şagirdlərin
hələ ibtidai məktəb səviyyəsindən başlayaraq öz sağlamlıqları və təhlükəsizlikləri
ilə bağlı bilik və bacarıqlara sistemli şəkildə yiyələnməsi zəruri həyati tələbat kimi
meydana çıxır.
Bu məzmun xətti sağlamlığı təmin edən və ona təhlükə törədən amillər
barədə biliklərin əldə olunmasını, bacarıqların formalaşdırılmasını təmin etməyə
xidmət edir. Bununla da sağlamlıq xəstəliklərin və fiziki qüsurların olmaması kimi
yox, həm də fiziki, mənəvi və sosial rifahın əsası kimi dərk olunmalıdır.
Hər bir şagird fövqəladə və təhlükəli hadisələr zamanı düzgün davranmağı,
özünü və yaxınlarını mühafizə etməyi bacarmalıdır. Ona görə də bu məzmun
17
xəttində diqqət yetirilən əsas məsələlərdən biri də şagirdlərin öz həyat və
fəaliyyətində təhlükəsizlik məsələlərinin rolunu dərk etmələri, bu problemlə
üzləşdikdə onu şəxsi və cəmiyyət mənafeyinə uyğun şəkildə həll etməyi
bacarmalıdırlar.
Bu məzmun xətti aşağıdakı alt-xətləri əhatə edir:
Sağlam həyat tərzi
Həyat fəaliyyətinin təhlükəsizliyi
Fövqəladə hallarda mühafizə
Sağlam həyat tərzi alt-xətti üzrə bilik və bacarıqlara yiyələnməklə şagirdlər
sanitar, gigiyenik qaydalara əməl edən, hər cür zərərli vərdişlərdən (siqaret
çəkmək, alkoqol və narkotik maddələrdən istifadə) uzaqlaşmağı, lazım gəldikdə
özünə və yoldaşlarına yardım etməyi bacaran fərdlər kimi formalaşırlar. Onlar
reproduktiv sağlamlığın qorunması yollarını mənimsəyir, həm öz sağlamlıqları,
həm də gələcək nəslin sağlamlığı üçün məsuliyyəti öz üzərlərinə götürmə
bacarıqlarına yiyələnirlər.
Şagirdlər müxtəlif parazitar infeksion və digər yoluxucu xəstəliklərdən
qorunma vərdişləri qazanır, insanda immunodefisit virusu (İİV) vasitəsilə törənən
QİÇS (qazanılmış immun çatışmazlığı sindromu) xəstəliyi barədə bilgilər alır,
ondan qorunma yollarını öyrənirlər.
Həyat fəaliyyətinin təhlükəsizliyi alt-xətti vasitəsilə şagirdlər evdə, küçədə,
məktəbdə, ictimai yerlərdə, çöldə təhlükəsiz davranış qaydaları barədə bilgilər
qazanır, təhlükələrdən və xoşagəlməz hallardan qorunma bacarığına yiyələnirlər.
Onlar bütün növ minaların və partlamamış hərbi sursatların insan həyatı
üçün təhlükəsini və bu təhlükə ilə üzləşdikdə nə etmək lazım olduğunu öyrənirlər.
Fövqəladə hallarda mühafizə alt-xətti vasitəsilə şagirdlər regionda
(rayonda) ən cox ehtimal olunan, yaxud baş verən təbii fəlakətlərin, güclü
istehsalat qəzalarının səciyyəvi xüsusiyyətləri, habelə yaxınlıqdakı müəssisələrdə
işlədilən təhlükəli kimyəvi maddələrin növləri və zədələyici xassələri barədə
biliklərə yiyələnir, belə qəzalar və fəlakətlər zamanı özünü qoruma, mühafizə
Dostları ilə paylaş: |