QAYNAQLAR
1. В.Жирмунский. К вопросу o литературных отношениях Востока и Запада // Сравнительное литературоведение. Ленинград, Наука, 1979, с.46-66
2. Ф.Юлдашев. Алпамыш. Ташкент, 1944
3. Дж.Фрезер. Золотая ветвь. Перевод с английского М.К.Рыклина. Москва, Политиздат, 1980
4. İ.Rüstəmzadə. Azərbaycan nağıllarının süjet göstəricisi. Bakı, Elm və təhsil, 2013
5. H.F.fon Dits. Homerin siklopu ilə müqayisədə yeni aşkar edilmiş oğuz // Bakı Slavyan Universiteti. Osvald Fon Volkenştayn Cəmiyyəti. Elmi əsərlər. Dil və ədəbiyyat seriyası. Birgə nəşrin xüsusi buraxılışı. Bakı-Frankfurt am Main, BSU-nun “Kitab aləmi” Nəşriyyat-poliqrafiya Mərkəzi, 2010, s. 26-37.
6. Х.Короглы. Из восточно-запaдных фольклорных связей. Темяглаз (Депегез) и Полифем // Типология и взаимосвязи средневековых литератур Востока и Зарада. Москва, Наука, 1974, с. 275-288
7. В.Жирмунский. Эпическое сказание об Алпамыше и “Одиссей” Гомера // Сравнительное литературоведение. Ленинград, Наука, 1979, с.314-336
8. Дж.Коккьяра. История фольклористики в Европе. Москва, Изд-во Иностранной Литературы, 1960
9. Н.Конпад. Запад и Восток. Статьи. Москва, Наука, 1966
Füzuli BAYAT
Filologiya üzrə elmlər doktoru,
AMEA Folklor İnstitutu
fuzulibayat@yahoo.com
UŞAQ OYUNLARI: RİTUAL QUTSALLIQDAN SOSİOLOJİ DƏYİŞİMƏ
Özət
Oyun uşaq dünyasının tərkib hissəsi olmaqla bərabər, onu həm fiziki, həm də mənəvi cəhətdən həyata hazırlayan əsas fəaliyyət növüdür. Uşaq dünyasının təbii ehtiyacı olan oyun ilk zamanlarda ritual mahiyyətli olmuş, zamanla tərbiyə və əyləncə funksiyasını üstlənmişdir. Uşaq oyunlarında iki faktor sintez edilmiş olur. Bunlardan biri uşaqların bilavasitə oyunun tərkib hissəsinə çevrilməklə fiziki və mənəvi cəhətdən inkişaf etmələri, müstəqil fəaliyyət göstərməyə hazırlanmalarıdırsa, ikincisi, uşaqların oyundan mənəvi və estetik zövq almaları ilə ətraf aləm haqqındakı biliklərini genişlətmələri, dərinləşdirmələridir.
Bununla bərabər uşaqların təlim və tərbiyəsində mühüm rol oynayan təhkiyəli uşaq oyunları, oyun yasaqları, oyuna qoyulan yasaqlar və əsasən, keçmişdən günümüzə qədər dəyişərək gələn oyuncaqlar da tədqiqat obyekti olmuşdur.
Açar sözlər: uşaq oyunu, ritual, sosioloji dəyişim, oyuncaq
CHILDREN GAMES: FROM RITUAL SANCTITY
TO A SOCIAL CHANGE
Summary
Game is a part of child world and a main kind of activity that prepares child for life physically and morally. In early times the game was a ritual nature, time by time assumed the function of nurture and entertainment. Two factors are synthesized in children games. One of them is a child’s development physically and morally and preparation to operate independently, the other is the child’s enlarging knowledge with getting pleasure morally and esthetically from a game.
At the same time the children games, games prohibitions, mainly the toy changing from the past to the present were the object of research.
Key words: a child game, ritual, social change, a toy
ДЕТСКИЕ ИГРЫ: ОТ СВЯЩЕННОГО РИТУАЛА
ДО СОЦИОЛОГИЧЕСКОГО ИЗМЕНЕНИЯ
Резюме
Игра, наряду с составной частью детского мира, является основным видом деятельности, готовящего его к жизни, как с физической, так и с нравственной стороны. Игра, являющаяся естественной потребностью детского мира, раньше обладала ритуальным содержанием, а со временем приобрела воспитательную и развлекательную функцию. В детских играх синтезируются два фактора. Один из них: дети, являясь непосредственно составной частью игры, развиваются с физической и нравственной стороны, готовят их к самостоятельной деятельности. Второй фактор, получив нравственный и эстетический вкус от игры, дети должны углубить свои знания об окружающей среде.
