20
A Z Ə R B A Y C A N V Ə K İ L İ ‐ VIII nömrə
Zərərçəkmişin sağlamlığına ehtiyatsızlıqdan az ağır zərər vurulması ilə bağlı əməl üçün CM‐nin
263.1‐ci maddəsində ən çoxu 2 ilədək müddətə azadlıqdan məhrumetmə cəzası nəzərdə tutulur.
Yəni bu maddə ilə nəzərdə tutulan əməl böyük ictimai təhlükə törətməyən cinayətlər sırasına aiddir.
Deməli CM‐nin 73‐cü maddəsinə görə CM‐nin 263.1‐ci maddəsi ilə nəzərdə tutulan yol‐nəqliyyat
hadisəsi törətmiş şəxs zərərçəkmişlə barışdıqda və ona dəymiş ziyanı aradan qaldırdıqda cinayət
məsuliyyətindən azad edilməklə haqqındakı cinayət işinin icraatına xitam verilə bilər. CM‐nin 73‐cü
maddəsinin mahiyyətindən görünür ki, zərərçəkmişlə barışqıla əlaqədar işin icraatına xitam
verilməsi nəinki işə məhkəmədə baxılma mərhələsində, həm də işin ibtidai araşdırma mərhələsində
də həyata keçirilə bilər.
Araşdırmalar göstərir ki, həm ibtidai araşdırma orqanları, həm də məhkəmələr yol‐nəqliyyat
hadisələrinin araşdırılması ilə bağlı icraat zamanı əsaslar olduqda qanunun həmin normalarını tətbiq
etməkdən yayınırlar. Həm də bu zaman nəinki öz qərarlarını əsaslandırmırlar, hətta müraciəti
müzakirə etməkdən imtina edirlər. Belə hərəkətləri isə qanun pozuntusundan başqa cür adlandırmaq
mümkün deyil.
Yazının hazırlanması zamanı bir neçə hakimdən yol‐nəqliyyat hadisələri ilə bağlı işlərə baxılarkan
zərərçəkmişlə barışıq əldə edilməsi hallarında nə üçün CM‐nin 73‐cü maddəsinin tətbiq
edilməməsinin səbəbini soruşduqda, onlar belə prosessual sənəd qəbul edilməsini yuxarı instansiya
məhkəmələrinin təqdir etməyəcəkləri, yəni xətm qərarını ləğv edəcəkləri ilə izah etdilər. Qəribədir,
görəsən qanunun tələblərinə uyğun qəbul edilən qərar hansı əsasla yuxarı instansiya məhkəmələri
tərəfindən ləğv oluna bilər?
Ehtiyatsızlıqdan baş verə biləcək hadisələrdən heç kəs sığortalanmamışdır. Hər kəs, hətta
professional sürücülər də konkret situasiyalarda zərərçəkmişə xəsarət yetirilməsi ilə bağlı yol‐
nəqliyyat hadisəsi törədə bilər. Təsəvvür edək ki, cavan bir elmi işçi, yaxud tələbə avtomobili idarə
edərkən cüzi ehtiyatsızlıq səbəbindən zərərçəkmişin az ağır xəsarət alması, məsələn ayağının baş
barmağının sınması ilə nəticələnən əməl törətmişdir. Bundan sonra o, zərərçəkmişi xəstəxanaya
aparmış, ona sağalması ilə bağlı maddi kömək göstərmiş, nəhayət onunla barışıq əldə etmişdir. Belə
hallarda nə üçün ilk dəfə böyük ictimai təhlükə törədən şəxs CM‐nin 73‐cü maddəsi tətbiq olunmaqla
cinayət məsuliyyətindən azad olunmamalıdır? Nəzərə almaq lazımdır ki, işə xitam veriləcəyi təqdirdə
belə hadisə törətmiş tələbə əslində yalnız azadlıqdan məhrumetmə cəzasına məhkum edilməlidir.
Ona islah işləri cəzası təyin edilə bilməz, çünki CM‐nin 49‐cu maddəsinə görə islah işləri cəzası yalnız
işləyən şəxslərə tətbiq olunur. Tələbənin cərimə edilməsi də əslində mümkün deyil, ona görə ki,
CM‐nin 263.1‐ci hissəsində nə az, nə çox 5000 manatdan 7000 manatadək cərimə cəzası nəzərdə
tutulur. (Müqayisə üçün qeyd edək ki, şəxs ehtiyatsızlıqdan zərərçəkmişə az ağır dərəcəli xəsarəti
nəqliyyat vasitəsi ilə deyil, başqa alət ilə yetirmiş olsaydı CM‐nin 131.1‐ci maddəsi ilə ona təyin
olunan cərimənin məbləği 300 manatdan yuxarı ola bilməzdi). Deməli ən optimal variant tələbəyə
azadlıqdan məhrumetmə etmə cəzası verilməsidir. Bu isə təsadüfən cüzi xətaya yol vermiş şəxsin
ümüd və arzularının puç olmasına gətirib çıxara bilər.
