21
Şöbə müdirindən icazə alıb çıxdı. Hadisələr elə sürətlə bir-birini əvəz
edirdi ki, hamımız
çaşmışdıq.
Səbinə Dilarənin rəfiqəsindən eşitdiyi tarixçəsini danışıb qurtarmışdı ki, biri yaşlı, biri cavan iki
qadın içəri girib:
- Hanı, hardadır o qəhbə, evlər yıxan fahişə. Dərələrin lotusu, səni dünyaya gəldiyinə peşiman
etməsəm atamın qızı deyiləm-deyə qışqıranda müdirimiz irəli durdu:
- Bacı, bir az yavaş danışın, ayıbdır burda belə ədəbsiz danışmayın. Siz kimi axtarırsız?
- Ədəb axtaranlara bax bir. Bir şortunu işə götürüb aranızda saxlayırsınız, sonra da ədəb-ərkan
güdürsüz. Bizə Dilarə deyən o lotu lazımdır.
- Yoxdur, icazə alıb gedib.
Qadınlar hirslə dönüb getdilər. Samirənin dediyinə görə Dilarənin əri onun rəfiqəsinin qohumu
imiş. Onu burda görəndə hər ikisi təəccüblənib. Heç demə bir il olar ki, Mahir iki uşağını, arvadını
qoyub Dilarə ilə yaşayır. Qaynanası, arvadı əlimyandı bütün şəhəri ələk-vələk eliyib Dilarəni
axtarırlarmış. Samirənin rəfiqəsi Dilarənin yerini onlara nişan verib. Mahir qohumunu görəndə
düşünüb ki,
Dilarənin üstünə gələ bilərlər, ona görə də qızı aradan çıxarmışdı. Yaxşı ki, vaxtında
duyuq düşmüşdülər. Qızı tapsaydılar nələr olacağı məlum idi.
Dilarə işə gəlmirdi, amma şöbədə qızğın müzakirələr gedirdi. Demək olar ki, hamı bu qızı
qınayır, ağızlarına gələni ünvanına döşəyirdilər. Uzun zaman bu söhbət kəsilmədi. Bir həftədən
sonra Dilarə çox üzgün, solğun şəkildə gəlib işdən çıxmaq haqqında ərizisini verdi. Heç kəs onun
üzünə baxmırdı, heç salamını da almadılar. Mən onun dalınca çıxıb ona nəsə, xoş bir söz demək
istəyimin qarşısını ala bilmədim.
Dilarə mənim münasibətimdən kövrəlib məni qucaqladı. Mən onun saçlarını sığallayıb könlünü
almağa çalışırdım:
- Sən özünü çox üzmə, hərənin bir qisməti var.
Sənin də taleyin belə gətirib, neyləmək olar.
O ağlaya-ağlaya:
- Elə bilirsiniz mən rahat, xoşbəxt yaşamaq, uşaq sahibi olmaq istəmirəm? – deyəndə mən neçə
gündən bəri ürəyimdə qovurduğum sözü dedim:
- Dilarə, gözəl-göyçək, ağıllı qızsan, niyə bir subay oğlanla ailə qurmamısan? Niyə evli kişiylə
qeyri-qanuni yaayırsan?
Dilarə mənə məlul-məlul baxıb dedi:
- Hiss eliyirəm ki, sən məni anlaya bilərsən. Mənimlə gedək bağda oturaq, sənə olanları
danışım, daha ürəyim partlayır, dözə bilmirəm!
Mən onunla yaxınlıqdakı bağa gəldim. Sakit bir künc tapıb əyləşdik. Dilarə səssizcə ağlayırdı,
sanki çoxdan bəndə salınmış çay öz bəndini uçurmuş, yeddi yerdən süzüb tökülürdü.
