Q ə r a r Azərbaycan Respublikası adından
Yüklə 0,52 Mb. Pdf görüntüsü
|
15 Həmin Məcəllənin 318.1-ci maddəsinə əsasən, məhkəmə baxışı zamanı cinayət işinə, məhkəməyədək sadələşdirilmiş icraatın materiallarına və ya xüsusi ittiham qaydasında şikayətə yalnız təqsirləndirilən şəxsə qarşı irəli sürülmüş və ya məhkəməyə verilən ittiham daxilində baxılır. Həmin Məcəllənin 349.5.1-ci maddəsinə əsasən, məhkəmənin gəldiyi nəticələr yalnız məhkəmə istintaqında tədqiq edilmiş sübutlara əsaslanmalıdır. «Məhkəmə hökmü haqqında» Azərbaycan Respublikası Ali Məhkəməsi Plenumunun 27 dekabr 1996-cı il tarixli 4 №-li Qərarının 2-ci bəndində qeyd olunur ki, izah edilsin ki, məhkəmənin hökmü yalnız məhkəmə iclasında bilavasitə təhqiq olunan sübutlara əsaslana bilər. Qanunun məzmununa görə, məhkəmə öz nəticələrini şərh edərkən, iş üzrə toplanılan, lakin məhkəmə iclasında təhqiq edilməyən və məhkəmə iclas protokolunda öz əksini tapmayan sübutlara istinad edə bilməz. Müttəhimin, zərərçəkmişin, şahidlərin təhqiqat, ibtidai istintaq və ya başqa məhkəmə iclasında verdikləri ifadələrə o vaxt istinad etmək olar ki, onlar məhkəmə iclasında elan edilməklə yanaşı, başqa sübutlarla müqayisəli şəkildə təhqiq edilmiş olsun. Cinayət işinin materiallarından görünür ki, ibtidai araşdırma zamanı yuxarıda sadalanan sübutların əldə olunması, həmçinin həmin sübutların birinci instansiya məhkəməsi tərəfindən tam, hərtərəfli və obyektiv araşdırılması zamanı hər hansı bir qanun pozuntusuna yol verilməmiş, işə Lənkəran Ağır Cinayətlər Məhkəməsi tərəfindən ağlabatan müddətdə baxılmış, məhkəmə baxışı zamanı yolverilməz sübutlardan istifadə olunmamış, cinayət prosesinin iştirakçıları tərəfindən təqdim edilmiş sübutların tədqiqindən əsassız olaraq imtina edilməmiş və proses iştirakçılarının, o cümlədən məhkum edilmiş şəxslər Məmmədov Ceyhun Məhəmməd oğlu, Məmmədov Aqil Məhəmməd oğlu və Həmidov Əfqan Əli oğlunun Azərbaycan Respublikası CPM-nin 91-ci maddəsində nəzərdə tutulmuş bütün hüquqları tam həcmdə təmin edilmiş və məhkəmə baxışı zamanı hər hansı kobud prosessual qanun pozuntusuna yol verilməmişdir. Həmçinin məhkəmə kollegiyası hesab edir ki, birinci instansiya məhkəməsi tərəfindən cinayət təqibi üzrə toplanmış sübutlar tam, hərtərəfli və obyektiv yoxlanılmış, yoxlama zamanı cinayət təqibi üzrə toplanılmış sübutlar təhlil edilərək, bir-biri ilə müqayisə edilmiş, hər bir sübutun mənsubiyyəti, mümkünlüyü və mötəbərliyi üzrə qiymətləndirilmişdir. Azərbaycan Respublikası Konstitusiya Məhkəməsinin Plenumunun «Azərbaycan Respublikası Cinayət Məcəlləsinin 244.1-ci maddəsinin şərh edilməsinə dair» 17 mart 2011-ci il tarixli Qərarında qeyd edilmişdir ki, cinayətin tövsifi törədilən konkret cinayət əməlinin cəhətləri ilə cinayət-hüquq normasının dispozisiyasında nəzərdə tutulan tərkib əlamətləri arasında uyğunluğu müəyyən etməklə, müvafiq prosessual sənəddə öz əksini tapan və cinayət-hüquqi nəticələrə səbəb olan əmələ verilən cinayət