6
bərabər, M.F.Axundzadədən başlayan professional ədəbi tənqidin XX əsrin
əvvəllərinə qədərki (1920-ci ilə qədərki) tarixini fundamental şəkildə
araşdırmağa müvəffəq olmuşdur.
Sovet dövründə tənqidin sistemli tarixini yazmaq mümkün olmasa
da, bu istiqamətdə müəyyən addımlar atılmış, tənqid və ədəbiyyatşünaslığı-
mızın yaradıcılıq problemləri daim diqqət mərkəzində olmuşdur. Akademik
K.Talıbzadənin iki cildlik “Seçilmiş əsərləri”nin ikinci cildi, üç cildlik
“Azərbaycan ədəbiyyatı tarixi”nin üçüncü cildində, iki cildlik “Azərbaycan
sovet ədəbiyyatı tarixi”ndə ədəbi tənqidlə bağlı yazılan icmallar,
Azərbaycan ədəbi tənqidinin bir çox istedadlı nümayəndələrinin elmi
fəaliyyətini işıqlandıran “Fikrin karvanı” kitabı bu baxımdan olduqca
əhəmiyyətlidir.
Azərbaycan ədəbi tənqidinin tarixi inkişaf yolunda ikinci əsas
mərhələ keçən əsrin 20-30-cu illəri hesab olunur. Bu onilliklərdə ədəbi
tənqid çox mürəkkəb və ziddiyyətli bir yol keçmişdir. Milli ədəbi tənqidin
tarixində bu qədər zəngin mərhələ təsəvvür etmək çətindir. Qeyd etmək
lazımdır ki, hər hansı bir dövrün ədəbi tənqidinin bütün təffərrüatı, tərkib
və parametrləri ilə canlandırılması həmin mərhələnin sistemli tədqiqat
predmetinə çevrildiyi təqdirdə əyaniləşir. Tənqidşünaslıq və ədəbiyyat
tarixçiliyi kontekstlərində bu mərhələnin tənqidi də ciddi araşdırmaların
obyekti olmuşdur. Keçən əsrin son onilliklərində prof.Ş.Salmanov və prof.
N.Şəmsizadənin tədqiqatları xüsusi qeyd olunmalıdır.
“Müasir Azərbaycan ədəbi tənqidinin təşəkkülü və inkişaf
meylləri” adlı tədqiqatın müəllifi Ş.Salmanov 1920-1932-ci illər sovet
dövrü ədəbi tənqidinin keçdiyi tarixi inkişaf yolunu, bu inkişafın
istiqamətini və yaradıcılıq meyillərini araşdırma obyektinə çevirmiş, bu
zaman və təbii ki, tədqiqatın obyektinin imkan verdiyi dərəcədə 1930-cu
illər ədəbi tənqidinin poeziyaya münasibəti məsələlərinə də toxunmuşdur.
Prof. N.Şəmsizadənin “Seçilmiş əsərləri”nin birinci (qismən),
ikinci (bütövlükdə) cildləri 1920-30-cu illər ədəbi tənqidimizin görkəmli
nümayəndələrinin elmi irsinin araşdırılmasına həsr olunmuşdur.
Son illərdə isə prof. B.Əhmədov və prof. T.Salamoğlunun
araşdırmalarını xüsusi qeyd etmək lazım gəlir. Prof. B.Əhmədovun bir sıra
məqalələrində 1930-cu illər tənqidi ilə bağlı təhlillərində bədii təsərrüfata, o
cümlədən poeziyaya və onun ayrı-ayrı nümayəndələrinin yaradıcılığına
metodoloji münasibət öndədir.
Prof. T.Salamoğlunun “Ədəbi tənqid tarixinə dair portret-oçerklər”
adlı tədqiqatında ədəbi tənqidimizin bu mürəkkəb mərhələsinə, dövrün
7
istedadlı tənqidçilərinin elmi irsinə çağdaş elmi-nəzəri düşüncə
müstəvisində münasibət bildirilmişdir. Adı çəkilən kitabında prof. T.Salam-
oğlu poeziya və tənqid probleminin şərhinə də xüsusi diqqət yetirmişdir.
Göstərilən bu tədqiqatlarda 1930-cu illər ədəbi tənqidində poeziya
məsələləri əhatəli tədqiqat obyekti olmuşdur. Bütün bunlara baxmayaraq,
1930-cu illər ədəbi tənqidi, xüsusilə onun poeziya ilə bağlı axtarışları, uğur
və kəsirləri ayrıca elmi-tədqiqat obyekti kimi götürülməmiş, milli ədəbi
tənqidin həmin mərhələsi üçün səciyyəvi olan xüsusiyyətlər sistemli şəkildə
öyrənilməmişdir.
Bundan əlavə, 1920-30-cu illərin tənqid materiallarının bir sistem
şəklində nəzərdən keçirilməsi sübut edir ki, 1920-ci illər tənqidi ilə 1930-cu
illər tənqidini keyfiyyətcə fərqləndirmək lazım gəlir. Tədqiqat işinin “1930-
cu illər Azərbaycan ədəbi tənqidinin poeziyaya estetik və ideoloji
yanaşmaları” kimi müəyyənləşdirilməsi, ilk növbədə, tədqiqatın üfüqi yox,
şaquli istiqamətdə aparılmasını və daha çox ədəbiyyatşünaslığımızda
“vulqar-sosioloji tənqid” mərhələsi kimi xarakterizə edilən onilliyin tənqid
təsərrüfatındakı fərqli təmayülləri aşkarlamağı, ədəbi mübarizələrin
mahiyyətini üzə çıxarmağı nəzərdə tutur. İndiyə qədər bu mərhələnin
tənqidi, təhlili ümumi bədii təsərrüfata münasibət kontekstində
öyrənilmişdir. Bu tədqiqatda isə tənqid və poeziya məsələlərinin ön plana
çəkilməsi ədəbi prosesin dərinliklərinə nüfuz etməyə, konkret bir sahənin
inkişaf yolu kontekstində ədəbi tənqidin səciyyəsini meydana çıxarmağa
imkan verir.
Tədqiqatın metodoloji əsası. Tədqiqat işində əsasən tarixi-
müqayisəli, tipoloji və analitik təhlil metodlarından istifadə edilmişdir.
Elmi əsaslandırmanı gücləndirmək məqsədilə yeri gəldikcə rus sovet
nəzəriyyəçi və tənqidçilərinin problemlə əlaqəli fikirlərinə də istinad
edilmişdir.
Tədqiqatın nəzəri və təcrübi əhəmiyyəti. Tədqiqat işi 1930-cu
illər tənqidinin elmi mənzərəsinin bütövləşməsi, metodoloji təbiətinin
aşkarlanması baxımından ciddi nəzəri əhəmiyyət daşıyır. Həmçinin bu iş
özünün təhlil istiqamətləri, nəzəri qənaətləri ilə sonrakı tədqiqatlar üçün də
müəyyən nəzəri baza kimi xidmət edə bilər. Tədqiqat işindən ali
məktəblərin filologiya fakültələrində “Ədəbi tənqid tarixi” fənninin
tədrisində, ali məktəblərin bakalavr və magistr pillələri üçün dərslik və dərs
vəsaitlərinin, həmçinin proqramların, metodik göstəriş və metodik
işləmələrin tərtibi zamanı istifadə oluna bilər. Tədqiqat prosesində
topladığımız ədəbi tənqid materialları Azərbaycan ədəbi tənqidinin tarixi