Mən ona mane
olmurdum. Bu göz yaşları bəlkə də indi ən gözəl məlhəm, təsəlli idi. Dilarə elə ağlaya-ağlaya
çiynimi qucaqlayaraq sözə başladı:
- Məni anlasan da sağ ol, anlamasan da. Ürəyim elə şişib ki, bəlkə də tanımadığım bir adam da
soruşsa sənə nə olub, ürəyimdə nə var açıb tökərəm qarşısında. Yaxşı ki, bu sənsən. Səni təzə
tanısam da hamıdan yaxın gəlirsən mənə. Bilmirəm, sənin
gözlərində dərd də görürəm, işıq da
görürəm, istilik də, məhəbbət də. Kaş sənin kimi bir kimsəm olaydı, ürəyimi dərd deşəndə üstünə
qaçaydım.
- Sənin bir kimsən yoxdumu Dilarə?
- Var bacı, var. Anam da var, bacım da, xalam da, bibim də, əmim də, amma nə olsun 6 ildir bir
kəs maraqlanmır ki, bu qız ölüb ya qalıb?
- Bəs sən onlardan niyə ayrılmısan?
- Mən ayrılmamışam, məni küçəyə atıblar – Dilarə elə ürəkdən hönkürdü ki, mən də özümü
saxlaya bilməyib ona qoşuldum. Daha heç nə soruşa bilmirdim. Qorxurdum bu gözəl üzlü qız
gözümün qabağında yaşa qarışıb axıb gedə. Bir neçə dəqiqədən sonra özünə gəlib yenidən aramla
danışmağa başladı.
- Atam rəhmətə gedəndə 10 yaşım yox idi. Bütün xoşbəxtliyim atamla getdi.
Çox gözəl insan
idi. Mən anamdan heç bir qayğı, nəvaziş görməmişdim. Atam məni əzizləyər, nazımla oynayardı.
22
Anam diliacı, qaradinməz qadın idi. Qohum-əqrəba anamın bu xasiyyətinə görə bizə gəlməzdi.
Amma atam hər istirahət günü məni əmimgilə, bibimgilə aparırdı. Uşaq idim, çox şeyi ağlım
kəsmirdi. İndi bibimin atama dediyi sözlərin mənasını anlamağa başlamışam. Həmişə deyərdi ki,
qardaş, sözümüzə baxmadın, ömrünü çürütdün, o qadın əməli saleh adam deyil. Atam bir söz
deməz, siqareti-siqaretlə calayardı. Bir gün dərsdən gələndə, atamı evin ortasında üstü qara kəlağayı
ilə örtülmüş gördüm. Bibim yanıqlı səslə oxşayıb ağlayırdı. Onda atamı ağlaya bilmirdim. Amma
sonralar hər gün atamı çağırıb ağlayırdım. Atam öləndən bir neçə ay sonra evimizə bir kişi gəldi.
Anam mənə bərk-bərk tapşırdı ki, ona hörmət edim, sözündən çıxmayım,
çünki bizə çörək verən
odur. Mən anamın dediklərinə əməl edirdim. İki ildən sonra bir bacım gəldi dünyaya. Bu qızın
dünyaya gəlişi işimi artırsa da çox sevinirdim. Çünki bu balaca kuklaya oxşar qızla oynamaq
yeganə sevinc payım idi. Atalığımın zəhmli sir-sifəti, anamın heç vaxt açılmayan qaşqabağı evimizi
qaranlıq zindana çevirmişdi. Artıq 14 yaşım vardı. Bu yaşa necə çatmışdım bilmirdim. Bir axşam
kişi evə çox acıqlı qayıtmışdı, anamla dava etməyə başladı. Onların arasındakı bu qalmaqalın əsas
səbəbi heç demə mənəmmiş. Kişi dönə-dönə anama deyirdi ki, mən sənin küçüyünü nə qədər
yedirib geydirəcəm. Bəsdir daha, yekə qızdır getsin özü-özünü saxlasın. Davanın axırı məni evdən
qоvmaqla qurtardı. Evimiz Yasamal bazarının yanında idi. Titrəyə-titrəyə bazarın yanındakı binanın
küncünə qısılıb oturdum. Nə edəcəyimi bilmədən hey ağlayırdım. Aradan nə qədər vaxt keçmişdi
bilmirəm, yaşlı bir kişi mənə yaxınlaşdı:
- Niyə burda oturmusan, niyə ağlayırsan? – soruşduqda daha da bərkdən ağlamağa başladım.
