Microsoft Word Qebele-Son variant
Yüklə 0,61 Mb. Pdf görüntüsü
|
- Bu səhifədəki naviqasiya:
- Knyaz ASLAN pedaqoji elmlər namizədi, dosent, “Qızıl Qələm” mükafatı laureatı
Şəlalə xanımın erməni işğalçılarına qarşı mətinliklə vuruşmuş qəbələli Qarabağ döyüşçüləri barədə yazdıqlarını həyəcansız oxumaq olmur. Vətənin dar günündə qarı düşmənin qarşısında keçilməz çəpərə dönən, hər qarış torpaq uğrunda son damla qanına qədər vuruşan ər oğulları ehtiramla xatırlayan müəllif bu gün şəhid və əlil ailələrinə dövlət qayğısından ürək dolusu danışır, fikirlərini faktlarla əsaslandırır. Bütün bunlar isə hazırda Azərbaycan Ordusunun sıralarında Vətənə hərbi xidmətini namusla yerinə yetirən gənclərə və ya əsgərliyə hazırlaşan yeniyetmələrə vətənpərvərlik hisslərinin aşılanması baxımından çox yerinə düşür. Elə buradaca incə bir məqama toxunmaq istəyirəm. Bu məqam Şəlalə xanımın dünyaya göz açdığı ocağın timsalında bir qəbələli ailəsinin ədəbi-publisistik təsvirinin verilməsi ilə bağlıdır. Əlbəttə, burada təsvir olunan hadisələr hamı üçün tipik olmaya bilər. Amma söhbət ömrü boyu halallıqla dolanan, bütün ağrı-acılara baxmayaraq sabaha ümidlə boylanan, Tanrıya ümidinin işığında öz nəcib arzularına doğru yolundan dönməyən bir azərbaycanlı ailəsinin yaşantıları çoxları üçün tanış gələ bilər. Bu baxımdan müəllifin ata-anası, qardaşları ilə bağlı düşüncələri kitaba ayrı bir əlvanlıq gətirir, oxucunu başqa bir aləmə aparır. Kiçik qardaşı İsmayılın (Əfəndinin) uşaq vaxtlarından əcəllə çiling-ağac oynaması, sonralar yaşı çatmaya-çatmaya Qarabağ uğrunda savaşa yollanması, döyüşlərin birində ağır yaralanması, ailə üzvlərinə dəhşətli sarsıntılar yaşatması, ölümün pəncəsindən güclə qurtarması və s. kimi həyati epizodlar nə qədər təsirlidir!.. Nə yaxşı ki, bu faciəli anların sonu nikbinliklə bitir, nə yaxşı ki, axırda xeyir şərə qalib gəlir, nə yaxşı ki, Əntiqə ananın duaları Tanrıya yetişir! Bir də nə yaxşı ki, indi İbrahimlə Sədaqət qəhrəman ataları İsmayılın ümidlərini doğruldurlar!.. Mən Əntiqə ananı görməmişəm. Amma Şəlalə xanımın təsvirlərindən sonra ona məhəbbətim birə min qat artdı. Cavan ömür-gün yoldaşı Məhyəddini erkən itirən, acı göz yaşlarını gizlədə-gizlədə kirpikləri ilə od götürən, vahiməli qəbristanlığın düz ovcunda yerləşən komasında beş körpəsini yarıac-yarıtox böyüdüb boya-başa çatdıran Əntiqə ana!.. Şəhərdən qonaq gələn, elə əyləşdiyi həyətdəcə sərçələri qanına-qəltan eləyən ovçuya əməlli-başlı təbiət dərsi keçən bu ana obrazı həqiqətən tərbiyə mücəssəməsidir!.. Hər zaman özünün bənzərsiz təbiəti, əzəmətli dağları, qalın meşələri ilə diqqəti cəlb edən Qəbələnin bu gün beynəlxalq miqyaslı turizm mərkəzlərindən birinə çevrilməsi sevinci də kitabdan duyulur. Yaxın-uzaq xarici ölkələrdən axın-axın gələn əcnəbi qonaqların buradan zəngin təəssüratla qayıtması, hər bir turistin öz vətənində Azərbaycanın təbliğatçısına çevrilməsi üçün hələ çox işlərin görülməsi indi doğrudan da taleyüklü vəzifələrdən biridir. Kitab müəllifinin Qəbələnin əsrarəngiz təbiəti haqqında sevə-sevə söz açması, bu elin rəmzinə çevrilmiş hər bir bitki və ya meyvə barədə könüldolusu bəhs etməsi ilə yanaşı, xüsusilə məşhur Qızıl Əhmədi almasının cırlaşması, şabalıd ağaclarının quruması ilə bağlı həyəcan təbili çalması da vətəndaşlıq yanğısından irəli gəlir. Fikrimcə, uyğun sahənin mütəxəssisləri bu ciddi məsələnin üstündən sükutla keçməməli, bəlkə də dövlət səviyyəsində tədbirlərin müəyyənləşdirilməsi üçün təkliflər hazırlamalıdırlar... Qəbələlilərin