«Ey iman gətirənlər! Mömin qadınlar hicrət edib sizin yanınıza gəldikləri zaman onları imtahana çəkin. Allah onların imanını daha yaxşı bilir. Əgər bunların mömin olduqlarını bilsəniz, onları kafirlərə qaytarmayın. Nə bunlar onlara halaldır, nə də onlar bunlara halaldırlar. Kafirlərin bu qadınlara sərf etdikləri mehri özlərinə qaytarın. Həmin qadınların mehrlərini özlərinə verdiyiniz halda onlarla evlənməyinizdə sizə heç bir günah yoxdur. Kafir qadınlarınızı kəbin altında saxlamayın, sərf etdiyiniz mehri tələb edin. Qoy onlar da mömin qadınlara sərf etdikləri mehri sizdən tələb etsinlər. Allahın hökmü budur. O sizin aranızda hökm verir. Allah Biləndir, Müdrikdir»197
Bu ayə nazil olduqdan sonra Ömər (r.a) iki müşrik zövcəsini boşadı və onlardan birini Müaviyə ibn Əbi Süfyan (r.a), digərini isə Səfvan ibn Ümeyyə aldı. Peyğəmbər Mədinəyə gəldikdən sonra müsəlman olmuş qüreyşli Əbu Bəsir (Ütbə ibn Useyd əs-Səqəfi) (r.a) onun yanına gəldi. Qüreyş də onu geri qaytarmaq üçün iki kişi göndərdi və onlar Peyğəmbərin yanına gəlib: «Bizimlə bağladığın sülh müqaviləsinə görə Əbu Bəsiri (r.a) geri qaytar!»- deyə ona müraciət etdilər. O, Əbu Bəsiri (r.a) həmin iki kişiyə təhvil verdi. Onlar Əbu Bəsirlə (r.a) Məkkəyə yola düşdülər və nəhayət gəlib zul-Hüleyfəyə çatdılar. Burada onlar (xurcunlarındakı) xurmadan yemək üçün dayandılar. Əbu Bəsir (r.a) onlardan birinə (Xuney ibn Cabirə): «Ey filankəs, Allaha and olsun ki, sənin bu qılıncın çox gözəldir!»- dedi. Qılıncın sahibi onu qınından çıxarıb dedi: «Doğrudan da bu çox gözəl qılıncdır. Mən onu bir neçə dəfə təcrübədən keçirmişəm». Əbu Bəsir (r.a): «Göstər görüm necə qılıncdır»- dedi, sonra fürsət tapıb qılıncı onun əlindən aldı və nəfəsi kəsilənə qədər qılıncla onu vurdu. O birisi isə (başqa rəvayətdə Xuneysin mövlası) qaçıb Mədinəyə gəldi və tələsik məscidə daxil oldu. Peyğəmbər onun vahimə içində yüyürə-yüyürə gəldiyini görüb: «Bu adam nədənsə qorxub!»- dedi. O, Peyğəmbərin yanına gəlib dedi: «Allaha and olsun ki, yoldaşım öldürüldü! (Qorumasanız) mən də öldürüləcəyəm».
Bu vaxt Əbu Bəsir (r.a) gəlib dedi: «Ey Allahın peyğəmbəri! Allaha and olsun ki, artıq O, sənə vədini yerinə yetirməyə yardım etdi və sən də məni müşriklərə təhvil verdin. Sonra isə Allah məni onların əlindən xilas etdi.
Peyğəmbər dedi: «Vay bunun anasının halına!198 Bu, müharibə alovunu qızışdıran bir kimsədir. Əgər bir neçə nəfər də onunla həmrəy olsa (o zaman müharibə alovu qızışacaq və sülh müqaviləsi pozulacaq) ».
Əbu Bəsir (r.a) bunu eşitdikdə onun yenidən müşriklərə qaytarılacağını başa düşdü və Mədinədən çıxıb dənizin sahilinə tərəf getdi. Sonra müşriklərdən canını qurtarmış Əbu Cəndəl ibn Suheyl (r.a) də ona qoşuldu. Daha sonra isə Məkkə müşriklərindən yaxa qurtaran hər bir müsəlman ona qoşuldu və beləliklə də onlar qüvvətli bir dəstəyə çevrildilər. Vallahi onlar hər dəfə Qüreyşin ticarət karvanının Şama yola düşdüyündən xəbər tutduqda, karvanın qabağını kəsər və onları öldürüb mallarını götürərdilər. Bu təhlükəni görən Qüreyş öz tərəfindən bir nümayəndəni (Əbu Süfyanı (r.a)) Peyğəmbərin yanına göndərdi. Bu dəfə Qüreyş Peyğəmbəri Allaha and verib aralarında olan qohumluq əlaqələrinin hörmətinə görə (onların ticarət karvanlarını Əbu Bəsir (r.a) və onun camaatından qorumaq üçün) ona yalvarırdı. Onlar Peyğəmbərə : «Bundan sonra müsəlman olaraq Məkkədən Mədinəyə hicrət etmiş hər bir şəxs əmin ola bilər (geri gətirilməyəcəkdir.) »- deyə xəbər göndərmişdilər».
