"TRACECA" beynəlxalq nəqliyyat, kommunikasiya proqramı
Yanacaq enerji sahəsində beynəlxalq “INOGATE” proqramı
Avropa İttifaqının MDB dövlətlərinə texniki yardım TACİS layihələri
Transmilli Şirkətlər, investisya layihələri
1) Dünyada inteqrasiya prosesləri çərçivəsində müəyyənləşən bir çox beynəlxalq və regional proqramlar mövcuddur. Bu proqramlar və layihələr daxilində TRACECA, TACİS və İNOGATE beynəlxalq proqramları mövcuddur. «Yeni İpək Yolu» adlandırılan TRACECA proqramı Mərkəzi Asiya, Qafqaz və Avropa arasında nəqliyyat əlaqələrini inkişaf etdirən beynəlxalq proqramdır. TRACECA (Avropa-Qafqaz-Asiya nəqliyyat dəhlizi) Brüsseldə 3 may 1993-cü il tarixində keçirilmiş 8 təsisçi dövlətin (5 Mərkəzi Asiya və 3 Cənubi Qafqaz ölkələri) ticarət və nəqliyyat nazirlərinin Konfransında təsis olunmuşdur. Proqramın məqsədi bu dövlətlərin siyasi və iqtisadi müstəqilliyini dəstəkləməklə onların alternativ kommunikasiya nəqliyyat yolları vasitəsilə Avropa və dünya bazarlarına çıxış qabiliyyətini yüksəltmək və Avropadan Qara Dəniz və Qafqaz vasitəsilə Mərkəzi Asiyaya və əks istiqamətdə müasir infrastruktur nəqliyyat dəhlizinin yaradılmasından ibarətdir.
Sovet İttifaqının süqutu nəticəsində müstəqil dövlətlərin yaranması və onların dünya birliyi ilə əlaqələrinin bərpa olunmağa başlanması böyük bir coğrafi ərazidə yeni iqtsadi məkanın formalaşması prosesinə yol açmışdır.
Yeni iqtisadi məkan artıq bir tam şəklində yaranıb ümumdünya təsərrüfatı sisteminin tərkibi kimi formalaşır, onunla üzvi surətdə qaynayıb qarışmağa çalışır. Nəhəng nəqliyyat dəhlizi bu imkanlara yol açsa da, həmin tarixi prosesin gedişi əhəmiyyətli dərəcədə “görünməyən yollardan”, yəni kapitalın, əmtəələrin, işçi qüvvəsinin sərbəst hərəkəti və fəaliyyəti üçün əlverişli iqtisadi mühitin yaradılmasından asılıdır.
Azərbaycan Respublikasının TRACECA Proqramında iştirakı ölkəmiz üçün strateji əhəmiyyət kəsb edir və Azərbaycanın Avropa ilə iqtisadi əlaqələrinin möhkəmləndirilməsi və genişləndirilməsi, dünya iqtisadiyyatına inteqrasiyası və beynəlxalq nəqliyyat qovşağına çevrilməsi üçün böyük imkanlar yaradır. Avropa ilə Asiyanı birləşdirən ən qısa nəqliyyat marşrutlarının kəsişməsində əlverişli geostrateji mövqedə yerləşən Azərbaycanın nəqliyyat sektorunun inkişafı ölkəmiz üçün müstəsna əhəmiyyət kəsb etdiyini dərindən dərk edən Ümummilli lider Heydər Əliyevin təşəbbüsü ilə 7–8 sentyabr 1998-ci ildə Bakı şəhərində 9 ölkənin – Azərbaycan, Bolqarıstan, Gürcüstan, Qırğızıstan, Moldova, Rumıniya, Türkiyə, Özbəkistan, Ukrayna dövlət başçılarının və 13 beynəlxalq təşkilat və 32 dövlətin nümayəndə heyətinin iştirakı ilə Tarixi İpək Yolunun bərpasına