CÜMHURİYYƏTİN TƏHLÜKƏSİZLİK ORQANLARI (1918-1920)
102
rəisi təyin edilmişdir. Onun rəhbərliyi ilə hissə və birləşmələrdə çavuş
məktəbləri yaradılmış, döyüş hazırlığının proqram və cədvəlləri
tərtib edilmiş, qoşun və agentura kəşfiyyatı işinin təşkilinə diqqət
artırılmışdır.
123
1920-ci il fevralın 17-də öz xahişi ilə ordu sıralarından tərxis
edilən Sulkeviç az sonra Nazirlər Şurasının qərarı ilə Bakıdan keçərək
Rusiyaya gedən könüllü ordu qalıqlarından silah və təchizatı qəbul
edən İdarələrarası Komissiyanın sədri təyin olunmuşdu. 1920-ci il
Aprel işğalından sonra Sulkeviç bolşeviklər tərəfindən həbs olunaraq,
ölüm cəzasına məhkum edilmiş və 1920-ci il iyulun 15-də Bayıl
həbsxanasında güllələnmişdir.
Belə təqib və həbslərə məruz qalanlar arasında ƏMT-nin
əməkdaşları və onların yaxın qohumları da az deyildi.
ƏMT-nin ilk rəisi, görkəmli siyasi xadim Nəsib bəy Yusifbəylinin
yaxın dostu və silahdaşı
Məmmədbağır Şeyxzamanov da belə
repressiyalara məruz qalanlardan biri olmuşdu. M.Şeyxzamanov
1880-ci ildə Azərbaycanın qədim şəhərlərindən olan Gəncədə
dünyaya göz açmış və uşaqlığını orada keçirmişdir. O, “Müsavat”
partiyasına daxil olmuş və Azərbaycanın azadlığı uğrunda yorulmadan
mübarizə aparmışdır. M.Şeyxzamanov AXC dövründə parlamentin
üzvü kimi bir sıra dövlət məsələlərinin həllində də yaxından iştirak
etmişdir. Bolşeviklər hakimiyyəti ələ aldıqdan sonra 1920-ci ildə onu
güllələmişlər. Türkiyədə nəşr olunan aylıq “Azərbaycan” dərgisində
1967-ci ildə Nağı bəy Şeyxzamanovun ölümü ilə bağlı çap olunmuş
nekroloqda M.Şeyxzamanov barəsində aşağıdakıları oxuyuruq:
“Nağı
bəyin şəxsiyyəti üzərində bolşeviklər tərəfindən 1920 sənəsində
şəhid edilən mərhum ağabəyisi Məhəmmədbağır Şeyxzamanovun
çox qüvvətli bir təsiri olmuşdur. İnanılmış, vəfalı bir müsavatçı
olan Məmmədbağır bəy gərək millət vəkili bulunduğu
Azərbaycan parlamentində, gərəksə ümumi ictimaarda vətən
xaini kommunist ünsürlərə qarşı geniş mücadilə açmış bir zat
idi. Bunun üçündür ki, rus istila ordusu Azərbaycana ayaq basar-
basmaz arxa-arxaya kütlə halında yaxalanan və sorğusuz-sualsız
123 Сулькевич, Матвей Александрович. -
https://ru.wikipedia.org/wiki/Сулькевич,_Матвей_Александрович
CÜMHURİYYƏTİN TƏHLÜKƏSİZLİK ORQANLARI (1918-1920)
103
qurşuna düzülən münəvvərlərin ön sırasında yer alanların biri də
o olmuşdu”.
124
Dərginin verdiyi məlumatdan da göründüyü kimi, Məmmədbağır
Şeyxzamanov XI Qızıl Ordu tərəfindən sorğusuz-sualsız güllələnmiş,
Nağı bəy isə vətən xaini elan edilmişdir. Vətən xaini elan edildikdən
sonra Nağı bəy Bakıdan Gəncəyə, sonra Tiflisə, Tiflisdən isə Türkiyəyə
getməyə məcbur olmuşdur. Nağı bəy Türkiyədə mühacirətdəki
azərbaycanlılarla sıx əlaqədə olmuş və onların yaratdığı “Azərbaycan”
kültür dərnəyinin işində fəal iştirak etmişdir.
1883-cü ildə Gəncə şəhərində anadan olan
Nağı bəy Şeyxzamanov
Azərbaycanın ictimai-siyasi həyatında yaxından iştirak etmişdir.
O, əvvəlcə Gəncədə əsası 1905-ci ildə Bakı şəhərində Əhməd bəy
Ağayev tərəfindən qoyulan “Difai” Partiyasının, sonralar isə Nəsib bəy
Yusifbəyli tərəfindən yaradılan “Türk Ədəbi-Mərkəziyyət Firqəsi”nin
üzvü olmuşdur. 1917-ci ildə “Türk Ədəbi-Mərkəziyyət Firqəsi” ilə
“Müsavat” partiyasının ən fəal üzvlərindən birinə çevrilmişdir.
