19
UOT 633.1
ƏKİNÇİLİK İNSTİTUTUNUN YENİ TARİXİ DÖVRDƏ TƏDQİQAT
PRİORİTETLƏRİ, QARŞIDA DURAN VƏZİFƏLƏRİ VƏ UĞURLARI
C.M.TƏLAİ
Azərbaycan KTN, Əkinçilik ET İnstitutu, Bakı-98, Sovxoz №2
talai_akinchi@mail.ru
; www.aetei.az
Məqalədə Əkinçilik ET İnstitutunun yeni tarixi, aparılan institusional dəyişikliklər, təşkilati
strukturu, yeni tarixi dövrdə institutun tədqiqat prioritetləri, qarşıda duran vəzifələri, seleksiya,
genetika, fiziologiya, biokimya, fitopatologiya, becərilmə texnologiyası, otlaqların idarə
edilməsi, yemlərin texnologiyası və zootexniki qiymətləndirilməsi sahələrində əldə olunan
nailiyyətlər, yerli və beynəlxalq elmi əməkdaşlıq, Dövlət reyestrində olan və patentlə mühafizə
edilən dənli, dənli-paxlalı və yem bitkiləri sortları və toxumçuluq fəaliyyəti haqqında ətraflı
məlumatlar verilmişdir. İnstitutun 2015-ci ildə yumşaq buğdanın “Günəşli” və yoncanın
“Yemçilik İnstitutu 16” sortları rayonlaşmış, seleksiya nailiyyətlərinin Dövlət reyestrinə daxil
edilmiş və patentləşmişdir.
Açar sözlər: institusional dəyişikliklər, tədqiqat prioritetləri, vəzifələr, elmi uğurlar,
beynəlxalq əməkdaşlıq, rayonlaşmış sortlar, seleksiya nailiyyətləri, sarı pas, keyfiyyət,
resursmühafizəedici texnologiyalar, otlaqların idarəsi, yemlərin texnologiyası
Ключевые слова: институциональные изменения, приоритеты исследований,
задачи, научные достижения, международное сотрудничество, районированные сорта,
селекционные достижения, желтая ржавчина, качество, ресурсосберегающие технологии,
управление пастбищ, технология кормов
Key words: institutional changes, research priorities, objectives, scientific achievements,
international collaboration, released varieties, selection achievement, yellow rust, quality,
resource-conserving technology, pasture management, feed technology
Bu gün elmi-tədqiqat müəssisələrinin qarşısında ölkədə aqrar bölmənin
inkişafı istiqamətində həll olunmalı mühüm vəzifələr durur. Bu həlli vacib
vəzifələrə torpaqların münbitliyinin yaxşılaşdırılması, biomüxtəlifliyin qorunması,
saxlanması və istifadəsi, bitkiçilikdə və heyvandarlıqda yeni yüksək məhsuldar sort
və cinslərin yaradılması, mütərəqqi texnologiyaların elmi və praktiki əsaslarının
işlənib hazırlanması, səmərəli bitki mühafizəsi xidmətləri tədbirlərinin işlənib
hazırlanması, alınmış mühüm elmi nəticələrin fermer və digər təsərrüfat
qurumlarında tətbiqinin genişləndirilməsi kimi məsələlər daxildir. Bu baxımdan
yeni tarixi dövrə qədəm qoymuş Əkinçilik ET İnstitutunun qarşısında da mühüm
vəzifələr durur. Belə ki, 46 ildən sonra tarix yenidən təkrarlandı. Azərbaycan ET
Yemçilik, Çəmənçilik və Otlaqlar İnstitutu yenidən Əkinçilik İnstitutuna
birləşdirildi və bununla da institut yeni tarixi dövrünə qədəm qoydu. Əkinçilik ET
İnstitutu Azərbaycan Respublikasının Nazirlər Kabinetinin “Azərbaycan Aqrar
Elm Mərkəzinin və onun tabeliyindəki elmi-tədqiqat institutlarının strukturunun
təkmilləşdirilməsi haqqında” 17 aprel 2015-ci il 109 nömrəli qərarı ilə Azərbaycan
ET Əkinçilik İnstitutu və Azərbaycan ET Yemçilik, Çəmənçilik və Otlaqlar
20
İnstitutunun bazasında yenidən yaradılaraq fəaliyyət göstərir. Nəzərə almalıyıq ki,
ET Yemçilik, Çəmənçilik və Otlaqlar İnstitutu məhz 1969-cu ildə Əkinçilik ET
İnstitutunun bazasında yaradılmışdır.
