www.kitabxana.net
Amid Əlioğlu
2016
Suallar və onlara elə özümün fərqli cavablarım.
İçimdə təlatüm baş qaldırmışdı. Xarakterimə xas
olmasa da, məsələ kapitan Tapdıqovla bağlı idi deyə,
maraq mənə güc gəldi. Yarıdan yuxarısı dəmir
barmaqlıqlara bənzər qapının üstündən baxmaqla bir
şey öyrənə bilməyəcəkdim. Hündür olmayan barı ilə
sədd çəkilən həyəti dövrə vurub evin arxa tərəfindən
ehmalca içəri tullandım. Uzaqdan it, çaqqal, canavar
ulartısı, yaxından isə bayquşların səsi həyacandan, az
qala, ürəyimin ağzımdan çıxmasına səbəb olurdu.
Ərazinin yalnız iki yerində – həyət və ev
qapısının üstündə işıq yanırdı. Evi ehmalca dövrə
vurdum. Otaqların birinin pəncərəsindən xəfif işartı
dəydi gözümə. İşartı gah güclənir, gah da zəifləyirdi.
Yaxınlaşıb bir qədər sakit dayandıqdan sonra götür-
qoy etməyə başladım. Pəncərədən baxmalıydımmı?
Mənə lazım idimi? Niyə ora qədər getmişdim? Nə idi
məni ora aparan? Elə bu sorğu-sualların içində
qulağıma qadın iniltisi gəldi. Artıq beynimdə heç bir
sual yox idi. Mən oradan baxmalı idim. Ehmalca
ayaqlarımı yerdən bir qədər yuxarıdakı çıxıntıya
qoyub, əllərimlə pəncərənin yaşmağından tutaraq
qalxdım.