Вместе с тем объектом исследования также стали повествовательные детские игры, играющие важную роль в образовании и воспитании детей, разного рода запреты во время игры, а также игрушки, которые сегодня претерпели большие изменения.
Ключевые слова: детская игра, ритуал, социологическое изменение, игрушка
-
Giriş
Körpənin bilinməyən bir dünya ilə ilk təması, ilk tanışlığı həyatın çətin qaydalarına, yaşamın mübarizə və mücadilələrinə uyum saxlaması, böyüməsinin və inkişafının əsas şərti oyundur. Oyun, əslində heyvanların və uşaqların təbii işidir, ən çox onlara aiddir və bioloji bir istəkdir. Əski çağlarda ritual məzmun kəsb edən uşaq oyunları yavaş-yavaş ritual qaynağını itirmiş, əyləncəyə, tərbiyə etməyə, öyrətməyə dönüşmüş oyunun bir növüdür. Müasir dünyada təhsil anlayışının əsasında doğumdan başlayan və bütün uşaqlıq illərini əhatə edən oyun oynamaq, uşaqların öncə özünü, sonra ətrafını və daha sonra da dünyanı tanımasına əsaslanır. “Uşağı tanımaq və onu oyun yolu ilə tərbiyə edərək inkişafına izn vermək üçün istifadə edilə biləcək ən əlverişli vasitələrdən biri uşağın oynadığı oyunlardır” (Sağlam, 2014, 406).
Müasir dünyada uşaqlıq, hüquqi olaraq on səkkiz yaşa qədərki dönəmə verilən addır. Bu yaşın tarixən dəyişkən olduğunu da qeyd etmək lazımdır. Təbii ki, əski çağlara getdikcə uşaqlıq dönəminin daha erkən bitdiyini görürük. Ancaq bütün bunlara baxmayaraq harada uşaq varsa, orada oyun var. Harada oyun varsa, orada da oyuncaqlar var. Hər halda nəzəri olaraq fərdi uşaq oyunları ilə kollektiv uşaq oyunlarını, açıq havada oynanan uşaq oyunları ilə qapalı məkanlarda oynanan oyunları bir-birindən ayırmaq lazımdır. Beləliklə, uşaq oyunları
1. Fərdi,
2. Kollektiv şəkildə oynanmaqla iki qismə bölünür. Buraya uşaqların tərbiyəsi və təlimini də əlavə etmiş olursaq o zaman fərdi şəkildə, həm də qapalı məkanda oynayan uşaqla, kollektiv və açıq havada oynayan uşağın həm psixologiyasında, həm də sosiallaşmasındakı rolları daban-dabana fərqli olacaqdır.
Uşaqlar oyun zamanı iki faktoru sintez etmiş olurlar. Bunlardan biri uşaqların bilavasitə oyunun tərkib hissəsinə çevrilməklə fiziki və mənəvi cəhətdən inkişaf etmələri, müstəqil fəaliyyət göstərməyə hazırlanmalarıdırsa, ikincisi, uşaqların oyundan mənəvi və estetik zövq almaları ilə ətraf aləm haqqındakı biliklərini genişlətmələri, dərinləşdirmələridir. Nəticədə, bu iki faktor uşağın bir şəxsiyyət kimi yetişməsində mühüm rol üstlənmiş olur. Beləliklə, oyun oynayanın fiziki qabiliyyətlərini artırmaqla, orqanizmin inkişafını təmin etməklə bərabər ən çətin və mürəkkəb anlarda kollektiv hərəkət etməyə və xarakterin formalaşmasına yardım edir. Uşaq oyunları uşaqların tərbiyə və təliminin əsas vasitəsi kimi çıxış edir.
Təbii ki, uşaq oyunları haqqında da ilk məlumatı Kaşgarlı Mahmud vermişdir. Divanın müəllifi bir neçə oyunun adını çəkməklə bərabər “Müngüz müngüz” adlı bir uşaq oyunundan da bəhs etmişdir:
“Müngüz müngüz: buynuz buynuz. Bu, bir növ uşaq oyunudur. Çayın kənarında diz çökərək otururlar. Ayaqlarının arasına yaş qum doldururlar, sonra əlləriylə quma vururlar. Onlardan biri (əbə) “müngüz müngüz” deyir və uşaqlar “nə müngüz” deyə soruşurlar. Biri (əbə) buynuzlu heyvanların adlarını bir - bir deməyə başlayır. Uşaqlar da bunu təkrar edirlər. (Əbə) bu zaman dəvə və eşşək kimi buynuzsuz bir heyvanın da adını çəkir. Uşaqlardan biri bu heyvanın və ya başqa buynuzsuz bir heyvanın adını deyərsə onu çaya atırlar. Bu atalar sözündə də qalmışdır: “Süsəgən udhka Tenğri müngüz berməs.” (Süsəyən, çox süsən öküzə Allah buynuz verməz.) Bu atalar sözü bir işi görmək istəyib də görə bilməyən adam üçün deyilir ki, o adam işi görsəydi xalqa pislik etmiş olacaqdı.” (Kaşgarlı, 1999-3, 363–364).
