23
FİZİKA DƏRSLƏRİNDƏ
TƏLİM METODLARININ DİDAKTİK SİSTEMİ
İxtiyari didaktik sistemə aşağıdakı elementlər daxildir:
təlimin məqsəd və vəzifələri,
təlimin məzmunu, təlimin üsul və vasitələri, təlimin təşkilinin formaları, təlim nəticələri.
Didaktika tarixində təlim metodlarının müxtəlif təsnifatı verilmişdir. Onlardan ən geniş
yayılanı yeni materialın qavranılmasında şagirdlərin təlim fəaliyyətinin xarakterinə əsaslanır.
Bu təsnifat 5 metoddan ibarətdir:
1) izahedici-illüstrativ metod;
2) reproduktiv metod;
3) təlim materialının problemli izahetmə metodu;
4) evristik metod;
5) tədqiqat metodu.
Sadalanan metodlar iki qrupa bölünür: 1) reproduktiv (1 və 2-ci metodlar) – şagirdlər
hazır bilikləri mənimsəyir və onları olduğu kimi istifadə (reproduksiya) edir; 2) produktiv (4
və 5) metodlar – şagirdlər yeni bilikləri yaradıcılıq fəaliyyəti nəticəsində əldə edirlər.
Problemli izahetmə metodu isə aralıq vəziyyətdədir: o həm hazır biliklərdən istifadəni, həm
də yaradıcılıq fəaliyyətinin elementlərini birləşdirir.
1. İzahedici-illüstrativ metod
Təlimin izahedici-illüstrativ (bəzən
informasiya-reseptiv metod da adlandırılır)
metodu
müəllimin hazır informasiyanı şagirdlərə müxtəlif təlim vasitələrinin köməyi ilə çatdırmasın-
dan, şagirdlərin isə həmin informasiyanı qavrayıb dərk edərək yadda saxlamasından ibarət-
dir
. Müəllimin rolu informasiyanın qavranılmasının, yaxud müxtəlif fəaliyyət formalarının
(məsələn, tapşırıq həlli, təcrübə aparılması və s.) təşkilindən ibarətdir. Şagird ona çatdırılan
informasiyanı qavrayıb anlayırsa, onu öz bilik və təsəvvürləri ilə əlaqələndirə bilirsə, bu
zaman biliyin mənimsənilməsindən danışmaq olar.
Müəllim informasiyanın çatdırılmasını şifahi izahatların (söhbət,
mühazirə, müzakirə),
çap (dərslik, müntəxəbat, sorğu və məlumat kitabı) və digər əyani tədris vasitələrinin
(nümayişlər, kino-, video-, diafilmlər, sxemlər, cədvəllər, plakatlar), fəaliyyət formalarının
nümayişi (laboratoriya işlərinin aparılması, tapşırıqların həlli, cavab planının tərtib edilməsi
və s.) vasitəsilə həyata keçirir.
İzahedici-illüstrativ metod biliklərin ötürülməsinin iqtisadi baxımdan ən qənaətcil
üsullarından biridir. Onun effektliliyi çoxəsrlik praktika ilə təsdiq edilmişdir.
Təlimin izahedici-illüstrativ metodundan fizika dərslərində daha
çox yeni mövzunun,
yaxud öyrənilmiş materialın yeni hissəsinin tədrisinə başladıqda, başqa sözlə, şagirdlərin
yeni materialı mənimsəmək üçün zəruri bilikləri olmadıqda istifadə edilir.
Əsas məktəbdə izahedici-illüstrativ metod həmişə digər metodlarla birlikdə istifadə
olunur.
Şagirdlərin yaş və psixoloji xüsusiyyətləri təlim materialının qavrama və mənimsəmə
keyfiyyətini artırmaq üçün fəaliyyət formalarının tez-tez dəyişməsini tələb edir. Yuxarı
siniflərdə yeni materialın şərhi mühazirə formasında aparılarsa, izahedici-illüstrativ
metoddan bütün dərs boyunca da istifadə etmək olar.
Beləliklə, izahedici-illüstrativ təlim metodu ən geniş yayılmış metodlardan sayılır. Son
illər təlimin məqsəd
və vəzifələri dəyişmiş, tərbiyəedici və inkişafetdirici vəzifələrə daha çox
üstünlük verilməyə başlanmışdır. Bununla əlaqədar nüfuzlu psixoloqlar informasiyanın
mənimsənilməsinin elə təşkil olunmasını təklif edirlər ki, şagirdlər təkcə biliyin özünü deyil,
24
onun strukturunu da qavramış olsunlar. Bu məqsədlə fiziki dünyagörüşün formalaşması
tarixinin və metodologiyasının şərh edilməsi böyük əhəmiyyət daşıyır.
