Pirimqul Qodirov O‘zbekiston xalq yozuvchisi, tarixshunos, fan arbobi. Tarjimai holi

Tarixshunoslik faoliyati
Ma’rifatparvar adib O‘zbekistonning badiiy tarixiy o‘tmishining qayta yaratilishiga salmoqli hissa qo‘shgan. 1969-1978 yillarda yozilgan "Yulduzli tunlar" romani o‘zbek adabiyotining eng sara tarixiy asarlari sirasiga kiradi. Ushbu romanda Movarounnahrdek ulkan davlatning parchalanib ketishi, Temuriylar o‘rtasidagi nizolar mohirona tasvirlangan, hamda Bobur shaxsiyati mukammal tarzda ochib berilgan. O‘n ikki yoshida taxtga chiqishga majbur bo‘lgan va butun umr Vatan sog‘inchida yashagan Boburning: "Jonimdin o‘zga yori vafodor topmadim..." deya chekkan iztiroblari aks ettirilgan.
“Yulduzli tunlar” ko‘p marotaba Moskvada va Toshkentda nashrdan chiqqan, roman, shuningdek, “Xalqlar do‘stligi” jurnalida ham chop etilgan. Roman hind va urdu tillariga tarjima qilingan. Shuningdek, qozoq, qirg‘iz, qoraqalpoq tillarida chop etilgan. 1981-yil “Yulduzli tunlar” romani uchun P. Qodirovga Hamza nomidagi davlat mukofoti topshiriladi.
Shuningdek, "Shohruh va Gavharshod" nomli romani 2013-yil Sharq nashriyotida bosib chiqariladi. Ushbu romanda Buyuk Temurning farzandi Shohruh va uning nikohidagi Gavharshodbegim hayoti bayon qilinadi.
Tarjimonlik faoliyati
Pirimqul Qodirov tarjimon sifatida L.Tolstoyning “Kazaklar”, K.Fedinning “Dastlabki quvonchlar”, P.Tolisning “Iz”, X.Derayevning “Taqdir” qissa va romanlarini o‘zbek tiliga o‘girgan.
Pirimqul Qodirov 1990-2000 yillar O‘zbekiston Respublikasi Oliy Majlisi fan va madaniyat qo‘mitasining raisi o‘rinbosari, raisi lavozimlarida faoliyat yuritib, O‘zbekistonning fan, adabiyot va san’ati taraqqiyotida jonbozlik ko‘rsatgan.
Taniqli adib so‘nggi yillar O‘zbekiston Yozuvchilar uyushmasida nasr bo‘yicha rais lavozimida faoliyat yuritgan. Mehribon va talabchan ustoz sifatida ko‘plab yosh iqtidor sohiblariga ustoz bo‘lgan.
O‘zbek adabiyoti va madaniyati rivoji oldidagi xizmatlari davlat tomonidan munosib ravishda baholanib, Pirimqul Qodirov “O‘zbekiston Respublikasida xizmat ko‘rsatgan madaniyat xodimi” va “O‘zbekiston xalq yozuvchisi” sharafli unvonlariga sazovor bo‘lgan, “El-yurt hurmati” hamda “Buyuk xizmatlari uchun” ordenlari bilan mukofotlangan.
2010 yil 21-dekabr umrining 82-yilida O‘zbekiston xalq yozuvchisi Pirimqul Qodirov olamdan ko‘z yumdi.




Pirimqul Qodirov (1928.25.10. Tojikiston Respublikasi Shahriston tumani Kengko‘l qishlog‘i - 2010) — yozuvchi, adabiyotshunos olim. O‘zbekiston xalq yozuvchisi (1988). O‘zbekistonda xizmat ko‘rsatgan madaniyat xodimi (1978).
O‘rta Osiyo universitetining sharqshunoslik fakultetini (1951) tugatgan. SSSR Yozuvchilar uyushmasida o‘zbek adabiyoti bo‘yicha maslahatchi (1954—63), O‘zbekiston Fanlar akademiyasi Til va adabiyot institutida katta ilmiy xodim (1963—83), O‘zbekiston Respublikasi Adabiyot, san’at va me’morlik sohasidagi Davlat mukofotlari qo‘mitasi raisi (1989—94), O‘zbekiston Oliy Kengashi (Madaniyat va madaniy meros qo‘mitasi raisi; 1991—95), O‘zbekiston Respublikasi Oliy Majlisi (Fan, ta’lim, madaniyat va sport masalalari qo‘mitasi raisi o‘rinbosari; 1997— 2000) deputati bo‘lib ishlagan.