həsr olunmuş beynəlxalq Konfrans keçirilmişdir. Avropa İttifaqı TRACECA Proqramı əsasında "Avropa-Qafqaz-Asiya dəhlizinin inkişafı üzrə beynəlxalq nəqliyyat haqqında Əsas Çoxtərəfli Saziş” imzalanmış və Bakı Bəyannaməsi qəbul edilmişdir. Saziş 12 dövlətin – Azərbaycanın, Gürcüstanın, Ermənistanın, Bolqarıstanın, Rumıniyanın, Moldovanın, Ukraynanın, Özbəkistanın, Qazaxıstanın, Qırğızıstanın, Tacikistanın və Türkiyənin dövlət və hökumət başçıları tərəfindən imzalanmışdır. Əsas çoxtərəfli sazişin müddəalarına uyğun olaraq, TRACECA Hökumətlərarası Komissiyasının Daimi Katibliyi yaradılmışdır. Daimi Katibliyin Bakı şəhərində yerləşdirilməsi qərara alınmış və 2001-ci ilin 21 fevral tarixində TRACECA Hökumətlərarası Komissiyasının Daimi Katibliyinin rəsmi açılışı baş tutmuşdur. Xarici İşlər Nazirliyi ilə TRACECA Hökumətlərarası Komissiyanın Daimi Katibliyi (HKDK) arasında həyata keçirilən sıx əməkdaşlıq nəticəsində, proqramın ölkəmizdə reallaşmasında mövcud olan əsas problemlər müəyyən edilir və onların həlli yolunda tədbirlər görülür. Bu əməkdaşlıq çərçivəsində XİN-in rəhbərliyi ilə TRACECA Daimi Katibliyinin nümayəndələri arasında mütəmadi olaraq görüşlər keçirilir, XİN-in ekspertləri TRACECA İşçi Qruplarının işində fəal iştirak edirdi, XİN-in təşkilatçılığı ilə keçirilən tədbirlərə TRACECA nümayəndələri dəvət olunurdu. Avropa İttifaqı tərəfindən Proqramın reallaşdığı dövr ərzində Azərbaycan Respublikasına investisiya layihələrinin maliyyələşdirilməsi üçün təxminən 14 milyon Avro həcmində vəsait ayrılmışdır. Bu dövrdə respublikamızda TRACECA Proqramı çərçivəsində Əsas Çoxtərəfli Sazişin şərtlərinin həyata keçirilməsi məqsədilə nəqliyyat infrastrukturunun inkişafı istiqamətində mühüm işlər görülmüşdür. Belə ki, TRACECA nəqliyyat dəhlizi üzrə yük axınının artırılması üçün son illər ərzində nəqliyyat sektorunun texniki təchizatının yaxşılaşdırılması sahəsində bir sıra tədbirlər görülmüş, avtomobil magistrallarının, dəmir yolu xətlərinin və körpülərin bərpası və tikintisi, dəmir yolu nəqliyyatı vasitələrinin, gəmilərin, bərələrin, liman qurğularının təmiri üzrə müəyyən işlər görülmüşdür. Bakı şəhərində ildə 10 milyon ton neft məhsullarının boşaldılıb yüklənməsinə imkan verən neft boşaltma limanı istifadəyə verilmişdir. Bakı Beynəlxalq Ticarət Limanının bərə terminalında yenidənqurma işləri başlanmışdır. TRACECA Proqramının bu layihələrinin həyata keçirilməsi məqsədilə Azərbaycan Respublikasına dünyanın müxtəlif maliyyə institutlarından (Avropa Yenidənqurma və İnkişaf Bankı, Küveyt İqtisadi İnkişaf Fondu, İslam İnkişaf Bankı, Dünya Bankı və s.) 255 milyon ABŞ dolları həcmində kreditlər ayırmışdır.