-
Uşaq oyunlarının təsnifatı
Bir halda ki, oynamaq uşaqlar üçün öyrənmənin ən qısa və ilk yolu və onların təbii haqqıdır, o zaman uşaq oyunlarını funksiyasına, formasına və məzmununa baxaraq təsnifləndirmək lazımdır. Beləliklə, uşaq oyunlarına bir neçə aspektdən yanaşmaq mümkündür: ona milli-coğrafi amil kimi (Avropada oynayan uşaqlarla Afrika uşaqlarının oyunları), sosioloji (varlı ailənin uşaqları ilə kasıbların uşaqlarının oyunu), tarixi (texnologiyadan öncəki ənənəvi uşaq oyunları ilə texnologiyadan sonrakı oyunlar), fərdi və kollektiv, açıq havada, küçədə və qapalı məkanda oynanan oyunlar kimi baxmaq lazımdır. Uşaq oyunları yerinə görə də iki hissəyə ayrılır:
1. Açıq havada oynanan oyunlar.
2. Qapalı məkanlarda oynanan oyunlar.
Bunların hər birinin uşağın həm fiziki, həm də zehni inkişafında fərqli mövqeyi vardır. Həm də bunların hər birinin öz spesifik xüsusiyyətləri, təsir və təhsil forması, psixoloji nəticələri vardır. Artıq açıq havada oynanan oyunlarla qapalı məkanda oynanan oyunlar haqqında son zamanlar daha çox yazılmağa başlamışdır. Bununla bərabər janrına və ya növünə görə uşaq oyunlarını aşağıdakı kimi qruplaşdırmaq olar:
a. Funksiyasına görə oyunlar. Buraya sırıkla yerimə, taxta ata minmə, ağaca dırmanma, ətək döndürmə, çəllək yuvarlama, üzmə, topaç çevirmə, üzmə, ağac atma kimi fiziki bacarıq nümayiş etdirən oyunlar daxildir.
b. Qaydalı oyunlar. Buraya eşşək beli, körəbə (təsadüfi gəlin seçimi ilə oynanan evlilik oyunu), iplə dartma, dirədöymə və s. daxildir.
c. Rol oynama oyunları. Buraya ənənəvi mərasimləri, bayramları, şənlikləri canlandıran təqlidi oyunlar daxildir (Arsal, 2014, 139-140).
Bəsit bir təsnifatla uşaqların ayaqüstü oynadığı oyunlarla, oturaraq oynadıqları oyunları da ayrı bir özəllik kimi qəbul etmək olar. Hələ sadəcə oğlanların və sadəcə qızların oynadıqları xüsusi oyunlar da vardır.
Bir başqa təsnifata görə oyunlar 1) udmaq-uduzmaq və 2) oynamaq üçün oyunlardan ibarətdir. (Yavuz 2014, 152) Udmaq-uduzmaq oyunlarında uşaqlar ciddi bir görkəm alır, məsumiyyət ortadan qalxır. Çünki burada güclü, bacarıqlı, çevik olanın qazanacağı məlumdur.
Bütün uşaq oyunlarını əhatə etməkdən uzaq olan bir təsnifat da A.Nəbiyev tərəfindən təqdim edilmişdir:
1. Cəldlik, çeviklik və hərəkətlə bağlı uşaq oyunları.
2. Ayin, etiqad və mərasimlərlə bağlı uşaq oyunları.
3. Gözbağlıca oyunları (Nəbiyev 2009, 556-560).
Oyun uşaqların beyin fəaliyyətini inkişaf etdirdiyi üçün onu yaş qruplarına görə də təsnifləndirmək olar. “Uşaqların oynadıqları oyunlar yaş dönəmlərinə görə fərqliliklər göstərir. 0-2 yaş dönəmində bilgi, dil, hərəkət inkişafı yetərli səviyyəyə çatmadığından uşaqlar tək başına oyun oynayırlar. 2-4 yaş dönəmində uşaqlar eyni yerdə dəyərləri ilə çox daha əlaqə yaratmadan oyun oynayırlar. Bu dönəmdə uşaqların xəyal gücləri çox inkişaf etmiş vəziyyətdə olur, ancaq yoldaşları ilə sosial münasibət yaratmazlar. 4 yaşından sonra uşaqlar birlikdə oyun oynamağa başlarlar. 6 yaşından sonra qaydalı oyunlar oynarlar, təşkilatlanırlar, bir-biriləri ilə bölüşmələri artır” (Madi 2014, 219-220). Bu yaş dönəmlərinin özəllikləri ümumi halda doğru olsa da uşaqdan uşağa, ölkədən ölkəyə dəyişə bilir.
