“Ərəb dilində köməkçi fellər haqqında bəzi qeydlər”
407
SUMMARY
In the result of research it was studied the interesting features of auxiliary verbs,
and it should be continued.
РЕЗЮМЕ
В результате исследовательских работ были затронуты достаточно
интересные стороны вспомогательных глаголов; поиски будут продолжены.
Quranın düşüncə sistemində “tədəbbür” məfhumu
409
QURANIN DÜŞÜNCƏ SISTEMİNDƏ
“TƏDƏBBÜR” MƏFHUMU
Şüca Cavanpərəst
AMEA Əlyazmalar İnstitutunun doktorantı
Açar sözlər: Quran, düşüncə, təfəkkür, tədəbbür
Key Words: Quran, knowledge, thinking, meditation
Ключевые слова: Коран, познание, мышление, размышление
Giriş. İslam mədəniyyətində düşüncə sisteminin təşəkkülü barədə əsas
qaynaq Qurani-Kərimdir. Burada həmin sistemin tərkib hissələrini təşkil
edən məfhumlar sırasında elm, ağıl və təfəkkür və s. mühüm yer tutur. İslam
düşüncə sisteminin əhəmiyyətli ünsürlərindən biri də “tədəbbür” məfhumu-
dur ki, ümumi təfəkkür prosesində xüsusi rol oynayır. Həmin rolun nədən
ibarət olduğunu müəyyənləşdirmək zəruri məsələlərdən biri kimi çıxış edir.
Tədəbbür sözü “dubr” kökündən olub işlərin arxasınca düşünmək məna-
sı bildirir ki, bu da əslində dərindən fikirləşmək və məsələnin gələcəyini
nəzərə almaq deməkdir. Bu cür düşüncənin nəticəsi olaraq əvvəlcə gözə
səthi şəkildə çarpan həqiqətlər aşkar olur. Rağib İsfəhani “Müfrədat” əsərin-
də yazır: “Tədəbbür işlərin arxasında düşünmək və tədbir görmək deməkdir”
(2.c.1.s.657). Məhəmməd ibn Əbibəkr Əbdülqadir ər-Razinin “Muxtarüs-si-
hah” əsərində tədbir sözünün mənasını belə izah edir:
Tədəbbür – işlərin aqibət üzərində təfəkkür mənasında işlənir. Əhməd
ibn Məhəmməd bin Əli əl-Müqri əl-Qəyyumi “Misbahül-münir fi qəribi
şərhi-kəbir” kitabında yazır: “Dubr ön və qabaq sözünün təzadı olaraq bir
şeyin arxası deməkdir. Ona görə bu söz işin sonu və aqibəti mənası bildirir.
Tədəbbür insanın üz və arxa çevirməsi və gələcəyi düşünməsidir, diqqətlə
baxaraq işin aqibətini fikirləşməsidir (3.c.2.s.188).
Şeyx Fəxrəddin Tərihinin “Məcməül-bəhreyn” əsərində deyilir: “Bir iş
üçün tədbir görmək onu nəzərdən keçirərək sonunu və aqibətini düşünmək
deməkdir” (4.s.8). Müəllif sonra Nisa surəsi, 82-ci ayəni misal gətirir:
“Onlar Quran barəsində (onun Allah kəlamı olması haqqında) düşünməz-
Şüca Cavanpərəst
410
lərmi? Əgər o, Allahdan qeyrisi tərəfindən olsaydı, əlbəttə, onda çoxlu zid-
diyyət (ixtilaf, uyğunsuzluq) tapardılar” .
Allah-təala bu ayədə tədəbbürdən söz açır ki, bu da işlərin aqibətinə
baxaraq onlar barədə dərindən düşünmək anlamına gəlir. O, eyni zamanda
tədəbbür və təfəkkür arasında olan fərqə işarə edərək yazır: “Tədəbbür
adətən qəlbin hökmü ilə işlərin aqibətini düşünmək mənası bildirir, ancaq
təfəkkür qəlbin hökmü ilə dəlillərə diqqət yetirir” (4.s.9).
Firuzabadinin “Qamus”unda deyilir: “Dubr ön və qabaq sözünün zidd
tərəfidir, bir şeyin arxası bu sözlə ifadə edilir. Tədbir isə işlərin sonuna və
aqibətinə baxmaq mənası bildirir. İstiqbal (qarşılamaq) sözünün təzadı
“istədbar” sözüdür. Quranda bu sözün işlənməsi sonluğu düşünmək
baxımından diqqəti cəlb edir (5.s.157).
Qərəşinin sözlüyündə tədəbbürün eyni zamanda anlamaq və dərk etmək
mənası verlilr, yəni tədəbbür etməmək anlamamaq deməkdir (6.c.2.s.326).
Əllamə Təbatəbai həmin sözün mənasını izah edərək yazır: “Tədəbbür
bir şeyin başqa bir şeydən götürülməsi deməkdir. Quran ayələrində bu söz
ayə üzərində düşüncəyə dalmaq və sonra bir daha ayələr üzrə düşünmək
mənası bildirir” (7.c.5.s.128).