– Əsas Çoxtərəfli Sazişin Depozitoru funksiyalarını yerinə yetirərək Xarici İşlər Nazirliyi üzv dövlətlərlə Sazişin işi ilə bağlı yazışma aparır, iştirakçıları Sazişə aidiyyəti olan sənədlər, məlumatlar və bildirişlər haqqında xəbər verirdi
– Ölkəmizin digər dövlətlərlə və beynəlxalq təşkilatlarla münasibətlərdə təmsil etmə funksiyasını həyata keçirən Xarici İşlər Nazirliyi tərəfindən TRACECA Proqramının inkişaf etdirilməsi ilə bağlı məsələlər dövlətin xarici siyasətinin prioritet istiqamətlərindən biri kimi əsas tutulurdu, aparılan görüşlər və danışıqlar zamanı, ikitərəfli əlaqələr səviyyəsində və beynəlxalq təşkilatlar çərçivəsində TRACECA-nın maraqlarının müdafiə edilməsi istiqamətində iş aparılırdı, Avropa-Qafqaz-Asiya nəqliyyat dəhlizinin fəaliyyətinin yaxşılaşdırılmasına yönəlmiş təkliflər irəli sürülürdü. Azərbaycan Respublikasında və Əsas Çoxtərəfli Sazişin üzv-dövlətlərində TRACECA nəqliyyat dəhlizinin cəlbediciliyinin artırılması istiqamətində görülən işlərin nəticəsində gözə çarpan nailiyyətlər əldə edilmişdi, marşrut üzrə yük daşımalarının həcmi xeyli artmışdır.
Azərbaycan özünün əlverişli strateji mövqeyi ilə bu iqtisadi məkanın mərkəzində, Qərblə Şərqin kəsişmə nöqtəsində yerləşmişdir. İki qitə arasında yaradılan nəhəng kommunikasiya qurğularının respublika ərazisindən keçməsi onun strateji rolunu daha da artırmışdır. Respublikamızda nüfuz dairəsi uğrunda dünyanın aparıcı dövlətlərinin rəqabət mübarizəsi, yalnız mövcud olan zəngin təbii sərvətlərlə deyil, həmçinin əhəmiyyətli dərəcədə kommunkasiya, nəqliyyat sistemi ilə əlaqədardır.
Yaranan yeni iqtisadi məkanda beynəlxalq ticarət, beynəlxalq kapital və maliyə axınları sürətlə genişlənməyə başlamışdır. TRACECA proqramı üzrə ümumdünya əhəmiyyətinə malik olan nəhəng layihələrin həyata keçirilməsi inteqrasiya prosesini daha da sürətləndirir. Böyük perspektivə malik iş imkanlarının açılması yaxın gələcəkdə yeni iqtisadi məkanda yeni beynəlxalq maliyyə mərkəzinin yaranacağı imkanını xeyli artırmışdır.
8 sentyabr 1998-ci ildə Bakıda Azərbaycan və Gürcüstan prezidentlərinin təşəbbüsü və Aİ-nın TACİS-TRACECA proqramının dəstəyi ilə “Tarixi İpək Yolunun bərpası” adlı beynəlxalq konfrans keçirilmişdir. 32 ölkə və 12 beynəlxalq təşkilat nümayəndələri bu konfransda iştirak etmişlər. Konfransda əldə edilmiş ən mühüm nailiyyət Azərbaycan, Ermənistan, Gürcüstan, Qazaxıstan, Qırğızıstan, Tacikistan, Özbəkistan, Türkiyə, Ukrayna, Moldova, Rumıniya və Bolqarıstanın “Avropa-Qafqaz-Asiya Nəqliyyat Koridorunun inkişafı üçün əsas Beynəlxalq Nəqliyyat çoxtərəfli Müqavilə” (Əsas razılaşma) və Əsas Razılaşmanın əsasında beynəxalq dəmiryolu nəqliyyatı olan Texniki Əlavə sənədlər qəbul edilmişdir.