hüquqi qiymətdir. Beləliklə, məhkəmə kollegiyası hesab edir ki, cinayət hadisəsi baş vermişdir və Məmmədov Ceyhun Məhəmməd oğlunun əməllərində Azərbaycan Respublikası CM-nin 126.2.4, 221.3-cü maddələri, Məmmədov Aqil Məhəmməd oğlu və Həmidov Əfqan Əli oğlunun əməllərində isə CM-nin 221.3-cü maddəsinin tərkib əlamətləri vardır. İbtidai istintaq orqanı və birinci instansiya məhkəməsi tərəfindən C.M.Məmmədovun əməlləri Azərbaycan Respublikası CM-nin 126.2.4, 221.3-cü maddələri, A.M.Məmmədov və Ə.Ə.Həmidovun əməlləri isə CM-nin 221.3-cü maddəsi ilə düzgün tövsif olunmuşdur. Məhkum edilmiş şəxslər Ceyhun Məmmədov, Aqil Məmmədov və Əfqan Həmidova birinci instansiya məhkəməsi tərəfindən təyin edilmiş cəzaların cinayətin ağırlığına və məhkum edilmiş şəxslərin şəxsiyyətlərinə uyğun olub-olmaması məsələsini də müzakirə edərək, məhkəmə kollegiyası hesab edir ki, birinci instansiya məhkəməsi bu məsələnin həlli zamanı Azərbaycan Respublikasının Cinayət Məcəlləsinin 58-ci maddəsinin tələblərinə əməl etməklə, törədilmiş cinayətin xarakterini və ictimai təhlükəlilik dərəcəsini, təqsirkar şəxsin şəxsiyyətini, habelə cəzanı yüngülləşdirən və ağırlaşdıran halları nəzərə almış, Cinayət Məcəlləsinin 41.2-ci maddəsinin tələblərinə uyğun qanuni və ədalətli cəza təyin etmişdir. Belə ki, iş materiallarında olan, Kürdəmir Rayon Məhkəməsinin 19 avqust 2015-ci il tarixli qərarından görünür ki, həmin qərara əsasən Məmmədov Ceyhun Məhəmməd oğlunun barəsində həbs qətimkan tədbiri seçilmişdir.
16 İş materiallarında olan, hüquqi sənədlərdən görünür ki, təqsirləndirilən şəxslər Aqil Məmmədov Kürdəmir rayonunun Şıxımlı kəndində qeydiyyatda olmaqla həmin kənddə yaşayır. O, yaşayış yerindən müsbət səciyyələndirilir. Himayəsində 2 nəfər azyaşlı uşaqları vardır. İş materiallarından görünür ki, təqsirləndirilən şəxs Ceyhun Məmmədovun da himayəsində 2 nəfər azyaşlı uşaqları vardır. İş materiallarından görünür ki, iş üzrə zərərçəkmiş şəxs Vüsal Qurbanovun təqsirləndirilən şəxslərdən heç bir tələb və şikayəti yoxdur. İş materiallarında olan, Azərbaycan Respublikası Daxili İşlər Nazirliyinin BƏSİİ-nin məlumatlarından və işə əlavə edilmiş hökmlərin surətlərindən görünür ki, təqsirləndirilən şəxs Məmmədov Ceyhun Məhəmməd oğlu Kürdəmir rayon məhkəməsinin 05 sentyabr 2006-cı il tarixli hökmünə əsasən CM-nin 128-ci maddəsi ilə təqsirli bilinib 200 manat cərimə cəzasına məhkum edilmiş, 21 may 2007-ci il tarixli amnistiya aktına əsasən o həmin cəzadan azad edilmişdir. Lənkəran Ağır Cinayətlər Məhkəməsinin 19.09.2011-ci il tarixli hökmünə əsasən CM-nin 29,149.1-ci maddəsi ilə təqsirli bilinib 4 il 6 ay müddətinə azadlıqdan məhrum etmə cəzasına məhkum edilmişdir. İş materiallarında olan, Azərbaycan Respublikası ƏN-nin Penitensiar Xidmətinin 4 saylı Məntəqə Tipli Cəza Çəkmə Müəsisəsinin məktubundan görünür ki, Nərimanov Rayon Məhkəməsinin 03 oktyabr 2014-cü il tarixli qərarına əsasən Ceyhun Məmmədova təyin edilmiş rejim dəyişdirilərək