Peyğəmbər səhabələrdən birini (bu xoş xəbəri çatdırmaq üçün) Əbu Bəsir və onun camaatının yanına göndərdi və Uca Allah bu ayələri nazil etdi:
ﭽ ﭑ ﭒ ﭓ ﭔ ﭕ ﭖ ﭗ ﭘ ﭙ ﭚ ﭛ ﭜ ﭝ ﭞﭟ ﭼ حتى بلغ ﭽ ﮘ ﮙ ﮚ ﭼ
«Sizi onların üzərində qələbə çalmağa müvəffəq etdikdən sonra, Məkkə vadisində onların əlini sizdən, sizin də əlinizi onlardan çəkən Odur..» ayəsindən, «Kafirlər öz qəlbində təkəbbürlüyə – cahiliyyə lovğalığına qapıldıqları zaman …»199 ayəsinə qədər.
Onların təkəbbür və təəssübü, Hüdeybiyyə müqaviləsinə «Bismillahir-Rəhmanir-Rəhim», «Muhəmmədun-rəsulullah» sözlərini yazmaqdan imtina etmələri və həmin il (hicrətin altıncı ilində) müsəlmanların Məkkəyə daxil olub Allahın evini ziyarət etməyə razılıq verməmələri idi.
Bu hədisi həmçinin Abdurrəzaq «Müsənnəf» əsərində (5-ci cild, səh. 342), Əhməd «Müsnəd» əsərində (4-cü cild, səh. 331) və ibn Cərir «Təfsir»ində (26-cı cild, səh. 101) təvayət etmişlər.
Muslim «Səhih» əsərində (12-ci cild, səh. 187) demişdir: «Ənəs ibn Malik (r.a) rəvayət edir ki, səksən nəfər silahlı Məkkə müşriki Tən'im dağı tərəfdən müsəlmanlara hücum etmiş, lakin əsir tutulub Peyğəmbərin yanına gətirilmişdilər. O da onlara heç bir cəza verməyib hamısını azad etmiş və bu ayə nazil olmuşdu:
ﭽ ﭑ ﭒ ﭓ ﭔ ﭕ ﭖ ﭗ ﭘ ﭙ ﭚ ﭛ ﭜ ﭝ ﭞﭟ ﭼ
«Sizi onların üzərində qələbə çalmağa müvəffəq etdikdən sonra, Məkkə vadisində onların əlini sizdən, sizin də əlinizi onlardan çəkən Odur..».
Bu hədisi həmçinin Tirmizi «Sünən» əsərində (4-cü cild, səh. 185), Əbu Davud «Sünən» əsərində (3-cü cild, səh. 13), Əhməd «Müsnəd» əsərində (3-cü cild, səh. 122, 125) və ibn Cərir «Təfsir»ində (26-cı cild, səh. 94) rəvayət etmişlər.
Muslim «Səhih» əsərində (12-ci cild, səh. 174) demişdir: «Sələmə ibn əl-Əkva (r.a) demişdir: «Peyğəmbərlə birlikdə Hüdeybiyyəyə gəldiyimiz zaman bizim sayımız min dörd yüz nəfər idi və biz özümüzlə əlli qoç da gətirmişdik. (Ora çatdıqda hamı susamışdı. Elə buna görə də) Peyğəmbər su quyusunun yanında oturdu, sonra ya dua etdi, ya da onun içinə tüpürdü və oradan su fəvvarə vurdu. Biz o sudan doyunca içdik, heyvanlarımızı suvardıq və ehtiyat üçün qablarımıza da doldurduq. Sonra Peyğəmbər beyət etmək üçün bizim hamımızı ağacın altına dəvət etdi. Mən ilk beyət edənlərdən idim. Beyət edənlərin sayı yarıya çatdıqda Peyğəmbər dedi:
– Ey Sələmə, gəl beyət et!
– Ey Allahın elçisi, artıq mən ilk zümrə ilə birlikdə sənə beyət etdim!
– Yenə beyət et!
