55
türrə (tərrar) – başın ön tərəfindən sallanan qıvrım tellərə
deyilir. Qıvrım olduğuna görə əyri, dolanbac yola işarədir. Aşiq
həqiqət yolunda bu cür əyri və dolanbac gedişatlarda aza bilər.
Camal sifətinin əlamətlərindən hesab olunur.
üz (ruxsar) – vəhdətə və Haqqın camal sifətinə işarədir.
Gözəlliyin başlıca əlamətləri üzdə cəmləşir və buna görə də
ilahinin hüsn sifətinin simvolu, həmçinin işıq və paklıq məzhəri
kimi işlədilir. Hətta bəzən Müshəfə (Quran), Günəşə, Aya və s.
də bənzədilir.
saç (zülf) – gecə, qaranlıq, zülmət, küfr, kəsrət, dünyəvi
həvəs, maddi dünya və s.-in rəmzidir. Saçın çoxluğu kəsrətə,
qaralığı zərrənin və bəndənin vəhdət aləmindən ayrılıb «şəbi-
hicran»a, aşiqə zülmət olan surətlər aləminə düşməsinə, saçın
əyriliyi maddi dünyanın əyri işlərinə bənzədilir. Zülfün əsiri
olmaq maddi dünyanın əsiri olmaqdır. Üz gözəldir və Haqqın
gözəlliyinin təcəllisidir. Saç üzə töküldükdə üzü, Haqqın
hüsnünün nişanəsini gizlədir. Deməli, zülf məşuqla aşiq
arasındakı hicabdir. Üz Haqqın lütf, saç isə qəhr sifətinə
işarədir. Saç bəzən ruhların məskəni anlamında da işlədilir.
xal – həqiqi vəhdət nöqtəsi. Tanrı zatının yeganəliyi və bü-
tövlüyü. Hər şey: varlıq və xilqət bu bütövlüyə – mərkəzi nöq-
təyə bağlıdır. Xal Qeyb və Şəhadət aləminin vahid timsalı kimi
həmin nöqtəyə bənzədilir.
xətt – Haqqın vəchinin, yəni üz və mahiyyətinin gerçəklik
aləmində təzahürü və Haqqın camalının təcəllisi xətt adlanır.
Xətt həm də Tanrının hüsn və camalının üzdəki incəliklərinin
simvoludur. Xətt adətən vəhdətin kəsrətdə təzahürü və ilahi
varlığın əzəmətinə yaxınlıq mərtəbəsi kimi də dəyərləndirilir.
çillə – mürid və salikin irşad yolunun müəyyən mərhələ-
sində sınaq, Haqq və mürşid qarşısında imtahan üçün xəlvətə
çəkilərək həyata keçirməli olduğu əməllər və bu əməllərin icra
müddəti çillə adlanır. Aclıq, yuxusuzluq, sükut, uzlət, riyazət,
nəfsi arzulardan tamamilə əl çəkmək və s. də buraya daxildir.
Çillə, əsasən, 40 gün çəkir və müridin Haqq yolundakı çətinlik-
56
lərə dözmə bacarığını və daxili işıqlanmada nail olduğu mərtə-
bəni üzə çıxarır.
şam – irfan nuru, Haqq yolçusunun qəlbində yanan ilahi
eşq və həqiqət işığıdır ki, onu doğru yola sövq edir, həqiqətlər
bu işıqda görünməyə başlayır.
şahid – Tanrı həqiqətinin qəlb gözü ilə müşahidəsi; Haqqı
Haqq ilə görmək; qayib olanı göstərən batini dəlil. Haqqın
təcəllisi və müşahidəsi zamanı qəlbdə zühur edib qərarlaşan
hal.