Belə hadisələr üstündə vətəndaşlara azadlıqdan məhrumetmə cəzası verilməsində dövlət maraqlı
deyildir. İstintaq‐məhkəmə orqanlarının qanunun tələblərini düzgün tətbiq etməmələri səbəbindən
məhkumluq "qazanan" şəxs həyatda irəliləmək, öz yerini tapmaq imkanından məhrum olur.
Nəzərdən qaçırmaq olmaz ki, məhkumun cəzaçəkmə müəssisəsində saxlanılması da dövlətin heç də
az olmayan xərcləri hesabına başa gəlir.
Ona görə də hesab edirik ki, həm ibtidai araşdırma orqanları, həm də məhkəmələr bu kateqoriyadan
olan işlər üzrə qanunu əsaslar olduqda CM‐nin 73‐cü maddəsi ilə müəyyən olunan normaları tətbiq
etməkdən çəkinməməlidirlər.
Haqqında söhbət açdığımız əməllə bağlı qüvvədə olan qanun normalarında və istintaq‐məhkəmə
təcrübəsində anlaşılmazlıqlar olduğunu qeyd etdikdən sonra hesab edirik ki, yazının başlığında
qoyulan suala cavab vermək vaxtı çatmışdır. Doğurdan da ehtiyatsızlıqdan zərərçəkmişin
sağlamlığına az ağır zərər vurulması cinayət məsuliyyətinə səbəb olmalıdırmı?
Yazı müəllifinin fikrincə belə əməllərə görə cinayət məsuliyyəti müəyyən etməyə ehtiyac yoxdur.
A Z Ə R B A Y C A N V Ə K İ L İ ‐ VIII nömrə
21
Sözsüz bu fikirlə razılaşmayanlar da az deyildir. Onlar öz etirazlarının arqumenti kimi insanların
sağlamlığına zərər dəyməsi ilə nəticələnən hadisələrin, xüsusilə də yol‐nəqliyyat hadisələrinin
çoxluğunu əsas gətirməklə bu əməllərin dekriminallaşdırılmasının əhali tərəfindən birmənalı
qarşılanmamasında israr edə bilərlər.
Gözlənilən etirazlarla bağlı öz mövqeyimizi əsaslandırmaq məqsədilə əvvəlcə tarixə ekskurs etmək
istəyirik. Respublikamızın 1960‐cı il Cinayət Məcəlləsində döymə, üsulundan asılı olmayaraq böhtan
və təhqir üstündə də cinayət məsuliyyəti nəzərdə tutulurdu. 2000‐ci ildə qəbul edilmiş yeni Cinayət
Məcəlləsi ilə kütləvi informasiya vasitələrində yayılma ilə əlaqədar olmayan böhtan və təhqir kimi
əməllər dekriminallaşdırıldı. Azərbaycan Respublikasının 2012‐ci il 29 iyul tarixli Qanunu ilə isə
döymə, yəni CM‐nin 132‐ci maddəsi ilə nəzərdə tutulan əməl də dekriminallaşdırılaraq bu hərəkətlər
inzibati xətalar sırasına aid edildi. Cinayət qanunvericiliyindəki bu dəyişikliklər cəmiyyət tərəfindən
təbii qarşılandı, yəni cəmiyyət içərisində hər hansı silkələnməyə gətirib çıxarmadı. (Hərçənd bizim
fikirimizcə kütləvi informasiya vasitələrində yayılma ilə bağlı olmayan təhqir və böhtanla bağlı
əməllər üstündə inzibati məsuliyyət müəyyən edilməsi məntiqi və məqsədə müvafiq olardı. Çünki
hazırda həmin əməlləri törədən vətəndaşlar qüvvədə olan nə cinayət, nə də inzibati qanunvericiliklə
heç bir halda məsuliyyətə cəlb edilə bilməzlər).