Sonra o məni əliboş – yəni silahsız – görüb bir qalxan verdi və beyət etməyinə davam etdi. Beyətin sonunda o dedi:
– Ey Sələmə, mənə beyət etmirsən?
– Ey Allahın elçisi, artıq mən əvvəlki və sonrakı camaatla birlikdə sənə beyət etdim!
– Yenə beyət et!
Mən üçüncü dəfə ona beyət etdim. Sonra o mənə dedi: «Ey Sələmə, sənə verdiyim qalxan haradadır?»
Mən dedim: «Ey Allahın elçisi! Mən əmim Amiri (r.a) silahsız görüb qalxanı ona verdim».
Peyğəmbər gülüb dedi: «Həqiqətən, sən, sanki ilk əvvəl: «Allahım! Özümdən də artıq sevdiyimi (bir neməti) mənə əta et!»- deyən şəxsə bənzəyirsən!»
Sonra müşriklər bizim yanımıza öz nümayəndələrini göndərib onlarla sülh müqaviləsi bağlamağı təklif etdilər. Biz bununla razılaşdıq və aradakı gediş-gəliş bərpa olundu. O zamanlar mən Təlhə ibn Ubeydullahın (r.a) xidmətçisi idim. Mən onun atını suvarır, qaşovla belini toz-torpaqdan təmizləyir, habelə digər xidmətlər göstərir və Təlhənin (r.a) çörəyini yeyirdim. Mən Allahın (rizasını qazanmaq) və Peyğəmbərinin (əmrinə tabe olmaq) xatirinə var-dövlətimi və qohum-əqrəbamı tərk edib Mədinəyə hicrət etmişdim.
Məkkə əhli ilə bizim aramızda sülh müqaviləsi bağlanılıb gediş-gəliş bərpa olunduqdan sonra mən tikanlı bir ağacın yanına gəlib altına tökülmüş tikanları təmizlədim və dincəlmək üçün orada uzandım. Bu zaman dörd Məkkə müşriki yanıma gəlib Peyğəmbər barəsində nalayiq sözlər danışmağa başladılar. Mən onların dediklərinə nifrət etdim və gedib başqa ağacın altında uzandım. Onlar silahlarını ağacdan asıb orada uzandılar. Elə bu vaxt carçı vadinin aşağı tərəfindən car çəkib dedi: «Ey mühacirlər, ibn Zuneymi (r.a) öldürüblər!» Mən dərhal qılıncımı çıxarıb o dörd nəfərin üstünə hücum etdim və onların qılınclarını əlimə toplayıb dedim: «Məhəmmədin hörmətini ucaldan Allaha and olsun ki, sizlərdən biri başını tərpətsə onun boynunu vuraram!» Sonra mən onları əsir tutub Peyğəmbərin yanına gətirdim. Bu arada əmim Amir (r.a) zirehli atın üzərində, əsir tutulmuş Ablat oğullarından olan Mikrəzi və başqa yetmiş müşriki Peyğəmbərin yanına gətirdi. Peyğəmbər onlara nəzər salıb dedi: «Onları azad edin! Bu onların birinci və axırıncı günahı olsun!»
Peyğəmbər onları bağışlayıb hamısını azad etdi və Uca Allah da bu ayəni nazil etdi:
ﭽ ﭑ ﭒ ﭓ ﭔ ﭕ ﭖ ﭗ ﭘ ﭙ ﭚ ﭛ ﭜ ﭝ ﭞﭟ ﭠ ﭡ ﭢ ﭣ ﭤ ﭥ ﭼ
«Sizi onların üzərində qələbə çalmağa müvəffəq etdikdən sonra, Məkkə vadisində onların əlini sizdən, sizin də əlinizi onlardan çəkən Odur. Allah sizin nə etdiklərinizi Görəndir».
Sonra biz oradan çıxıb geriyə, Mədinəyə döndük və yolüstü müşrik olan bənu Lihyan qəbiləsinə yaxın bir yerdə dayanmalı olduq. Onlarla bizim aramızda bir dağ var idi. Peyğəmbər o gecə dağa qalxıb müşriklər barəsində ona və səhabələrinə xəbər gətirən şəxs üçün Allahdan bağışlanma dilədi. Mən o gecə iki və ya üç dəfə dağa qalxdım.