Təsəvvüf və söz sənəti. Təsəvvüf bütün orta əsrlər boyunca
islam şərqində nizamlı və mükəmməl mənəvi-əxlaqi davranış
normaları, bitkin, yetkin və bütöv dini-fəlsəfi etiqad sistemi
olaraq qalmadı. O, sənətin müxtəlif sahələrinin (musiqi, rəqs,
rəssamlıq və s.), xüsusilə də, söz sənətinin yüksəlişinə rəvac
verən ciddi stimul rolunu oynadı. Mübaliğəsiz demək olar ki,
islam şərqində orta əsrlər dövrünün nəhəng, əzəmətli, zəngin,
bəşər poetik təfəkkürünün şedevrlərini təşkil edən nümunələ-
rinin, böyük bir hissəsi öz rişəsini təsəvvüf və irfan düşüncə-
sindən alır. Bu düşüncə və ideyalar orta yüzilliklər islam alə-
mində bir çox nəhəng ədəbi simaların yaradıcılığına qida verən
elə mühüm mənbə rolunu oynamışdır ki, həmin faktor olmadan
bu sənətkarları bir ədəbiyyat xadimi kimi düşünmək belə müm-
kün deyil. Beləliklə, sufizm orta əsrlərdə dərin məzmun, ideya
və mündəricəyə malik təriqət ədəbiyyatının yaranmasına sə-
bəb olmuşdur. Hansı ki, həmin ədəbiyyatı orta yüzilliklər ədəbi
meydanının məhsulları içərisindən götürsək, meydan çox yox-
sul, bəsit və miskin görünər. Bu fikirlər eynilə Azərbaycan ədə-
biyyatına da aiddir.
Sufizm ideyalarının bədii ədəbiyyatda ilkin təzahürü VIII-
IX əsrlərə aiddir. Bu dini-fəlsəfi görüşün özü təkmilləşdikcə,
zənginləşdikcə və mükümməl sistem halına gəldikcə onun söz
sənətinə təsir imkanları da artır. Artıq XII-XIII yüzilliklərdə
təriqət ədəbiyyatının Fəridəddin Əttar, Sənai Qəznəvi, Əh-
məd Yasəvi, Cəlaləddin Rumi, Yunis Əmrə və s. kimi əzə-
57
mətli simaları yetişir. Sonrakı dövrlərdə də Sədi Şirazi, Hafiz
Şirazi, Əbdürrəhman Cami və s. şərq klassiklərinin yaradıcı-
lığında təriqət meyllərinin ciddi təzahürünü görürük.
Azərbaycan ədəbiyyatında da buna bənzər mənzərə ilə rast-
laşırıq. XII əsr şairlərimizin (Nizami, Xaqani və s.) yaradıcılı-
ğında sufizm meyllərinin ötəri də olsa, müəyyən təzahürləri
özünü büruzə verir. XIII əsrdən etibarən bu meyl güclənir və
sonrakı yüzilliklər boyunca əhatəli şəkildə davam edir. XIII-
XIV əsrlərdə İ.Həsənoğlu, M.Şəbüstəri, Z.Şirvani, M.Əhvə-
di, Ə.Təbrizi, İ.Nəsimi və s., XV-XVI yüzilliklərdə isə
Q.Ən-
var, Xəlili, Kişvəri, İ.Gülşəni, Həbibi, Xətai, Füzuli və s.
sənətkarlarımızın yaradıcılığında təriqət ideyaları özünün ciddi
bədii əksini tapır. XVII-XVIII əsrlərdə bu meyl xeyli dərəcədə
öləzisə də, öz ömrünü davam etdirir. Ümumiyyətlə, bu dövrün
böyük ədəbi şəxsiyyətləri sufizmə öz sələfləri ilə müqayisədə
az meyl göstərmişlər.
Bəs təsəvvüf ideyalarının ədəbiyyata gəlişinin, bu dini-fəl-
səfi sistemin söz sənəti ilə çox tez, həm də asanlıqla qaynayıb
qovuşmasının səbəbi nə idi?
