İbtidai təhsilin məzmununun nəzəri-pedaqoji problemləri
131
keyfiyyət göstəricilərini əks etdirir. Bütövlükdə ibtidai təhsilin
keyfiyyətinin idarə olunmasında həmin göstəricilər vasitəyə çevrilir.
Məktəbdaxili qiymətləndirmənin keçirilməsində əsas vasitə
kimi istifadə olunan bu standartların xarakteri onu daha yaxından
öyrənməyi tələb edir. Standartların ibtidai təhsildə mövqeyi, onun
bilik və fəaliyyətləri ehtiva etməsi, həm başlanğıcda istiqamətverici,
sonda isə yekunlaşdırıcı rola malik olunmasını göstərir.
Fənlər üzrə məzmun standartları inteqrativ xarakterə malik
olmaqla daha çox ümumi səciyyə daşıyır. Onların nümunəsində
yalnız bacarıq və qabiliyyətləri müşahidə etmək mümkün olur. Bu
bacarıq və qabiliyyətlər bir və ya bir neçə dərsdə deyil, ardıcıl və
əlaqəli qurulmuş təlim prosesində qazanılır.
Adətən belə nəticələrin reallaşdırılması müəllimdən xüsusi
bacarıq və peşəkarlıq tələb edir. Onların pedaqoji qabiliyyətlərinin
meydana çıxmasına şərait yaradır.
İbtidai təhsilin məzmununun struktur komponentləri, onların
ardıcıl düzülməsi xüsusi məntiqi fəaliyyətin nəticəsi kimi
dəyərləndirilir. Bu fəaliyyət, ilk növbədə, məzmunun fəlsəfəsini
anlamaqdan, hər kəsin onu özü üçün dərk etməsindən başlayır.
Sosioloji araşdırmalar, müzakirə və sorğular keçirməklə cəmiyyətin
tələbatları öyrənilir. Yaradılmış işçi qrupları tərəfindən vəziyyətə
uyğun təhsil səviyyəsi üzrə ümumi nəticələr müəyyənləşdirilir.
Həmin nəticələr inteqrativ mahiyyət daşıdığından nəzəri və praktik
xarakterdə olan zəruri bacarıqları (səriştələri) meydana qoyur.
İbtidai təhsil üzrə fənlərin adı, məzmunu mövcud stan-
dartların imkanları fonunda yaranır. Müəyyənləşdirilmiş fənlər
əsaslandırılır, onların həyati əhəmiyyət kəsb edən tərəfləri qabarıq
şəkildə ifadə olunur.
İbtidai təhsilin məzmununun strukturunda hər bir fənnə aid
ümumi nəticələrin verilməsi onun ən xarakterik cəhətlərindən hesab
olunur. Əslində həmin nəticələr fənlər üzrə ümumi standartlar kimi
qəbul olunur və fənn kurikulumlarında onlar siniflər üzrə standartlar
kimi konkretləşdirilərək davam etdirilir.