Burada önəmli bir məsələ də uşaqların yaş qruplarına və cinsiyyətinə görə oyuna münasibətləri və ya oyunun təsnifatıdır. Belə ki, aparılan müşahidələr nəticəsində belə bir fikrə gəlinmişdir ki, (Atık, 1986) üç-dörd yaşındakı uşaqlar daha çox təkbaşına və paralel oyunlara, beş-altı yaşındakı uşaqlar isə bərabər və kollektiv oyunlara üstünlük verirlər. Oyunun seçilməsində qız və oğlan uşaqları arasında fərq varsa da oyunu necə oynamaqda elə bir fərq görünmür. Ancaq oğlan uşaqları kollektiv oyuna bir qədər gec meyl etmələrinə baxdıqda qızlar bu tip oyun oynamağa daha erkən yaşlardan başlamışlar. Hər halda oğlanlar təkbaşına və paralel oyunlara, qızlar isə daha çox kollektiv oyunlara yatqındırlar.
-
Keçmişdən günümüzə uşaq oyunları
Keçmişdən bugünə qədər uşaq oyunlarında sosial-texnik və mədəni dəyişikliklər olsa da dəyişməyən onun “müəyyən bir məqsədə bağlı olan və olmayan qaydalı və ya qaydasız həyata keçirilən, ancaq hər vəziyyətdə uşağın istəyərək və xoşlanaraq işirak etdiyi, fiziki, zehni, dil, hissi və sosial inkişafını əsas götürən real həyatın bir parçası və uşaq üçün ən təsirli öyrənmə yolu” olduğudur (Dönmez Baykoç, 1992). Müasir dövrə qədər uzun bir tarixi yol keçən uşaq oyunları ən azı üç minillik bir inkişaf etapından keçmişdir. Onun fəlsəfəsində hər zaman öyrənmə əsas olmuşdur. Ancaq bu zaman içində dəyişən o qədər çox şey olmuşdur ki, əski uşaq oyunlarından çox az şey qalmışdır.
Uşaqlar “Evcik-evcik”, “Beşdaş”, “Laldinməz”, “Yoldaş, səni kim apardı?”, “Mərə”, “Qəzmədaş”, “Siçan-pişik” , “Mərəköçdü”, “Gizlənqaş” və s. kimi oyunlardan kompyuterlərə, oyun makinalarına, klassik oyunlardan, çoxunun adı olmayan çağdaş oyunlara qədər bir çox dövr keçmişlər.
Bu gün dəyişən sosial-mədəni və texnoloji çağda uşaqlar qismən də olsa kənd yerlərində, hətta oyunun anlamı və oyuncaqlar dəyişsə də hələ də açıq havada, kollektiv şəkildə oynayırlar. Şəhərlərdə isə uşaqlar müəyyən yaşa qədər qapalı məkanlarda, çox vaxt isə böyüklərin nəzarəti altında oynanır. Təbii ki, oyun XXI yüzildə açıqdan qapalılığa, sərbəstlikdən sərhədliliyə doğru dəyişiklik göstərmişdir. Böyüklərin və ya baxçanın və ya məktəbin nəzarəti altında oynanan oyunlar sərbəst olmayıb, qısıtlanmış oyunlardır. Bütün bunların müsbət tərəfləri olduğu kimi mənfi tərəfləri də vardır. Ancaq oyun var və insanlıq var olduqca olmağa davam edəcəkdir.
Müasir dünyada “uşağın sosial, mədəni çevrəsini, iqtisadi şərtlərini diqqətə almaq lazımdır... Ona görə də uşaqların oyunlarını həm sosiokültürəl aspektdən araşdırma, həm də oyunu uşaqların digər fəaliyyətləri ilə (iş, məktəb və s.) birlikdə öyrənmək şərti ortaya çıxır” (Onur, 2014, 83). Buraya təbii ki, bir də uşağın şəhərdə və ya kənddə yaşaması da daxildir, çünki şəhərləşmə, sürətlə sənayeləşmə, texnologiyanın öncə böyük meqapollarda toplanması, bir az da sosial çevrə şəhərli uşaqla kəndli uşağın həm oyununda, həm də oyundan nəyi anladığında fərqli yanaşmalar ortaya qoyur. Bunu günümüz uşaq oyunları və oyuncaqları baxımından mütləq nəzərə almaq lazımdır.
