43
Ad günündə həsrətini çəkməyə başladığı insandan hədiyyə-zad gözləmirdi,
Röyalın saf sevgisi, ülvi məhəbbəti, hər bir görüşü onun üçün ən qiymətli hədiyyə
idi. Əsmər bənizli, çinar boylu oğlanın surəti gecə-gündüz xəyalından çıxmır,
ağlını çaşdırırdı.
Nəhayət, ad günü gəlib yetişdi, həmin gün səhər erkən oyandı, güzgünün
qabağında oturub üzünə xeyli sığal çəkdi, üz-gözündən təbəssüm yağa-yağa
eyvana çıxıb üzbəüz binaya baxdı. Iş hələ başlamamışdı, daha doğrusu, fəhlələr
hələ gəlməmişdilər. Birdən gözü lap yuxarı mərtəbədə qırmızı hərflərlə yazılmış
“Fidan, səni sevirəm” sözlərinə sataşdı. Həyəcandan az qaldı ürəyi dayansın.
“İlahi, o, bu yüksəkliyə necə çıxıb?”-düşündü.
Içində ömrü boyu eşitmədiyi şən bir melodiyanın akkordları döyünürdü. Qəlbinə
yeni günəş doğmuşdu. Havada uçan quşlar da, şəhərin dənizə uzanan mənzərəsi də
gözlərinə başqa cür görsənirdi, hər yan sevgi nəğməsinə bələnmişdi. Fəvvarələrin
şırıltılı səsi, gül-çiçək ətri bir-birinə qarışmışdı. Ilk dəfəydi xiyabanlarda əkilən
güllərin qoxusunu belə yaxından duyurdu.
Çölü içinə sığmırdı... Röyalla tez görüşmək, onu bağrına basıb doyunca öpmək
istəyirdi. Bu istəyinin qarşısını almağa heç bir qüvvənin gücü çatmazdı.
Qapıda atılıb boynuna sarıldı:
- Mənə görə o təzə tikilinin damına çıxmağa qorxmadın?
- Yox, eşqimin gücünə inam hissi məni hər təhlükədən keçirdi.
- Elə bil dünyanı mənə bağışladın.
- Ürəyindən nə keçir, gülüzlüm, gedək, dənizi də bağışlayım sənə. Uşağı da
götür, çıxıb sahildə bir az gəzib-dolaşaq. Sonra...
- Hə, gəl sahil parkına gedək, çoxdandı ora yolum düşmür. Sonra evə qayıdarıq.
Sənin üçün yaxşı süfrə açaram.
... Fidanın təklifiylə faytona mindilər. Onlar birlikdə illərin xoşbəxti kimi
görünürdülər. Fayton bulvarı dövrə vurdu. Köhnə evlərinin yanından ötəndə
Fidanın qəlbini qəribə hisslər bürüdü. Qarşı tərəfdən gələn faytonda bəylə-gəlin
oturmuşdu. Fidanın yadına bəd ruzigarın əlindən atasının toy hədiyyəsi kimi
bağışladığı malikanəni məcburən tərk edən milyonçu qızı düşdü.
44
- Bilirsən Röyal, bax, bizim evimiz burda idi...
- Gözəl yerdəymiş...
- Amma bu binadan gəlin köçənlərin çoxunun ilk nigahı uğursuz olub...
Sonra Əfqanı nzərdə tutaraq:
- Sənin dediyin kimi, o mənə yox, bu evə aşiq olubmuş...
- Elələri yalnız pula vurulurlar, nə yolla olur-olsun, təki pul gəlsin...
Qanı qaralmışdı Fidanın, əyilib Röyalın qulağına: “gəl qayıdaq,-canım, bu gün
səninlə evdə baş-başa qalmaq mənə daha xoş olar”,-pıçıldadı, cavab gözləmədən
evə tərəf səmt götürdülər...
Uşaq gəzintidən və dənizin təmiz havasından xumarlanmışdı, evə çatar-çatmaz
yuxuya getdi. Bulvarın ab-havası ona düşmüşdü. Yeməkdən sonra Röyal getmək
üçün izn istədi.