Ümumiyyətlə, Əkinçilik Elmi-Tədqiqat İnstitutu SSRİ Nazirlər Sovetinin 20
may 1950-ci il 2117 saylı və Azərbaycan K(b)P MK-nın və Nazirlər Sovetinin 6
iyun 802 saylı müvafiq qərarları ilə Azərbaycan Elmlər Akademiyasının nəzdində
yaradılmış və 1950-ci ilin oktyabrından fəaliyyətə başlamışdır. Əkinçilik ET
İnstitutu Sov.İKP MK-nın və SSRİ Nazirlər Sovetinin 14 fevral 1956-cı il 253
saylı qərarına, SSRİ Kənd Təsərrüfatı Nazirliyinin 8 mart 1956-cı il 87 saylı
əmrinə və Azərbaycan KP MK-nın və Azərbaycan SSR Nazirlər Sovetinin “Kənd
Təsərrüfatı üzrə elmi tədqiqat müəssisələrinin işinin yaxşılaşdırılmasına dair
tədbirlər haqda” 27 aprel 1956-cı il 222 saylı qərarına uyğun olaraq Azərbaycan
SSR Kənd Təsərrüfatı Nazirliyinin tabeliyinə keçmişdir [1].
Respublikada taxıl istehsalının artırılması ilə əlaqədar ixtisaslaşmış
təsərrüfatları yüksək kondisiyalı toxumlarla təmin etmək və ölkədə toxumçuluq
işinin fəaliyyətini yaxşılaşdırmaq məqsədilə Kənd Təsərrüfatı Nazirliyinin 16
avqust 1993-cü il tarixli 236K saylı əmrinə əsasən Əkinçilik ET İnstitutunun
bazasında “Elit” Elm İstehsalat Birliyi yaradılmışdır. 2000-2015-ci illər aralığında
Azərbaycan Respublikasının Nazirlər Kabinetinin 16 dekabr 1999-cu il 190 saylı
qərarına əsasən yaradılmış Aqrar Elm Mərkəzinin struktur tabeliyində fəaliyyət
göstərmişdir [1].
Azərbaycan Respublikasının Nazirlər Kabinetinin 17 aprel 2015-ci il 109
nömrəli qərarına əsasən Azərbaycan Respublikası kənd təsərrüfatı nazirinin 2015-
ci il 30 oktyabr tarixli 110 nömrəli əmri ilə Əkinçilik ET İnstitutunun yeni
strukturu təsdiqlənmişdir. Bu baxımdan Əkinçilik ET İnstitutunun yenilənmiş
strukturuna 8 şöbə (Bitki seleksiyası; Bitki fiziologiyası və biotexnologiya;
Davamlı əkinçilik və bitki diversifikasiyası; Otlaq və biçənəklər; İnformasiya
təminatı və elmi nəticələrin tətbiqi; Hüquq, kadr və kargüzarlığın təşkili; Maliyyə
və mühasibat uçotu; Təsərrüfat), 5 laboratoriya (Torpaq və bitki analizləri; Dənin
keyfiyyəti; Xəstəlik və zərərvericilərə nəzarət; İlkin toxumçuluq və toxumun
keyfiyyəti; Yemlərin texnologiyası və zootexniki qiymətləndirilməsi), ictimai
elmlər və xarici dillər kafedrası daxildir.
İnstitutun struktur tərkibində elmi-istehsalat xarakterli tədqiqat işlərinin
aparılması məqsədilə 11 təcrübə bazası, o cümlədən 4 bölgə təcrübə stansiyası
(Tərtər BTS, Qobustan BTS, Zaqatala BTS, Cəlilabad BTS), 3 dayaq məntəqəsi
(Şəki DM (taxılçılıq istiqamətli), Şəki DM (yemçilik istiqamətli), Gədəbəy DM), 1
təcrübə sınaq stansiyası (Kürdəmir TSS) və 3 yardımçı təcrübə təsərrüfatı (Ağstafa
YTT, Abşeron YTT (taxılçılıq istiqamətli) və Abşeron YTT (yemçilik istiqamətli)
fəaliyyət göstərir. İnstitutda elmi və müdafiə şuraları fəaliyyət göstərir. İnstitutda
331 nəfər çalışır, onlardan 118-i elmi işçi, o cümlədən 5-i elmlər, 47-i fəlsəfə
doktorlarıdır.
Bu gün Əkinçilik ET İnstitutunun qarşısında ölkənin müxtəlif aqroekoloji
bölgələri üçün dənli taxıl (buğda, arpa, qarğıdalı) və paxlalı (noxud, mərcimək),
yem (yonca, xaşa) bitkilərinin yeni yüksək məhsuldar və keyfiyyətli, biotik və