Uşaqların oynadıqları oyunların başında bədəni inkişaf etdirən oyunlar, zehni, hesabı, estetik zövqü formalaşdıran əyləncələr gəlir. Bunun üçün taxta xəncər və qılınclar, uzun eşşək, tullanmaq, qaçmaq yarışı, top oyunları, çilingağac, zər, domino, aşıq və s. oyunlardan istifadə edilir. Belə ki, bu və buna bənzər oyunların həm uşaqlar, həm də yeniyetmələr tərəfindən oynanması oyunun adaptasiyonu mənasına gəlmir, bunlar sadəcə olaraq uşaq və yeniyetmələrin zövq və əyləncə anlayışına bağlıdır.
Oynayan insan dedikdə ağıla ilk olaraq uşaqların oyunu gəlir. Bu həm də dünyaya gələn insanın elə ilk gündən oynaması deməkdir. Onun süd əmməsindən, beşikdə hərəkətinə qədər hər şeyi oyundur. Uşaq aləmindən yetkinlik, gənclik dünyasına keçiddə uşaqların oyun fəaliyyəti xüsusi yer tutur. Oyun uşaqların bəlkə də tək fəaliyyət arenasıdır ki, burada o, əslində ciddiyyəti, qaydaya əməl etməyi, səbr göstərməyi, paylaşmağı və s. öyrənir. Bir sözlə, oyun uşaqların ikinci məktəbi rolundadır. Canlı varlıqlar içində ən çox oynayan heyvanlarla uşaqlardır. Belə ki, oyun uşağı təbiətdən cəmiyyətə, heyvani vərdişlərdən insani yaşama doğru aparan yeganə vasitədir. J.Huizinganın ifadəsi ilə “insanın həqiqətən oynaması üçün yenidən uşaq olması lazımdır.” O baxımdan uşaq oyunlarının fəlsəfəsində insanın saflığı, özünə geri dönməsi, təbiətlə həmahəngliyi vardır. Uşaq oyunlarında fəsillərin simvolik anlamı, ritual hazırlığın ilkin elementləri yatır. Ancaq bu ciddi mənalar insanın düşüncəsizcəsinə hərəkətləri, çılğıncasına təşəbbüsləri kimi özünü göstərir. Ancaq uşaq oyunları da ciddi bir qayda daxilində keçirilir (bax. Onur 2005). Uşaq oyunları gələcəkdə onları həyatda qarşılaşacaqları çətinliklərə, zorluqlara, zəfərə və məğlubiyyətlərə alışdırır, onları gələcəyə hazırlayır.
Uşaqların da oyunları böyüklərin oyunu kimi ritual mahiyyətlidir. Hətta uşaqların oynadıqları kuklaların, oyuncaqların çoxu bir zamanlar kult xarakerli olmuş, ritualların əsas aləti kimi funksiyonallaşmışdır. Heyvan, quş və ya fantastik varlıqların təsvirini daşıyan kuklalar əski çağlarda sehir ünsürü kimi işlədilmişdir. Məsələn, şamanlıqda emegetlər adlanan kuklalar şamanın yardımçı ruhlarının təsviri olub sonradan uşaq kuklalarının düzəldilməsində model olmuşdur. Eyni şəkildə əski çağlarda ata evini tərk edən qızın özü ilə gətirdiyi yardımçı ruhlarının təsviri də uşaq bəbəklərinin əsas bazasını təşkil etmişdir.
Oyunla başlayan uşaq həyatı bilgi, fikir yürütmə, sosial varlıq kimi yetişmə, bir şeyləri bölüşə bilmə, duyğu orqanlarını inkişaf etdirmə, ağlını işlətmə, oxuma və yazma, yönü təyin etmə, görə bilmə, fiziki inkişaf, bədənin möhkəmlənməsi, dözüm və səbr, xəyal gücü, yaradıcılıq kimi insana bütün yaşamı boyu gərəkli olan şeyləri qazanmış olur.