Biz Mədinəyə gəlib çatdıqdan sonra Peyğəmbər xidmətçisi Rəbahı (r.a) mənimlə birlikdə geridə qalmış sürüyə baş çəkməyə göndərdi və biz Təlhənin (r.a) atına minib ora getdik. Biz ora çatdıqda artıq Abdurrəhman ibn Bədr əl-Fəzari sürüyə basqın etmiş, çobanı öldürüb mal-qaranı sürüb aparmışdı. Mən: «Ey Rəbah! Götür bu atı Təlhə ibn Ubeydullaha (r.a) çatdır, Peyğəmbərə də xəbər ver ki, artıq müşriklər onun sürüsünə basqın ediblər».
Sonra mən bir təpənin üstünə qalxıb Mədinəyə tərəf üz tutdum və üç dəfə: «Köməyə gəlin!» – deyə çağırdım.
Daha sonra mən müşrikləri təqib edib onları ox atəşinə tutdum və rəcəz200 ilə bu sözləri oxudum:
Əkvanın oğluyam mən Ölüm günüdür bu gün.
Sonra yaxınlaşıb onlardan birini oxla vurdum. Mənim atdığım oxun ucu onun atının yəhərindən keçib çiyininə dəydi. Mən yenə:
Əkvanın oğluyam mən Ölüm günüdür bu gün.
deyib onları ox atəşinə tutdum. Allaha and olsun ki, atlılardan hər biri mənə hücum etdikcə onları (atlarını) oxla vurub yaralayırdım. Mən o vaxta qədər ox atdım ki, nəhayət onlar (çıxılmaz vəziyyətə düşdülər və) özlərini dağ dərəsinə saldılar. Mən dağın üstünə qalxıb onların başlarına o qədər daş yağdırdım ki, nəhayət ələ keçirdikləri mal-qaranı geri qaytardılar. Onlar həyəcanla otuzdan çox zireh və nizələri yerə atdılar. Mən bu silahların üzərinə o qədər daşlar saldım ki, Peyğəmbər və səhabələri dağın döşündəki dərəyə gəldikdə onların orada olduğunu bilsin. Bu vaxt Abdurrəhman ibn Bədr əl-Fəzari gəlib çıxdı və onlar oturub nahar etməyə başladılar. Mən isə dağın üstündən onlara tamaşa edirdim. O dedi: «Bu gördüklərim nədir? (Burada nə baş verib?)» Onlar dedilər: «Biz bunun təzyiqinə məruz qalmışıq. Allaha and olsun ki, alaqaranlıqdan indiyə kimi bizdən əl çəkməyib, bizi ox atəşinə tutub və hər şeyi (mal-qaranı, zirehlərimizi və nizələrimizi) əlimizdən alıb. Abdurrəhman ibn Bədr əl-Fəzari dedi: «Dörd nəfər (danışıqlar aparmaq üçün) onun yanına getsin!»
Onlardan dördü mənim yanıma qalxdı. Mən danışmağa fürsət tapan kimi dedim: «Məni tanıyırsınızmı?» Onlar dedilər: «Xeyr, sən kimsən?» Mən dedim: «Mən Sələmə ibn əl-Əkvayam. Məhəmmədin hörmətini ucaldan Allaha and olsun ki, mən istəsəm sizin hər birinizi öldürə bilərəm, ancaq siz istəsəniz də məni öldürə bilməyəcəksiniz!» Onlardan biri: «Bəli! Zənn edirəm ki, o doğru deyir»- dedi və onlar geri qayıtdılar. Peyğəmbərin süvari qoşunu ağaclar arasından görünənədək mən tutduğum mövqeyi tərk etmədim. Qoşunun önündə Əxrəm əl-Əsədi (r.a), onun ardınca Əbu Qətadə əl-Ənsari (r.a), onun da ardınca Miqdad ibn əl-Əsvəd əl-Kindi (r.a) gəlirdi. Mən Əxrəmin (r.a) atının yüyənindən tutduqda o dedi: «Axı onlar qaçırlar!» Mən dedim: «Ey Əxrəm, onlardan özünü qoru! Mən istəmirəm ki, Peyğəmbər və səhabələri gəlincəyə qədər onlar səni öldürsünlər!» O dedi: «Ey Sələmə! Əgər sən Allaha və axirət gününə, cənnətin və cəhənnəmin haqq olduğuna inanırsansa Onun yolunda şəhid olmağıma mane olma!»
