www.kitabxana.net
– Milli Virtual Kitabxana
28
- Ay yazıq, neyləyəsən, həmişə sırtıq abırsızları görmüsən. Ona görə də indi təəccüblənirsən. İlk tanışlıq
belə olur də. Sonra yavaş-yavaş hər şey yoluna düşür.
- Gəlin onda çörək kəsməzdən əvvəl içək bu görüşün sağlığına.
Nail əlində tutduğu şampan şərabından piyalələrə süzüb payladı.
- İç, - Məsmə tərəddüd edən İncini stolun altından dümsüklədi.
Ard-ardınca stolun üstünə müxtəlif təamlar düzülürdü. Nailin də sağlıq tostları bitmək bilmirdi. Məsmə
ilə bir-birini tərifləyə şərabın axırına az qalmışdılar.
- Gör qız nə istəyir soruş, bekar qalmasın, yesin-içsin.
- Aaz, sənə nə olub, yesənə-içsənə, - Məsmə məzəmmətlə onu süzürdü.
İncini qəribə bir süstlük bürümüşdü. Yediyi, içdiyi canına sınmırdı. Bu iki yad insanın arasında ürəyinə
pis fikirlər gəlirdi. Nailin arxayınçılığı, maşından düşərkən Məsmənin ona mənalı göz-qaş etməsi, dəhlizdə
Rimanın "xeyrini görəsən" atmacasını xatırladıqca İncinin qəlbinə dolan qara fikirlər canını alırdı. Olmaya onu
buraya satmağa gətirib? Ola bilsin razılığa gəliblər, behini də alıb. Tanış olmaq, evlənmək adı ilə fırlayıb alan
alacaq, satan da satacaq. O da olacaq Məsmə kimi anaya layiq qız və yaxud onun gələcək "işçisi". Bax bu
qonaqlıq, yeyib-içmək də yəqin ona görədir. Onu sərxoş edib, ya da nə iləsə bihuş edib istəklərinə çatacaqdılar.
İnci dəfələrlə Məsmənin hərraca qoyduğu bakirə qızları necə tora salacaqları barədə müştəriləri ilə olan
söhbətlərini eşitmişdi.
Stəkanı tutan əli əsdi. Şirəni uda bilmədiyindən boğazında qaldı. Çeçədi, əlini ağzına tutub yerindən
qalxdı.
- Ürəyində qaldı? Nə istəyirsən? Dayan kürəyinə vurum.
- Keçdi, heç nə. Əllərimi yuyub qayıdıram.
- Çölə çıxma, bildin də, qapının ağzında arakəsmədə kran var, əl-üzünə su vur qayıt. - Məsmə
qayğılandı.
www.kitabxana.net
– Milli Virtual Kitabxana
29
İncinin isə qayıtmaq fikri yox idi. O bu dəqiqə əlinə düşən fürsətdən istifadə edib qaçmaq, ilan ağzından
çıxan qurbağa kimi canını qurtarmaq istəyirdi. Əks halda onun bəkarətini əlindən alacaqdılar! İmkan
verməyəcəkdilər özü öz bədəninə yiyəlik etsin, ismətini sevgilisi üçün qoruyub saxlasın...
Başı söhbətə qarışan Məsmə xeyli vaxt keçməsinə baxmayaraq İncinin otağa qayıtmamasından narahat
oldu.
- Bay... bu qız nə çox ləngidi, görəsən nə oldu? - Yerindən durmağa ərindi, üzünü qapıya tərəf tutub
çağırdı:
- İnci, ay qız, nə oldu sənə, gəl çıx görüm.
- Darıxma gələr. Səbəbsiz olmaz. Bəlkə özünə bər-bəzək verir. Dur maraqlan, nəyəsə ehtiyacı ola bilər.
Səs-soraq gəlmirdi. Məsmə yerindən durub əvvəlcə vanna otağını, sonra da ayaqyolunu nəzərdən
keçirdi. Təəcübdən dondu: İnci yox idi.
Nail Məsmənin sual dolu baxışlarından təlaşa düşdü:
- Qıza nə olub? Nə baş verib?
- Qız yoxdu, yox olub...
- Necə yox olub? İynədi itsin? Bizdən xəbərsiz hara çıxıb? Bu dəqiqə öyrənərəm.
O divardakı düyməni basdı. Saniyə keçmədi, hər iki ofisiant içəri girdi.
- Bizimlə oturan qız harasa çıxıb. O, buralara nabələddi, axtarın, tapın.
- Bir az qabaq mən onu gördüm, - ofisiantlardan biri dilləndi.
- Harda?
- Dəhlizdə rastlaşdım. Özündə deyildi, harasa tələsirdi.
- Bütün otaqları, hər yeri axtarın, mənə bir xəbər verin.
Məsməni fikir götürmüşdü: İnci otaqdan çıxıb hara getmişdi?
www.kitabxana.net
– Milli Virtual Kitabxana
30
- Gəl otur, fikir eləmə, - Nail onu sakitləşdirməyə çalışdı, - bəlkə içdiyi şərabdan keflənib, çölə havasını
dəyişməyə çıxıb?
- Axı o elə çox içmədi.
- Səbrli ol, beş dəqiqəyə tapılar.
İki dəqiqə keçmədi ofisiant qapıda göründü:
- Nail bəy, hər yeri gəzdik yoxdur...
