Bakasovun necə ağır bir cinayət işlətməyi, məncə, burada hamı üçün tamamilə
aydındır. Bu nə deməkdir? Belə şey harda görünüb?! Biz heç kəsə icazə
vermərik ki, əlinə yaba alıb raykom tərəfindən təhkim edilmiş adamların
üstünə yerisin. Bizim işçilərin avtoritetini ləkələməyə heç kəsin ixtiyarı
yoxdur. Yaxşı olar ki, yoldaş Kərimbəyov, siz öz komsomolunuzun işləri barədə
düşünəsiniz, hissə qapılıb, belə mənasız sözlər danışmayasınız. Hiss,
duyğu öz yerində, iş isə öz yerində. Bakasovun yol verdiyi hərəkət bizi,
həqiqətən, narahat etməlidir və heç şübhəsiz ki, belə adama partiyada yer
yoxdur... Yoldaş Sayakov, kolxozun partiya təşkilat katibi kimi, siz bütün bu
deyilənləri təsdiq edirsinizmi?
Sapsarı saralmış Çoro ağır-ağır yerindən
durub:
– Bəli, təsdiq eləyirəm, – dedi. – Ancaq mən istərdim ki, məsələ
aydınlaşdırılsın...
– Necə aydınlaşdırılsın?
– Mən istərdim ki, biz öz partiya
təşkilatımızda Bakasovun məsələsini müzakirə eləyək.
– Vacib deyil. Siz sonra öz təşkilatınızın üzvlərinə bu barədə məlumat
verərsiniz. Daha nə
sözünüz var?
– Mən istərdim ki, məsələ aydınlaşdırılsın...
– Nə aydınlaşdırılsın, yoldaş Sayakov? Bakasovun partiya əleyhinə çıxışı göz
qabağındadır.
Daha burda aydınlaşdırılası bir şey yoxdur. Bu işdə siz də məsuliyyət
daşıyırsınız və kommunistlər arasında apardığınız tərbiyə işinin bu cür
pozğun
halda olduğuna görə öz cəzanızı alacaqsınız. Deyin görək, sizin Seqizbayevə
üz vurub, məsələni partiya bürosuna qoymamağı xahiş etməyinizi necə başa
düşmək olar? Ört-basdır etmək, eləmi? Ayıb olsun! Əyləşin!
Mübahisə başlandı. MTS direktoru və rayon qəzetinin redaktoru Kərimbəyovu
müdafiə elədi.
Hətta bir anlığa onlar mübahisədə üstünlük qazandılar. Ancaq Tanabay daha heç
kəsi eşitmirdi. O özü ilə danışırdı, özünə sual verirdi: “Nə oldu,
Tanabay, səni yaşadan o şeylər nə oldu? Nə sənin can qoyduğun sürü, nə o
tövlə, nə o yem qıtlığı burada heç kəsin vecinə deyil. Sən necə də axmaq
olmusan, Tanabay! Kolxoz üçün, qoyun-quzu üçün ömrünü bada vermisən. İndi
bütün bunların məsələyə dəxli yoxdur. İndi sən təhlükəli adam olmusan.
Olsun, cəhənnəmə ki! Əlinizdən gələni eləyin! Yapışın peysərimdən, tullayın
bayıra. Daha mənim üçün fərqi yoxdur. Döşəyin, utanmayın...”
Kolxoz sədri
Aldanov söz aldı. Tanabay bu adamın üz-gözündən, əl-qol hərəkətindən hiss
elədi ki, o, kimisə hədələyir, kimisə söyür. Ancaq “Çidar... Gülsarı”
sözlərini eşidincə o, heç nə dərk eləyə bilmədi. Sonra Tanabay diqqətini
cəmləməyə çalışdı. Aldanov hiddətlə danışırdı:
– ...Hələ bu harasıdır ki? Bir
atın ayağına çidar vurmaq üstündə bu adam camaatın içində deyib ki, mənim
başımı əzəcəkdir. Yoldaş Kaşkatayev, yoldaş büro üzvləri, bir kolxoz sədri
kimi sizdən xahiş eləyirəm ki, bizi Bakasovun əlindən qurtarasınız. Onun
yeri, doğrudan da, türmədir. Onun bütün rəhbər işçiləri görməyə gözü yoxdur.
Yoldaş Kaşkatayev, qapının dalında şahidlər dayanıb, onlar Bakasovun məni
necə hədələdiyini təsdiq edə bilərlər. Məsləhət bilsəydiniz onları
çağırardıq.
Kaşkatayev əsəbi halda üz-gözünü turşutdu:
– Yox, – dedi, – lazım deyil. Bu qədər kifayətdir. Oturun.
Sonra məsələ səsə qoyuldu.
– Təklif
birdir: Bakasov partiya üzvlüyündən kənar edilsin. Kim razıdır?
Yenə də Kərimbəyov özünü saxlaya bilməyib ayağa durdu:
– Bir dəqiqə, yoldaş Kaşkatayev!
