15
Şəkiyə rəhbər işə göndərilən şəxs isə Şaumyanın yaxın adamı Ter-
Qriqoryan idi. Onun qısa müddətli hakimiyyəti dövründə qəzada milli zəmində
toqquşmalar nəticəsində Şəkinin 20 kəndi viran edildi.
Qəzada əhalinin müsibətlərinə son qoymaq üçün qərara alındı ki, Gəncədə
yerləşən milli hökumətə müraciət edilsin. Ora yollanan nümayəndə heyətinə Şəki
şəhər bələdiyyəsinin rəis müavini Mahmud bəy Fərzəlibəyov rəhbərlik edirdi.
Lakin onlar Kiş çayı sahilində, bəndin yaxınlığında basqına məruz qaldılar.
Mahmud bəy Fərzəlibəyov və Məşədi Cabbar Dadanovdan başqa
nümayəndə heyətinin üzvləri qətlə yetirildi.
7
20-30-cu illərdə Sovet hökumətinin Şəkidə törətdiyi bütün cinayət
xarakterli əməllərdə əli olan “ispolkom” Ələşrəf 1927-ci ildə Şəkidə çap etdirdiyi
«Şəki keçmişdə və indi» kitabçasında bu hadisəni başqa variantda təqdim edir.
Onun yazdığına görə erməni qoşununun Gürcüstan vasitəsilə Şəkiyə gələcəyi
barədə şayiələr yayılır. Guya bu qüvvəni qarşılamaq üçün Haşım bəy Əmircanovun
rəhbərliyi ilə nümayəndə heyəti göndərilir. Əvvəlcə nümayəndə heyətinə rəhbərlik
üçün Ədilxan nəzərdə tutulsa da sonra Haşım bəylə əvəz olunur. Şəki şəhər
bələdiyyəsinin rəis müavini Mahmud bəy Fərzəlibəyov, Meşədi Cabbar Dadanov,
erməni millətinin nümayəndələri Muxak Bayaxçı oğlu, Şaşa Məlik Allahverdov və
iki nəfər mühafiz həmin heyətin tərkibində idi. Yuxarıda deyildiyi kimi Mahmud
Fərzəlibəyov və Məşədi Cabbar Dadanovdan başqa onların hamısı Kiş çayı
sahilində, bəndin yaxınlığında qətlə yetirildilər.
Tarixən milli təəssübkeşlik əhval-ruhiyyəsi ilə köklənən şəkililər
istiqlaliyyət dövründə ümummilli problemlərin həllində də yaxından iştirak
edirdilər. Daşnak təcavüzünün qarşısını almaq üçün Şəkidən Zəngəzura 400
nəfərdən ibarət süvari hissə göndərilmişdir. Eyni zamanda Zəngəzurun dağıdılmış
kəndlərindən qaçqın düşmüş 5000 adam qəzada yerləşdirilmişdi.
8
1919-cu il may ayının 28-də Şəki Bayram ovqatında idi. İstiqlaliyyətin
birinci ildönümü qeyd olunurdu. Küçələrə qələbəlik, insanların simasına sevinc
ifadəsi, qəlblərinə isə müstəqilliyin ilk ilinin gətirdiyi fərəhli yekunlardan irəli
gələn milli qürur hissi hakim kəsilmişdi.
Həmin gün şəhərin müxtəlif yerlərində yarmarkalar təşkil edilmişdi. Xalq
üçlüyünün ifasında səslənən muğamlar, mahnılar qara zurnanın hay-harayına
qovuşaraq qəribə bir ahəngdarlıq yaratmışdı. Xan sarayını əhatə edən qala
divarlarının önündə müsavatçı çavuş Əhmədağa Yusifbəyovun qəbul etdiyi hərbi
rəsmi-keçid bayram şənliklərinə xüsusi təntənə gətirdi. Cümhuriyyətin nazirlər
kabinetinin sədri Nəsib bəy Yusifbəyovun xalqa ünvanlanan nikbin məzmunlu
müraciəti oxunduqdan sonra camaatın əhval-ruhiyyəsi daha da yüksəldi.
7
Əfəndiyev. Şəki Azərbaycan Xalq Cümhuriyyətinin fəaliyyəti illərində. Şəki, 2003, səh. 6
8
V.Çıraqzadə. İstiqlal yollarında. Azərnəşr, Bakı, 1992, səh. 58
16
Bəli, müstəmləkə əsarəti adlı hərarətli vəziyyətdən xilas olmuş xalq ürək
dolusu sevinir, həyatın bütün sahələrini əhatə edən geniş quruculuq işləri aparırdı.
