20
Nəzəri cəhətdən o da aydındır ki, təhlil üçün götürülmüş hesabat dövrlərinin sayı çox
olduqda təhlilin nəticələri daha obyektiv və inandırıcı olur. Başqa sözlə, dinamika
sıraları nə qədər dərin və çoxşaxəli olarsa təhlilin səmərəliliyi də bir o qədər yüksək
olar. Təcrübədə, bəzi hallarda auditor müxtəlif hesabat dövrlərinin məlumatlarının
müqayisəsi zamanı nəzərə alınması vacib olan makroiqtisadi göstəricilərlə rastlaşır və
onların nəzərə alınması kompleks təhlilə subyektivizm elementlərinin daxil olmasını
labüd edir. Ona görə də nəzəri ədəbiyyatlarda hesabat dövrlərinin sayı və təhlilə cəlb
ediləcək informasiyanın miqdarı haqqında məsələnin həllinin professional
hissiyyatdan və auditorun ixtisas səviyyəsindən asılı olduğu xüsusi vurğulanır. Qeyd
etmək lazımdır ki, hazırda təsərrüfat subyektlərinin auditi zamanı auditor tərəfindən
sifarişçinin «maliyyə-təsərrüfat tarixi»nin təhlilinin dərinləşdirilməsi və ona daha çox
maraq göstərməsi auditin keyfiyyətini yüksəltmir və bəzi hallarda onun səmərəliliyini
aşağı salır. Çünki, hüquqi cəhətdən ölkə müəssisələrinin «tarixi»nin 5-6 ildən artıq
olmaması və həmin dövrlərdə xeyli makroiqtisadi sarsıntıların baş verməsi onların
müqayisə edilməsi, uçotu və təhlili işlərinin «əsassız yaradıcılığı» çevirir. Fikrimizcə,
analitik proseduralar üçün auditorun sərəncamında iki illik mühasibat balansı və
maliyyə nəticələri haqqında hesabat forması olduqda, belə bir vəziyyət optimal
variant hesab edilə bilər.
IV. Qərarların qəbul olunması üçün meyarların müəyyən edilməsi; Təcrübədən
məlumdur ki, auditor kompleks təhlil zamanı maliyyə hesabatlarının göstəricilərinə
əsasən hesablanmış müxtəlif əmsalların dünya və ölkə təcrübəsində qəbul edilmiş
normativ kəmiyyətlərinə istinad edir. audit aparılan dövrün faktiki göstəricisi ilə
auditor prosedurasının həyata keçirilməsinin ikinci mərhələsində müqayisə üçün
seçilmiş baza göstəricisi arasında kritik fərq bu məsələnin həllində əsas istiqamət
hesab olunur. Bundan başqa, auditor tərəfindən maliyyə hesabatının hər bir maddəsi
üçün müəyyən edilən mütləq göstərici də müqayisə üçün baza rolunu oynaya bilər.
Ona görə də, bazar münasibətləri şəraitində auditor tərəfindən müqayisə bazası kimi
seçilmiş kritik fərq və ya mütləq kəmiyyətin artması audit aparılan obyektin müfəssəl
testləşdirilməsi haqqında qərarın qəbul edilməsi üçün əsas şərt sayılır.
21
V. Auditor proseduralarının yerinə yetirilməsi və nəticələrin ümumiləşdirilməsi;
Aydındır ki, bu mərhələnin mahiyyətini iqtisadi təhlil, onun nəticələrinin şərhi və
auditor tərəfindən aşkar edilmiş qeyri-adi kənarlaşmaların ümumiləşdirilməsi prosesi
təşkil edir. bu zaman analitik proseduraların yerinə yetirilməsi və onun
layihələşdirilməsi metodunun seçilməsi qarşıya qoyulmuş vəzifələr kompleksindən
asılı olaraq həyata keçirilir. Auditor təhlinin ardıcılığı baxımından ilk növbədə
maliyyə (mühasibat) hesabatının oxunması metodunun seçilməsi və ondan istifadə
olunması probleminin həllini məqsədəuyğun sayır. Bu metod müəssisə vəsaitlərinin
və əldə edilmiş mənfəətin yaranma mənbələrinin müəyyən edilməsi məqsədilə dərc
olunan hesabatlarda əks etdirilmiş göstəricilərin mütləq kəmiyyətlərinin, uçot
siyasətinin əsas müddəalarının və illik hesabata edilmiş əlavələrin öyrənilməsi və
qiymətləndirilməsini nəzərdə tutur. Bu zaman maliyyə hesabatlarındakı qeyri-adi
kənarlaşmalara və məbləğlərə xüsusi diqqət yetirilir. Bundan başqa, analitik
proseduraların yerinə yetirilməsi prosesində auditor iqtisadi təhlilin müqayisə,
interrolyasiya, korrelyasiya, reqressiya üsullarından, iqtisadi-riyazi metodlarından və
digər evristik (psixoloji) qaydalardan istifadə edə bilər.
22
II FƏSİL. AUDİTOR YOXLAMALARI ZAMANI ANALİTİK
PROSEDURALARDAN İSTİFADƏ EDİLMƏSİ VƏ ONUN
TƏKMİLLƏŞDİRİLMƏSİ PROBLEMLƏRİ
2.1. Biznes-plan mərhələsində istifadə olunan analitik proseduralar və
onların təkmilləşdirilməsi istiqamətləri
Yuxarıda xüsusi vurğulandığı kimi, bazar münasibətləri şəraitində həyata
keçirilən auditor yoxlamalarının bütün mərhələlərində analitik proseduralardan
istifadə olunur. Qeyd etmək lazımdır ki, analitik proseduralar auditin istər planlaşdıma
və istərsə də son mərhələsində mühasibat hesabatlarının məlumatları əsasında
hesablanılan və qiymətləndirilən ümumiləşdirilmiş maliyyə əmsallarından istifadəni
nəzərdə tutur. Nəzəriyyə və praktikada geniş istifadə edilən maliyyə əmsalları, öz
növbəsində, təsərrüfat subyektlərinin maliyyə vəziyyətini öyrənməyə və istifadəçi
mövqeyindən mühasibat və maliyyə hesabatlarını nəzərdən keçirməyə imkan verir.
Bizim fikrimizcə, auditin planlaşdırma mərhələsi hər bir yoxlamanın aparılması
üçün vacib sayılan və sistematik təkrarlanan auditor tədbirlərinin siyahısının mexaniki
surətdə tərtib edilməsi ilə başa çatmır. Məlumdur ki, auditor mühasibat və maliyyə
hesabatlarının ayrı-ayrı maddələrinin və göstəricilərinin müqayisəsi prosesində
inflyasiya ilə bağlı müxtəlif növ kənarlaşmaların və risklərin mövcudluğu ehtimalını
yaxşı bilir və bunu planlaşdırmada mütləq şərt kimi nəzərə alır. Bu zaman risk
dedikdə, auditin planlaşdırma mərhələsində buraxılan səhv, uyğunsuzluq və mövcud
qanunvericiliyin tələblərinin pozulması ehtimalı və mümkünlüyü başa düşülür. Ona
görə də, nəzəri və praktiki ədəbiyyatlarda planlaşdırma risklərin azaldılmasına və
auditin səmərəli təşkilinə imkan verən proses kimi xarakterizə olunur.
Məlumdur ki, auditin planlaşdırma mərhələsində həyata keçirilən analitik
proseduralar auditor yoxlamalarının senarisinin işlənib hazırlanması və kənarlaşmaları
(mütləq və nisbi ifadədə) aşkara çıxarmağa imkan verən xarakterik əlaqələrin və
asılılıqların müəyyən edilməsi məqsədini daşıyır. Məhz bu baxımdan, bazar
münasibətləri şəraitində auditor yoxlamalarının aparılması məqsədilə həyata keçirilən