Mən ona mane olmadım və o Abdurrəhman ibn Bədr əl-Fəzari ilə təkbətək göyüşdə şəhid oldu. O, yalnız Abdurrəhmanın atını yaralaya bildi, Abdurrəhman isə onu öldürüb atına sahib oldu. Sonra Əbu Qətadə (r.a) Abdurrəhmanla təkbətək döyüşdü və qılıncla onu öldürdü. Məhəmmədin hörmətini ucaldan Allaha and olsun ki, mən onların ardınca qaçdım və arxada nə bir səhabə, nə də onlardan bir toz-torpaq (əsər-əlamət) gördüm. Müşriklər gün batmamışdan əvvəl gəlib zu-Qərəd adlanan, su olan bir dərəyə çatdılar və susuzluqlarını yatırtmaq üçün suyun kənarına gəldilər. Sonra nəzər salıb mənim onların dalınca gəldiyimi, onları qabaqladığımı görüb dərhal oranı tərk etdilər və bir qurtum belə o sudan içə bilmədilər. Onlar yenə dağın döşünə çəkildilər. Mən qaça-qaça onlara yaxınlaşıb:
Əkvanın oğluyam mən Ölüm günüdür bu gün.
deyib qarşımdakı müşrikin çiynindən bir ox vurdum.
O dedi: «Anası onu itirsin! Bu, səhərki Əkvadı?» Mən: «Bəli, ey nəfsinin düşməni! Mənəm, səhərki Əkva!»- deyə cavab verdim».
Onlar dağın döşündə iki at tərk edib qaçdılar. Mən bu atları da sürüb Peyğəmbərin yanına apardım və yolda Amirlə (r.a) rastlaşdım. Onun əlində birində bir az süd, digərində isə su olan iki tuluq var idi. Mən (süddən) içib (sudan) dəstəmaz aldıqdan sonra Peyğəmbərin yanına gəldim. O, müşriklərin tərk etdiyi suyun kənarında oturmuş və onlardan aldığım dəvələri, zirehləri və nizələri götürmüşdü. Bilal (r.a) isə bu dəvələrdən birini kəsib ciyərindən və hörgücündən Peyğəmbər üçün qızardırdı. Mən dedim: «Ey Allahın elçisi, izn ver səhabələrdən yüz nəfər seçib götürüm və onların ardınca gedib hamısını öldürüm!»
Peyğəmbər azı dişləri tonqal işığında görünənə qədər (ürəkdən) güldü və dedi: «Ey Sələmə! Sən bunu bacara biləcəyinə arxayinsan?» Mən dedim: «Əlbəttə! Səni ən hörmətli edən Allaha and olsun ki, bacararam!» O dedi: «Hal hazırda onlar Ğətəfan diyarında gonaqdırlar!»
Bu vaxt Ğətəfandan bir kişi gəlib dedi: «Filankəs onlar uçun bir dəvə kəsdi. Onlar dəvənin dərisini soyarkən üzərində olan toz-torpağı görüb: «Müsəlmanlar gəlirlər»- deyə qaçıb getdilər.
Ertəsi gün Peyğəmbər : «Bu günkü gündə ən yaxşı süvarimiz Əbu Qətadə və ən yaxşı piyadamız Sələmədir!» – deyib süvari və piyadalar üçün ayrılmış qənimət paylarından ikisini (hərəsindən bir pay) mənə verdi. Sonra o məni öz arxasına, Adbaya201 mindirdi və biz Mədinəyə qayıtdıq. Yolda ən bərk qaçan ənsarlardan biri: «Mədinəyə qədər yarışmaq istəyən varmı?»- deyə bir neçə dəfə təkrar etdi.
Mən onun bu qəti tələbini eşitdikdə dedim: «Məgər sən alicənab, möhtərəm insanlara hörmət etmirsən?» O: «Xeyr, mən yalnız Allahın elçisinə hörmət edirəm!»202- dedi. Mən Peyğəmbərə : «Atam-anamsan ey Allahın elçisi! İzn ver onunla yarışım» - dedim. O : «İstəyirsənsə yarış!» - dedi. Sonra mən (üzümü yarışmaq istəyən ənsara tutub): «Hazırlaş!»- dedim. Mən ayaqlarımı büküb qaçış vəziyyətini aldım, sonra dərhal yerimdən sıçrayıb qaçdım. Yolda nəfəsimi dərmək üçün bir müddət dayandıqdan sonra yenə onun ardınca qaçdım. Bir az sonra mən yenə yorğunluğumu almaq üçün dayandım. Sonra qalxıb onun dalınca qaçdım və nəhayət gəlib onu keçdikdə çiyninə vurub dedim: «Vallahi mən səni ötdüm!». O dedi: «Hesab edirəm ki, sən məni ötdün».
