35
Mərhum Süleyman bəy çalışmaya başladı. Pulsuzluq, aclıq, əlbəsəssizlik
onu məyus etmədi, qorxutmadı. Hətta özü 1917-ci sənə avqustunun əvvəlindən
vəzifəyə başladığı halda 1918-ci sənənin şəbat ayında keçmiş maaşlarını almaq
üçün özü utanıb bəndəni vasitə etdi.
Bu qədər müddət öz hesabına xidmət etdikdən sonra yenə maaş istəməyi
özünə bir müşkül əmr hesab ediyordu. Gəncədə akarşi başlandı, cümlə mülki və
hərbi məmurlar dəxi qarətkarlara, talançılara iltihaq etdilər. Kimsə kimsəni
tanımaq istəmədi, kimsə kimsəyə itaət etmədi, şübhə etmək olur ki, düz, doğru,
qeyrət və namuslu şəxslər tapılmayacağı bir dərəcəyə gəldi. Mərhum Əfəndiyev
gündüzlər ac, gecələr uyğusuz öz cavan mütəllimləri ilə şəhərin hərastına, şəhərdə
əmin-asayişi əmələ gətirmədə zərrə qədər qüsur gətirmədi. Şəhərdə, istisionda,
nərəyə gedilsə Süleyman bəy görünürdü. Özü namus və qeyrətli, mütəllimləri
düz, doğru.
Şəmkir müharibəsi əsnasında isə mərhum Süleyman bəy heç bir
fədakarlıqdan çəkinmədi. Əvvəldən axıradək ən təhlükəli, ən mühüm nöqtələrdə
isbat vücud edənlərin birincisi oldu. Bundan sonra Süleyman bəyin məmuriyyəti
qara yazıya təbdil edildi. Bir müddət Gəncədən getdi. Bu halda müsəlman ordusu
təşkilinə hökumət tərəfindən müsaidə edildi. General Əliağa Şıxlinski baş
komandan (Gəncədə ilk dəfə yaradılan korpusa Ə. Şıxlinski baş komandan təyin
olunmuşdur — Ş. N.) təyin edildi. Gəncədə qəvay əsgəriyyə təşkilinə başlandı.
Mərhum Süleyman bəy beşinci alay komandanlığına təyin edilərək yenidən
Gəncəyə təşrif gətirdi. Yenə fəaliyyətə, fədakarlığa başladı. Bu vəqt şəhərdə öylə
bir aparşi hökmfərma idi ki, heç bir qüvvə təmin asayişə müqtədir deyildi.
Nəhayət, mövcud türk əsgərlərini müsəlləh edərək onların namus və qeyrətlərinə
istinadən onların vasitəsilə e'adeyi-asayişə və Bakı tərəfdən Gəncə üzərinə tərtib
edilməkdə olan hücuma qarşı müdafiə etməyə müqtədir ola bilmək lüzumu hiss
edilərək buna təşəbbüs edildi.
Süleyman bəy: «Bən bu vəzifəyi qəbul edə bilərəm» - deyə bütün zəhmət və
çətinliyi öz alayına qəbul və hər bir cəhətdən təmin etdi. Həqiqətən bununla da
Gəncədə e'adeyi-asayiş əmələ gələrək nizam, intizam bərqərar etdilər. Böyləcə
mərhum general Süleyman bəy Əfəndiyev heç bir gün fədakarlıqdan çəkinməyərək
fəaliyyətinə davam etməkdə idi. Bu günlərdə bir ziyai-əbədi qəbilindən mədud
olaraq darülbəqaya ertihal edərək cümlə azərbaycanlıları hüzn və ələm dəryasına
qərq etmiş.
Rəhmətullahe əleyh rəhmət vaseh.