-
Təhkiyəli uşaq oyunları
Uşaqların yaradıcılıq qabiliyyətini və xəyal gücünü inkişaf etdirən bir çox təhkiyəli uşaq oyunları vardır. Bu oyunları daha çox 12 yaş və üstü olan uşaqlar oynayır. Təhkiyəli və ya başqa bir deyişlə süjetli oyunlar yaradıcılığa, estetik zövqə böyük stimul verən xəyal gücünün məhsuludur. Bu oyunlarda uşaqların dünyası daha açıq bir biçimdə sərgilənmiş olur. Qarabağda və Azərbaycanın digər bölgələrində yayğın olan süjetli oyunlardan biri də “Ana, məni qurda vermə” və ya “Mən çobanam, vermərəm”dir. Kökü daha əski çağlara qədər gedən bu oyun hal-hazırda ritual təməlini itirmiş durumdadır. Öncə oynayanların içində ana və qurd rollarını ifa edəcək uşaqlar seçilir. Qalan uşaqlar ananın övladları rolunda iştirak edirlər.
Oyun qurdun, ananın uşağı rolunu oynayan oyunçulardan birini aparması ilə başlayır. Uşaq “ana, məni qurda vermə, dosta sat, yada vermə” fəryadı ilə anasını çağırır və bu cümlədən sonra əsl oyun başlamış olur. Ana ilə qurd arasında keçən döyüşdə qurd öldürülür, ana uşağını xilas edir. Oyunun digər variantı mərasim şənliklərində icra edilir. Bu, sözlü, nəğməli uşaq oyundur ki, yenə də oyunçulardan biri Qurd rolunu oynayır. Qurd bir-birinin əlindən tutmuş dəstəyə və oyunun başçısı olan çobana, mən qurdam, bütün qış heç bir şey yeməmişəm, mənə qoyun ver, – deyə müraciət edir. Çoban, sən qurdsansa, al görüm, mən də çobanam, vermərəm, cavabını verir və dəstəni Qurddan qoruyur. Ancaq oyunun qaydasına görə qurdun əli dəyən oyunçu oyundan çıxmalı olur.
Təhkiyəli uşaq oyunlarından biri də “Əlağa erkək istəyir” və ya bu oyunun başqa bir variantı olan “Qarapaşa” adlanan oyundur. Birinci oyunda baş çoban, yəni sərkar, polis məmuru Əlağa, yasavul və qoyunlar iştirak edir. Polis məmuru yasavulu baş çobanın yanına göndərib ondan bir erkək istəyir. Baş çoban erkəyi vermir. Əlağa yasavula erkəyi zorla almağı tapşırır. Baş çoban isə qoyunlarını qoruyur. Digər oyunda isə uşaqlar, çoban Qarapaşa, it, yalançı və qoyunlar rolunda iştirak edir. Yalançı əlində çomaq və tütək olan Qarapaşaya yaxınlaşaraq ondan bir toğlu tələb edir. Toğlunu ala bilmədikdə yalançı onun toğlusunu qaçırır. İt isə hürə-hürə həm yalançını, həm də çobanı təqib edir və qaçırılan toğlunu geri qaytarmağa çalışır. Oyun çobanın toğlunu yalançıdan geri alması ilə tamamlanır.
“Oğru-oğru” adlı təhkiyəli uşaq oyununda isə oyunçular öz aralarından birini xan seçirlər. Xan isə oyunçuları iki hissəyə bölür: birinci tərəfdə oğrular, ikinci tərəfdə isə yasavullar olur. Oyunda oğrular qaçıb gizlənirlər, yasavullar da onları axtarırlar. Bəzi bölgələrdə isə (şimal-qərb bölgəsi) oyunçular xan yerinə çoban seçirlər. Yenə də oyunçular iki hissəyə bölünürlər: oğrular və itlər. Oğrular sürüdən qoyun oğurlamağa çalışırlar, itlər də oğruları qovur.
Hal-hazırda dəyişən sosial, texniki və mədəni şəraitdə təhkiyəli uşaq oyunları o qədər də yayğın deyildir və yavaş-yavaş unudulmaqdadır. Təhkiyəli oyunların yerini artıq qısa və texniki cəhətdən mükəmməl olan oyunlar almışdır.
-
Uşaq oyunlarının vazkeçilməz parçası - oyuncaqlar
Aradan keçən uzun illər müddətində bəsit, qaba alətlərlə, bir çox halda özlərinin düzəltdikləri oyuncaqlarla küçədə, yaşıdları və ya özündən bir az böyük və ya kiçiklərlə oynayan uşaqlar, o zamandan demək olar ki, çox az şey saxlamışlar. Sürətlə dəyişən dünya, texnologiyalaşan həyatımız uşaq oyunlarına da təsirsiz ötüşməmişdir. İndi mexanikləşdirilmiş zərif oyuncaqlarla və çox vaxt da kompyuterlə oynayan yeni uşaqlar nəsli ortaya çıxmışdır. Açıq məkan qapalı, təbii oyunlar süni şəkildə yaradılan robot rəqiblərlə oynanan oyunlara transformasiya olunmuşdur. Uşaqlar hazır oyunların passiv seyirçisindən, aktiv şəkildə kompyuterin və ya oyun cihazlarının özü ilə oynamağa qədər uzun bir yol keçmişdir.