cəza çəkməsindən ötrü qeyd edilən müəssisəyə göndərilmişdir. İş materiallarından görünür ki, təqsirləndirilən şəxs Məmmədov Aqil Məhəmməd oğlu Kürdəmir Rayon Məhkəməsinin 09 iyul 2004-cü il tarixli hökmünə əsasən CM-nin 177.2.1-ci maddəsi ilə təqsirli bilinərək 3 il müddətə azadlıqdam məhrum etmə cəzasına məhkum edilmişdir. Kürdəmir Rayon Məhkəməsinin 02 dekabr 2008-ci il tarixli hökmünə əsasən CM-nin 150.1 və 152-ci maddələri ilə təqsirli bilinib CM-nin 66.3-cü maddəsinin tələbinə əsasən cəzalar qismən toplanılmaqla o, 05 il müddətə azadlıqdan məhrumetmə cəzasına məhkum edilmiş, Şirvan Apelyasiya məhkəməsinin 11.03.2009-cu il tarxli qərarına əsasən onun cəzası 4 ilə endirilmiş, 07.08.2012-ci il tarixdə cəzasını çəkib qurtarmışdır. İş materiallarından görünür ki, təqsirləndirilən şəxs Həmidov Əfqan Əli oğlu əvvəllər məhkum edilməmişdir. İş materiallarında olan, hüquqi sənədlərdən görünür ki, təqsirləndirilən şəxs Əfqan Həmidov Kürdəmir rayonunun Şıxımlı kəndində qeydiyyatda olmaqla həmin kənddə yaşayır. Yaşayış yerindən müsbət səciyyələndirilir. Himayəsində 2 nəfər azyaşlı uşaqları vardır. İş materiallarında olan, əlillik haqqında vəsiqənin surətindən və xəstəlik tarixlərindən görünür ki, təqsirləndirilən şəxs Əfqan Həmidovun arvadı Ruhiyyə Həmidova II qrup ümumi xəstəlik əlilidir. Habelə birinci instansiya məhkəməsinin hökmündən görünür ki, məhkəmə təqsirləndirilən şəxslər Məmmədov Ceyhun Məhəmməd oğlu, Məmmədov Aqil Məhəmməd oğlu və Həmidov Əfqan Əli oğluna törətdikləri cinayətlərə görə cəza təyin edərkən hər birinin himayəsində azyaşlı uşaqlarının olmasını və zərərçəkmiş şəxsin onlardan heç bir şikayət və tələbinin olmamasını Azərbaycan Respublikası CM-nin 59.1-ci maddəsinə əsasən onların cəzalarını yüngülləşdirən hallar, eyni zamanda təqsirləndirilən şəxs Əfqan Həmidovun arvadı Ruhiyyə Həmidovanın II qrup əlil olmaqla onun ailədə yeganə qazanc gətirən olmasını CM-nin 59.2-ci maddəsinə əsasən Ə.Ə.Həmidovun cəzasını yüngülləşdirən hal kimi, Aqil Məmmədovun əməlində cinayətlərin residivi, Ceyhun Məmmədovun əməlində isə cinayətlərin təhlükəli residivinin olmasını isə onların cəzalarını ağırlaşdıran hal kimi nəzərə almışdır. Azərbaycan Respublikası CM-nin 58.1-ci maddəsinə əsasən, cinayət törətməkdə təqsirli bilinən şəxsə, bu Məcəllənin Ümumi hissəsinin müddəaları nəzərə alınmaqla Xüsusi hissəsinin müvafiq maddələrində nəzərdə tutulmuş hədlərdə ədalətli cəza təyin edilir. Törədilmiş cinayətə görə nəzərdə tutulmuş cəzalardan daha ciddi cəza növü yalnız o halda təyin edilir ki, az ciddi cəza növü cəzanın məqsədlərini təmin edə bilmir. Həmin Məcəllənin 58.3-cü maddəsinə əsasən, cəza təyin edilərkən cinayətin xarakteri və ictimai təhlükəlilik dərəcəsi, təqsirkarın şəxsiyyəti, o cümlədən cəzanı yüngülləşdirən və ağırlaşdıran hallar, habelə təyin olunmuş cəzanın şəxsin islah olunmasına və onun ailəsinin həyat şəraitinə təsiri nəzərə alınır.
Yüklə 0,52 Mb. Dostları ilə paylaş:
|