neçə inzibati məhəllələrə bölünmüşdü ki, hər məhəllənin öz Məhəlləbaşısı vardı. Məhəlləbaşının
əsas vəzifəsi vergiləri toplamaq idi. Aradan yüz illər keçsə də, Şəkidə hələ də küçə adları yox,
məhəllə adları daha populyardır. Bu gün də ünvanı məhz məhəllələrin adları ilə tapırlar. Əhali əsasən
ticarət və ipəkçiliklə məşğul olurdu.
Görkəmli dövlət xadimi Hacı Çələbi xanın hakimiyyəti dövründə (1743–1755) Şəki xanlığı yaxın-
laşmaqda olan Rusiya – İran təcavüzü əleyhinə Azərbaycanı birləşdirmək siyasəti yeridirdi. Bu
məqsədlə o, ilk növbədə Osmanlı imperiyası ilə əlaqələr yaratmışdı. Qeyd etmək lazımdır ki, bəhs
etdiyimiz dövrdə Rusiya ilə hərbi qarşıdurmaya meyl göstərməyən Osmanlı imperiyası Rusiyanın
Azərbaycan xanlıqları ilə münasibətlərini və özünün bölgədəki mənafeyini diplomatik yolla
tənzimləməyə çalışırdı. Belə ki, Osmanlı sultanlarının tapşırığı ilə Azərbaycanla həmsərhəd olan əya-
lətlərin valiləri Azərbaycan xanlıqlarında baş verən hadisələri diqqətlə izləyir və topladıqları
məlumatları mərkəzə ötürürdülər. Beləliklə, Osmanlı dövləti xanlıqlara və sultanlıqlara parçalanmış
Azərbaycanda baş verən hadisələrlə yaxından tanış idi.
1746-cı ildə Əhməd xanın möhürü ilə Osmanlı vəzirinə göndərilmiş məktubda Şəkidə Hacı Çələbinin
hakimiyyəti ələ keçirməsindən, Nadir şahın onun üzərinə təşkil etdiyi yürüşlərdən və onların
nəticələrindən, Hacı Çələbinin kömək üçün Osmanlı sarayına məktub göndərməsindən bəhs olunur.
Fikrimcə, bu məktub oxucularımız üçün maraqlı olardı. Məktubda göstərilir ki:
“Şəkidə hakimiyyəti ələ almış Hacı Çələbi adı ilə məşhur olan bir şəxs Nadirə qarşı yerli
kəndxudalarla ittifaq bağladı. Nadir şah Şirvana təcavüz etdiyi zaman Hacı Nadirə üstün gəlib
onu məğlub etmişdir. Hacı Çələbi üç dəfə Nadirin qoşunları ilə müharibə edib və Haqq-Təala
həzrətlərinin inayətilə qələbə çalmışdır. Bu gün harada olduğu bilinməyən Nadir şahın təkrar
edəcəyi bir hücum müqabilində bu tərəflərdə olan bütün əsgərlərini götürüb islam əsgərinə qoş-
maq niyyətində olan Hacı Çələbinin məktubunu Sizə göndərmişik. Nadirin vəziyyəti barədə
məlumat almaq üçün göndərilən casuslar hələ geri dönməyib. Bundan sonra da bu ətraflarda hər
hansı bir hadisə baş verərsə, tez bir zamanda rəsmi sənədlə sizə xəbər verərik…”
Göründüyü kimi, bu məktub Şəki xanlığı ilə Osmanlı dövləti arasındakı qarşılıqlı əlaqələrin
başlanma tarixinin dəqiqləşdirilməsi və bəhs olunan dövrdə baş vermiş siyasi hadisələrin gedişinin
öyrənilməsi üçün olduqca əhəmiyyətli ilk mənbədir.
Şəki xanlığı ilə Osmanlı imperiyası arasındakı münasibətlərin araşdırılmasında olduqca əhəmiyyətli
olan digər bir sənəd 1754-cü ildə Hacı Çələbi xanın şəxsən özünün Osmanlı sarayına göndərdiyi
məktubudur. Hacı Çələbi xan göstərilən məktubunda yazırdı:
“Nadir şah saysız-hesabsız əsgərləri ilə Şirvan və Dağıstan mahalını işğal etməklə böyük dağıntılar
törətmişdir. Buraya da ardı-arası kəsilməyən yürüşlər etmiş, doqquz ay mühasirədə saxlamışdı. Lakin
Allah bizə kömək oldu. Nadir şahın ölümündən sonra İranın (indiki Azərbaycan – Q.Ə) müxtəlif
yerlərində xanlıqlar müstəqil fəaliyyət göstərməyə başladı. Osmanlı dövləti hələ qədimdən bəri
ehtiyac olduqda Dağıstan, Şirvan və onun ətrafındakı xanlara hər zaman kömək etmişdir. Gürcü
valiləri haqlı-haqsız varislik iddiasında olub, kafir ruslarla əlbir olaraq, 40-50 min əsgərlə Car-Tala
camaatı üzərinə hücum etmişlər. Car və Tala camaatı ilə bizim mehriban qonşuluğumuz, həm də din
və məzhəb eyniliyimiz var. Buna görə də biz onların imdadına getdik. Vuruşma bir saat yarım çəkdi.
Allahın köməyi ilə müsəlmanlar qələbə çaldı, kafirlər məğlub oldu ”.