Təhqir, böhtan və döymə kimi əməllər təqsirkar tərəfindən qəsdən törədildiyi halda, ehtiyatsızlıqdan
zərərçəkmişə az ağır zərər vurma kimi əməllər adından göründüyü kimi ehtiyatsızlıqdan, yəni hadisə
törədənin iradəsindən asılı olmayaraq, bir çox hallarda açıq‐aşkar təsadüf nəticəsində baş verir.
Deməli əslində mahiyyət etibarilə ehtiyatsızlıqdan zərərçəkmişə az ağır dərəcəli xəsarət yetirilməsi,
ictimai təhlükəlilik dərəcəsinə görə qəsdən törədilən təhqir, böhtan və döymə kimi əməllərdən ağır
hesab edilə bilməz. Axırıncı əməllər üçün cinayət məsuliyyətinin aradan qaldırılması cəmiyyət
tərəfindən təbii qarşılanıbsa, ümüd etmək olar ki, ehtiyatsızlıqdan az ağır xəsarət yetirməyə görə
əməllərin dekriminallaşdırılması da problem yaratmayacaq.
Digər tərəfdən biz bilirik ki, başqa postsovet ölkələrində olduğu kimi, Respublikamızın Cinayət
Məcəlləsi qəbul edilərkən RF Cinayət Məcəlləsindən baza kimi istifadə edilmişdir. Ehtiyatsızlıqdan
törədilən və sağlamlığa az ağır zərər vurma ilə nəticələnən əməllər üçün cinayət məsuliyyəti
müəyyən edən normalar Rusiya qanunvericiliyində də olmuş və yəqin ki, başqa ölkələrin
qanunvericiliyinə də elə oradan keçmişdir. Lakin Rusiya Federasiyasının 2003‐cü il 8 dekabr tarixli
Qanunu ilə Məcəlləyə dəyişikliklər edilərkən ehtiyatsızlıq üzündən sağlamlığa az ağır zərər vurmaqla
əlaqədar bütün normalar cinayət qanunvericiliyindən xaric edilmişdir. Hazırda qüvvədə olan RF
Cinayət Məcəlləsinin heç bir maddəsində ehtiyatsızlıqdan törədilən əməllərin zərərçəkmişin
sağlamlığına az ağır zərər vurmaya səbəb olması üçün məsuliyyət nəzərdə tutulmur. Bu, yol‐
nəqliyyat hadisələri ilə əlaqədar əməllərə də aiddir. Yəni RF CM‐də yol hərəkəti və nəqliyyat
vasitələrinin istismarı qaydalarının pozulmasının zərərçəkmişin sağlamlığına az ağır zərər
dəyməsinə səbəb olması cinayət məsuliyyəti yaratmır.
Mənbə kimi götürülən RF Cinayət Məcəlləsindən fərqli olaraq AR Cinayət Məcələsində bu məsələ
ilə bağlı normalar nəinki qanunvericilikdən çıxarılmamış, əksinə son illərdə qanuna edilən
dəyişikliklərlə bu xarakterli əməllərlə cəzalar daha da ağırlaşdırılmışdır. Bu yazı başlandıqdan sonra
məlum oldu ki, ehtiyatsızlıqdan zərəçəkmişin sağlamlığına az ağır zərər dəyməsi hallarında cinayət
məsuliyyətinin sərtləşdirilməsi istiqamətində 20 oktyabr 2015‐ci ildə daha bir Qanun qəbul
edilmişdir. Doğrudur, postsovet ölkələrinin bir çoxunda sağlamlığa az ağır zərər dəyməsi ilə
nəticələnən yol‐nəqliyyat hadisələrinə görə cinayət məsuliyyəti indi də mövcuddur. Lakin, həmin
ölkələrin heç birində belə əməllər üçün bizim CM‐də olduğu qədər sərt cəzalar müəyyən
edilməməmişdir. Xüsusilə qeyd etmək lazımdır ki, yol‐nəqliyyat hadisələri ilə bağlı əlavə cəza
qismində nəqliyyat vasitələrini idarə etmək hüququndan məhrum etmə cəzasının mütləq tətbiq
edilməli olmasına həmin ölkələrin Cinayət Məcəllələrinin heç birində təsadüf edilmədi. Yeri
gəlmişkən qeyd etmək lazımdır ki, AR CM‐nin yol‐nəqliyyat hadisələrindən bəhs edən on dörd
maddəsində 2 ildən 5 ilədək müddətə nəqliyyat vasitələrinin idarə etmək hüququndan məhrum
edilməsi qismində əlavə cəza nəzərdə tutulur və bunların hamısı da imperativ xarakter daşıyır.