71
Ərazidə əhaliyə sosial xidmətin ən mühüm sahələrindən biri əhaliyə məişət xidmətinin
göstərilməsidir. Bu sahənin inkişafına və genişlənməsinə xüsusi diqqət verilməlidir. Quba-Xaçmaz
iqtisadi rayonunda şəhərlə qəsəbələr, rayon mərkəzləri ilə kənd yaşayış məntəqələri arasında məişət
xidmətində böyük fərqlər mövcuddur. Ərazidə məişət xidməti fərdi paltar tikişi, bərbərxana,
mebellərin təmiri və hazırlanması, nəqliyyat vasitələrinə texniki xidmət, kimyəvi təmizləmə, məişət
cihazlarının təmiri, ayaqqabı təmiri və s. sahələrdən ibarətdir.
İqtisadi rayonda inzibati rayonlar üzrə əhaliyə məişət xidmətində göstəricilər fərqlidir. Məişət
xidmətinin 70 %-dən çoxu Xaçmaz və Quba rayonlarının payına düşür. Adambaşına bu göstərici
Xaçmaz və Qusar rayonlarında daha yüksəkdir.
Mədəni-maarif müəssisələri iqtisadi rayonda kitabxanalar, klublar, kinoqurğular, muzey və
digər sahələrlə təmsil olunur. 2014-cü ilin statistik məlumatına görə, Quba-Xaçmaz iqtisadi
rayonunda 272 kitabxana fəaliyyət göstərmişdir. Orada olan kitab və jurnalların sayı 1921,5 min
nüsxə təşkil edir. Bu da hər 1000 sakinə orta hesabla 3655 nüsxə deməkdir. Ərazidə olan ümumi
kitabxanaların 62%-i Quba və Xaçmaz inzibati rayonlarının payına düşür.
Ərazidə 240 klub və 11
muzey fəaliyyət göstərir. Buraya gələnlərin sayı isə 97 min nəfərdir[2]. 2014–2018-ci illər
regionların sosial-iqtisadi inkişafı dövlət proqramı çərçivəsində mədəniyyət obyektlərinin əsaslı
təmiri, tikintisi, tarix-mədəniyyət abidələrinin bərpası və konservasiyası sahəsində işlərin davam
etdirilməsi nəzərdə tutulmuşdur [7].
Ticarət xidməti əhalinin maddi tələbatının ödənilməsində müstəsna rol oynayır. Digər xidmət
növlərindən fərqli olaraq, son illər ərazidə ticarət şəbəkəsi xeyli inkişaf etmişdir. İstər ayrı-ayrı
ticarət mallarının növlərinə, istərsə də əhaliyə göstərilən xidmətin çeşidinə görə ticarət xidməti
inkişaf etməkdədir. Rayon mərkəzlərində və qəsəbələrdə bütün tələblərə cavab verən mağazalar və
ticarət mərkəzləri fəaliyyət göstərir. Bu xidmət obyektləri yerlərinin sayına və xidmət səviyyəsinə
görə bir-birindən fərqlənir. Ümumiyyətlə götürdükdə isə, ticarət müəssisələrinin 75%-i şəhər və
qəsəbələrdə, 25%-i isə kənd yaşayış məntəqələrində yerləşir. Son illər statistikaya baxdıqda kənd və
qəsəbələrdə ticarət obyektlərinin sayının artmasını müşahidə etmək olar. Belə ki, yüksək dağ
kəndlərində ticarət xidməti tələblərə cavab verməsə də, son illərdə bu ərazilərdə də ticarət
xidmətinin inkişafı istiqamətində irəliləyişlər müşahidə olunmaqdadır.
Təhsil sistemi əhalinin savadlanması-maariflənməsində və ideya-siyasi aləminin
zənginləşməsində mühüm yer tutur. İqtisadi rayonda xalq təhsil şəbəkəsi məktəbə-qədər
müəssisələr, orta məktəblər, liseylər, kolleclər və institut kimi sahələrlə təmsil olunur. Quba-
Xaçmaz iqtisadi rayonunda məktəbəqədər uşaq müəssisələrinin sayı 61, orada oxuyan uşaqların sayı
isə 2800 nəfərdir. 2015-ci il 01 yanvar statistik göstəricilərinə əsasən iqtisadi rayonda 418 ümumi
təhsil məktəbi fəaliyyət göstərir. İqtisadi rayonda olan ümumtəhsil məktəblərinin 84%-i Quba,
Qusar və Xaçmaz inzibati rayonlarında yerləşir.