Məlum olduğu kimi, Şəki xanlığı ilə qonşu Car-Balakən camaatlıqları arasında mehriban qonşuluq və
sıx dostluq münasibətləri vardı. Belə ki, hələ 1744-cü ildə, Şəki xanlığının yaranmasından çox
keçməmiş, Nadir şah öz qoşunu ilə Şəki xanlığına yürüş edərkən şəkililərin müdafiə olunmaq üçün
sığındığı “Gələrsən-Görərsən” qalasında mühasirədə olan Hacı Çələbinin qoşunu gecələr qaladan
çıxıb şah ordusuna hücumlar edir, ona ağır tələfatlar verirdi. Məhz bu ağır sınaqlar dövründə Car-
Balakən döyüşçüləri şəkililərin köməyinə gəlir, həmin çətin mübarizədə onlara köməklik edirdilər.
Bu birgə mübarizə Nadir qoşunlarının ciddi tələfatına səbəb olmuşdu.
1752-ci ildə gürcü çarları Teymuraz və II İrakli Gəncəyə yürüş etməyi qərara aldılar. Lakin onlar
bilirdilər ki, Şəki və Qarabağ xanları da Gəncəni ələ keçirməyə çalışırlar. Buna görə də II İrakli hiylə
işlədərək vaxtilə Qarabağa hücum etdiyi üçün Hacı Çələbi xandan narazı qalmış Qarabağ xanı Pənah
xanı (1748-1763) öz tərəfinə çəkmək üçün onunla danışıqlara girdi və getdikcə güclənməkdə olan
Şəki xanına qarşı ittifaq bağlamağı təklif etdi. Həmin təkliflə razılaşan Pənah xanla yanaşı bu ittifaqa
Gəncə xanı Şahverdi xan (1747-1760), Qaradağ xanı Kazım xan (1747-1752), İrəvan xanı
Hüseynəli xan və Naxçıvan xanı Heydərqulu xan (1747-1763/64) da qoşuldular. Xanlar II İrakli ilə
görüşüb Hacı Çələbi xana qarşı danışıqlar aparmaq üçün Gəncəyə gələrkən II İraklinin pusquda
durmuş qoşun hissələri qəflətən hücum edərək onları əsir aldı və qollarını qandallayıb Gürcüstana
doğru hərəkətə başladı. II İrakli bu yolla Azərbaycan xanlıqlarını özündən asılı hala salmaq istəyirdi.
Bundan xəbər tutan Hacı Çələbi xan Azərbaycan xanlarını xilas etmək üçün II İraklinin hərbi
qüvvələrini təqib edərək darmadağın etdi. II İrakli tərəfindən xəyanət yolu ilə əsir alınmış
Azərbaycan xanları isə azad olundular. Tarixə bu hadisə “Qızılqaya xəyanəti” kimi düşmüşdür. Bu
hadisə Hacı Çələbi xanın Osmanlı sarayına yazdığı məktubunda belə əks olunmuşdur:
“Kazım xan, Pənah xan Cavanşir, Haqverdi xan, Hüseynəli xan, Nəcəfqulu xan birləşmişdilər. II
İrakli xanların hamısını öz çadırına topladı. Ziyafət əsnasında onları həbs etdi. Sonra Gəncə qalası
üzərinə hərəkət etdi. Biz onların imdadına yetişdik. Səhərdən günortanın sonlarına qədər ox-oxa, top-
topa, misli görünməmiş döyüş oldu. Allahın köməyi ilə müsəlmanlar qələbə çaldı. Bu hadisəni
bilməniz və bundan şad olmanız üçün baş vermiş bu hadisəni şəxsinizə bildirdim. Osmanlı dövləti
daima İslam dini uğrunda çoxlu işlər görüb. Keçən il də mən sizə məktub göndərmişdim. İndi də sizə
şahanə hədiyyələr göndərirəm və sizə dərin təşəkkürümü bildirirəm”.
Hacı Çələbi xan silah işlətmək, qoşunlara başçılıq etməkdən başqa, ona tarix, ədəbiyyat, digər elmlər
barədə müfəssəl məlumat verilmişdi. Şəxsi mütaliəsi sayəsində biliklərini artıran Hacı Çələbi xan
xalq arasında böyük hörmət qazanmışdı. Hacı Çələbi xan 1755-ci ildə Şəkidə vəfat edib və orada
dəfn olunub.
Hacı Çələbi xanın vəfatından sonra Şəki xanlığının sonrakı inkişafı Kərim Ağa Fateh – Kərim ağa
Şəkixanovun “
Şəki xanlarının müxtəsər tarixi
”ndə belə təsvir olunur:
“Hacı Çələbi xan öləndən sonra oğlu Ağakişi bəy də yerində hakim olub. Surxay xanın atası
Məhəmməd xanın qızın alıb, beş il Şəkidə xanlıq edib. Sonra Ağakişi bəy qızını alan Məhəmməd xan,
Qumux xanı qoşun ilə Ərəş mahalına gəlib, Ağakişi bəyə adam göndərər ki, qızımın əri gəlsin,
görüşək. Ağakişi bəy də bir para adam götürüb gedər. Ərəş sultanı Məlik Əliməhəmməd xan ilə sözü
bir olub. Məhəmməd xan tarixi-islamiyyə min yüz yetmiş ikidə olanda Ağakişi bəyi öldürər. Qoşunun
götürər. Noxuya gələr. Hüseyn xan ki, Hacı Çələbinin böyük oğlu Həsən ağanın oğludur, o vaxt cahil
oğlan imiş. Şəki bəylərinin bir parası onu götürüb Şirvan vilayətinə qaçıbdırlar. Məhəmməd xan
Noxuya gəlib, Hacı Çələbinin çox pulun və xəzinəsinin yerini duyubdurlar. Yerdən çıxarıb, Noxuda
Dostları ilə paylaş: |