2) INOGATE beynəlxalq layihə Avropaya Neft və Qaz nəqliyyatı üzrə (İNOQEYT) enerji proqramıdır. Proqramın məqsədi neft və qaz kəmərləri sistemlərinin vasitəsi ilə regional inteqrasiyanı təmin etmək və iştirakçı dövlətlərin nəqlini dəstəkləməkdir. Proqram özəl sərmayəçiləri və beynəlxalq maliyyə təşkilatlarını bu kəmərlər vasitəsilə yanacaq, enerji layihələrinin həyata keçirilməsində əsas rol oynayır.
INOGATE (Avropaya dövlətlərarası neft və qaz nəqliyyatı) proqramı, keçmiş SSRİ-nin Yeni Müstəqil Dövlətləri üçün Avropa Birliyinin texniki yardım proqramı daxilində bir regional təşəbbüsdür.
İNOGATE regional neft və təbii qaz məhsullarının Xəzər və Orta Asiya bölgələrindən Avropa və qərb bazarlarına karbohidrogen məhsullarının daşınması üçün texniki enerji layihəsidir.
İNOGATE razılaşmasını imzalayan 21 ölkə olmasına baxmayaraq 50-yə yaxın ölkə də bu əməkdaşlığa qoşulmuşdur. Bu ölkələr Xəzər və Orta Asiya bölgəsində çıxarılan neft və təbii qazın müxtəlif boru kəmərləri ilə Avropa bazarına çatdırılması barədə razılıq vermişlər. Beynəlxalq layihənin əsas təyinatı təbii qazın və neftin boru xətləri vasitəsilə regionun yanacaq- enerji təminatını və enerji təhlükəsizliyinin təmin edilməsidir.
AYB, AİKB və Dünya Bankı bu proqrama maliyyə dəstəyini təmin edən əsas müəssisələrdir. 1991-ci ildə Azərbaycan Respublikası müstəqillik qazandıqdan sonra Avropa İttifaqı Azərbaycan iqtisadiyyatına yardım göstərən əsas donorlardan biri olmuşdur. Azərbaycanda INOGATE proqramı çərçivəsində Şirvanovka və Qazax qaz paylayıcı sistemləri qurulmuşdur.
Proqramın məqsədi regionda neft və qaz boru kəmərləri sistemlərinin və infrastrukturun bərpa edilməsi və müasirləşdirilməsi üzrə bu ölkələrə kömək göstərilməsindən ibarətdir.
INOGATE çərçivəsində həyata keçirilən texniki əməkdaşlığa əlavə olaraq, Aİ zəngin təbii ehtiyatlara və strateji coğrafi əraziyə malik olan Şərqi Avropa, Qafqaz və Mərkəzi Asiya ölkələrinin enerji təminatını və tranzit potensialının səmərəli istifadəsinə yönəlmiş fəaliyyətində Avropaya daxil olan ölkələr və bütün tərəfdaşların dəstəyi ilə enerji əməkdaşlığı prosesini genişləndirməkdədir. 13 noyabr 2004-cü ildə Bakıda Enerji Nazirliklərinin Konfransında Aİ, Qara dəniz və Xəzər dənizi hövzəsi ölkələri arasında enerji sahəsində əməkdaşlığını gücləndirmək məqsədi daşıyan siyasi dialoq aparılmışdır.