Kişi çiyinlərimdən tutub məni ayağa qaldırdı. Bir də soruşdu.
- Qızım, nə olub sənə, söylə görüm, bəlkə bir köməyim dəydi.
- Atalığım məni evdən qovub.
- Niyə?
- Deyir get özün-özünü saxla, mənim pulum yoxdur səni yedirməyə.
Kişi atalığımın qarasına deyinə-deyinə məni yaxınlıqda saxladığı maşına mindirdi.
Müti qul
kimi kişinin dediklərinə əməl edirdim. Başqa gümanım yox idi. Atamın ölümündən sonra bircə
qohum mənimlə maraqlanmamışdı. Anam da hər dəfə acıqlanıb deyinəndə atama da qohumlarına
da söyürdü. Mən də dinməzcə qulaq asar, ağlayardım. Mənə hədsiz canıyananlıq, mehribanlıq
göstərən bu yad kişi çətin anımda həm atam idi, həm də anam.
Maşını böyük bir binanın qabağında saxladı. Bu binanın o vaxt nə olduğunu bilmirdim, indi
bilirəm ki, mehmanxana idi. İsti, rahat bir otağa gəldik. Yemək-içmək gətirdilər. Doyunca yedim-
içdim. Sonra vanna otağına keçib yuyundum. Bütün bunları kişinin məsləhəti ilə edirdim. Başım
yüngülcə gicəlləndi. Sonralar anladım ki, həmin gecə şərab da içmişəm. Bir neçə dəqiqəlik kişi
çıxdı və mən soyunub yatağa girdim. İsti, yumşaq yorğan-döşəkdə xumarlandıqca, yuxu göz
qapaqlarımı ağırlaşdırır, məni harasa, uzaqlara aparırdı. Yarı yuxulu
kişinin otağa girdiyini,
yatağımın qırağında oturub, saçlarımı sığalladığını güclə gördüm. Kişinin səsi qulaqlarıma nəsə
anlamadığım sözlər pıçıldayırdı:
- Ağıllı qız ol, hər sözümə əməl elə, hər şeyin olacaq. İstədiyini yeyəcəksən, ən gözəl libasların
olacaq. Səni kraliça kimi saxlayacam. Səndən çox xoşum gəlir. Mənim quzum ol, gülüm ol, səni
çox istəyəcəm. O gecə nələr olduğunu xatırlamıram. Səhər yuxudan oyananda kişinin telefonla
kiminləsə danışdıqlarını eşitdim.
- Axşam bir quş tutmuşam. Həm gözəldi, həm körpədi, həm də tər-təmiz.
O başdan nə dedilərsə, kişi bərkdən güldü:
- Lələşini nə bilmisən, adamın gərək pulu olsun.
Hər müşkülü asan eliyən puldur, pul.- Arada
fasilə edirdi yəqin ki, deyiləni dinləyirdi. Sonra yenə həvəslə danışırdı:
- Yox, yox sən öləsən heç kəsə vermərəm. Bu cənnət quşudu, onu uçurmaram.
Mən söhbətin məndən getdiyini anlamışdım. Kişinin dediyi kimi körpə quş kimi tələyə
düşmüşdüm. Artıq hər şey gec idi və nədənsə peşiman da deyildim. Çünki işin mahiyyətini də tam
anlamırdım, anlamaq iqtidarında deyildim.
Dilarə içini çəkərək yenə ağlamağa başladı. Mən ona mane olmaq istəmirdim. Çünki bilirdim ki,
indi ona lazım olan, kömək olacaq elə bu göz yaşlarıdır. Özünə gəlib söhbətinə davam etdi: