Gülüstan müqaviləsi
23
6-cı maddədə qeyd olunurdu ki, şahın öz piyada qoşunlarının, top-
larının, hərbi istehkam xidmətinin Avropa üslubunda qurulması xahişinə
əsasən Fransa imperatoru şah qoşunları üçün səhra topları, süngülü
tüfənglər hazırlamağı və həmin silahların Avropa qiymətləri ilə satılma-
sını öz üzərinə götürür. 7-ci maddədə təsbit olunmuşdu ki, şah öz qoşun-
larının yenidən qurulması, piyadaların təkmilləşdirilməsi, artilleriyanın
yaradılması və istehkam xidmətinin sahmana salınması üçün nə qədər
Fransa zabitinə ehtiyacı olsa, Fransa tərəfi həmin zabitləri göndərəcək-
dir. Anlaşmanın 9-cu maddəsində də şah sarayına köməklər göstəriləcəyi
ilə bağlı öhdəliklər var idi. Bu maddədə bildirilirdi ki, İngiltərə və Rusiya
Fransa ilə İrana qarşı hansı ittifaqa girməli olsalar, Fransa ilə İran da
həmin ittifaqa qarşı oxşar ittifaq yaradacaqlar. Eyni zamanda Fransa və
ya İranın ayrılıqda təhlükəyə məruz qaldığı vaxt onlar bir-birinə məlumat
verməli və düşmənə qarşı birgə mübarizə aparılmalı idi (53).
Anlaşmanın digər maddələrində isə İranın Fransa qarşısındakı
öhdəlikləri təsbit olunmuşdu. 8-ci maddəyə əsasən şah sarayı İngiltərə ilə
bütün siyasi və ticarət əlaqələrini kəsməli, tezliklə İngiltərəyə qarşı
müharibə elan edilməli və bu dövlətlərin dostluq münasibətlərinə son
qoyulmalı idi. Şah sarayı eyni zamanda Hindistana göndərdiyi elçisini
geri çağırmalı, Fars körfəzi limanlarındakı ingilis şirkətlərinin
fəaliyyətinə son qoymalı, ingilislərlə istər dəniz vasitəsilə, istərsə də quru
vasitəsilə olan əlaqələr dayandırılmalı və İngiltərənin hər hansı bir
səfirini qəbul etməməli idi. 10-cu maddəyə əsasən şah sarayı əfqanları və
Qəndəhar əhalisini ingilislərə qarşı müharibəyə səfərbər etməyə çalışmalı
idi. 11-ci maddəyə əsasən Fransa donanmasının gəmiləri İran limanlarına
yaxınlaşdığı halda onların qəbuluna lazımi şərait yaradılmalı idi. 12-ci
maddəyə əsasən isə şah öhdəsinə götürməli idi ki, Fransa qoşunları quru
ilə Hindistana hücum etməyi qərara aldığı təqdirdə bu ölkənin
qoşunlarının İran ərazisindən keçməsinə şərait yaratsın və Fransa
qoşunlarına lazımi köməklik göstərsin (54).
Toxunulan maddələr, anlaşma ilə tərəflərin üzərinə qoyulan
öhdəliklərin əsas məzmununu özündə əks etdirirdi. Şahın məqsədi
Rusiyanı Cənubi Qafqazdan sıxışdıraraq bu bölgəni öz nəzarəti altına
almaq idisə, Fransanın da məqsədi İrana qarşı müəyyən güzəştlərə
getməklə bu ölkə üzərindən Hindistana hücum icazəsini almaq idi. Şah
sarayı Gürcüstanın və Cənubi Qafqazın digər işğal olunmuş ərazilərindən
Rusiyanın sıxışdırılması üçün İngiltərəyə qarşı müharibə elan etməyi,
Fransa qoşunlarının İran üzərindən Hindistana yürüş etməsinə şərait
yaradılmasını öz üzərinə götürürdü. Ən başlıcası isə Fətəli şah Napoleon
kimi qüdrətli bir imperator və sərkərdə ilə ittifaqa girirdi. Bu məsələnin
Mehman Süleymanov
24
psixoloji tərəfi də şah üçün çox əhəmiyyətli idi.
Çünki bu ittifaq qərb
ölkələrində, o cümlədən də Rusiyada müəyyən bir narahatlıq yaratmaya
bilməzdi.
Fransa tərəfi eyni zamanda şah qoşunlarının yenidən qurulmasına
kömək göstərilməsini öz üzərinə götürürdü. Bu məsələdə Fransa özü də
kifayət qədər maraqlı idi. Çünki güclü şah qoşunları Fransanın böyük
düşməni olan Rusiyanın zəiflədilməsində müəyyən rol oynaya bilərdi.
Əvəzində isə Fransa gələcək böyük fəthləri üçün özünə zəmin yaratmış
oldu. Rusiyanın zəifləməsi isə Fransanın istər Avropa, istərsə də Asiya
siyasətinin çətinliklərini aradan qaldıra bilərdi. Napoleon Fransanın
xarici işlər naziri Taleyrana belə yazırdı: "Siz bilirsiniz ki, mən İranla itti-
faqa nə qədər meylliyəm....Siz səfirlə söhbət edin (şahın səfiri nəzərdə
tutulur-red.) və ona deyin ki, mən 10-12 min İran sərbazından ibarət bir
korpusun təşkili üçün lazım olan qədər zabiti o ölkəyə göndərərəm. Bu
korpus iki ay ərzində Rusiya ilə döyüşə hazır olacaqdır" (54a). Onun
sözlərinə görə Tehrana göndəriləcək Fransa hərbi heyəti üç aydan sonra
Rusiya və İngiltərəni də heyrətə gətirəcəkdi.
3. General Qardanın İran missiyası
Fransa ilə Qacar sarayı arasında aparılan danışıqların və imzalanan
müqavilənin ilk əməli nəticələrindən biri bu oldu ki,
Napoleon general
Qaranın rəhbərliyi altında İrana hərbi nümayəndə heyəti göndərməyə razı
oldu. Şah qoşunlarının qısa müddət ərzində yeni tələblər üzərində
qurulması üçün Qacar sarayının belə bir heyətin göndərilməsinə ehtiyacı
var idi. Həm Fətəli şah, həm də Abbas Mirzə şah qoşunlarının yenidən
qurulmasının zəruriliyini qəbul edirdilər və Fransa ilə formalaşmaqda
olan münasibətlər bu istiqamətdə yeni imkanlar aça bilərdi.
General Qardan Fransa imperatorunun etibar etdiyi şəxslərdən biri idi
və Napoleonun şərq siyasətinin həyata keçirilməsində onun təcrübəsinə
müəyyən ümidlər bağlanılırdı. Şərqlə tanış olduğu bildirilən general Klod
Metyu Kent Qardan 1766-cı ildə anadan olmuşdu. Gənc yaşlarında hərbi
xidmətə qoşulmuş və Fransa inqilabından əvvəl piyada qoşunları üzrə
kapitan rütbəsi almışdı. Tarixi məlumatlara görə, 1792-ci ildən etibarən
onun daha fəal hərbi həyatı başlandı və 1799-cu ildə general rütbəsinə la-
yiq görüldü. 1804-cü ildə general Qardan Fransa imperatorunun
mühafizə dəstəsinin rəisi təyin edildi. 1805-ci ildən etibarən isə o,
Napoleonun adyutantı oldu. Qardanın əcdadlarından biri şərq ölkələrində
Fransa konsulu vəzifəsini yerinə yetirmişdi. Ona görə də şərq
limanlarında bu adı hələ də xatırlayanlar var idi (55).