1999-cu ilin iyul ayında 15 dövlətin iştirakı ilə imzalanan dövlətlərarası neft və qaz ixracını nəzərdə tutan Avropa İttifaqının Çərçivə Sazişi İNOGATE-nin əsas hüquqi bazasını təşkil etmişdir. Proqramın 1-ci fazası ümumi məbləği 50 milyon avrodan artıq olan 10 layihənin həyata keçirilməsini nəzərdə tuturdu və bu layihələrdən beşi bilavasitə Azərbaycanla əlaqədardır. INOGATE çərçivəsində yeni müstəqil dövlətlər və Azərbaycan daxil olmaqla trans-sərhəd layihələrinin həyata keçirilməsi üçün yeni perspektivlər yaradır və hidrokarbon mənbələrinin tranziti ilə bağlı beynəlxalq razılaşmaların üstünlükləri əsasında beynəlxalq maliyyə institutları və xüsusi investisiya fondları tərəfindən investisiyanın cəlb edilməsi məqsədləri üçün vacib rol oynayır. INOGATE-nin məqsədi neft və qaz kəmərləri sistemlərinin vasitəsilə regional inteqrasiyasını təmin etmək və onların nəqlini dəstəkləməkdir. Proqram özəl sərmayəçiləri və beynəlxalq maliyyə təşkilatlarını bu kəmərlər üzrə layihələrin həyata keçirilməsinə cəlb etmək üçün beynəlxalq katalizator rolunu oynayır.
3) Azərbaycanın xarici siyasətinin əsas istiqamətlərindən birini Avropa İttifaqı ilə əməkdaşlıq təşkil edir. Azərbaycanın iqtisadi durumu və strateji mövqeyi Avropa İttifaqı üzv dövlətlərinin Azərbaycanla siyasi və iqtisadi münasibətləri inkişaf etdirmək marağını artırır.
Müstəqil Dövlətlər Birliyinə Texniki Kömək - TACIS Avropa Komissiyasının Müstəqil Dövlətlər Birliyi üzv ölkələrə, demokratik bazar mərkəzli iqtisadi sistemə uyğunlaşmanı təmin edə bilmələri üçün etdiyi qrant və texniki yardım proqramıdır. Daha sonralar Monqolustan da yardım proqramına daxil edilmiş və proqram Avropa Yardım və İş Birliyi Ofisinin tərkibinə qatılmışdır.
1990-cı il dekabr ayında Romada keçirilən Avropa Birliyinin Zirvə toplantısında, keçmiş Sovet respublikalarını iqtisadi, texniki cəhətdən dəstəkləmək üçün qərar verildi və Avropa Birliyi dəstəyinin bir beynəlxalq texniki yardım proqramlarının reallaşdırılması qərarlaşdırıldı. Bu yığıncaq TACIS (Technical Assistance to the Commonwealth of Independent States – Müstəqil Dövlətlər Birliyinə Texniki Kömək) Proqramının başlanğıc mərhələsini reallaşdırmışdır. TACIS, Sovetlər Birliyi dağıldıqdan sonra yaranan 12 müstəqil dövlətin və Monqolustanın siyasi və iqtisadi quruculuq prosesini dəstəkləmək üçün 1991-ci ildən bəri icra edilməkdə olan beynəlxalq proqramdır. Proqramın üç əsas hədəfi vardır:
Bu dövlətlərin bazar iqtisadiyyatı və demokratiyaya keçiddə yardım göstərilməsi;
Əməkdaşlıq səviyyədə tərəfdaşlığı və ikili əlaqələrin inkişaf etdirilməsi;
Beynəlxalq inkişaf proqram üzrə MDB ölkələrinin dünya iqtisadiyyatına inteqrasiyası;
1991–1996-cı illərdə proqram çərçivəsində bu ölkələrə 3 milyard 390 milyon avro məbləğində yardım edilmiş və 2500-dən çox layihənin reallaşması təmin edilmişdir.
TACIS proqramı Avropa İttifaqının MDB dövlətlərinə texniki yardım proqramıdır. Aİ-nın TACIS proqramı çərçivəsində müvafiq texniki və ekspert köməyi vasitəsilə Azərbaycanda aparılan iqtisadi islahatlara dəstəkdir. TACIS proqramı (MDB ölkələrinə texniki yardım) 12 keçmiş Sovet İttifaqı dövləti və Monqolustana texniki yardım dəstəyini təmin etmək üçün 1991-ci ildə AS tərəfindən qəbul edilmişdir. TACIS proqramının Azərbaycanla bağlı hissəsində əməkdaşlığın üç əsas istiqamətinə üstünlük verilir: infrastruktur, özəl sektor və insan resurslarının inkişafı. TACIS-in Azərbaycanla əlaqədar əsas çoxtərəfli şəbəkə layihələri TRACECA və INOGATE-dir.