Təbii olaraq uşaqların oynaması üçün həm o zaman, həm də indi oyuncaqlara ehtiyacı olmuşdur. Oyuncaq uşaq dünyasının ayrılmaz parçası olub, onun cəmiyyətə uyğunlaşmasında başlıca rol oynayır. Bunun önəmini uşaq oyunları və oyuncaqları ilə məşğul olan bilim adamları da qeyd edirlər. Bu bilim adamlarına görə oyuncaqlar cəmiyyətin, xalqın mədəni inkişafını, inanclarını, dillərini və yaşanılan bölgənin özəlliklərini əks etdirir. Cəmiyyətin mədəni özəlliklərini bu şəkildə əks etdirən oyuncaqlar mədəni əlaqə vasitəsi funksiyasını da yerinə yetirir. (Karaman ve Nas, 2012; Girmen, 2012) Oyuncaqsız oyun olmadığına görə uşaq oyunları həm də uşaqların oynadığı oyuncaqlar haqqındadır.
Əski çağlarda uşaq dünyasının olmazsa olmazlarından biri olan oyuncaqlar, əsasən, bişmiş gildən, taxtadan, müxtəlif parçalardan düzəldilirdi. Xüsusi zövqlə düzəldilmiş oyuncaqlar, daha sonralar fabriklərdə istehsal edilən oyuncaqlar yalnız çox varlı uşaqlarının oynaya bildiyi oyuncaqlar idi. Taxtadan və ya daha primitiv şəkildə teldən düzəldilən kiçik arabalar, qoşqu alətləri, at və digər heyvan fiqurları, gəlinciklər, bişmiş torpaqdan hazırlanan oyuncaqlara nisbətən həm davamlı, həm də yüngül idi. Son 60-70 ilə qədər daha çox Masallıda, Lənkəranda və ümumiyyətlə, digər bölgələrdə taxtadan düzəldilən bəzəkli oyun arabaları, kiçik beşiklər, gəlinciklər o qədər də baha olmayan qiymətə bazarlarda satılırdı. Taxta oyuncaqlardan biri də yelləncəkdə yellənən insan fiquru idi. Oğlanların oynaması üçün taxta qılınclar, yay və oxlar da hazırlanırdı ki, bu da onların çeviklik, güc, taktik qabiliyyətlərinin inkişafına səbəb olurdu.
Ancaq sürətlə başlayan sənayeləşmə oyuncaqların da forma və məzmununu dəyişdi. Ən azından uşaqların yaralanmasına, zədə almasına səbəb verməyən taxta oyuncaqlar yerini uşaqların yaralanmasına yol açacaq dəmirdən, sərt plastik materialdan hazırlanan oyuncaqlara verdi. Burada fiziki yaradan daha çox psixoloji travma daha təhlükəlidir. Çünki bu oyuncaqlar milli olmaqdan çox bizə yad olan mədəniyyətlərin məhsulu idi. Artıq uşaqlar əldə düzəldilmiş oyuncaqlar olmadığından və buna tələbatın da çox azaldığı bir vaxtda robotlara, uzaqdan batareya ilə çalışan maşınlara, özü qurulub yığılan müxtəlif konstruksiyalara üstünlük verirlər.
Oyuncaqlar bir çox halda fəsillərə görə də dəyişirdi. Oyuncaqlar haqqında yazılı mətnləri qalmayan xalqlarda yaşlı insanların xatirələrindən istifadə etməklə ən azı yüz, yüz əlli illik oyuncaqlar haqqında məlumat əldə etmək mümkündür. Çox təəssüf ki, türklərin əski və orta çağ oyuncaqları haqqında bilgimiz yoxdur.
Uşaq həyat haqqında bir şey bilmədiyi vaxtda ilk olaraq oyuncaqla tanış olur. O baxımdan oyuncaqların uşaqların təlim-tərbiyəsində böyük rolu vardır. Təbii ki, bəzi məlumatlara inansaq ən qədim oyuncaqların Misirdə düzəldildiyini demək lazımdır. Oyuncaqlarla bağlı araşdırmasında B.Onur onların tarixən keçdiyi inkişaf yolunu izləməklə bərabər uşaqların təlim-tərbiyəsindəki roluna da toxunmuşdur (bax. Onur, 1993; Onur 2010).