Həm də dövlət quruculuğu daşnak təcavüzünün gətirdiyi çətinliklər, öz
varlığını işğallardan kənarda təsəvvür etməyən «şimal ayısının təhdidləri və
nəhayət daxili satqınların fitnə-fəsadları şəraitində gedirdi. Bolşevik mərəzinə
yoluxmuş məhdud bir zümrə adamları kommunistlərin sıralarına cəlb etmək üçün
ərzaq paylamağa qədər müxtəlif vasitələrə əl atırdılar. Partiyaya daxil olan hər bir
Şəkili 3 kq mampası konfeti və 2 qutu çayla mükafatlandırılırdı.
Şəkidə milli hakimiyyətin nüfuzdan salınmasına xidmət edən təbliğatın,
fəhlələri tətillərə sövq edən çağırışların və digər təxribat xarakterli əməllərin
törədilməsində Abid Əfəndiyev, Məmmədəmin Şəkinski və Mustafa Quliyev
aparıcı rol oynayırdılar. Bu bolşeviklər siyasi xarakterli aksiyaların
hazırlanmasında və həyata keçirilməsində xüsusi səriştəyə malik olan peşəkarlar
idi.
Məsələ burasındadır ki, Abid Əfəndiyev və Məmmədəmin Şəkinski Orta
Asiyada, Mustafa Quliyev isə Kiyevdə bir müddət bolşevik təbliğatının təşkili
prosesində iştirak etmişdilər. Hətta, M. Şəkinski «Hümmət» bolşevik təşkilatının
Aşqabad komitəsinin məsul katibi kimi fəaliyyət göstərmişdi. Onlar «Hümmət»in
qərarına əsasən inqilabi iş aparmaq üçün Azərbaycana gəlmişdilər.
Ukraynadan Azərbaycana dəvət edilmiş, Bakıda, Lənkəranda daha sonra
Şəkidə milli hökumətə qarşı mübarizə aparmış M.Quliyev Azərbaycanda sovet
hökuməti qurulduqdan sonra maarif komissarı vəzifəsinədək yüksəlmişdir. Lakin
milli hökumətə qarşı bolşevizmin təntənəsi naminə mübarizə aparan bu bolşevik də
digərləri kimi kütləvi repressiyanın şahə qalxdığı dövrdə xalq düşməni kimi «ifşa»
olundu.
O, Azərbaycan SSR Xalq Daxili işlər Komissarlığının təqdimatına əsasən
1937-ci il iyulun 5-də Odessa şəhərində həbs edilərək Bakıya göndərildi.
M.Quliyevə qarşı irəli sürülən ittihamnamədə bildirilirdi ki, 1924-cü ildən bolşevik
partiyasının baş xəttinə qarşı çıxışlara başlamış, 1926-cı ildə Xalq Maarif
Komissarı işləyərkən millətçi ittihad təşkilatına rəhbərlik etmiş və şəxsən həmin
təşkilatın Şəkidəki özəyini yaratmışdır. Daha sonra qeyd olunurdu ki, o, Moskvada
yaşayarkən Ə.Qarayevlə əlaqəyə girərək onun rəhbərliyi altında əksinqilabı
fəaliyyətini davam etdirmişdir. Qazaxıstanda yaşadığı dövrdə də eyni məzmunlu
siyasi fəaliyyət göstərmişdir. M.Quliyevin əsas məqsədi silahlı yolla SSRİ-dən
ayırmaq olmuşdur. Əlbəttə bütün bunlar cəfəngiyatdan başqa bir şey deyildi. Milli
hökumətə qarşı güzəştsiz mübarizə aparan bir şəxs belə niyyətlərdən çox-çox uzaq
olmuşdur. O, sadəcə olaraq, nədənsə M.C.Bağırovun qəzəbinə tuş gəlmişdir.
Mustafa Quliyev 1938-ci il iyul ayının 3-də SSRİ Ali Məhkəməsinin Hərbi
kollegiyasının qərarı ilə güllələndi.
Azərbaycanda Sovet hökuməti qurulduqdan sonra əvvəllər müxtəlif
vasitələrlə kommunist bolşeviklər partiyasının sıralarına cəlb edilmiş adamların bir