üzünə həmişə bağlı qalmışdı, onun sakini də Teymur üçün həmişə sirr,
əlçatmaz olmuşdu.
Turist kimi Parisə gedib qayıtmadığı illərdən gör nə qədər
vaxt keçmişdi. Bu zaman ərzində bir dəfə də olsun Mədinə Parisdə
yuxusuna girməmişdi. Yoxsa evin, divarların, əşyaların, balkonun,
küçənin, magistral yolun yaddaşı idi bu?!
Fransaya getməmişdən qabaq bu evdəki dözülməz günlərini
xatırladı. Nə bacısı, nə valideynləri ilə danışırdı. “Yeyirsən” “hə”, “yox”.
“Gec gələcəksən?”, “hə”,”yox” . Bu həm də onun üçün yaxşı idi ki,
deyəsən, ondan çəkinməyə başlamışdılar. Atası ilə anası təşvişə
düşmüşdülər. Deyəsən, yeganə oğlanlarını itirdiklərini başa düşürdülər.
“Ata-anası!”- “hanı onlar?!“ – Teymurun ürəyi sızıldayırdı. İndi
onları necə bağrına basardı. O vaxtsa onlara divan tutdu. Vətəni tərk
etməsi ilə öldürdü onları. Bəlkə elə buna görə də ömürləri az oldu. Əvvəl
kişi getdi, sonra da arvad. İndi onlar üçün necə göynəyirdi. O vaxtsa heç
rəhmi gəlmirdi. Əksinə, onlari cəzalandirmaq, buralardan qaçmaq,
uzaqlaşmaq, yox olmaq istəyirdi. Yox, onlara görə getməmişdi Bakıdan.
Bacısı qarışmasaydı onları yola gətirə biləcəyinə əmin idi. Bacısı aləmi
qarışdırmışdı. Mədinəni də prinsipə o saldı. Mədinə təzə - təzə Teymura
sarı addımlayırdı ki, Nərgiz ona da yetdı, giryan peşiman elədi. Parisin
küçələrində həmişə bu sözlər qulağını deşirdi: “Teymur, başa düş, bacın,
valideynlərin məni istəmirlər. Mən onların iradəsinin əleyhinə gedə
blmərəm. Bacarmaram. Bu mənlik deyil, mən ayrı cür ola bilmərəm,
bağışla! Qapımı, telefonumu, - hər şeyi unut!”
Mədinə də sərt, qətiyyətli olmağı seçdi. Və hər şey onda
bitdi. Doğma şəhər cəhənnəmə döndü. Teymur da sərt, qətiyyətli olmaq
istədi. Mədinədən, hamıdan biryolluq əl çəkməyə qərar verdi.
İlk günlər Paris həyatı da cəhənnəm idi. Sovet səfirliyi onu
bir neçə dəfə geriyə qaytarmağa cəhd etmişdi. Fransa vətəndaşı və
şəxsiyyət vəsiqəsi olmadığı üçün başına cürbəcür işlər gəlirdi. Bütün
bunlar sonradan yoluna düşəcəkdi. Ən dəhşətlisi isə dili bilməməsi idi.
Bunu turist səfərinin müddəti qurtaran gününün səhəri başa düşdü.
Teymur Fransanı ona görə seçməmişdi ki, o mütərəqqi
inqilablar, zərif sənətlərin tərəqqi etdiyi şəhər və sairə və sairə idi. Eləcə
məktəbdə xarici dil kimi Fransız dilini keçmişdi. Bu dildə salamlaşmağı,
hal – əhval tumağı, bəzi asan mətnləri oxumağı bacarırdı. Ingilis, alman
dilində heç bunları da bilmirdi. Bütün danışıq kitabçalarını götürsə də
bəs etmirdi. Nə Teymur onların danışığını başa düşür, nə də onlar onun
dediklərindən bir şey anlayırdılar. Təzə dil açan uşaq kimi danışırdı.İş
axtarmaqdan söhbət gedə bilməzdi. Otuzu adlayan adam üçün dil
öyrənmək elə də asand deyildi. Səfirlik onu geri çağıranda hətta sevinirdi
də. Raufun göndərdiyi pullarla dolanmaqdan da bezmişdi. Evə dönmək
istəmirdisə heç olmasa Rusiyaya, Pribaltikaya qayıda bilərdi. Amma bu
da ürəyicə deyildi. Görünür, bu şəhərdə işləmək, yaşamaq onun
qismətinə yazılıbmış.
Parisdə çoxdan yaşayan ruslarla, ən əsas da türklərlə dostluq
köməyinə gəldi. Əvvəl mərkəzdən uzaqda bir çarpayı yerləşəcək qədər
kiçik bir otaq kirayələyirdisə, sonra mərkəzə, babat otağa köçə bildi.
Tələbə türklər ona iş də tapdılar. Rus dilini öyrənmək istəyənlərə
kurslarda, evdə dərs deyirdi. Fransız dili də tədricən qaydaya düşürdü.
Həm onu başa düşürdülər, həm də özü onları anlamaqda çətinlik
çəkmirdi. Şəhər hökümət orqanlarında çalışan, həm də Teymura maraq
göstərən bir fransız qadın şəxsiyyət sənədi almaqda ona yaxşı əl
tutmuşdu. Gərəksiz zənn etdiyi hüquqşünaslıq diplomu da hayına çatdı.
