261
- Onu düz deyirsən, Növrəstə. Amma hələ öz kəndimizə dönə bilməyəcəyik.
Çünki döyüşümüz, mübarizəmiz qurtarmayıb. Hələ daşnakları Zəngəzurun hər
yerindən təmizləyə bilməmişik. Sən daha bir neçə il bundan əvvəlki, gözü bağlı
Növrəstə deyilsən, odun-alovun içindən çıxmısan… Bilirsən ki, bir tərəfdən Dro,
bir tərəfdən də Njde dişlərini üstümüzə qıcıdıblar. Amma darıxma. Düşmən nə
qədər cilov gəmirsə də, axırda təslim olmağa məcbur olacaq. Bizim arxamızda
Qızıl Ordu kimi böyük qüvvə var… - Şahmərdan susdu, nə isə fikirləşib soruşdu: -
Sən bizim komandanlığın Njdenin yanına iki adam göndərdiyini bilirsənmi?
- Yox, nə üçün göndərib?
- Njdenin təslim olub silahı yerə qoyması üçün. Təslim olmasa, onun üstünə
yeriyəcəyik. İlanın başını birdəfəlik əzəcəyik. Bax, onda öz kəndimizə qayıdıb
rahat yaşayacayıq. Keçirdiyimiz günləri həm acı, həm də şirin xatirələr kimi
yadımıza salacayıq. Qərəz, görək Levonla Qurgen nə xəbərlə gələcəklər…
Sağsağanın pırıltı ilə ağacdan uçmasından nazik budaqlar tərpəndi. Yetişmiş
tutlar yerə səpələndi. İri bir tut düz Şahmərdanın alnına düşdü. Şahmərdan başını
qaldırdı. Növrəstə yaylığının ucu ilə onun alnındakı dırnaq yekəlikdə ləkəni sildi.
Hər ikisi qalxıb gülə-gülə evə tərəf getdilər.
Onlar otağa girəndə Hayk Comərdlə Vahana nə isə danışırdı. O, arvadını
Xınzirəkdə aparıb qoyduqdan sonra, təzəcə qayıtmışdı. Şahmərdanla Növrəstə
oturub söhbətə qulaq asdılar.
Hayk deyirdi:
- Xınzirəkdə mənə məlum oldu ki, Njde Kafana qaçandan sonra bir çox
kəndə əl altınca kağız göndərib. Kağızında dövlətliləri qorxudub ki, Qızıl Ordu,
Şura hökuməti sizin hər şeyinizi əlinizdən alacaq, özünüzü də öldürəcək, qazamata
salacaq. Yazıb ki, sizin arxanız, köməyiniz mənəm, bolşeviklərlə mübarizə eləmək
üçün mənim başıma toplanın… Manuçar Sarumov da kənddən çıxıb Njdenin
yanına gedib…
Qapı açıldı, Levon baş-gözü sarıqlı içəri girdi.
- Bəs Qurgen hanı? – deyə Vahan soruşdu. – Başını, qulağını niyə
sarımısan?
Levon bir tərəfdə oturub həyəcan və qəzəblə hər şeyi danışdı. Axırda dedi:
- Getdim saqqal gətirməyə, bığı da qoyub gəldim…
- Hə… - deyə Vahan fikirli-fikirli dilləndi. – Bu heç yaxşı olmadı. Qurgen
əlimizdən tez getdi… Sən şikəst oldun…
- Mən öz halıma yanmıram. Ancaq Qurgen yazıq oldu…
- Bəli, o da inqilabın qurbanı oldu, - deyə Şahmərdan köksünü ötürdü.
Aralığa ağır bir sükut çökdü. Adamların gözündə həm kədər, həm də böyük
bir qəzəb hiss olunurdu.
Vahan sinəsinə əyilmiş başını yuxarı qaldırıb Levondan soruşdu:
- Qərargaha getmisənmi?
- Yox, elə gəlişim buradır.
- Dur gedək, yaranı Arakel dərmanlayıb bağlasın, sonra qərargaha,
Gerasimovun yanına gedək, əhvalatı danış.
Levonla Vahan durub getdilər.
262
…Dan yeri təzəcə sökülürdü. Xoruzlar bir-biri ilə bəhs edirmiş kimi, arası
kəsilmədən banlaşırdı… Ancaq çox çəkmədi ki, harada isə lap yaxında partlayan
mərmilərin səsi onları susdurdu…
İyirmi-iyirmi beş gün qulağı top-tüfəng səsi eşitməyən və Şura quruluşuna
alışmağa başlayan Gorus əhalisi sərasimə yuxudan oyandı.
Qızıl Ordu hissələri, kommunist dəstələri hücuma keçmiş general Droya
cavab vermək üçün mövqelər tutmaqda idilər.
Njde və Dro öz qoşunlarını, toplaya bildikləri yeni qüvvələrinin hesabına,
Denikin zabitləri və ağ kazakların hesabına artırmışdılar. Döyüşə rəhbərlik edən
həm daşnak, həm Denikin zabitləri idi.
Qızıl Ordu hissələri və Kafan fəhlələri Njdenin qabağını kəsib döyüşə
girdikləri üçün o, Dro ilə bərabər Gorusa hücuma keçə bilmədi. Lakin çox ciddi və
qanlı döyüşlərdən sonra Dro Gorusu, onun ətrafındakı kəndləri, Sisyan kəndlərini
tutmağa müvəffəq oldu.
Bolşeviklər Njdeni əvvəlcə Kafandan çıxartdılar. Lakin o, şəhəri və bir çox
kəndləri təzədən alıb öz yerini bərkitdi.
Zəngəzur tamamilə daşnakların əlinə keçdi. Bu dövrdə ən vəhşi terror
başlandı. Daşnaklar ələ keçən kommunistlərə, partizanlara və onların ailələrinə
ağla gəlməz divan tutdular. Bir çoxunun evini yandırdılar. Mal-qarasını çəkib
apardılar. Bir çox kommunistlərin və partizanların intiqamını arvadlarından aldılar,
əvvəl ələ salıb, sonra güllələdilər. Belə qurbanlardan biri də Şuşanik və onun
balaca oğlu oldu. Njde şəxsən özü ana ilə balanın həyatını bircə güllə ilə
söndürdü…
On səkkizinci fəsil
1921-ci ilin aprel ayı idi.
Otaq adamla dolmuşdu. Daşnak ordusunun bəzi zabitləri, Njdenin ətrafına
toplaşan mauzeristlər, əksinqilabçılar burada idilər. Njde onları müşavirəyə
çağırtdırmışdı. Müşavirə neçə saat idi ki, davam edirdi.
«Odlu-alovlu» danışmağı sevən və danışdıqca qızışıb özündən çıxan Njde
deyirdi:
- Cənablar! Neçə müddətdir ki, Qırmızı Ordunun ayağı Zəngəzurdan
çəkilmişdir. Bu, bizim böyük qələbəmizdir. O adamlar ki, bolşeviklərlə bacara
biləcəyimizə şübhə edirdilər, indi böyük qüvvə olduğumuza inanmaya bilməzlər.
Ancaq bizi narahat edən partizanlardır. Onlar gah gündüz, gah gecə, bəzən açıq,
bəzən gizli olaraq qoşun hissələrimizə, kəndlərə hücum edirlər. Cənablar, mən onu
demək istəyirəm ki, bolşeviklər hələ gözlərini Zəngəzurdan çəkməyiblər. Bundan
əlavə, vəziyyət bu son aylarda dəyişilib, bizim üçün daha ağır olub. Açıq
danışacağam. Cidanı çuvalda gizlətmək olmaz. Gürcüstan və Ermənistan hökuməti
tamamilə süqut etdi… - Adamlar təəccüblə bir-birlərinin üzünə baxdılar. Kimi
263
başını kədərlə aşağı saldı, kimi gözünü Njdenin ağzına dikib sonra onun nə
deyəcəyini gözlədi, kimi özünü saxlaya bilməyib yerindən qışqırdı:
- Yəni deyirsən, bizim Xatisov hökuməti tamam yıxıldı?..
Njde:
- Bəli, - dedi. – Parlament üzvlərindən bəzilərini bolşeviklər həbs ediblər,
bəziləri canlarını təhlükədən qurtarıb Zəngəzura qaçıblar. Cənablar, açıq deyim ki,
indi Zəngəzurdan başqa Zaqafqaziyanın hər yerinə qırmızı rəng çəkilmişdir. İndi
Zəngəzur hər tərəfdən bolşeviklərlə əhatə olunmuş təkcə bir adaya bənzəyir. Ancaq
bu xəbər bizim sıralarımızda, qoşun hissələrimizdə çaxnaşma yaratmamalıdır.
Çünki arxamızda Antanta durub. O, bizə hərbi yardım göstərir, mənəvi qüvvət
verir. Bolşeviklər bunu bilirlər. Məhz buna görə də, Zəngəzuru tezliklə əlimizdən
almağa can atırlar. Qırmızı Ordunun bu gün-sabah yenidən hücuma keçəcəyi də
şübhəsizdir. Onda biz nə eləməliyik? Təslim olmalıyıqmı? Yox, cənablar, mən bu
fikri beynimə sığışdıra bilmirəm. Mənim vuruşmağa hünərim və hərbi qüvvəm
kifayət qədərdir. Mən bu gündən etibarən Zəngəzuru Şura Ermənistanından
ayırıram. Zəngəzurda dağlar hökuməti yaratdığımı sizə elan edirəm. Mən ona
Syunik
1
hökuməti adı verirəm. Özümü isə, Syunik sparapeti
2
elan edirəm.
Cənablar, dostumuz Antantanın köməkliyi ilə bolşevikləri Ermənistandan
təmizləyəndən sonra, Zəngəzur yenə onun bir qəzası olacaqdır. İndi parçalanmış
Ermənistan torpağının yenə birləşəcəyinə əminəm. Cənablar, hər kəs öz işində
möhkəm olmalıdır. Zabitlər əsgərləri döyüşə yaxşı hazırlamalıdırlar. Ordudan
fərariliyə yol verilməməlidir. Heç bir əsgər Ermənistan hökumətinin yıxıldığını
bilməməlidir. Aydındırmı?
«Bəli», «Aydındır», «Biz öz işimizi bilirik» sözləri eşidildi.
Heç kəsə danışmaq üçün söz verməyən Njde müşavirəni bağladı…
Növrəstə ikimərtəbəli evin aynabəndində oturub şəhərə tamaşa edirdi. Açıq
pəncərədən içəri əsən sərin meh onun üzünə vurur, alnına tökülmüş saçını
oynadırdı…
Ömründə şəhər görməmiş Növrəstə Şuşanın yaraşıqlı evlərinə, təbii
mənzərələrinə heyran olmuşdu. Ancaq bu gözəl şəhər ona zövq verdiyi kimi, qüssə
də verirdi. «Qəşəng şəhərdir, yaşamalı yerdir, amma heyif ki, bir tərəfi şikəstdir.
Bunun da bir yanını bizim kənd kimi yandırıb xarabalığa çeviriblər. Heyif ki…».
Növrəstə ayaq səslərinə geri döndü. Gələn Şahmərdan idi. Növrəstə tez ayağa
qalxıb dedi:
- Bibi oğlu, niyə çox yubandın?
- Qərargahda işimiz vardı. Gerasimovun polku axı indi burdadır…
- Səhərdən getmisən, indi günortadır. Yəqin ki, lap acmısan… Elə buradaca
otur, çörək gətirim, ye. Kartof bişirmişəm.
- Ac deyiləm. Əsgərlərlə bir yerdə yemişəm. Oturmağa da vaxt yoxdur.
Vahan məni gözləyir. Səninlə xudahafizləşməyə gəldim.
1
Qədim Ermənistanda Zəngəzur Syunik padşahlığı adlanırdı.
2
Sparapet – qədim Ermənistanda bütün silahlı qüvvələrin komandirinin tituludur.
Dostları ilə paylaş: |