33
müvafiq işlərə yenidən baxan digər məhkəmələr Konstitusiya
Məhkəməsinin pozulmuş hüquq və azadlıqlarının bərpasına yönəlmiş
qərarına uyğun olmayan qərar qəbul etməməlidir. [...]
Yuxarıdakıları nəzərə alaraq, Konstitusiya Məhkəməsinin Plenumu
hesab edir ki, Azərbaycan Respublikasının prosessual qanunvericiliyində
təsbit edilmiş və sorğuda mübahisələndirilən müddəaların Konstitusiyaya
uyğun olub-olmaması məsələsi ali konstitusiya ədalət mühakiməsi
orqanının və eyni zamanda Ali Məhkəmənin mövcud qanunvericilikdə
müəyyən edilmiş səlahiyyətləri çərçivəsində həll olunmalıdır.
Həmin müddəalar Ali Məhkəmənin Plenumu tərəfindən:
1) Hüquq və azadlıqların pozulması ilə bağlı yeni hallar üzrə icraatı
Azərbaycan Respublikasının qanunvericiliyi ilə müəyyən edilmiş hüquqi
hədlər çərçivəsində həyata keçirilməklə;
2) Konstitusiya Məhkəməsinin qərarlarının, o cümlədən bu
qərarlarda əks olunmuş hüquqi mövqelərin məcburi qüvvəsini nəzərə
alaraq onların şərtsiz icrasının təmin edilməsi üçün zəruri hüquqi
məsələləri həll etməklə;
3) Konstitusiya Məhkəməsinin qərarlarının təhrifinə (təftişinə,
genişləndirilməsinə, məhdudlaşdırılmasına və ya digər formada təfsir
olunmasına)
yol verməməklə;
4) İşlərin yenidən baxılması məsələsini təşkil edərkən onların
yalnız təkrar baxılması üçün deyil, həmçinin pozulmuş insan hüquq və
azadlıqlarının tezliklə bərpası məqsədi ilə Konstitusiya Məhkəməsinin
qərarlarında göstərilmiş məhkəmə səhvlərinin, onların yol verildiyi
məhkəmə icraatı mərhələsində və müvafiq icraat üçün qanunvericilikdə
nəzərdə tutulmuş müddətlər çərçivəsində aradan qaldırılması üçün
konkret qərarlar qəbul etməklə yerinə yetirildikdə Azərbaycan
Respublikası Konstitusiyasının 130-cu maddəsinin IX hissəsinə uyğun
hesab edilə bilər.
Qərarda Məhkəmə “preyudisial” sözünə istinad edir. Bu söz Azərbaycanın bəzi
prosessual qanunvericilik aktlarında istifadə olunsa da, qanunlar bu terminin
tərifini vermir. “Preyudisial” sözündə “
pre” “qabaq” və ya “əvvəl” deməkdir,
“
yudisial” isə “məhkəmə” və ya “ədalət mühakiməsi” deməkdir. Qısa formada
desək “preyudisial” son olaraq həll olunmuş məsələnin (adətən barəsində son
məhkəmə qərarı qüvvəyə minmiş) digər məhkəmə və ya işlər üçün mübahisəsiz
qəbul olunmasını ifadə edir. Yəni bir məhkəmə artıq son olaraq həll olunmuş
(barəsində digər məhkəmələrin qüvvəyə minmiş qərarı olan) işin faktlarını və ya
hüquqi dəyərləndirməsini mübahisə edə bilməz.
34
Qeydlər, suallar və tapşırıqlar
1.
Azərbaycan Konstitusiyasının 1 və 2-ci maddələrinə əsasən xalq
suverendir. 7-ci maddəyə əsasən isə Azərbaycan demokratik ölkədir.
Ancaq xalq
dövlətin idarəçiliyində birbaşa iştirak etmir. O, seçdiyi orqanlar vasitəsi ilə
iştirak edir. Dövlət orqanlarının təşkili Konstitusiyanın digər maddələri və
qanunlarla tənzimlənir. Bu maddələrin və qanunların fonunda Konstitusiyanın 1
və 2-ci maddələri daha çox deklarativ xarakter daşıyır. Sizcə, 1 və 2-ci
maddələrin əhəmiyyəti varmı, varsa, onlar nə qədər böyükdür?
Alman Konstitusiyasında oxşar maddə var. Fransanın hazırkı
Konstitusiyasının 2-ci maddəsinin 5-ci abzası eyni prinsipi ifadə edir. Ancaq ABŞ
Konstitusiyasında buna oxşar maddə mövcud deyil. ABŞ Konstitusiyasının 1-ci
maddəsi ABŞ-ın qanunverici orqanı olan Konqres barədədir. Konstitusiyanı
deklarativ prinsiplərlə başlamaq və ya xalqın iradə ifadəsinin bir yolu olan
qanunverici orqana aid müddəalarla (daha praktik) başlamaq arasında
praktiki
fərq varmı?
Konstitusiyanın əksər maddələrinin geniş xarakter daşıdığını nəzərə
alsaq, onların hamısının deklarativ olduğunu demək olarmı? Yoxsa insanların
münasibətindən asılıdır?
Tapşırıq: Azərbaycanın qanunlarına əsasən siyasi partiya yaratmaq üçün
ən azı 1000 (min) nəfər – bu daha çox və ya az ola bilər, bizim
müzakirəmiz üçün böyük fərq etməz – üzvün olması tələb olunur. Yəni
yeni yaranacaq partiyanın azı 1000 üzvü olmalıdır. Məmməd musiqiçidir
və hesab edir ki, musiqiçilərin əmək haqqı azdır. O, düşünür ki, hər il
dövlət ölkədə fəaliyyət göstərən peşəkar bir musiqiçiyə büdcədən 500
manat pul ödəməlidir. Bu cür qanunun qəbul edilməsinə nail olmaq üçün
o, siyasi partiya yaratmaq istəyir və qeydiyyat üçün qeydiyyat orqanına
müraciət edir. Məmmədin partiyasına yalnız 700 insan üzv olmağa razılıq
verir. Ona qeydiyyatdan imtina edilir.
Məmməd Konstitusiya Məhkəməsinə müraciət edərək qanunda
1000 nəfər tələbinin ləğv edilməsini xahiş edir. Onun əsas arqumenti
budur ki: xalq suverendir, siyasi partiya xalq tərəfindən bu suverenlikdən
istifadə etmənin bir mexanizmdir, 1000 nəfər tələbi xalqın suverenliyini
məhdudlaşdırır. Təsəvvür edin, Konstitusiya Məhkəməsi. Siz hansı qərarı
verərdiniz? Nə üçün? Fərz edin ki, Konstitusiyada sərbəst toplaşmaq
azadlığı yoxdur (maddə 49).
2.
Azərbaycanın Konstitusiyasında Azərbaycanın “sosial” dövlət olması
vurğulanır. 12, 16 və 38-ci maddələrə baxın. Xüsusən 12-ci maddədə