2. Reproduktiv metod
Bu metoddan şagirdlərin bacarıq və vərdişlərinin formalaşdırılması üçün istifadə edilir.
O, biliyin təkrarlanmasına, onun nümunə üzrə müxtəlif situasiyalarda tətbiq edilməsinə
əsaslanır. Müəllim müxtəlif tapşırıq sistemi vasitəsilə biliklərin, onların tətbiqinin, yaxud fəa-
liyyət formalarının dəfələrlə təkrarlanmasını təşkil edir.
Metod yalnız şagirdin deyil, həmçinin müəllimin də təşkilati, həvəsləndirici fəaliyyətini
nəzərdə tutur. Burada şifahi izahatlardan, çap və əyani tədris vasitələrindən istifadə edilir.
Tədris prosesində,
bir qayda olaraq, reproduktiv metodla izahedici-illüstrativ metod
birlikdə istifadə olunur. Müəllim dərs boyunca yeni mövzunun bir hissəsində izahedici-illüs-
trativ metoddan, digər hissəsini isə nəzəri materialı reproduksiya etdirməklə möhkəmləndirir.
Hər iki metod şagirdlərdə bilik, bacarıq və vərdişlərin zənginləşdirilməsinə, əsas idraki
bacarıqların (müqayisə, analiz, sintez, ümumiləşdirmə və s.) formalaşdırılmasına xidmət edir.
Ancaq bu metodlar şagirdlərin yaradıcılıq bacarıqlarının inkişaf etdirilməsinə, yaradıcı
təfəkkürün planlı surətdə və məqsədyönlü olaraq formalaşdırılmasına yardım etmir. Bu
məqsəd üçün isə produktiv təlim metodlarından istifadə olunmalıdır.
3. Təlim materialının problemli izahetmə metodu
Təlim materialının problemli izahetmə metodunun mahiyyəti ondan ibarətdir ki, müəllim
təkcə informasiyanın çatdırılmasını təşkil etmir, həm də şagirdləri bu və ya digər problemin
həllinin axtarışına cəlb edir. Müəllim problemin həlli zamanı idrak prosesinin müxtəlif
mərhələlərində yaranan fikir ziddiyyətlərini nümayiş etdirir.
Başqa sözlə desək, müəllim problemi qoyur, onu özü həll edir,
yəni elmi təfəkkürü
nümayiş etdirir. Şagirdlər isə bu prosesin düzgünlüyünü və məntiqliyini müşahidə edir,
problemin həlli mərhələlərini öyrənirlər.
Orta məktəb fizika kursunda problemli izahetmə metodunun istifadəsi məqsədəuyğun
sayılan çoxlu nümunələr vardır. Məsələn, işığın təbiəti haqqında biliklər bir yanaşmadan
digərinə (işığın korpuskul nəzəriyyəsindən dalğa nəzəriyyəsinə) keçidi nümayiş etdirir. Fikir
ziddiyyətləri işığın korpuskulyar-dalğa dualizminin yaranmasına səbəb olmuşdur.
Beləliklə, problemli izahetmədə problem qoyulur, alimlərin
hipotezləri izah edilir,
müxtəlif fərziyyələr irəli sürülür və nəticələr çıxarılır. Texniki imkanı olan siniflərdə bu
nəticələri təsdiq edən təcrübələr qoymaq daha məqsədəuyğundur.
Nəticədə problemli izahetmə metodunun aşağıdakı quruluşu yaranır:
1) ziddiyyətlərin aşkar edilməsi və problemin qoyuluşu;
2) fərziyyələrin irəli sürülməsi;
3) həll planının tərtib edilməsi;
4) həll prosesi, həll zamanı yaranan və yaranması ehtimal olunan
çətinliklər,
ziddiyyətlər;
5) hipotezin düzgünlüyünün sübutu;
6) gələcək fəaliyyət sahələrinin inkişafında həllin əhəmiyyətinin şərhi.
Beləliklə, problemli izahetmə metodunun özünəməxsusluğu ondadır ki, şagirdlər infor-
masiyanı təkcə qavramırlar. Onlar fərziyyələrin doğruluğunu müəllimin izahını, mühakimə-
lərini və ya nümayiş təcrübələrini izləmədikdən sonra növbəti addımı proqnozlaşdırmağa
cəhd edilir. Beləliklə, şagirdlər əvvəlcə müəllimin fəaliyyətini müşahidə edir, sonra isə tədri-
cən ona qoşularaq birgə iştirak edirlər. Şagirdlər inkişaf etdikcə onların bu prosesdə
iştiraklarının səviyyəsi də tədricən artır.