İnteqrasiya prosesində Avropa İttifaqı və tərəfdaş ölkələr arasında genişlənən əlaqələr çərçivəsində Tərəfdaşlıq və Əməkdaşlıq Sazişi imzalanmışdır. On Şərqi Avropa və Mərkəzi Asiya ölkəsi Tərəfdaşlıq və əməkdaşlıq Sazişinə qoşulmuşdur. TƏS çərçivəsində Avropa İttifaqı və partnyor ölkə tərəfindən imzalanmış və ratifikasiya olunmuş sazişdir. Belə saziş 22 aprel 1996-cı ildə imzalanmış, 8 oktyabr 1996-cı ildə isə Azərbaycan tərəfindən təsdiq edilmiş, 1 iyul 1999-cu ildə qüvvəyə minmişdir.
18 may 2004-cü ildə Aİ-nin on yeni üzv dövlətinin Avropa İttifaqı və Azərbaycan Respublikası arasında Tərəfdaşlıq və Əməkdaşlıq Sazişə qoşulmasına dair protokolun imzalanmasından sonra əsas məqsədlər müəyyənləşdirilmişdir.
Texniki Yardım proqramı olan TACIS Yeni Müstəqil Dövlətləri və Monqolustan üzrə Avropa İttifaqının proqramıdır. Beynəlxalq TACIS proqramı Avropa İttifaqı və tərəfdaş ölkələri arasında iqtisadi və siyasi əlaqələrin inkişafına təşviq edir.
TACIS proqramının reallaşması bazar iqtisadiyyatına və demokratiyaya keçid prosesini dəstəkləmək üçün qrant təmin edir. 1991-ci ildə texniki yardım proqramı kimi bağlanmış proqramın çərçivəsində 116,5 milyon avro dəyərində vəsait ayrılmışdır. TACIS layihələri Tərəfdaşlıq və Əməkdaşlıq Sazişləri əsasında əməkdaşlıq proqramlarına çevrilmişdir.
TACİS proqramının maliyyələşdirdiyi vacib layihələrdən biri də TEMPUS proqramıdır. TEMPUS yeni müstəqillik qazanmış ölkələrə ali təhsil sahəsində yardım göstərilməsi üzrə əməkdaşlıq proqramıdır. Avropa Birliyi dövlətlərinin hər biri ilə ayrı-ayrılıqda maliyyələşdirilən TEMPUS proqramının reallaşdırılmasında məqsəd Avropa ali təhsil sistemi çərçivəsində müstəqillik əldə edən ölkələrlə iş birliyinə nail olmaqdır, Avropa təhsil sisteminə inteqrasiya etməkdir.