Əbu Hilal Əsgəri lüğət və bəlağət elmində tanınmış müəlliflərdən
biridir. O, “Füruğül-lüğəviyyə” əsərində “tədəbbür” və “təfəkkür” sözləri
arasındakı məna fərqinə işarə edərək yazır: “Tədəbbür qəlbdə işlərin
aqibətini düşünməkdir. Ancaq təfəkkür əməllərin və hərəkətlərin səbəb və
dəlillərini axtarmaq deməkdir (7.s.67).
Beləliklə, qaynaqlarda verilən məlumatları ümumiləşdirsək belə bir
nəticəyə gəlirik ki, tədəbbür məsələnin zahiri tərəfinin arxasında dayanan
məqamlar, yəni işin batini tərəfi haqqında düşünmək deməkdir. Belə bir
düşüncə gələcək və aqibəti nəzərə alan tədbirli düşüncədir. Məsələnin
mahiyyətini axtarmaq, diqqəti işin nəticə və sonuna yönəltmək tədəbbürün
əsas xüsusiyyətidir. Təfəkkür isə məsələnin zahir və batinini, səbəb və
nəticələrini araşdırmaq deməkdir. Təfəkkür məlum faktlar və dəlillər
əsasında bəlli olmayan məsələləri araşdırmaq və aşkar etmək məqsədi
daşıyır.
İşlərin sonunu və aqibətini aşkar etmək istəyi insanı məsələnin səthi
müşahidəsindən onun dərinliyinin dərkinə sövq edir. Quran ayələrində
tədəbbür insanı dərin məna axtarışına dəvət edir, bu səmavi kitabın ilahi
vəhydən qaynaqlandığını diqqətə çatdırır. Quran səthi səviyyədə ərəblərin
Quranın düşüncə sistemində “tədəbbür” məfhumu
411
danışdığı söz və cümlələrdən ibarətdir və bu səviyyədə bəşər sözündən o
qədər də fərqlənmir. Ancaq ilahi kitab olaraq onun dərin düşüncəyə və
aqibətə hesablanmış məna tutumu adi bəşər düşüncəsindən fərqlənir.
Quranda tədəbbür məfhumu ilə bağlı başqa bir məqam da vardır:
ayələrin ardıcıl məna düzümündə diqqət onların batininə yönəlir, ayələr
arasında olan əlaqənin dərinliyi göz önündə canlanır. Bunlar arasında heç bir
ixtilaf yoxdur, bütün ayələr batini məzmun baxımından bir-birilə uzlaşır,
bütöv bir tam kimi qarşımıza çıxır. Ona görə də bir surədə olan ayələri
ardıcıl izləməklə yanaşı, onları bütöv Quranla tutuşdurmağa ehtiyac duyulur.
Bununla da məlum olur ki, 23 il ərzində Peyğəmbərin (s) enişli-yoxuşlu yo-
lunda və fərqli ictimai-tarixi şəraitlərdə nazil olan Qurani-Kərim bəşər zeh-
ninin səviyyəsində deyildir. Bəşər və başqa maddi varlıqlar həmişə dəyişik-
lik halında olaraq naqislikdən kamala doğru hərəkətdədir. Deməli, Quranda
tədəbbür ayələr arasında olan batini məna əlaqələrini, ayələrin özlərinin bir-
birilə bağlılığını nəzərdə tutur.
Meybodinin “Kəşfül-əsrar” adlı məşhur təfsirində tədəbbür barədə belə
deyilir: “Tədəbbür odur ki, işləri əvvəldən axıradək tənzimləyərək onun so-
nunu nəzərdə tutasan. Əbu Osman Məğribi deyir ki, tədəbbür üç qisimdir:
biri öz-özünə fikirləşmək ki, buna möizə yönümlü tədəbbür deyirlər; ikin-
cisi, zahidlərə məxsus düşünməkdir; üçüncüsü, Quran üzərində düşünmək-
dir. Sonuncu həqiqət və kəşf yönümlü tədəbbür adlanır və ariflərə xasdır.
Onlarda batini kəşf ilə qəlb ilə Haqq arasındakı pərdə götürülür, arzuları ger-
çəkləşir, müşahidə suları mülahizə arxı ilə rəvan olur, ürəklə zikrə dolu, dil
susqun halda özünü unudur. Belə ariflər siddiqlərin sükunət dərəcəsinə
yetişmiş olurlar və buraya yetişməyən kimsə Quran calalından, onun gizli
cövhərindən faydalana bilməz (9.c.2.s.515).
Tədəbbür və təfsir arasında fərq.
Ayələri diqqətlə
nəzərdən keçirərkən onun ənənəvi terminoloji
mənasından əlavə, başqa izahları da ortaya çıxa bilər:
A. Quranda irəli sürülən tədəbbür məfhumu dərrakə, fəhm, elmi və ruhi
səviyyəsindən asılı olmayaraq bütün insan təbəqələrinə şamil edilə bilir.
Təfsir Quranın anlaşılmasında müctəhidlərin və alimlərin yararlandıqları
üsuldur. Onlar bununla tədəbbürün elmi izahını verməyə çalışırlar. Ancaq
Quranın mətnində hər kəsdən tədəbbür – yəni düşünmək tələb olunur. Hətta
müşriklər və münafiqlərə düşünmək üçün müraciət olunur. Allah Muminin
surəsi, 68-ci ayədə buyurur:
Dostları ilə paylaş: |