sənət nümunələri və süfrə mədəniyyəti barədə ətraflı söz açan Şəlalə Məhyəddinqızı yalnız bu bölgəyə məxsus olan sənətkarlıq işlərini, milli mətbəximizin ətirli xörəklərini də oxucuların diqqətinə çatdırır. Çox güman ki, kitabın bu hissəsindən yetərincə faydalananlar da tapılacaq... Bütövlükdə Şəlalə Məhyəddinqızının Azərbaycanımızın dilbər guşələrindən biri olan bənzərsiz Qəbələ torpağının çiçəklənməsinə həsr etdiyi bu kitab yaşı əsrlərlə ölçülən qədim və ulu yurda qoyulmuş mənəvi abidədir. Əminəm ki, bu əsər hər bir kəsin kitab rəfinin bəzəyinə çevriləcək. Knyaz ASLAN pedaqoji elmlər namizədi, dosent, “Qızıl Qələm” mükafatı laureatı QƏBƏLƏ İLƏ QISA TANIŞLIQ lkə vətəndaşı ona görə qürur hissi duyur ki, güclü dövlətin himayəsində yaşayır. Onun doğulduğu vətən torpağının hər qarışı inkişaf edir. Boya-başa çatdığım rayonun inkişafından söz açmaq, burada gördüklərimi qələmə almaq istəyim də Azərbaycanın iqtisadi səviyyəsinin ilbəil artmasına işarədir. Yazıya yenicə başlayırdım, nədən danışacağımı düşünürdüm, dövlət başçısı İlham Əliyevin “Azərbaycanda bircə dənə də kənd qalmayacaq ki, problemləri həll edilməmiş olsun...” fikirlərindən daha da ruhlandım. Prezident bəyan edir: “Ölkənin ikinci yeni iqtisadi inkişaf xətti cızılıb və əvvəlki ucqar nöqtələrdə zərurət doğuran məsələlər həll olunacaq”. Ölkəmizin hər bir tərəfində irəliləyiş gedir. Xüsusən də rayonların sürətli inkişafı reallığa çevrilir. Bölgələrdə respublika əhəmiyyətli obyektlərin tikilib istifadəyə verilməsi, yeni iş yerlərinin açılması işsizliyin aradan qaldırılmasına səbəb olur. Qazanan isə güclü iqtisadiyyata sahib olan dövlətimiz və yaşayışını təmin edən vətəndaşlarımızdır... Bu gün insanların istirahət məkanı kimi can atdığı Qəbələ rayonu öz inkişafı ilə seçilir... Əsrarəngiz təbiəti ilə seçilən, uca dağların qoynunda yerləşən bu ərazi bitib- tükənməyən qalın meşələri, gurultulu çayları, zəngin flora və faunası ilə məşhurdur. İqtisadi siyasətin bəhrəsi sayəsində müasir görkəmindəki dəyişiklik və zəka ilə təbiətin birgə vəhdətinin təzahürü burada açıq-aşkar hiss olunduğundan Qəbələnin adı daha uzaqlarda səslənir və əcnəbiləri cəlb edən turist mərkəzinə çevrilir. Rayona axışan xaricilərin illərlə artımı da dediyimizin əyani sübutudur. Ölkə başçısı İlham Əliyevin 2004-cü ildə imzaladığı “Regionların sosial-iqtisadi inkişafı ilə bağlı Dövlət proqramı”nda Qəbələdə turizmin inkişaf etdirilməsi istiqamətində verdiyi mühüm tapşırıqlar da öz əksini tapmışdır. Sənədə əsasən rayonun turizm potensialına uyğun olaraq bir neçə istiqamət müəyyənləşir və nəticədə bu sahədə dünya standartlarına uyğun yeni müəssisələr istifadəyə verilir... Qafqaz Sıra dağlarının ətəyində Qəbələyə Allah-Təala qeyri-adi gözəllik bəxş edib. Bir günün içində min dona düşən təbiət öz füsunkarlığı ilə ecazkar mözücə yaradır. Ələlxüsus da fəsillər bir-birini əvəz edəndə ayrı bir aləmin seyrinə düşürsən. Bir qarış torpağına nəzər salanda müxtəlif bitki örtüyünün şahidi olursan. Orta ömrü 500 il olan şabalıd ağacları, başı göylərə dəyən pıçıldaşan çinarları, vələsi, qaraağacı, mırdaşası və s. yaşıl bitki örtüyü necə cəzbedicidirsə, eləcə də təbiətin canlı heyvanat aləmi daha maraqlıdır. Eyni məcradan, Qafqazın ətəyindən süzülən çayları müxtəlif xarakteri ilə seçilir. Qara çay, Dəmiraparan çay qapqara palçıqlı suyu ilə gurultusundan qulaq batırırsa, yerdən qaynaqlanan bulaq suları ayna saflığı ilə könülləri, gözləri oxşayır... Ö Yüklə 0,61 Mb. Dostları ilə paylaş:
|