Dünya təsərrüfatının müasir inkişaf mərhələsində ölkələrin iqtisadi artım templərinin sürətlənməsində birbaşa xarici investisiyaların rolu danılmazdır. Aydındır ki, birbaşa xarici investisiyalar ayrı-ayrı ölkələr üçün xarici dövlət borcu yaratmır və əksinə olaraq onun örtülməsi üçün əlavə vəsait mənbələri yaradır, istehsal və elmi-texniki kooperasiya vasitəsilə milli iqtisadiyyatların beynəlxalq təsərrüfata aktiv inteqrasiyasına münbit şərait yaradır. Ölkələr arasında birbaşa xarici investisiyaların həyata keçirilməsi nəticəsində müasir dünya iqtisadiyyatında transmilliləşmə prosesini meydana çıxaran iri transmilli şirkətlər – TMK-lar yaradılır. Transmilliləşmə prosesini meydana çıxaran TMK-lar dünya təsərrüfatında yeni gün mənbələri olmaqla, həm də beynəlmiləlləşmə prosesinin əsas aparıcı qüvvəsidir. Belə ki, müasir xarici iqtisadi fəaliyyətdə artıq ticarət deyil, mal və xidmətlərin istehsal və satışının bilavasitə xaricdə təşkil edilməsi dominant prosesdir. Bu üsulla həyata keçirilən satış əməliyyatlarının həcmi ixrac əməliyyatlarının həcmini qabaqlayır, ümumdünya ixracatının özü isə tədricən TMK-ın müxtəlif şöbələri arasında aparılan firmadaxili ticarətə çevrilməkdədir. Bütün bunlardan belə bir nəticə çıxarmaq olar ki, TMK fəaliyyəti nəticəsində dünya təsərrüfatı beynəlmiləlləşərək vahid mal, xidmət, kapital, işçi qüvvəsi bazarına çevrilir. TMK-lar xarici ölkələrin iqtisadi resurslarına birbaşa çıxış imkanı əldə edir və öz kapitalı, istehsal birlikləri və sahibkarlaq bacarığını istehsalata cəlb edərək dünya səviyyəsində effektiv istehsal və satış şəbəkəsi yaradırlar. Dövlət və transmilli kapital arasında olan “mübarizə” yenə davam edəcəkdir. Əhali isə yaşadığı regiondan asılı olmayacaq, bir istehlakçı kimi transmilli korporasiyalara və onların istehsal etdikləri əmtəələrə üstünlük verəcəkdir. Buna səbəb isə transmilli korporasiyaların daha aşağı qiymətə keyfiyyətli əmtəə təklif etməsi olacaqdır. Həmçinin dövlətlərin iqtisadi siyasəti yerli istehsalçıları qorumağa, onların inkişafına yardımçı olan bir proteksionist siyasət olacaqdır. Həm dövlətlər, həm də transmilli korporasiyalar öz mənafeyinə uyğun milli hökumətlərdən də üstün olan tənzimləmə orqanlarının yaradılmasında maraqlı olacaqlar. Milli dövlətlərin fövqəldövlət tənzimləməsinin mövcudluğuna meylli olmalarının ən əsas səbəbi dövlətləri bəzən onların maraqlarına zidd olan transmilli kapitalın tənzimlənməsinə, nəzarət altında saxlanılmasına və onun sərbəst hərəkət etməsinə təsir göstərilməsinə səy göstərilməsi hesab edilir. Milli hökumətlər transmilli korporasiyaların qarşısında maneələr törətdiklərindən, transmilli kapitalın sərbəst hərəkətinə öz maraqlarına uyğun təsir edəcəklərindən transmilli korporasiyalar fövqəldövlət tənzimlənilməsi orqanlarına meylli olacaqdırlar. Onlara sərf edən ÜTT, BVF və bu kimi qurumların daha çox mövcud olmasıdır. İki güclü rəqib olan transmilli korporasiya və dövlət arasındakı mübarizə kompromis qərarlar seriyası ilə də müşayiət olunacaqdır. Yeni informasiya texnologiyalarının meydana gəlməsi isə transmilli korporasiyaların strategiyasını və eləcə də təşkil olunmasını köklü şəkildə dəyişdirəcəkdir. Transmilli korporasiyaların istehsal bölmələri getdikcə genişlənəcək və ucuz, həm də ixtisaslaşmış işçi qüvvəsinin olduğu ölkələrə hərəkət edəcəkdir. Həmçinin transmilli korporasiyaların digər hissələrində də köklü olaraq dəyişikliklər baş verəcəkdir. Beynəlxalq maliyyə mühiti dedikdə, beynəlxalq biznesin fəaliyyəti üçün zəruri olan dünya maliyyə bazarlarının yaranması və inkişafı şərtlərini müəyyən edən şərait nəzərdə tutulur. Beynəlxalq maliyyə bazarları, beynəlxalq bank sistemi və beynəlxalq investisiyalarının idarə olunması şəbəkəsi, yəni kapital bazarı onun mühüm tərkib hissələri, milli və beynəlxalq maliyyə qurumları isə onun əsas iştirakçılarıdır.