Beləliklə biz Mədinəyə qədər yarışdıq və mən onu arxada qoydum. Allaha and olsun ki, biz cəmi üç gün Mədinədə qaldıqdan sonra Peyğəmbərlə birlikdə Xeybərə getdik. Bu vaxt əmim Amir (r.a) rəcəz ilə bu sözləri oxudu:
Təllahi!203 İstəməsəydı Allah, düz yola gəlməzdik biz,
Nə sədəqə verərdik, nə namaz qılardıq biz,
Olmasaydı lütfün Sənin, keçinə bilməzdik biz.
Sabit et qədəmləri, düşmən gəldikdə bizə,
Sonra da bir təskinlik Özün nazil et bizə!
Allahın elçisi dedi: «Bu kimdir?»
O dedi: «Mənəm, Amir». Peyğəmbər ona: «Rəbbin səni bağışlasın!»- dedi. Peyğəmbər kiməsə Allahdan xüsusən məğfirət diləyərdisə o şəxs mütləq şəhid olardı. Bu vaxt dəvəsinin üstündə əyləşmiş Ömər ibn əl-Xəttab (r.a) onu çağırıb dedi: «Ey Allahın Peyğəmbəri! İzn ver Amir oxusun biz də həzz alaq!»
Biz Xeybərə gəlib çatdıqda düşmənin başçısı Mərhəb qabağa çıxıb qılıncını havada oynatdı və dedi:
Artıq Xeybər tanıdı, bildi ki Mərhəbəm mən!
Müharibə başlayıb döyüş alovlanarkən,
Mahir silah ustası, təcrübəli ərəm mən.
Bu vaxt əmim Amir (r.a) onunla təkbətək döyüşə çıxıb dedi:
Artıq Xeybər tanıdı, bildi ki Amirəm mən,
Mahir silah ustası, çevik qəhrəmanam mən.
Təkbətək döyüş başladı və hər ikisi bir-birinə qılınc zərbəsi endirdi. Mərhəbin vurduğu qılınc Amirin (r.a) qalxanına dəydi. Amir (r.a) onu alt nahiyədən vurduqda qılıncı özünə qayıdıb venasını kəsdi və o şəhid oldu. Mən bir neçə səhabənin: «Amir intihar etdi və əməlləri puç oldu!»- dediyini eşitdim. Mən ağlaya-ağlaya Peyğəmbərin yanına gəlib dedim: «Ey Allahın elçisi, Amirin əməlləri puç oldu!» Peyğəmbər : «Bunu kim deyir?»- deyə soruşduqda mən: «Səhabələrindən bir neçəsi!» - deyə cavab verdim. O dedi: «Yalan deyirlər! Əksinə, o ikiqat savab qazandı!»
O zaman Əli (r.a) gözlərinin ağrısından əziyyət çəkirdi və Peyğəmbər məni onun yanına göndərib dedi: «Mən bayrağı Allah və Onun rəsulunu sevən və (ya)204 Allah və rəsulunun sevdiyi bir şəxsə verəcəyəm!»
Əli (r.a) göz ağrısından iztirab çəkdiyi üçün onun əlindən tutub Peyğəmbərin yanına gətirdim. O, Əlinin (r.a) gözlərinə tüpürdü və onun gözləri sağaldı. Peyğəmbər bayrağı ona verdikdən sonra Mərhəb yenə qabağa çıxıb dedi:
Artıq Xeybər tanıdı, bildi ki Mərhəbəm mən!
Müharibə başlayıb döyüş alovlanarkən,
Mahir silah ustası, təcrübəli ərəm mən.
Əli (r.a) dedi:
Anamın Heydər205 adlandırdığı mənəm,
Meşələr şiri tək zəhimli görkəmliyəm,
Düşmənləri pərən-pərən edib tez öldürürəm.
O, Mərhəbin baş nahiyəsinə qılınc zərbəsi endirib onu öldürdü. Xeybər də məhz Əlinin (r.a) əli ilə fəth olundu».
Muslim bu hədisin başqa isnadla da rəvayət olunduğunu qeyd etmişdir.
Əhməd «Müsnəd» əsərində (4-cü cild, səh. 86) demişdir: «Abdullah ibn Məğəffəl əl-Muzəni (r.a) demişdir: «Biz Hüdeybiyyədə Peyğəmbərlə birlikdə, Uca Allahın Quranda qeyd etdiyi ağacın206 altında toplaşmışdıq. O ağacın budaqlarından bəziləri onun belinə toxunurdu. Bu vaxt Əli ibn Əbi Talib (r.a) və Suheyl ibn Amr Peyğəmbərin qarşısında oturmuşdular. Peyğəmbər Əliyə (r.a) əmr edib dedi: «Yaz! Rəhmli, Mərhəmətli Allahın adı ilə (Bismillahir-Rəhmanir-Rəhim)!» Suheyl ibn Amr onun əlindən tutub dedi: «Müqaviləmizdə «Bismillahir-Rəhmanir-Rəhim!»– ifadəsinin yazılmasını qəbul etmirik. Bizim bildiyimiz «Allahım, Sənin adınla başlayıram (Bismikə Allahummə)»- başlığını yaz!