Rayon mərkəzləri və qəsəbələrdəki məktəblər müasir maddi-texniki təchizatla təmin olunduğu
halda, bəzi kənd məktəbləri müasir tələblərə cavab verməyən darısqal binalarda yerləşir. Son illərdə
də Quba-Xaçmaz iqtisadi rayonunun bir sıra ucqar kəndlərində, həmçinin digər kənd və
qəsəbələrində yeni məktəblərin açılması və köhnəlmiş məktəb binalarının təmiri istiqamətində
müəyyən işlər görülür. İqtisadi rayonda təhsilə ən böyük töhvələrdən biri də 2015-ci ildə Prezident
İlham Əliyevin Azərbaycan Müəllimlər İnstitutunun Azərbaycan Dövlət Pedaqoji Universitetinə
birləşdirilməsi barədə sərəncamı olmuşdur. Bu sərəncam ilə Azərbaycan Müəllimlər İnstitutunun
rayonlardakı filialları, uyğun olaraq Quba filialı Azərbaycan Dövlət Pedaqoji Universitetinin filialı
hesab olunmuşdur. Nəticədə, iqtisadi rayonda dövlət univer-sitetinin filialının yaradılması təhsilə
marağın artmasına, eyni zamanda region əha-lisinə kənara çıxmadan eyni səviyyəli təhsilin əldə
edilməsi üçün şərait yaradılır[5].
Səhiyyə xidməti iqtisadi rayonda inkişaf etmiş əsas sahələrdən biridir. Səhiyyə xidməti
dedikdə ərazidə mövcud olan xəstəxana, ambulator-poliklinika, təcili tibbi xidmət müəssisələri,
aptek, əhaliyə tibbi xidmət göstərən həkim və orta tibb işçiləri nəzərdə tutulur. İqtisadi rayonda
Həsənov T.G.. Allahverdiyeva S.Ə., Mursaquliyev C.Ə.
72
əhaliyə xidmət göstərən həkimlərin sayı 722 nəfər təşkil edir. İqtisadi rayonda olan həkimlərin
28%-i Xaçmaz inzibati rayonunda cəmlənmişdir. Son illər Xaçmaz inzibati rayonunda Mərkəzi
xəstəxananın müasir standartlara uyğun təmiri həyata keçirilmişdir. İqtisadi rayonun səhiyyə
xidmətindən danışarkən qeyd etmək lazımdır ki, iqtisadi rayonun dağlıq ərazilərində yerləşən tibb
müəssisələrində kadr çatışmazlığı müşahidə olunur. Bu məsələ ilə əlaqədar olaraq diferensial əmək
haqqı sisteminin tətbiqi və tibbi kursların açılması məqsədəuyğun olardı[4].
Həm yerli, həm də xarici turizm üçün potensial region olan Quba-Xaçmaz iqtisadi rayonunun
sosial-iqtisadi inkişafında Xəzər dənizi boyunca yerləşən kurort-rekreasiya sahələrinin inkişaf
etdirilməsi böyük əhəmiyyət kəsb edir. Regionda turizm sahəsini beynəlxalq səviyyəyə qaldırmaq
üçün bütün imkanlar vardır. Bölgənin turizm ehtiyatları zəngin və perspektivlidir. Xəzər sahili boyu
dağlıq ərazilərdə turizm inkişaf etdirilir. Burada xidmət müəssisələri geniş yayılmışdır. Turizmin
inkişafı təkcə onun yüksək gəlir gətirməsi ilə məhdudlaşmır, həmçinin sosial problemlərin həllində,
işsizliyin aradan qaldırılmasında, əhalinin yaşayış səviyyəsinin yüksəldilməsində mühüm əhəmiyyət
kəsb edir. Hazırda respublikada xarici turistlərə xidmət göstərə bilən otellər və istirahət mərkəzləri
Yalama-Nabran bölgəsində daha çox cəmlənir. Xaçmaz inzibati rayonu ərazisinə aid edilən Nabran
yaşayış massivi respublikadaxili, qismən də xarici turizmin inkişafında xüsusi yer tutur[6]. Şahdağ
Milli Parkı, Təngəaltı dərəsi, Afurca şəlaləsi, “Quba” istirahət mərkəzi, “Balbulaq”, “Cənnət bağı”
istirahət zonaları (Quba), Yalama və Nabranın qumlu çimərlikləri təbiətsevərləri istirahətə cəlb edir.
