238
dialoq müxtəlif əqidələrə, mədəniyyətlərə, siyasi görüşlərə, düşüncələrə mənsub
insanların bir araya gələrək, mədəni ölçülər səviyyəsində bir-biri ilə danışması,
müəyyən məsələlərin müzakirə edilməsi yoludur.
Dialoq, əsasən, iki şəraitdə aparılır:
a) ailədə, küçədə, bazarda, iş yerində, nəqliyyatda, məişət məclislərində,
çayxanalarda və s.;
b) ictimai yerlərdə, elmi konfranslarda, simpoziumlarda, iclaslarda, tədris
auditoriyalarında, radio və televiziya verilişlərində və s. Hər bir şəraitdə adamların
normal fikir
mübadiləsi, bir-birini anlaması üçün müəyyən qaydalara, şərtlərə, etik
normalara əməl olunmalıdır. Bunlardan ən başlıcası ünsiyyətin səmimiliyidir. Bu
o deməkdir ki, birinci şəxs danışarkən digəri (və ya digərləri) onu axıra qədər
dinləməli, müsahibinə fikrini açıqlamağa imkan verməli, sonra söhbətə
qoşulmalıdır. Müsahibi mətləbdən uzaqlaşdığı, lüzumsuz məsələlərdən danışdığı,
təfərrüata yol verdiyi zaman dinləyən tərəf
“İcazə verin”, “Üzr istəyirəm”, “Sizin
bu fikrinizə kiçicik bir düzəliş vermək istəyirəm”, “İcazə verin fikrinizə bir qədər
aydınlıq gətirim” və s. kimi replikalarla onun danışığına müdaxilə edə bilər.
Diskussiyada iştirak edənlər öz mövqeyini dəyişmək istəmədikdə belə deyilmə-
lidir: “Mən sənin fikirlərini qiymətləndirirəm. Lakin öz fikirlərimə daha çox
əminəm”. Danışan həmkarının fikirləri ilə razı olmaya bilər, lakin bununla belə
ortaq məxrəcə gəlmək üçün yolların axtarılmasından imtina etməməlidir. Fikirlər
qarşılıqlı anlama şəraitində, etik normalar çərçivəsində müzakirə edilməli,
problemin həlli yolu tapılmalıdır.
Dialoq “Qurani–Kərim”də öz əksini tapmışdır. Orada səmmiyyət dialoqun
vacib məqamlarından biri kimi qiymətləndirilir və göstərilir ki, fikri müxtəlif
insanlar arasında münasibətlər qarşılıqlı etimad əsasında qurulduqda səmərəli
nəticə verə bilər. “Qurani-Kərim” əhli-kitabla hikmət və gözəl öyüdlə mübahisə
etməyi tapşırır: “(Ya Rəsulum), insanları hikmətlə (Quranla, tutarlı dəlillərlə),
gözəl öyüd-nəsihət (möizə) ilə Rəbbinin yoluna dəvət et, onlarla ən gözəl surətdə
(şirin dillə, mehribanlıqla, əqli səviyyələrinə müvafiq şəkildə) mübahisə et”.
239
Rəsmi yerlərdə vacib məsələlərlə bağlı aparılan dialoqlarda tərəflər səbrli
və təmkinli olmalı, danışığın etik qaydalarına əməl etməlidirlər. Lakin bəzən belə
olmur. Tərəflər mümkün qədər daha çox danışmağa, haqq-nahaq müsahibini
susdurmağa, öz dediyini sübut etməyə çalışır, ucadan, qışqıra-qışqıra danışırlar.
Çox təəssüf ki, televiziya ekranında bəzən belə dialoqa tamaşa etməli oluruq. Belə
verilişlərin birində iqtidaryönlü partiyalardan birinin nümayəndəsi ilə
müxalifətdən olan partiyanın nümayəndəsi dialoqa cəlb olunmuşdu. Hər iki tərəf
aparıcının sualı ətrafında öz partiyasının mövqeyini izah etməyə çalışırdı.
Mübahisə qızışmışdı. Onların biri digərinə danışmaq üçün imkan vermirdi, hər
ikisi eyni zamanda danışırdı. Aparıcı onları sakitləşdirə bilmirdi. Tamaşaçılar bu
dialoqdan heç bir şey anlamadılar, yalnız təəssüfləndilər. Bu cür situasiyalarda
dialoqa girən tərəflər müsahibinin məqsədsiz, əhəmiyyətsiz
hərəkətlərinin, qərəzli,
tendensiyalı fikirlərinin, uzun-uzadı danışığının qarşısını ehtiyatla və yüksək
təvazökarlıqla almaq bacarığına yiyələnməlidir. Dialoq nəsə öyrənmək, inkişaf
etmək, yeniləşmək məqsədlərini qarşıya qoymalıdır.
Diskussiya zamanı dialoqun tələb olunan qaydada səmərəli keçməsi üçün
aşağıdakılar nəzərə alınmalıdır:
1.
Müzakirəyə çıxarılan məsələnin mahiyyəti düzgün anlaşılmalıdır.
2.
Müzakirədə müdafiə olunacaq mövqe və ideyalar dəqiq müəyyən-
ləşdirilməlidir. Müzakirə olunan məsələdən yayınmaya yol verilməməlidir.
3.
Diskussiyaya hazırlaşarkən bütün mümkün məlumat mənbələri (ilkin
mənbələr, statistik məlumatlar, ədəbiyyat və s.) nəzərdən keçirilməlidir.
4.
Fikir ayrılığının yaranacağı gözlənilərsə tərəflər öz mövqeyinin
müdafiəsi üçün dəlillər, sübutlar hazırlamalıdır. Sübutlar məntiqi təfəkkürə
əsaslanmalı, inandırıcı olub qarşı tərəfi qane etməlidir. Dəqiq və aydın faktlar ən
yaxşı təkzib üsuludur. Əsaslandırma dəqiq faktlar üzərində qurulmalıdır.
5.
Rəqib opponentini diqqətlə dinləməli, onun fikrinin doğru məqamları
ilə razılaşmalıdır.
6.
Mövqeyinin səhv olduğu sübut edilmiş tərəf opponentinin haqlı
olduğunu etiraf etməyi bacarmalıdır.