Bu gün dəyişən dünyada böyük bir sənayeyə çevrilən uşaq oyuncaqları daha çox ticari məqsədə xidmət etdiyindən kütləvi şəkildə istehsal edilir və təbii ki, yavaş-yavaş oyuncaqların estetik tərəfi, tərbiyəvi əhəmiyyəti arxa plana keçir. Müasir dövrdə sənayeləşən oyuncaqların uşaqların fiziki və zehni inkişafını sürətləndirən, onları sosiallaşdıran oyuncaqlardan fərqli olduğunu da demək lazımdır. Buraya texnologiyanın son nailiyyəti olan kompyuter oyunlarını (təkbətək savaş – karate, uşu, şaulin və b. oyunları) da əlavə etmək lazımdır. Sürətlə artan və xüsusən də idxal edilən bu stolüstü oyunlar çevik düşünmək qabiliyyətini artırsa da oyunun öldürmək, yaralamaq üzərində qurulması uşaqlarda şiddət və amansızlıq duyğuları yaradır. Təbii ki, uşaqlarda gərginlik duyğusu, əsəb yaradan, bir-birindən fantastik heyvan fiqurları, robot döyüşçüləri təmsil edən oyuncaqlar, süpermənlər, hörümçək adamlar və digərləri ayrı bir problemdir. Bütün bunlar pedaqoqların, psixoloqların, mədəniyyət tarixçilərinin, bir sözlə, dünyanın və ən əsası da valideynlərin gözləri qarşısında baş verir və ticari maraq mənəvi marağı, şiddət mərhəməti, əsəbilik zövq almağı üstələyir.
Oyuncaqlar doğma mədəniyyətlə bağlı olduqda, milli özünəməxsusluğu əks etdirdikdə uşaqlar bir fərd kimi milli dünyagörüşə yiyələnir, milli ruhda tərbiyə alırlar. Bu halda uşaqlar həm də tarixlərini, milli mənəvi dəyərlərini, bir sözlə, kim olduqlarını öyrənmiş olurlar. Oyuncaqlar idxal edilmişsə, başqa bir mədəniyyəti təbliğ edirsə, bunun mənfi nəticələri uşaqların ən yaxşı halda kosmopolit, pis halda isə başqa mədəniyyətə heyran, bir az da zalım, ədalət duyğusu olmayan vətəndaşlar kimi formalaşmasını saxlamış olur. Bunun qarşısını almağın ən optimal variantı uşaqları mümkün olduğu qədər başqa mədəniyyətləri, həmçinin zalımlığı, qan tökməyi açıq şəkildə göstərən oyuncaqlardan və oyunlardan uzaq tutmaqdır.
Bununla bərabər bəzi elektronik oyuncaqlar, uşaqların zehninin yaxşı çalışmasına, biliklərinin artmasına səbəb olur. Ona görə də müasir dövrdə oyuncaq sənayesindən idxal edilən stolüstü elektronik oyuncaqlara daha çox üstünlük verilir. Bu, təbii ki, uşaqların zehni qabiliyyətinin inkişafına, məktəbə və ya imtahanlara hazırlığına müsbət təsir göstərsə də uşaqların fiziki aktivliyini azaldır, sosiallaşmasına isə mənfi təsir göstərir, uşağı fərdiliyə, içinə qapanmağa sürükləyir. Stolüstü oyunlara üstünlük verilməsinin bir böyük səbəbi də urbanizasiya sürətlə inkişafı, uşaq oyun yerlərinin azalması, daralmasıdır. Özəlliklə, Bakı kimi plansız böyüyən şəhərdə sürətlə tikilən çoxmərtəbəli binalar uşaqlar üçün oyun yerlərini demək olar ki, nəzərdə tutmur. Bu, üçüncü dünya ölkələri və ərəb dünyası üçün də xarakterikdir. Azərbaycanda bəzi oyun yerləri, parklar və oyuncaqlar yalnız ticari məqsəd daşıdığından və bahalı olduğundan əhalinin çox böyük əksəriyyətini təşkil edən imkansız ailələrin uşaqlarının oyundan kənarda qalmasına səbəb olur. Bu problem özlüyündə uşaqların sosial baxımdan fərqliləşməsinə, fərqliləşmənin isə uşaq psixologiyasına mənfi təsir göstərməsinə gətirib çıxarır.
-
Dostları ilə paylaş: |