Turizm xərclərinin həyata keçirilməsi vaxtı
və iqtisadiyyatın bununla əlaqəsi
Turizm xərclərinin həyata keçirilməsində vaxt çox mühümdür. Belə ki, faktiki məhsul “istehlak” edilənə qədər nəqliyyatdan istifadə, yerləşdirilmə vasitələri və s. xidmətlər əvvəlcədən bronlaşdırılır və ödənilir. Eyni zamanda müvafiq istifadədən sonra da kredit kartı və ya qiymətli kağız vasitəsi ilə də ödəmələr həyata keçirilə bilər. 2008-ci il Milli Hesablar Sisteminə uyğun olaraq ev təsərrüfatında (şəxslər) son istehlak mal və xidmət üçün pulun ödədiyi vaxt deyil, onun hüququna keçdiyi andan etibarən hesaba alınır. Həmin qaydalar turizm xərcləri münasibətlərində də tətbiq edilir. Nəqliyyat vasitələrində yaranan istehlak xərcləri daşınma, yerinə çatdırıldığı vaxt, səyahət bürosunda isə məlumat təqdim edildiyi zaman və qabaqcadan səfərlə bağlı xidmət edildiyi anda hesaba alınır.
Turist səfəri zamanı bütün mal və xidmətlərin əldə edilməsi mahiyyət etibarı ilə turizm xərcləridir. Bundan başqa səfərə qədər və səfərlə əlaqədar (peyvənd etmə, şəxsiyyət vəsiqəsi ilə əlaqədar xidmətlər, tibbi yoxlama, səyahət bürosunun xidməti və s.) bütün xidmətlərə görə ödəmələr də turizm xərclərinə daxil edilir. Həmçinin bura səyahət zamanı (xüsusi ilə geyim, dava-dərman) istifadə etmək üçün alınan və ya hədiyyə etmək üçün nəzərdə tutulan mallar da daxil edilir.
Dostları ilə paylaş: |