Belə bir qərar çıxartmaqla biz səhv etmirikmi, yoldaş büro üzvləri? Başqa
təklif var: Bakasova, şəxsi işinə yazılmaq şərti ilə ciddi töhmət verilsin,
bununla bərabər, kommunist Bakasovun şəxsi ləyaqətini, partiya heysiyyətini
təhqir etdiyinə və raykomun təhkimçisi olmaq etibarı ilə, düzgün olmayan
iş üsullarına əl atdığına görə büro üzvü Seqizbayevə də töhmət elan edilsin.
Seqizbayev yerindən qışqırdı:
– Demoqogiya!
Kaşkatayev:
– Yoldaşlar, sakit
olun, – dedi. – Siz raykomun bürosundasınız, öz evinizdə deyilsiniz, qayda-
qanunu gözləmək lazımdır. – İndi hər şey raykomun birinci katibindən asılı
idi və o, məsələni Seqizbayevin gözlədiyi istiqamətə yönəltdi. – Bakasovu
məhkəmə məsuliyyətinə almağı lazım bilmirəm, lakin partiya onun yeri
deyildir, bu məsələdə yoldaş Seqizbayev tamamilə haqlıdır. Səsə qoyuruq.
Bakasovun partiyadan xaric edilməsinə kim razıdır?
Burada yeddi nəfər büro
üzvü vardı. Üç nəfər Tanabayın əleyhinə əl qaldırdı, üç nəfər lehinə səs
verdi. Yerdə Kaşkatayev qalırdı. Bir qədər dayanandan sonra o da Tanabayın
əleyhinə səs verdi. Tanabay bunların heç birini görmədi.
Məsələnin necə həll edildiyini o, Kaşkatayev katibə müraciət eləyəndə başa
düşdü:
– Protokola
yazın: raykom bürosunun qərarı ilə Bakasov Tanabay partiya üzvlüyündən xaric
edilir.
“Vəssalam! Vəssalam!” deyə Tanabay öz-özünə pıçıldadı. Sanki, o
oturduğu yerdəcə ölmüşdü.
Lakin Kərimbəyov təslim olmadı:
– Mən təkid eləyirəm: Seqizbayevə də töhmət elan edilsin.
Bu məsələni səsə qoymadan da rədd
etmək olardı, lakin Kaşkatayev belə etmədi. Bunun özündə də gizli məna vardı.
– Yoldaş Kərimbəyovun təklifi ilə kim razıdır? Xahiş edirəm, əlinizi
qaldırasınız!
Yenə də üç-üç oldu və yenə də Kaşkatayev əlini qaldırıb Seqizbayevi töhmətdən
qurtardı. Ancaq Seqizbayev başa düşəcəkdimi, bu hörməti
lazımınca qiymətləndirəcəkdimi? Kim bilir... Bicin biridir. Hiylə
dağarcığıdır”.
Adamlar yerlərindən tərpəşdilər, stullar cırıldadı. Tanabaya elə
gəldi ki, hər şey qurtarıb, ayağa durub heç kəsin üzünə baxmadan, dinməz-
söyləməz qapıya yönəldi. Lakin Kaşkatayev onu arxadan səslədi:
– Bakasov,
hara gedirsiniz? Partiya biletinizi verin.
– Verim? – deyə Tanabay çaşqın halda katibin üzünə baxdı. Məsələnin nə yerdə
olduğunu o hələ indi dərk
eləyirdi.
Kaşkatayev:
– Bəli, – dedi. – Stolun üstünə qoyun. Daha siz partiyanın üzvü deyilsiniz və
bilet gəzdirməyə ixtiyarınız yoxdur.
Tanabay əlini
döşünə salıb, xeyli vaxt eşələndi. Partbilet dərində idi, lap dərində. Onu
Tanabay Caydarın əli ilə tikilmiş dəri kisəcikdə saxlayırdı. Kisəciyə ip
salınmışdı və Tanabay ipi boynundan aşırmışdı. Nəhayət, o, canında isitdiyi
partbiletini çıxartdı. Onu Kaşkatayevin par-par parıldayan soyuq stolunun
üstünə qoydu. Tanabay üşüdü, partbiletin yerinə o özü üşüdü. Yenə də heç
kəsin üzünə baxmadan, əlini döşünə salıb kisəciyin ağzını bağladı, yola
düzəldi.
– Yoldaş Bakasov, – bu dəfə Tanabayı səsləyən Kərimbəyov idi. – Siz özünüz nə
deyə bilərsiniz, yoldaş Bakasov? Axı siz heç danışmadınız.
Bəlkə danışmaq sizin üçün çətin idi? Biz güman edirik ki, partiyanın qapıları
sizin üzünüzə bağlı deyildir və siz gec-tez partiyaya qayıda
bilərsiniz. Deyin görək, bu saat siz nə düşünürsünüz?
Onun böyük dərdini hələ də yüngülləşdirmək istəyən bu cavan oğlanın
qarşısında minnətdar
olduğunu duyaraq Tanabay ürək ağrısı ilə geri döndü.
– Nə deyim? – dedi. – Bu qədər sözün qabağında nə demək olar? Mən bircə onu
deyə bilərəm ki,
müqəssir deyiləm, lap ona əl qaldırsam da, dilimə pis sözlər gətirsəm də,
müqəssir deyiləm. Mən bunu sizə izah edə bilməyəcəyəm. Buna görə də
Dostları ilə paylaş: |