Əvvələn, onlarla və yüzlərlə sadə, zəngin olmayan insanı
ətrafına toplayan xanəgahlarda mürşidin, şeyxin bir qədər quru,
soyuq görünən buyruq, göstəriş və nəsihətlərinə canlılıq, qay-
narlıq, təravət, təsiredici emosional çalar gətirmək daha səmə-
rəli ola bilərdi. Bunun yolu isə, təbii ki, sənət meydanından
keçirdi. Elə buna görə də çox keçmədən xanəgah icmalarının
bir çoxunda musiqi (səma), rəqs, xüsusilə də şeirlərdən, ilahi
və nəfəs kimi poetik nümunələrdən istifadə olunmağa
başlanıldı. Təsəvvüflə sənətin bu ilkin çulğaşmasından sonra
zaman-zaman xanəgah və sufi icmalarından kənar məkanlar,
məqamlar, dinləyicilər və oxucular üçün də həmin ideyaları
təlqin və təbliğ edən poeziya örnəkləri yarandı. Bunların kə-
miyyəti artıb kütləviləşdi və nəhayət, bədii ədəbiyyatın ayrıca
bir qoluna çevrildi.
58
İkinci tərəfdən, sufilər və ariflər islam peyğəmbərinin
«Al-
lah gözəldir və gözəlliyi sevər» hədisini bir həyat və fəaliyyət
şüarına çevirmişdilər. Onlar xanəgahları gözəl şəkildə bəzəyir,
gözəl geyinir, gözəl danışmağa və davranmağa çalışırdılar. Bu
isə xanəgah həyatına bir bədii-estetik ruh aşılayırdı. Gözəl mu-
siqi,
rəqs və
şeir isə bu fəaliyyəti bədii-estetik yönümdə ta-
mamlayırdı.
Üçüncüsü isə, təsəvvüfün işlədiyi məslək və məram, ide-
yalar, salikin və arifin keçirdiyi batini duyğular, irfani təfəkkür
tərzi, buradakı zəngin obrazlar, rəmzlər, Tanrı-bəndə, bəndə və
eşq münasibətləri və s. poeziya üçün zəngin material verirdi.
Elə buna görə də bəşər tarixində heç bir dini-fəlsəfi inanc
sistemi bədii
ədəbiyyatla təsəvvüf qədər qaynayıb
qovuşmamışdır.
Təriqət ədəbiyyatını yaradanların özləri də mənsubiyyətinə
görə müxtəlifdir. Onların bir qismi bilavasitə təriqət
başçılarıdır. Məsələn,
Ə.Yəsəvi (yəsəvilik),
C.Rumi
(mövləvilik) və S.Ərdəbili (səfəviyyə) kimi. Bəziləri isə ayrıca
təriqət yaratmasalar da, müəyyən təriqətin üzvü, hətta şeyx
olmuşlar. Məsələn, İ.Həsənoğlu, M.Əvhədi, Ş.İ.Xətai və s. ki-
mi. Üçüncü bir qism şairlər isə konkret olaraq hər hansı bir
təriqətə mənsub olmamış, lakin yaradıcılıqlarında təsəvvüf və
irfan ideyalarını bu və ya digər dərəcədə əks etdirmiş, onun
obraz və rəmzlərindən bəhrələnmişlər. Məsələn, M.Füzuli kimi.
Burada bir cəhəti də nəzərə almaq lazımdır. Təriqət əhli
müəyyən təriqətə mənsub olmayan şairləri heç vaxt özlərindən
saymamış, kənar şairləri özlərininkindən fərqləndirməkdən ötrü
öz şairlərinə «aşiq» və ya «aşıq» adı vermişlər.
2. Hürufizm
Azərbaycanın orta əsrlər ictimai, dini-fəlsəfi və ədəbi-mə-
dəni gerçəkliyində sufizmdən sonra öz əksini tapan ikinci bir
təriqət cərəyanı da hürufilikdir. Doğrudur, sufizm ideyaları