Peyğəmbər Əliyə (r.a) : «Yaz! Allahım, Sənin adınla başlayıram! Bu, Allahın elçisi Məhəmmədin Məkkə əhli ilə bağladığı sülh müqaviləsidir!»- dedi. Suheyl yenə onun əlindən tutub dedi: «Doğrudan da Onun elçisisənsə onda belə çıxır ki, biz sənə zülm etmişik. Sən bizim qəbul etdiyimiz başlığı yaz!»
Peyğəmbər : «Mən Allahın elçisiyəm!» - dedi və katibinə: «Bu Məhəmməd ibn Abdullah ibn Abdulmuttalibin bağladığı sülh müqaviləsidir!» yazmağı əmr etdi. Elə bu vaxt silahlanmış otuz gənc bizə tərəf hücum etdi. Peyğəmbər Allaha dua etdi və onların gözləri kor oldu. Biz onları əsir tutub Peyğəmbərin yanına gətirdik. O : «Siz kiminləsə müqavilə bağlamağa gəlmisiniz, ya kimsə sizin təhlükəsizliyinizə zəmanət verib?»
Onlar: «Xeyr!» - deyə cavab verdilər. Peyğəmbər onlara heç bir cəza verməyib hamısını azad etdi və Uca Allah bu ayəni nazil etdi:
ﭽ ﭑ ﭒ ﭓ ﭔ ﭕ ﭖ ﭗ ﭘ ﭙ ﭚ ﭛ ﭜ ﭝ ﭞﭟ ﭠ ﭡ ﭢ ﭣ ﭤ ﭥ ﭼ
«Sizi onların üzərində qələbə çalmağa müvəffəq etdikdən sonra, Məkkə vadisində onların əlini sizdən, sizin də əlinizi onlardan çəkən Odur. Allah sizin nə etdiklərinizi Görəndir».
Bu hədisi həmçinin ibn Cərir «Təfsir»ində (26-cı cild, səh. 94), Beyhəqi «Sünən» əsərində (6-cı cild, səh. 319) və Hakim «Mustədrək» əsərində (2-ci cild, səh. 461) rəvayət etmişlər.
Hakim bu hədisin Buxari və Muslimin şərtlərinə görə «səhih» olduğunu qeyd etmişdir. Lakin qeyd etmək lazımdır ki, Hakimin rəvayət etdiyi isnad heç də Buxari və Muslimin şərtlərinə müvafiq deyildir.
Əbu Abdurrəhman demişdir: «Hüseyn ibn Vaqid Buxarinin istinad etdiyi ravilərdən deyildir». Həmçinin Buxari və Muslim, Sabitin Abdullah ibn Müğəffəldən rəvayət etdiyini deməmişlər. Mizzi bu isnadı «Tuhfətul-Əşraf» əsərində qeyd etmişdir. Həmçinin bu Əlainin «Camiut-Təhsil» əsərində də, öz təsdiqini tapıb.
QEYD: İbn Həcər «Fəthul-Bari» əsərində (5-ci cild, səh. 351) demişdir: «Bu ayənin məhz Əbu Bəsir (r.a) barəsində nazil olması müəmmalıdır. Çünki Muslimin «Səhih» əsərində ayənin Sələmə ibn əl-Əkva (r.a) barəsində nazil olduğu, Əhmədin «Müsnəd» və Nəsainin «Sünən» əsərlərində isə bu ayənin müsəlmanlara hücum edən silahlanmış bir dəstə gənc barəsində nazil olduğu rəvayət olunmuşdur. Ayənin digər başqa səbəblərə görə nazil olduğu da mövcuddur».
İbn Həcərin fikrini bu ayədəki
ﭽ ﭘ ﭙ ﭼ
«Məkkə vadisində» - ifadəsi təsdiqləyir. Çünki Əbu Bəsir (r.a) və onun camaatı Məkkə vadisində olmamışdılar. Daha doğrusunu isə Allah bilir!
Əl-Hücurat surəsi
Uca Allah buyurur:
ﭽ ﮎ ﮏ ﮐ ﮑ ﮒ ﮓ ﮔ ﮕ ﮖﮗ ﮘ ﮙﮚ ﮛ ﮜ ﮝ ﮞ ﮟ ﭼ
«Ey iman gətirənlər! Heç bir şeydə Allahı və Onun Elçisini qabaqlamayın. Allahdan qorxun! Həqiqətən, Allah Eşidəndir, Biləndir».