- Sən nə danışırsan, necə yəni yoxdur...
- Həyətdəki dondurma satan bir qızın tək-tənha yaxınlıqdakı şosseyə tərəf getdiyini görüb. Yəqin odu...
- Yaxşı, get, yeni nəsə öyrənsən mənə çatdır, -yerindən ayağa durub şikayətlindi, - daha nə yemək, olan-
qalan iştahamız da korlandı. Dur gedək, yolda görsək qaytaraq. Öyrənək, görək niyə belə edib, xətrinə nə dəydi,
nə oldu axı? Bəlkə sən xətrinə dəymisən?
- Yox, Allah haqqı mən yazıq nə etdim ki, - Məsməni çaşqınlıq bürümüşdü. Görən nə oldu ki, İnci
xəbərsiz, öz yanından baş alıb getdi. Heç cürə ağlına sığışdıra bilmirdi.
Nail Məsmə ilə gəldikləri maşına minib şəhərə gedən şosseyə tərəf yön aldılar. Şosse boyu hər ikisi
gözünü yolun qırağından çəkmədən susmuşdular: İnci sanki, qeyb olmuşdu...
Nail Məsməni evinin yaxınlığına gətirdi:
- Səncə qız hara gedər?
- Hara getsə evə gələcək. Uzağı axşama evdə olacaq.
- Nə olsa mənə xəbər edərsən. Hələlik, - Nail sağollaşdı. Məsmə evin qapısını açarla açmaq istəyəndə
bağlı olmadığını görüb sevindi. İncinin xasiyyətinə bələd idi. Evdən başqa harasa gedən deyildi. Sevinməklə
yanaşı anlaya bilmədiyi qızlığının qəribə hərəkətinə görə ürəyində yaranan acığı sifətini turşutdu. Qapını açan
İnciyə hövsələsiz suallar yağdırdı:
- Ay balam, nə baş verib, nə olub sənə, əl yumaq bəhanəsi ilə çıxıb gizlicə qaçmısan. Qalmışıq axtara-
axtara: görəsən, qıza nə oldu, başına nə iş gəldi? Niyə belə edirsən? Məni də başa sal bilim.
www.kitabxana.net
– Milli Virtual Kitabxana
31
İnci sualı sualla qarşıladı:
- Sən de görüm məni niyə ora aparmışdın?!
- Təsadüfən rastlaşdıq. Hörmət məqsədi ilə bizi restorana apardı. Oturub çörəyimizi yeyib qayıdacaqdıq.
Burda pis nə var ki? Yediyim bir parça çörəyi də zəhərə döndərib gətirdin burnumdan.
- Yox, təsadüf deyildi. Sən gəzmək bəhanəsi ilə evdən çıxsan da, onunla rastlaşmağı qabaqcadan
razılaşmışdın.
- Tutaq ki, elədir. Hə, nə olsun?
- O olsun ki, sənin çoxdan könlündən keçir ki, məni ona satasan.
- Gic-gic danışma, bu ağlına haradan gəlib?
- Aylarla beynimi aparmağından. Yoxsa elə deyil? Nə qədər axmaq olasan ki, o cür imkanlı adamın
"Mama Roza"lıq edən arvadın öz övladı yaşında olan qızı ilə ailə qurmasına inanasan. Güman ki, bir gecəlik
siğəyə razılaşmısan. Qaçmasaydım məni sərxoş edib, o harının qucağına atacaqdın. Planın da uğurla baş
tutacaqdı...
- Ay Allah, sən nə qədər "fantazyor" qızsanmış, - Məsmə bu sözlərin İncidən eşitməsinə məətəl
qalmışdı, - Mən səni belə bilməzdim. Dilin nə yaman uzanıb? Ay axmaq, nə edirəm, sənin xeyrin üçün edirəm.
Səni güclə kiminsə yatağına salmaq fikrim yoxdur. İstəyirəm dərk edəsən, gələcəyini fikirləşəsən. Gözəlliyinin,
qızlığının qədrini, dəyərini biləsən, daha küləyə verməyəsən. Ay ağılsız, ağlın olsa Naildən, nailkimilərdən
bacardığın qədər faydalanıb, ömrünü xoş, var içində keçirərsən. Həmişə belə təravətli qalmayacaqsan.
Gülürsən, anlamırsan ki, dünyada ən böyük güc, ən dəyərli həqiqət puldur. İnsan bütün ömrü boyu çoxlu pul
qazanmaq üçün çalışır. Həyat yaradan dörd ünsürdən üçünü - odu, suyu, torpağı pulla alırsan. Pulu qazanmaq
naminə isə gərək nədənsə keçəsən, sərf edəsən. Dünyanın ən səxavətli varlığı - Tanrı həm də ən böyük
alverçidir. Hələ olmayıb ki, bəndədən əvəzini almadan pul, var qismət etsin. Baxır kimə necə yanaşır. Hərənin
bir cür başını qatışdırır. Mümkün deyil itkisiz nəyisə əldə edəsən...
Məsmənin fəlsəfi həyat dərsindən bezən İnci səsini qaldırdı:
- Mən var-dövlətdən ötrü sevgimi, namusumu qurban verə bilmərəm. Ömrüboyu kasıb yaşayıb xoşbəxt
olmaq, şərəfsiz varlı yaşamaqdan yaxşıdır.
Dostları ilə paylaş: |