68
Cavanşirin qəfləti ölümü ölkədə vəziyyəti xeyli gərginləşdirsə
də çox keçmədən ölkənin ağsaqqalları, valiləri, hakimləri və əyanları
hakimiyyətə Cavanşirin Bizans imperatoru tərəfindən konsul və
patrik rütbələrinə layiq görülmüş Varaz-Peroz adlı qardaşının oğlu
knyaz Varaz- Trdatı (681-688) seçdilər (136, k.2, f.38; 295, s.41).
M.Kalankatlı bildirir ki, «öz müdrikliyi, ağlı, qayğıkeşliyi ilə
tanınmış Varaz-Trdat ölkəni sərhədləri daxilində özünə tabe etdi və
«şanlı paytaxtını» – Bərdəni ələ keçirdi» (136, k.2, f.38). Akademik
Z.M.Bünyadov mənbəyə əsaslanaraq qeyd edir ki, Varaz-Trdat
Albaniya taxtına xəzərlərin 681-ci ilin yayındakı hücumu vaxtında
(680 və ya 681-ci ildən 688-ci ilə qədər),
ehtimal ki, 681-ci ildə sahib
olmuşdur (bax136, s.225). Qaynağın məlumatına görə, hün
sərkərdəsi Alp İlitver Cavanşirin qəsdən öldürüldüyünü nəzərdə
tutaraq intiqam almaq məqsədilə Qafqaz dağı ətəklərindəki
vilayətləri talan etmişdir. M.Kalankatlıya görə, «O (Alp İlitver –
Q.H.), öz böyük, şəxsi dəstəsilə düzənlikləri aşaraq Kür çayını keçdi
və Uti vilayətinə daxil olaraq, buradakı insanları öz mal-qarası ilə
birlikdə əsarətə aldı. Sonra onlar qayıtdılar və Lping yaxınlığında
olan düzənlikdə düşərgə saldılar» (136, k.2, f.38).
M.Kalankatlı bu barədə məlumat verir: «böyük katolikos Yelizarı
hunlar padşahının yanına göndərdi ki, onun vasitəsilə padşaha öz
həqiqi itaətini və məhəbbətini bildirsin və desin ki, o, bu məhəbbəti
ona sevimli qardaş olduğu üçün bəsləyir, ona çatdırsın ki, biz
albanların Cavanşirin ölümü ilə əlaqəsi yoxdur və bu ağır cinayət
alçaq və mənfur bir adamın əlilə icra olunub» (136, k.2, f.38).
Beləliklə, Yelizar Xəzər xaqanını inandırdı, Xəzər qoşunlarının
Albaniya ərazisindən çıxıb öz ölkələrinə qayıtmasına nail oldu (136,
k.2, f.38).