Yeni açılan arxivdən
İnamla demək olar ki, 1918—20-ci illərdə milli ordumuzun keçdiyi ömür
yolu tam tarixi salnamədir. Yetmiş iki il «tamamilə məxvidir» möhrü ilə
xalqımızdan gizlin saxlanan hərb tariximizin qiymətli sənədlərini araşdırmaq bizə
36
yalnız 1992-ci ilin noyabr ayında qismət oldu. Burda nələr yoxdu... Hər sənəddə
bir qəhrəman oğlumuzun taleyi, döyüş yolu, kimisi yarımçıq, kimisi də bütöv. Bu
nadir sənədləri araşdırdıqca böyük Səməd Vurğunun dillər əzbəri olan misraları
yada düşür:
Hər türbədən bir qəhrəman
Sanki baxıb deyir bizə:
«Alovların arasından
Yollar açdım eşqinizə».
Respublika Yeni Tarix Mərkəzi Dövlət Arxivində saxlanan belə qiymətli
sənədlərdən biri də general-mayor Süleyman bəy Əfəndiyevə məxsusdur. 1919-cu
il fevralın 21-də hərbi nazir vəzifəsini müvəqqəti icra edən general-leytenant
Əliağa Şıxlinskinin və Baş Qərargah rəisi, polkovnik Həbib bəy Səlimovun
imzaladığı 89 nömrəli əmrdə oxuyuruq:
«Bu gün Ağdamdan birinci piyada Azərbaycan diviziyasının rəisi general-
mayor Əfəndiyevin tif xəstəliyindən vəfat etməsi haqqında kədərli teleqram
almışıq. 1917-ci il fevral çevrilişindən sonra general-mayor (o vaxt polkovnik)
Əfəndiyev var qüvvəsi ilə ictimai-təşkilati işlərdə və Vətənin müdafiəsi sahəsində
xalqına xidmət etməyə başladı.
Yeri gəlmişkən qeyd edək ki, Gəncə şəhərində onun təşəbbüsü ilə yeni
yaranan Azərbaycan ordusuna təlimatçılar hazırlamaq üçün tədris dəstəsi
yaradılmışdı. Polkovnik Əfəndiyevin rəhbərlik etdiyi çox da böyük olmayan bu
dəstə vətənimizin mərkəzi Gəncə şəhərində qayda-qanun yaradılmasında,
anarxiyadan qorunmaqda, eşalonların tərksilah edilməsində və xalq əmlakının
qorunmasında əsas rol oynayırdı.
Gəncə şəhərində Müsəlman korpusu yaradılanda polkovnik Əfəndiyev
beşinci Müsəlman alayının komandiri təyin edilir. Tiflisdəki müxtəlif təşkilatların
açıq müxalif mövqeyi, rəsmi dairələr tərəfindən müsəlman alayının yaradılmasına
mənfi münasibəti və bir çox digər çətinliklərə baxmayaraq polkovnik Əfəndiyev
Tiflis rəsmi dairələrindən öz bacarığı hesabına alayı üçün lazım olan əsas şeyləri
alır və Gəncəyə çatdırır.
Könüllülərdən təşkil olunmuş beşinci atıcı alayı, yerlərdə hərbi sahədə
onlara kömək edə biləcək hakimiyyətin olmadığı bir dövrdə əksəriyyəti yaxşı
geyinmiş və orta səviyyədə təlim görmüş əsgərlərdən ibarət idi. Komandirin
qayğısı təkcə əsgərlərlə qurtarmırdı. Polkovnik Əfəndiyev zabitlər üçün də əla
təşkil olunmuş ucuz yeməkxana təşkil etmişdi.
Azərbaycan korpusunun süvari hissələrinin müvəqqəti buraxıldığı dövrdə
polkovnik Əfəndiyev qərargaha çoxlu əşya və xeyli ərzaq məhsulları təhvil verdi.
Bundan sonra ikinci Qarabağ süvari alayının komandiri təyin olunan polkovnik
Əfəndiyev bir çox çətinliklərə baxmayaraq alayı tam hazırlıqlı hərbi hissə
səviyyəsinə qaldıraraq, əla vəziyyətdə Hərbi Nazirliyə təqdim etdi.
Dostları ilə paylaş: |