(1-ci ayə)
Buxari «Səhih» əsərində (9-cu cild, səh. 147; 10-cu cild, səh. 214) demişdir: «Abdullah ibn əz-Zubeyr (r.a) rəvayət edir ki, Bənu Təmim qəbiləsindən olan bir dəstə Peyğəmbərin yanına gəldiyi zaman Əbu Bəkr (r.a) ona, Qa'qa ibn Mə'bəd ibn Zuraranı (r.a), Ömər isə Əqra' ibn Habisi (r.a) onlara əmir təyin etməyini təklif etdi. Bu an Əbu Bəkr (r.a) Ömərə (r.a): «Sən mənə müxalif olmaq istəyirsən!»- dedi. Ömər (r.a) də ona: «Mən sənə müxalif olmaq istəmədim!»- deyə cavab verdi. Beləliklə onlar mübahisə edib səslərini qaldırdılar və bu ayə nazil oldu»:
ﭽ ﮎ ﮏ ﮐ ﮑ ﮒ ﮓ ﮔ ﮕ ﮖﮗ ﭼ الآية
«Ey iman gətirənlər! Heç bir şeydə Allahı və Onun Elçisini qabaqlamayın...»
Uca Allah buyurur:
ﭽ ﮠ ﮡ ﮢ ﮣ ﮤ ﮥ ﮦ ﮧ ﮨ ﮩ ﮪ ﮫ ﮬ ﮭ ﮮ ﮯ ﮰ ﮱ ﯓ ﯔ ﯕ ﯖ ﯗ ﭼ
«Ey iman gətirənlər! Səsinizi Peyğəmbərin səsindən yüksəyə qaldırmayın və bir-birinizə müraciət etdiyiniz kimi ona da uca səslə müraciət etməyin. Yoxsa, özünüz də hiss etmədən əməlləriniz hədər gedər».
(2-ci ayə)
Buxari «Səhih» əsərində (10-cu cild, səh. 212; 17-ci cild, səh. 39) demişdir: «İbn Əbi Muleykə belə demişdir: «Əbu Bəkr (r.a) və Ömər (r.a) kimi xeyirxah səhabələr az qala həlak olacaqdılar! Bənu Təmim qəbiləsindən olan bir dəstə Peyğəmbərin yanına gəldiyi zaman Əbu Bəkrlə (r.a) Ömər (r.a )(mübahisə edib) səslərini qaldırdılar. Onlardan biri Əqra' ibn Habisi (r.a), digəri isə başqa birisini onlara əmir təyin olunmasını Peyğəmbərə təklif etdi».
Nafi (əl-Cuməhi)207 deyir ki, ikincinin (yəni əmir təyin olunacaq digər səhabənin) adını yadımda saxlamamışam.
«Bu an Əbu Bəkr (r.a) Ömərə (r.a): «Sən mənə müxalif olmaq istəyirsən!»- dedi. Ömər (r.a) də ona: «Mən sənə müxalif olmaq istəmədim!»- deyə cavab verdi. Beləliklə onlar mübahisə edib səslərini qaldırdılar və bu ayə nazil oldu»:
ﭽ ﮠ ﮡ ﮢ ﮣ ﮤ ﮥ ﭼ الآية
«Ey iman gətirənlər! Səsinizi Peyğəmbərin səsindən yüksəyə qaldırmayın…» - ibn əz-Zubeyr (r.a) deyir ki, bu ayə nazil olduqdan sonra Ömər (r.a) Peyğəmbərdən soruşacağı məsələləri ona eşitdirə biləcək səslə soruşardı.
İbn əz-Zubeyr (r.a) babasının – yəni Əbu Bəkrin (r.a) – belə etdiyini qeyd etməmişdir.
Bu hədisi həmçinin Tirmizi «Sünən» əsərində (4-cü cild, səh. 185), Əhməd «Müsnəd» əsərində (4-cü cild, səh. 6) və Təbərani «Mucəm» əsərində (26-cı cild, səh. 119) rəvayət etmişlər.
İbn Həcər «Fəthul-Bari» əsərində (10-cu cild, səh. 212) demişdir: «Beləliklə hədisin isnadında olan bağlılıq (ibn Əbi Muleykənin bu hədisi bilavasitə ibn əz-Zubeyrdən rəvayət etməsi) məlum oldu».
Dostları ilə paylaş: |