İndi Teymur qayınatasının prezident olduğu ətriyyat şirkətinin baş
hüquqşünası idi. Bir sözlə, polisin əlinə keçmək qorxusundan gizlənə -
gizlənə gəzdiyi Fransada artıq tam hüquqlu azad vətəndaş idi.
Teymur o vaxt təkcə ev adamlarından deyil, elə Mədinədən də
incimişdi. Yeni həyatında başından aşan çətinlikləri, problemləri onu o
qədər sıxırdı ki, Mədinənin xatirələri də onda qəzəb doğururdu.
Bu yuxu necə xoş idi! Belə duyğuları çoxdan yadırğamışdı.
Bu kimi hisslər ancaq gəncliyində ruhuna hakim kəsilərdi.
Mədinə! Onu ilk dəfə gördüyü günü yadına salmağa çalışdı.
Odessanı, yaşıllıqlar içərisində itib – batan “Dzerjinski” istirahət evini,
Qara dənizi, onun ilıq, göy sularını, o ilin yayını xatırladı. Neçə yay,
neçə payız, neçə qış, neçə yaz keçmişdi o ilk görüşdən! İndi onlar
Teymura necə əziz, necə xoş gəlirdi. Hər şey necə gözəl idi. O vaxtlar,
Teymur Mədinəyə sarı gedən yolu, onun qəlbinə düşən açarı da tapmışdı.
Bu, Mədinənin balaca qızı Kəmalə idi. Dəmir iradəli Mədinənin bütün
zəifliklərini yalnız bu uşaq açıb göstərirdi. Buna görə də Teymur bütün
ümidini o balaca məxluqa bağlayırdı.
Əvvəllər Mədinənin ona məhəl qoymaması, özünü yaşlı adam
kimi dartması Teymurun izzəti – nəfsinə az toxunmurdu. Bəzən onu lap
acıqlandırırdı da. Amma Mədinənin sərt, kəskin xasiyyəti ilə əsla
uyuşmayan gözəlliyi, zərifliyi hər şeyə qalib gəlirdi. Teymur elə ki, onu
görür, ruhunu sığallayan səsini eşidirdi, özü də hiss etmədən iradəsindən
asılı olmayaraq bu gözəl çöhrənin, yaraşıqlı qədd – qamətin, yandırıcı
hakimanə baxışların təsiri altında əriyirdi. Hələ heç bir qadın onu
yerindən beləcə oynatmamış, beləcə ovsunlamamış, beləcə tilsimə
salmamışdı.
Əlbəttə, ədalətsizlik edib qaraqabaq, sərt, hissiz – duyğusuz,
biganə zənn etdiyi Mədinə əslində belə deyildi. Dünyada saxta, ötəri
olmayan, keçib getməyən ruhu, əqli məftun edən- gözəl, zərif, ləyaqətli,
nəcib nə vardısa, onların birgə toplusu, gözəllik, zəriflik, sədaqət, vəfa
nümunəsiydi.
Kəmalə də anasına çox oxşayırdı. Yaşıl gözləri, əsmər
çöhrəsi, qönçəyə bənzər al dodaqları, açıq şabalıdı saçları eynilə anasınkı
idi. Ancaq Mədinənin qığılcımlar oynayan yosun bəbəkləri, ucları
özündən yuxarıya burulmuş uzun, sıx kiprikləri baxanı alışdırıb, yandırıb
– yaxırdı. Kəmaləninsə qəşəng gözlərində ərköyün, şıltaq, sadəlövh bir
uşaq marağının məsum parıltısı vardı. O, bütün balacalar kimi mehriban,
sevimli, kövrəkdi!
Kəmalə ilk baxışda adama yovuşmaz təsir bağışlasa da, çox
istiqanlı idi. Biganəliyi də, adamayovuşmazlığı da sabun köpüyü təki
nazikdi, tez sınırdı. Əvəzində məsum, gözəl, zərif, günahsız bir qəlbin
sənə necə kövrək tellərlə, necə zərif hisslərlə bağlandığının şahidi
olurdun.
Teymuru görəndə qucağına elə böyük bir sevinclə, elə
sadəlövh bir inamla qaçırdı ki, Teymur qollarını açıb onu bağrına
basmaqdan özünü saxlaya bilmirdi. Teymurla uşağın dostluğu da
istirahət evindən, Qara dənizin sahilindən, ağ, bənövşəyi, şəffaf
meduzalardan, avarlı qayıqdan başladı.
O vaxt Kəmalə ikinci sinfə keçirdi. Kəmalə də onu kövrək
uşaq sədaqəti və paklığı ilə sevirdi. Ancaq Mədinə burada da Teymurun
müvəffəqiyyətinə mane olurdu. Uşağı ayıldıb Teymurun yad, özgə
olduğunu deyir, onların hər ikisinin sevincinə zəhər qatırdı.
Yaşa dolduqca Kəmalə anasına daha çox qulaq asırdı.
Mədinənin təsiri altında Teymurdan soyuyur, uzaqlaşır, bəzən heç
dindirmirdi də. Ancaq buna baxmayaraq uşaq onu hədsiz sevir,
Teymurla küsülü qalanda qüssədən xəstələnirdi. Bir dəfə bunu ona Rauf
dedi. Rauf Mədinə ilə işləyirdi. Temurla bölüşməyən Mədinə çox vaxt
Dostları ilə paylaş: |