Regionda fəaliyyət göstərən Qalaaltı sanatoriyası Şabran şəhərinin 45 km-də, dəniz səviyyəsindən
600 m yüksəklikdə fəaliyyət göstərir. Burada hər il orta hesabla böyrək xəstəliyindən əziyyət çəkən
5 mindən çox insan müalicə olunur. Əgər sərmayə qoyulsa, yerli və xarici turistlər Qəçrəş istirahət
zonasından il boyu yararlana bilərlər. Regionda tarixi abidələrin olması burada mədəni turizmin
inkişaf etdirilməsinə də əlverişli şərait yaradır. Beşbarmaq qayası və müdafiə səddinin qalıqları,
türbələr (Siyəzən), Şabran, Gilgil-çay istehkamlar kompleksi, Çıraqqala (Dəvəçi), Cümə məscidi
(Quba) və b. maraqlı tarixi-memarlıq abidələridir[5].
Dağlıq ərazilərdə isə yalnız Qusar inzibati rayonunda Şahdağ dağ turizm və alpinizm istirahət
mərkəzi fəaliyyət göstərir. “2014–2018-ci illər regionların sosial-iqtisadi inkişafı dövlət proqramı”
çərçivəsində turizm sahəsinin inkişafının dəstəklənməsi, o cümlədən Qusar rayonunda “Şahdağ”
turizm kompleksinin infra-strukturunun tikintisinin davam etdirilməsi nəzərdə tutulmuşdur[7].
Regionun turizm-rekreasiya şəbəkəsini daha da inkişaf etdirmək üçün, ilk növbədə, xidmətin
keyfiyyətinin yüksəldilməsi yönümdə işlər aparılmalıdır. Bunun üçün də regionda qeyd edilən
sahədə ixtisaslı kadr hazırlığı üçün təhsil müəssisələri, filiallar, ixtisasartırma kursları və s.
yaradılması məqsədəuyğun olardı. Bu həm də iqtisadi rayonun əhalisinin məşğulluğuna da müsbət
təsir etmiş olar. Bundan əlavə, iqtisadi rayonun ərazisində Xəzərsahili xeyli boş ərazilər hələ də
qalmaqdadır ki, bu ərazilərdə çimərlikləri genişləndirmək, istirahət mərkəzləri yaratmaq olar. Bu
işlərin həyata keçirilməsi üçün ilk növbədə, kiçik və orta sahibkarlığa dəstək əsas şərtdir.
Nəqliyyat. Quba-Xaçmaz iqtisadi rayonu əlverişli nəqliyyat coğrafi mövqeyinə malikdir,
Bakı-Rostov magistral dəmir və avtomobil yolları üzərində yerləşir. Həmçinin rayondaxili və
rayonlararası iqtisadi əlaqələri inkişaf etdirmək üçün çox əlverişli imkanlara malikdir. Bildiyimiz
nəqliyyat hər bir ərazidə xidmət sahələrinin inkişafında, əhalinin sosial və təsərrüfat fəaliyyətini
həyata keçirməsində əsas amildir. Ərazinin dağlıq şəraitə malik olmasına baxmayaraq, əhalinin
məskun-laşmasında, şəhər və kənd yaşayış məntəqələrinin formalaşmasında nəqliyyat əsas sosial-
iqtisadi amillərdən biri kimi böyük əhəmiyyət kəsb edir. Ərazidə dəmir yollarının ümumi uzunluğu
123 km olub, bunun 62 km-i və ya 50,5%-i Şabran, Siyəzən, 61 km-i və ya 49,5%-i isə Xaçmaz
inzibati rayonunun payına düşür. Respublika üzrə ümumi dəmiryolunun 7,4%-i Quba-Xaçmaz
iqtisadi rayonunun payına düşür. Bakı-Xaçmaz-Dərbənd avtomobil və dəmiryol xətləri bu iqtisadi
rayonun ərazisindən keçir. Onu qeyd etmək lazımdır ki, dəmir yolundan və stansiyalardan
uzaqlaşdıqca əhalinin məskunlaşma səviyyəsi zəifləyir, kənd yaşayış məntəqələri seyrəlir[8].
Quba-Xaçmaz iqtisadi-coğrafi rayonunda (İCR) xidmət sahələrinin və nəqliyyatın
ərazi üzrə təşkilinin coğrafi
xüsusiyyətləri