©
«Bakı Universiteti» nəşriyyatı, 2010
3
MÜƏLLİFLƏRDƏN
Məlumdur ki, arxeoloji materiallar bəşər tarixinin uzun bir dövrünü
öyrənmək baxımından çox mühüm mənbələr sayılır.
Oxuculara təqdim olunan bu dərslikdə Qafqazın qədim dövr tarixinə
həsr edilmiş ümumiləşdirici əsərlərdən, monoqrafiyalardan və bir çox elmi
məqalələrdən istifadə olunmuşdur.
Bildiyimiz kimi, Qafqazın təbii şəraiti ən qədim dövrlərdən insanların
bu ərazilərdə məskunlaşması üçün zəmin yaratmışdır. Arxeoloji qazıntılar
nəticəsində aşkar olunmuş qədim yaşayış məskənləri və qəbir abidələri
ərazisində yaşayan insanlar öz inkişaflarında ibtidai cəmiyyətdən başlayaraq
tarixin bütün inkişaf mərhələlərini keçmişlər.
Əsərdə Qafqaz ərazisində yaşayan qədim insanların həyat tərzi,
məşğuliyyəti, sənətkarlığı, təsərrüfat həyatı və Yaxın Şərq ölkələri ilə
iqtisadi-mədəni əlaqələri barədə məlumat verilmişdir. Dərslikdə zəngin
illüstrativ materiallar, şəkillər və tablolar da öz əksini tapmışdır. Arxeologiya
elmində istifadə olunan metodlar, o cümlədən ən yeni informasiya
texnologiyalarının imkanlarından nə dərəcədə bəhrələnməyin üsulları xüsusi
bir mövzuda göstərilmişdir. Bununla da keçən 150 ildə arxeologiya elminin
Qafqazdakı bütün abidələri gənc tarixçilər, arxeoloqlar və qədim dövrlə
maraqlananlar üçün dərslikdə kifayət qədər araşdırılmışdır.
|