Dastlabki hikoyasi — «Studentlar» (1951). Shundan keyin Pirimqul Qodirov yoshlar hayoti haqidagi «Uch ildiz» (1958, roman), mustabid tuzum sharoitida ichki erkini yo‘qotgan, mutelik dardiga giriftor bo‘lgan qahramonlar hayoti aks etgan «Qadrim» (1961) va «Erk» (1968) qissalarini yozgan. Zamonaviy mavzularga bag‘ishlangan bu va boshqa asarlarida Pirimqul Qodirov 2-jahon urushi yillarida kechgan mashaqqatli hayoti faktlari hamda shu davr haqidagi taassurot va mushohadalaridan samarali foydalangan. Zamonaviy mavzularga bag‘ishlangan «Qora ko‘zlar» (1966) va «Olmos kamar» (1976) romanlarida Pirimqul Qodirov ma’naviy-axloqiy masalalar bilan birga voqelikda, xususan, qishloq hayotida mavjud bo‘lgan jiddiy muammolarga jamoatchilik e’tiborini qaratgan.
Sho‘ro mafkurasi 70-yillarda tarixiy mavzuning yoritilishiga qattiq qarshilik ko‘rsatganiga qaramay, Pirimqul Qodirov Abdulla Qodiriy, Oybek, Shayxzoda, Mirkarim Osim an’analarini davom ettirib, «Yulduzli tunlar» (1979) romanini yozdi. Yozuvchi bu asarida o‘zbek xalqi tarixining muhim sahifalarilan biri – buyuk shoir va davlat arbobi Zahiriddin Muhammad Bobur siymosiga murojaat etib, uning murakkab va mashaqqatli hayot yo‘lini tarixan haqqoniy gavdalantirib berdi. Keyinchalik ushbu asarning davomi — «Avlodlar dovoni» (1989) romanini nashr etdi.
Pirimqul Qodirov «Yulduzli tunlar» («Bobur») va «Avlodlar dovoni» romanlarida Bobur, Humoyun va Akbarning hayot yo‘lini kuzatish orqali Boburiylar saltanatining vujudga kelishi va ravnaq topishini yorqin tasvirlashga erishgan. U uzoq o‘tmishda va o‘zga mamlakatda ro‘y bergan voqealarni tasvirlashda o‘z fantaziyasiga emas, balki o‘zi e’tirof etganidek, «tarix fantaziyasi»ga, ya’ni chindan sodir bo‘lgan voqealarga ko‘proq asoslangan har ikkala asar ham keng kitobxonlar tarafidan samimiy kutib olinganiga qaramasdan, sho‘ro mafkurasi tomonidan keskin tanqid qilinib, muallif o‘tmishni ideallashtirishda ayblandi.
Paxta yakkahokimligi davrida o‘zbek xalqi boshiga tushgan jabru jafolar o‘zbek adabiyotida ilk bor «Meros» (1974) qissasida o‘z ifodasini topdi. Pirimqul Qodirov shu davrda qissa janrida samarali ijod qilib, bolalar va yoshlar hayotidan olingan «Akramning sarguzashtlari» (1974), «Yayra institutga kirmoqchi» (1979), shuningdek, ma’naviy-axloqiy masalalarga bag‘ishlangan «Najot» («Baxillar va botirlar», 1980) qissalarini ham e’lon qildi. «Ona lochin nidosi» (2000) romanida 15-asrdagi Movarounnahrning ijtimoiy-madaniy va ma’naviy hayoti keng aks ettirilgan. Yozuvchi so‘nggi yillarda «Qalb ko‘zlari (badialar, o‘ylar, esdaliklar)» (2001) kitobini chop etib, shu yo‘nalishdagi yangi badia(esse)lar ustida ish olib bormoqda.
Pirimqul Qodirov adabiyotshunos olim sifatida o‘zbek tili va adabiyotining ilmiy-nazariy masalalari bilan shug‘ullanib, «Til va dil» (1972), «Xalq tili va realistik proza» (1973), «Til va el» (2005) risolalarini hamda 2 jildli «Adabiyot nazariyasi» uchun «Adabiy asarning tili» va «Adabiy jarayon» boblarini yozdi.
Pirimqul Qodirovning «Qadrim» qissasi asosida «Sening izlaring» (rejissyor R.Botirov) badiiy filmi, «Yulduzli tunlar» romani va «Jon shirin» hikoyasi asosida ko‘p seriyali videofilmlar (rejissyor M.Yusupov) suratga olingan. Uning «Bobur» pesasi (rejissyor B. Yo‘ldoshev) uzoq yillar mobaynida hozirgi O‘zbek milliy akademik drama teatrida, «Insof» pesasi esa viloyat teatrlari sahnalarida qo‘yilgan. Asarlari rus, ukrain, hind, urdu, turk, uyg‘ur, qozoq, qirg‘iz va turkman tillarida nashr etilgan.
Hamza nomidagi O‘zbekiston davlat mukofoti laureati (1981), «Shuhrat» medali (1994) va «El-yurt hurmati» (1998) ordeni bilan mukofotlangan.