NƏTİCƏ
Bakı Slavyan Universitetinin “Azərbaycan tarixi və ictimai elmlər” kafedrasının dosenti Ə.Ə.Əmirov tərəfindən hazırlanmış “Müasir beynəlxalq və regional inteqrasiya prosesləri” dərs vəsaiti Beynəlxalq münasibətlər və regionşünaslıq fakültəsinin bakalavr hazırlığı üzrə beynəlxalq münasibətlər və regionşünaslıq ixtisası kurslarında təhsil alan tələbələr üçün kursun tədrisinə həsr olunmuşdur. “Müasir və regional inteqrasiya prosesləri” kursunun tədrisi 60 saat həcmində nəzərdə tutulmaqla, onlardan 30 saat mühazirə, 30 saat isə seminar məşğələsindən ibarətdir. Beynəlxalq münasibətlər və regionşünaslıq fakültəsinin tələbələrinə “Müasir beynəlxalq regional inteqrasiya prosesləri” kursunun tədrisi və digər məsələlər haqqında hərtərəfli bilik alınmasına və öyrənilməsinə yardım edəcəkdir. Tədris prosesini mövzu üzrə mövcud ədəbiyyat, əyani vəsaitlər, internet materialları və istifadəsi mümkün olan digər vasitələr əsasında həyata keçirmək nəzərdə tutulur.
Müasir beynəlxalq regional inteqrasiya prosesləri fənni üzrə dərs vəsaiti inteqrasiya proseslərinin öyrənilməsinə həsr olunub. Dərs vəsaitində inteqrasiyanın sosial, siyasi, iqtisadi əsasları, tarixi səbəbləri nəzərdən keçirilir. Bu proseslərin səbəbləri, əlamətləri, cəhətləri, regional və beynəlxalq inteqrasiyanın mahiyyəti açıqlanır. İnteqrasiya proseslərinin dünya dövlətlərinin milli iqtisadiyyatlarının inkişafına təsiri araşdırılır. Dərs vəsaitində müasir beynəlxalq, regional inteqrasiyaya nəzəri yanaşmalar göstərilir, inteqrasiya konsepsiyaları təhlil edilir.
İnteqrasiya proseslərinin inkişaf mərhələləri, əsas formaları və əməkdaşlıq növləri dərs vəsaitində əsas yer tutur. Bu səpkidə müasir beynəlxalq, regional inteqrasiyanın xüsusiyyətləri, tipləri vacib məsələlər kimi oxucuya çatdırılır.
Dərs vəsaitində vacib yer dünya məkanında regionlar üzrə inteqrasiya proseslərinin təşəkkülünə, yaranan birliklərin, ittifaqların quruluşuna, formalarına, fəaliyyət istiqamətlərinə verilir və bu proseslərin əhəmiyyəti işıqlandırılır. Bu inteqrasiya qurumları və birlikləri daxilində əməkdaşlıq forma və növlərinin sosial-iqtisadi nəticələri qeyd olunur. Qloballaşan dövrdə beynəlxalq və regional inteqrasiya birləşən dövlətlərə dünya miqyasında daha yüksək rəqabət bacarığını təmin edir.
Müasir beynəlxalq regional inteqrasiya prosesləri mövzusunda təqdim olunmuş dərs vəsaiti bakalavr və magistr tələbələri, bu sahə üzrə mütəxəssislər üçün dəyərli bir vasitədir.
Dostları ilə paylaş: |