Nağı bəy 1918–1920-ci illərdə yaranan və yaşayan AXC dövründə
Dövlət Təhlükəsizliyi Xidmətinin sələfi olan ƏMT-nin rəisi olmuş
(1919-cu ilin avqustundan 1920-ci ilin martınadək) və Azərbaycanın
müstəqilliyi və dövlətçiliyi uğrunda yorulmadan mübarizə aparmışdır.
Sonralar o, qısa müddətlərdə olsa da, Almaniyada və Amerikada
yaşamışdır. 1967-ci ildə Amerikada olarkən onun səhhəti pisləşmiş və
orada vəfat etmişdir. Övladlarının səyi nəticəsində Nağı bəyin cənazəsi
Amerikadan Türkiyəyə gətirilmiş və İstanbulun Qaracaəhməd
qəbiristanlığında dəfn edilmişdir. Mərhumun ölümü ilə əlaqədar
Türkiyədə çıxan aylıq “Azərbaycan” kültür dərgisində böyük bir
nekroloq verilmişdir. Nekroloqda Nağı bəy Azərbaycanın istiqlal
savaşının mücahidlərindən biri və fikrən, ruhən millətə bağlı olan bir
sima kimi anılır.
Nağı bəy mühacirətdə olarkən Azərbaycanda baş verən ictimai-
siyasi hadisələri bir daha təhlil etmiş, bu hadisələrlə bağlı fikir və
düşüncələrini məqalə, eləcə də kitab halında çap etdirmişdir. Onun
çap etdirdiyi “Böyük bir xeyirsevər Hacı Zeynalabdin Tağızadə”
124 “Azərbaycan” aylıq kültür dərgisi, Türkiyə, 1967, s. 21-22.
CÜMHURİYYƏTİN TƏHLÜKƏSİZLİK ORQANLARI (1918-1920)
104
(1957 ), “Dərdləşmə” (1963), “Biz və onlar” və “Azərbaycanın istiqlal
mücadiləsinin xatirələri” (1964) adlı əsərlərə Azərbaycanda baş
vermiş və baş verən hadisələrin bir az uzaqdan - Türkiyədən seyri
və qiymətləndirilməsi kimi baxmaq olar. Həmin əsərlər Azərbaycan
xalqının tarixini, istiqlal mücadiləsini və müstəqil dövlətini qorumaq
uğrunda mübarizəsini öyrənmək baxımından çox qiymətlidir.
Nağı bəy Türkiyəyə gedərkən yenicə ailə qurduğu həyat yoldaşı
Səlimə xanımı özü ilə aparmamışdı. Bizcə, bu, aşağıdakı səbəblərdən
ola bilərdi.
Birincisi, Nağı bəy ilk olaraq gizli yolla üsyanda iştirak etmək üçün
Gəncə şəhərinə gedirdi və belə bir qarışıq zamanda Səlimə xanımın
Gəncəyə getməsini artıq hesab edirdi.
İkincisi, Səlimə xanımı Bakıda saxlayan Nağı bəy belə qərara
gəlmişdi ki, Azərbaycana azadlıq gətirəcəklərini vəd edən bolşeviklər
evdar və günahsız qadına toxunmazlar.
Üçüncüsü, onun həyat yoldaşını aparmağa imkanı olmamış və
ya fikirləşmişdir ki, sərhədi keçərkən onun xanımını da həbs edərək
sərhədpozucusu kimi cinayət məsuliyyətinə cəlb edərlər.
Dördüncüsü, onlar bütün varlıqları ilə inanırdılar ki, bolşeviklərin
hakimiyyəti uzun sürməyəcək və dalğalandırdıqları üçrəngli milli
bayraq xalqın iradəsi ilə tezliklə yenidən göylərə yüksələcəkdir.
ƏMT-nin hər iki rəisinin sovetləşmə dövründəki taleyini az da olsa
əks etdirdiyini və müəyyən məlumat verdiyini nəzərə alaraq Nağı bəy
Şeyxzamanovun həyat yoldaşı Səlimə xanım haqqında açılmış istintaq
işində olan materialları da tədqiq etməyi lazım bildik. Səlimə xanımın
qaynı, ƏMT-nin ilk rəisi Məmmədbağır Şeyxzamanov bolşeviklər
tərəfindən öldürüldüyündən və həyat yoldaşı Nağı bəy Türkiyəyə
getmək məcburiyyətində qaldığından o da Azərbaycan Fövqəladə
Komissiyasının əməkdaşlarının əlinə keçməmək üçün Mərdəkandakı
bağlarında gizlənmişdi.
Səlimə xanım barəsində cinayət-axtarış işi qaldırıldığından
Azərbaycan Fövqəladə Komissiyasının əməkdaşlarına onun tapılması
əmri verilmişdi. Onu axtarmaqda əsas məqsəd həyat yoldaşının
vaxtilə guya kommunistlərdən götürdüyü qiymətli əşyaların və
Dostları ilə paylaş: |