230
NAXÇIVAN DÖVLƏT UNİVERSİTETİ.
ELMİ ƏSƏRLƏR, 2017, № 7 (88)
NAKHCHIVAN STATE UNIVERSITY.
SCIENTIFIC WORKS, 2017, № 7 (88)
НАХЧЫВАНСКИЙ ГОСУДАРСТВЕННЫЙ УНИВЕРСИТЕТ.
НАУЧНЫЕ ТРУДЫ, 2017, № 7 (88)
BƏHRUZ MƏMMƏDOV
Naxçıvan Dövlət Universiteti
U
OT:
372.8:54
7-11-Cİ SİNİFLƏRDƏ NÜMAYİŞ TƏCRÜBƏLƏRİNİN
TƏŞKİLİ VƏ APARILMASI METODİKASI
Açar sözlər: kimya təcrübəsi, nümayiş təcrübəsi, kimyəvi hadisələr, kimyəvi reaksiya.
Key words: school chemistry experiment
,
demonstration experiment, chemical phenomena,
chemical reaction
Кюлчевые слова: химический экспермент, демонстрационный эксперимент,
химические явления, химическая реакция
Respublikamızda həyata keçirilən yeni təhsil konsepsiyası məktəblərdə şagirdlərin yalnız
müəyyən həcmdə bilik almalarını deyil, həm də onların aldıqları bilikləri tətbiq etmək
bacarıqlarının inkişaf etdirilməsini nəzərdə tutur. Hazırda orta ümumtəhsil məktəblərinin kimya
proqramları və onların əsasında hazırlanmış dərsliklərdə şagirdlərin yaş səviyyəsinə uyğun bilik,
bacarıq və vərdişlərə yiyələnmələri üçün geniş imkanlar mövcuddur. Kimya fənninə dair şagirdlərin
bilikləri kimyəvi anlayışlar, nəzəriyyə və qanunlara əsaslanaraq, hesablama məsələlərinin müxtəlif
tiplərini həll etmək, təhlükəsizlik texnikası qaydalarına əməl etmək, sadə cihazları quraşdırmaqla
kimya eksperimentini aparmaq, müşahidə etmək və nəticə çıxarmağı bacarmaq və s. ilə müəyyən
olunur. Təlim prosesində şagirdlərin bilik və bacarıqları nəzəriyyə ilə praktikanın vəhdəti əsasında
dərinləşir, onlar arasında mürəkkəb əlaqələr yaranır.
Kimya təcrübəsi kimya tədrisində nəzəriyyə ilə praktikanın əlaqəsini həyata keçirən mühüm
təlim metodudur. Məktəb kimya kursunda kimya təcrübəsi yalnız tədqiqat metodu, yeni bilik
mənbəyi olmayıb, həm də özünə məxsus öyrənmə obyektidir. Kimya təcrübəsinin kimya
dərslərində tətbiqinin metodikasına dair kifayət qədər müxtəlif tədqiqatlar aparılmışdır. Lakin,
respublikamızın orta ümumtəhsil məktəblərində kurikulumun tətbiqi ilə əlaqədar olaraq dərs-
liklərin məzmunu əsaslı şəkildə dəyişir. Buna uyğun olaraq mövzulara daxil olunan kimya
təcrübəsinin seçilməsində də dəyişiklik yaranır. Buna görə də kimya təcrübəsinin təşkili və
aparılması metodikasına yenidən baxmaq zərurəti yaranmışdır.
Məktəb kimya eksperimentinin aşağıdakı növləri var:
1)
nümayiş təcrübəsi; 2) laboratoriya təcrübələri; 3)
laboratoriya işləri; 4) praktik işlər;
5)
laboratoriya praktikumu; 6) ev təcrübələri.
Məqalədə 7-11-ci siniflərdə nümayiş təcrübələrinin təşkili və keçirilməsinə dair metodik
işləmə verilir. Kimya dərslərində nümayiş təcrübələrini kimya müəllimi və ya laborant aparır. Bəzi
hallarda müəllimin hazırladığı şagird də apara bilər.
Kimya dərslərində nümayiş təcrübələrinin aparılmasına 7-ci sinfin kimya kursunda başlanır.
Nümayiş təcrübəsi şagirdlərdə kimyaya marağın oyadılması, kimyəvi hadisələrin mahiyyətinin
açılması, təcrübənin aparılması və laboratoriyada təhlükəsizlik texnikası qaydalarına əməl
olunması, onlarda bacarıq və vərdişlərin yaradılması, kimyəvi maddələr, cihazlarla tanışlıq və s.
məqsədilə aparılır. Məktəb kimya kursunda (7-11-ci siniflər) təcrübənin aparılması şagirdlər üçün
çətin və təhlükəli olduqda, müvafiq avadanlıq (kimyəvi maddələr və cihazlar) kifayyət qədər
olmadıqda dərslərdə nümayiş təcrübəsindən istifadə olunur.
Nümayiş təcrübəsinin aparılmasına aşağıdakı əsas tələblər qoyulur:
1) əyanilik- qabların və reaktivlərin həcminin böyük olması, sinifin son sıralarında aydın görün-
məsi. Nümayiş stolunda təcrübəyə aid olmayan reaktiv və qabların olması;
2) cihazın sadə və qusursuz olması;