4
vəhdəti isə genetik yaxın genotipləri qruplaşdırmağa, seleksiya
proqramları üçün genetik fərqli valideyn formalarını təsnif etməyə,
həmçinin populyasiyaların müxtəlifliyi və genetik strukturu haqqında
daha ətraflı informasiya toplamağa imkan verir.
Beləliklə, bir tərəfdən Azərbaycanın Xəzəryanı bölgələrində yayılmış
üzüm bitkisinin zəngin genetik müxtəlifliyinin öyrənilməsinə olan
obyektiv tələbat, digər tərəfdən isə Azərbaycanın yerli üzüm
sortimentinin
yaranmasına dair əsaslı informasiyanın yoxluğu,
həmçinin Azərbaycana məxsus yabanı üzüm nümunələrinin üzümün
mədəniləşdirmə prosesindəki rolunun araşdırılmaması dissertasiya
işinin mövzusunun seçimini şərtləndirmişdir.
Tədqiqatın məqsədi və vəzifələri: Dissertasiya işində məqsəd
Azərbaycanın Xəzəryanı bölgələrinə məxsus mədəni və yabanı üzüm
nümunələrinin genetik müxtəlifliyinin öyrənilməsi olmuşdur.
Bu məqsəddən çıxış edərək, aparılan tədqiqatlarda qarşıya
aşağıdakı vəzifələr qoyulmuşdur:
Azərbaycanın Xəzəryanı bölgələrinə məxsus mədəni və yabanı üzüm
nümunələrinin, biomorfoloji-kəmiyyət əlamətlərini öyrənməklə,
çoxölçülü statistik proqramlar əsasında genetik müxtəlifliyinin
tədqiqi və məhsuldarlığın əsas elementlərinin müəyyənləşdirilməsi;
Populyasiya-statistik metodlar əsasında tədqiqat obyekti kimi
seçilmiş üzüm nümunələri arasından məhsuldar formaların təyini və
gələcəkdə seleksiya proqramlarında istifadə üçün perspektiv
nümunələrin seçilməsi;
Tədqiqatda istifadə olunan RAPD, nüvə və xloroplast mikrosatellit
praymerlərinin effektivliyinin təyini, mədəni və yabanı üzüm
nümunələrinin nüvə və xloroplast genomlarında polimorfizmin
səviyyəsinin qiymətləndirilməsi, genotiplərarası genetik oxşarlıq və
genetik məsafələrin müəyyənləşdirilməsi;
Molekulyar-genetik üsullar əsasında Abşeron yarımadası, Şabran,
Quba və Nabran bölgələrinə məxsus üzüm populyasiyaları daxilində
genetik müxtəlifliyin tədqiqi, populyasiyalar arasında genetik
diferensiasiyanın qiymətləndirilməsi və populyasiyalararası genetik
məsafələrin müəyyənləşdirilməsi;
Üzüm nümunələrinin yarpaqlarında resveratrol antioksidantının
miqdarının təyini və nümunələrdəki resveratrolun miqdarı ilə
RAPD praymerləri ilə amplifikasiya olunmuş DNT fraqmentlərinin
hər biri arasında asılılığın olub-olmadığının öyrənilməsi;
5
RAPD, nüvə və xloroplast mikrosatellit praymerləri vasitəsilə əldə
olunmuş nəticələrin müqayisəli təhlili, üzüm nümunələrinin
identifikasiyası, sinonim və omonim formaların təyini.
Elmi yeniliklər: Üzümün (V.vinifera L.) genetik müxtəlifliyinin
araşdırılması bu sahədə Azərbaycanda ilk tədqiqat işidir və Xəzəryanı
bölgələrə məxsus, qiymətli yabanı və mədəni üzüm nümunələrinin və
onların genofondunun öyrənilməsinin nəzəri və praktiki cəhətdən
əhəmiyyətli olmasını təsbit edir. Tədqiqat işində mədəni və yabanı
üzüm nümunələrinin genetik müxtəlifliyi biomorfoloji-kəmiyyət
əlamətləri ilə yanaşı, ilk dəfə olaraq, RAPD, nüvə və xloroplast
mikrosatellit markerləri əsasında müqayisəli şəkildə öyrənilmiş,
Abşeron, Şabran, Quba və Nabran bölgələrinə məxsus üzüm
populyasiyalarının genetik strukturu çoxölçülü statistik metodlar
vasitəsilə analiz olunmuşdur. İlk dəfə olaraq, molekulyar-genetik və
populyasiya-statistik üsullardan kompleks şəkildə istifadə etməklə,
Xəzəryanı bölgələrə məxsus mədəni və yabanı üzüm nümunələrində
polimorfizmin səviyyəsi qiymətləndirilmiş, nümunələrarası genetik
məsafə
təyin edilmiş, nümunələrin qohumluq əlaqələri
müəyyənləşdirilmiş, genotiplər identifikasiya olunmuşlar. Bunların
əsasında Azərbaycanın üzüm bitkisinin mənşə mərkəzlərindən biri
olması təsdiqlənmişdir. Nümunələrin identifikasiyası ölkəmizə məxsus
üzüm genetik materialının respublikamıza mənsubluğunu sübut etməyə
imkan verir.