- Getmə, qal, bu gün mənim ad günümdür, istəyirəm, bu şad günümün sevincini
səninlə paylaşım, gecəni səninlə keçirib, səhəri səninlə açım.
Gözlərini yumub toy gecəsini xatırladı. Sonra yenə kövrək pıçıltıyla:
- Bu gecə həmin gecədən fərqli olacaq, -dedi,-Röyal, bütün qəlbimlə, varlığımla
sənin olmaq istəyirəm.
- Röyal onun saçlarını oxşadı, yanağından öpdü, dodaqlarına toxunmağa qorxdu,
belini qucmağa əli gəlmədi. Bədənini soyuq tər basdı. Sanki saxta iş üstündə
yaxalanır, əlləri-ayaqları əsirdi...
Fidan özünü onun ağuşuna atmağa hazır idi. xəyalən vurulduğu kişisinin
təbəssümü şərab kimi dodaqlarından süzülüb qızı məst eləmişdi:
- Əsmərbənizlim, həyatıma xoş gəldin!
- Röyal yenə onun yalnız əllərini, qollarını, dodaqlarını öpməklə kifayətləndi.
Sevgilisinin ağuşunda əriyib-itməyə, özünü təslim etməyə hazır bir qadının
yalvarışı kimi səslənən:
Röyal, Röyal, əzizim, canım-gözüm...-sözləri oğlanın bütün vücudunu silkələdi,
səsi əvvəlkindən də bərk xırıldadı, elə bil hansısa gözəgörünməz əl boğazından
yapışıb ikiəlli sıxırdı:
45
- Gülüzlüm, ilk dəfə səninlə danışmağım yadına gəlir, o zaman ərli qadınla
subay oğlanın telefonla eşq elan etməsini böyük qəbahət, günah olduğunu
söyləmişdin...
- Onda mənim “kimsən?” sualıma “səni sevən kəs”-deyən adamın ərgən
çağımdan xəyalımda sevib, əzizlədiyim əsmər bənizli oğlan olduğunu bilmirdim.
- Kaş, hər şey ayrı cür olaydı...
Ehtirasdan Fidanın dodaqları əsirdi:
- Söz verirəm, əzizim, bu andan hər şey sənin istədiyin kimi olacaq, yaxın gəl...
Röyal sanki çaşıb qalmışdı, yaxasını ondan qurtarmağa çalışırdı:
- Allah nigahlı-kəbinli qadınla yaşayan namərhəm kişini cəhənnəm odunda
yandıracaq.
- Mən boşanmış qadından daha çox özümü sərbəst, azad hesab eləyirəm, əslində
qəlbim, ruhum heç vaxt, heç kəsin olmayıb. Sadəcə, kağız üzərində olan bu birlik
iki sevən insan üçün o qədər də əhəmiyyət daşımamalıdır. Əsas ruhların, qəlblərin
birliyidir...
Röyal əllərini ovuşdurub üzünü yana çevirdi. Bədənindən bumbuz giziltilər
keçdi, canı üşüdü, əti ürpəşdi. Onun ehtirasın zirvə məqamında özünü soyuq
aparması, biganə davranışı Fidana toxunurdu. Az qalırdı diliylə desin: “sən necə
kişisən ki, belə məqamda sevdiyin qadına qarşı laqeyd qala bilirsən, bu necə
sevgidir, necə istəkdir?”.
Birdən yenə o məsum toy gecəsini xatırladı. Ürəyində: “Əgər bu ifadəni
işlətsəm, onun xətrinə dəyər, onda mənim şantaj yolu ilə muradına çatan Əfqandan
nəyim əskik olar? Yoxsa mənə də o fırıldaqçının təsiri keçib...”.
- Sənə nə olub? Bəlkə azarlamısan, haran ağrayır? Niyə titrəyirsən?
- Mən... mən bu gün getsəm yaxşıdı...
- Röyal, dayan, dayan, hara belə?
... O gedən getdi. Iki-üç gün aradan ötdü, Röyaldan xəbər-ətər çıxmadı. Zəng edib
anasından soruşdu.
“Evdə yoxdur...”-dedi.
Dostları ilə paylaş: |