İlk dəfə olaraq, Azərbaycana məxsus mədəni və yabanı üzüm
nümunələrinin yarpaqlarında resveratrol antioksidantının miqdarı
ölçülmüş, OPF-18 RAPD praymeri ilə amplifikasiya olunmuş 2300 n.c.
uzunluğunda olan DNT fraqmenti ilə resveratrol antioksidantının
yüksək miqdarı arasında asılılığın mövcudluğu aşkar edilmişdir.
İşin praktiki dəyəri: Tədqiq olunmuş üzüm nümunələrində çoxölçülü
statistik metodlarla biomorfoloji-kəmiyyət əlamətləri arasından
məhsuldarlığın komponentlərinin müəyyən edilməsi seleksiya sahəsində
əhəmiyyətli olub, məhsuldarlığın artmasına səbəb olacaq tədbirlərin
tətbiqini proqnozlaşdırmağa imkan verir. Həm biomorfoloji-kəmiyyət
əlamətləri, həm də bilavasitə nüvə və xloroplast genomları səviyyəsində
nümunələrarası genetik məsafənin təyini, yabanı və mədəni üzüm
genofondları arasındakı genetik müxtəlifliyin etibarlılığının
müəyyənləşdirilməsi gələcəkdə həyata keçiriləcək seleksiya proseslərini
istiqamətləndirməyə xidmət edir. Üzüm nümunələrinin identifikasiyası,
sinonim formaların aşkar olunması onların etibarlı şəkildə təsnif
6
edilməsinə və uzunmüddətli təkamülün nəticəsi olan mövcud genetik
müxtəlifliyin genbanklarda düzgün şəkildə ex situ mühafizəsinə imkan
verir. Resveratrol antioksidantının yüksək miqdarı ilə RAPD markeri
arasında asılılığın mövcudluğu cari DNT fraqmentinin SCAR markeri
kimi zaman və vəsait sərfinə yol vermədən resveratrolun miqdarının
çox olduğu genotiplərin tanınmasında tətbiqini mümkün edir. Tədqiqat
işində Azərbaycana məxsus mədəni üzüm nümunələrinin yabanı
əcdadları təyin olunmuşdur ki, bu da öyrənilmiş yabanı üzüm
nümunələrinin müxtəlif məqsədlərlə həyata keçiriləcək genetik
tədqiqatlarda istifadəsində faydalı olacaqdır. Molekulyar markerlərlə
tədqiqat işinin optimallaşdırılması davamlı üzüm sortlarının
yaradılmasına imkan verir. Bu istiqamətdə aparılacaq tədqiqatların son
məqsədi qiymətli üzüm nümunələrinin faydalı genlərinin, həmçinin
kəmiyyət əlamətlərinin genlərinin identifikasiyası və xəritələnməsinin
mümkünlüyüdür.
Beləliklə, Azərbaycanın Xəzəryanı bölgələrinə məxsus mədəni və
yabanı üzüm nümunələrinin genetik müxtəlifliyi və genofondunun
öyrənilməsi üzüm populyasiyalarının genetik strukturu, təkamülü,
mənşəyi haqqında əsaslı informasiya verərək, Azərbaycanın üzüm
rüşeym plazmasının gələcək idarəsi üçün çox faydalıdır.
Aprobasiya: Dissertasiya işinin əsas nəticələri akademik Həsən
Əliyevin 100 illik yubileyinə həsr olunmuş “Ekologiya: təbiət və
cəmiyyət problemləri” mövzusunda keçirilmiş beynəlxalq elmi
konfransda (2007), Bakı Dövlət Universitetində “Biologiyanın müasir
problemləri” mövzusunda keçirilmiş respublika elmi konfransında
(2008), Bakı Dövlət Universitetində “Biologiyada elmi nailiyyətlər”
mövzusunda keçirilmiş respublika elmi konfransında (2009),
Azərbaycan Milli Elmlər Akademiyası aspirantlarının illik elmi
konfransında (2009), Bakı Dövlət Universitetinin 90 illik yubileyinə
həsr olunmuş beynəlxalq elmi konfransda (2009), akademik Abdulla
Qarayevin anadan olmasının 100 illik yubileyinə həsr olunmuş “XXI
əsrdə biologiyanın aktual problemləri” mövzusunda keçirilmiş
respublika elmi konfransında (2010), İtaliyanın Baloqna şəhərində
keçirilmiş “Bitki genetik resurslarının genomuna dair 2-ci beynəlxalq
simpozium”da (2010), İran İslam Respublikasının Tehran şəhərində
keçirilmiş “11-ci bitki elmləri konqresi”ndə (2010), Bakı Dövlət
Universitetində gənc alimlərin və tədqiqatçıların “Müasir biologiyanın
nəzəri və tətbiqi problemləri” mövzusunda keçirilmiş beynəlxalq elmi
konfransında (2011) məruzə edilmişdir.
Dostları ilə paylaş: |